“Geografik obyektlarning nomlari toʻgʻrisida”gi Oʻzbekiston Respublikasi qonuni, Oʻzbekiston Respublikasi Vazirlar Mahkamasining “Geografik obyektlarning nomlari toʻgʻrisidagi Oʻzbekiston Respublikasi qonuniga muvofiq geografik obyektlarning nomlari sohasidagi ishlarni tartibga solish chora-tadbirlari haqida” 2012-yil 16-oktabrdagi 295-sonli qaroriga, Oʻzbekiston Respublikasi Iqtisodiyot va moliya vazirligi huzuridagi Kadastr agentligining 2025-yil 4-iyuldagi 03/08-7367-sonli xatiga ilova qilingan Ekspert komissiyasining 2025-yil 2-iyuldagi 05-19-10852-son xulosasiga asosan, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 24-moddasini qoʻllab, xalq deputatlari Qoʻqon shahar Kengashi, qaror qiladi:

1. “Geografik obyektlarning nomlari toʻgʻrisida”gi Oʻzbekiston Respublikasi qonuni hamda Oʻzbekiston Respublikasi Vazirlar Mahkamasining “Geografik obyektlarning nomlari toʻgʻrisidagi Oʻzbekiston Respublikasi qonuniga muvofiq geografik obyektlarning nomlari sohasidagi ishlarni tartibga solish chora-tadbirlari haqida” 2012-yil 16-oktabrdagi 295-sonli qaroriga muvofiq Qoʻqon shahar Geografik obyektlarni nomlash va qayta nomlash masalalari boʻyicha komissiyasining amalga oshirilgan ishlari toʻgʻrisidagi Qoʻqon shahar hokimining maslahatchisi D.Alimovaning axboroti maʼlumot uchun qabul qilinsin.

2. Qoʻqon shahar komissiyasi tomonidan geografik obyektlarni qayta nomlash boʻyicha taqdim etilgan hamda qonun talablariga muvofiq deb topilgan geografik obyekt (ziyoratgoh) nomlari 1-ilovaga asosan tasdiqlansin, shuningdek, belgilangan tartibda davlat reyestri bazasiga kiritilsin.

3. Qoʻqon shahar hokimligi Axborot xizmati (U.Norboyev), “Qoʻqon sadosi” gazetasi bosh muharriri (A.Mirsaidov)larga ushbu qarorni keng ommaga yetkazish tavsiya etilsin.

4. Belgilansinki, ushbu qaror ommaviy axborot vositalarida rasmiy eʼlon qilingan kundan boshlab kuchga kiradi.

5.Mazkur qaror bajarilishiga shahar hokimining oʻrinbosari A.Sulaymonov, Kadastrlar palatasi Qoʻqon shahar filiali rahbari B.Erkabayevlar shaxsan masʼul ekanligi belgilab qoʻyilsin.

6. Ushbu qaror bajarilishining nazorati Xalq deputatlari Qoʻqon shahar Kengashining Taʼlim, sogʻlikni saqlash, madaniyat, sport va ijtimoiy himoya boʻyicha doimiy komissiya raisi Oʻ.Tojiyeva hamda Qoʻqon shahar hokimining maslahatchisi D.Alimovalar zimmasiga yuklansin.