“Mahalliy davlat hokimiyati toʻgʻrisida”gi qonunning 6 va 24-moddalariga asosan Oʻzbekiston Respublikasi Prezidentining 2020-yil 29-sentabrdagi “Maishiy va qurilish chiqindilari bilan bogʻliq ishlarni boshqarish tizimini yanada takomillashtirish chora-tadbirlari toʻgʻrisida”gi PQ-4845-sonli qarori, 2024-yil 4-yanvardagi “Chiqindilarni boshqarish tizimini takomillashtirish va ularning ekologik salbiy taʼsirini kamaytirish boʻyicha chora-tadbirlari toʻgʻrisida”gi PF-5-sonli Farmoni, 2024-yil 26-sentabrdagi “Ekologiya va atrof-muhitni muhofaza qilish sohalarida ochiqlikni taʼminlash hamda boshqarish tizimini yanada takomillashtirish chora-tadbirlari toʻgʻrisida”gi PF-149-sonli Farmoni hamda Vazirlar Mahkamasi Rayosati majlisining 2023-yil 24-iyundagi 51-sonli bayoni 20-bandi ijrosini taʼminlash maqsadida, Xalq deputatlari Sirdaryo viloyati Kengashi qaror qiladi:

1. Viloyat hokimligining 2025-yil 5-avgustdagi 4/04-7201-sonli, viloyat Iqtisodiyot va moliya bosh boshqarmasining 2025-yil 21-maydagi 04/17/38-384-sonli, Chiqindilarni boshqarish va sirkulyar iqtisodiyotni rivojlantirish Agentligi Sirdaryo viloyati boshqarmasining 2025-yil 24-iyundagi 445-sonli murojaati qanoatlantirilsin hamda hududlarda maishiy chiqindilarni toʻplash va olib chiqib ketish boʻyicha xizmat koʻrsatish uchun majburiy toʻlov tariflari (xizmat koʻrsatuvchi tashkilotlar tomonidan kelishilgan narxlarda amalga oshiriladigan alohida xizmatlar uchun toʻlovlar bundan mustasno) narxlarni (tariflarni) tartibga solish organlari xulosalari olinganligi inobatga olinsin va ushbu qaror loyihasi normativ-huquqiy hujjatlar loyihalari muhokamasi portalida muhokamadan oʻtganligi maʼlumot uchun qabul qilinsin.

2. Chiqindilarni boshqarish va sirkulyar iqtisodiyotni rivojlantirish Agentligi Sirdaryo viloyati boshqarmasining qattiq maishiy chiqindilarni olib chiqib ketish jismoniy shaxslar uchun 5 552 (besh ming besh yuz ellik ikki) (QQS siz) soʻm, yuridik tashkilotlarga 1 m³ uchun 95 171 (toʻqson besh ming bir yuz yetmish bir) (QQS siz) soʻm va suyuq maishiy chiqindilarni olib chiqib ketilganligi boʻyicha 1 tonna uchun 55 666 (ellik besh ming olti yuz oltmish olti) (QQS siz) soʻm majburiy toʻlovlarning cheklangan tariflari tasdiqlansin.

3. Mazkur qaror ijrosinin taʼminlashda Chiqindilarni boshqarish va sirkulyar iqtisodiyotni rivojlantirish Agentligi Sirdaryo viloyati boshqarmasi S.Mamatovga:

maishiy chiqindi xizmatlari tariflari koʻrib chiqilganligi va natijasi yuzasidan Agentlikka axborot taqdim qilish zimmasiga yuklatilsin.

4. Mazkur qarorni nazorat qilish Xalq deputatlari viloyat Kengashi Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiya raisi A.Bobobekov zimmasiga yuklatilsin.

5. Ushbu qaror bilan belgilangan majburiy toʻlovlar yuridik tashkilotlar uchun 3 (uch) oydan keyin, jismoniy shaxslar uchun qabul qilingan kundan eʼtiboran kuchga kiradi.