2024-yil 3-chorak yakuni boʻyicha Qorakoʻl tuman mahalliy budjeti daromadlari 24,3 mlrd.soʻmni tashkil etdi.

Shundan, soliq turlari kesimida:

- aylanmadan olinadigan soliq boʻyicha 2 590,0 mln.soʻm;

- jismoniy shaxslardan olinadigan daromad soliq boʻyicha 8 118,9 mln.soʻm;

- yakka tartibdagi tadbirkorlar uchun qatʼiy belgilangan soliq boʻyicha 355,4 mln.soʻm;

- yuridik shaxslarning mol-mulkiga solinadigan soliq boʻyicha 380,8 mln.soʻm;

- jismoniy shaxslarning yer va mol mulkiga solinadigan soliq boʻyicha 9 984,9 mln.soʻm;

- suv resurslaridan foydalanganlik uchun soliq boʻyicha 757,4 mln.soʻm;

- davlat boji boʻyicha 1 371,6 mln.soʻm va boshqa mahalliy budjet tushumlari boʻyicha 749,9 mln.soʻm mablagʻlar 2024-yilning 3-choragida mahalliy budjetga tushirildi.

Oʻz navbatida, mahalliy budjet xarajatlari 2024-yilning toʻqqiz oyligida 197,4 mlrd.soʻmni tashkil qilgan boʻlib, ushbu mablagʻlarning 67,7 foizi, yaʼni 133,5 mlrd.soʻm miqdori tumanda ijtimoiy soha va aholini ijtimoiy qoʻllab- quvvatlash xarajatlariga sarflandi.

Jumladan, 2024-yilning toʻqqiz oyligida tuman ijtimoiy soha tashkilotlari xarajatlari (ish haqi va unga tenglashtirilgan toʻlovlar, dori- darmon va oziq-ovqat mahsulotlari bilan taʼminlash xarajatlari, qurilish- taʼmirlash va jihozlash va boshqa xarajatlar)ga quyidagi miqdorda mablagʻlar yoʻnaltirilgan:

- maktabgacha va maktab taʼlimi sohasiga 34,4 mlrd.soʻm;

- sogʻliqni saqlash sohasiga 82,9 mlrd.soʻm;

- boshqa ijtimoiy soha tashkilotlari (madaniyat, sport va boshqalar) tomonidan 16,2 mlrd.soʻm miqdordagi xarajatlar amalga oshirildi.

Umumiy xarajatlarning 10,7 foizi iqtisodiy sohani rivojlantirishga, 11,7 foizi davlat boshqaruvi organlarining (ish haqi, saqlash va boshqa) xarajatlariga, 0,9 foizi Fuqarolarning oʻzini-oʻzi boshqarish organlari xarajatlariga, 9,1 foizi “Fuqarolar tashabbusi” jamgʻarmasiga yoʻnaltirildi.

2024-yilning toʻqqiz oyligida mahalliy budjetda koʻzda tutilgan birinchi darajali toʻlovlar oʻz vaqtida va toʻliq moliyalashtirildi.

Bugungi kunda tuman iqtisodiyot va moliya boʻlimi tomonidan tuman hokimligi va tegishli tashkilotlar bilan birgalikda tuman mahalliy budjetining barqarorligini taʼminlash hamda mahalliy budjetdan birinchi darajali toʻlovlarni oʻz vaqtida va toʻliq moliyalashtirish yuzasidan tegishli chora- tadbirlar amalga oshirilmoqda.

Tuman mahalliy budjetining daromadlari va xarajatlari rejasiga tegishli oʻzgartirishlar hamda yuqori budjetdan maqsadli tadbirlar uchun qoʻshimcha ajratilgan mablagʻlar toʻliq hisobga olinmoqda hamda Oʻzbekiston Respublikasi Budjet kodeksining 27, 28, 147, va 148-moddalariga asosan tuman mahalliy budjetining ijrosini taʼminlash, budjetda koʻzda tutilgan xarajatlarni belgilangan tartibda va oʻz vaqtida amalga oshirish maqsadida tuman mahalliy budjetining 2024-yilning toʻqqiz oyligi xarajatlari va daromadlariga tegishli oʻzgartirishlar kiritildi.

Kun tartibidagi masala yuzasidan yuqorida bayon etilganlarga, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6 va 24-moddalariga hamda Oʻzbekiston Respublikasi Budjet kodeksining 27 va 126- moddalariga asoslanib, xalq deputatlari tuman Kengashi qaror qiladi:

1. Qorakoʻl tuman mahalliy budjetining 2024-yilning 3-chorak yakunlariga koʻra ijrosi hamda ushbu davrda budjet parametrlariga kiritilgan oʻzgarishlar toʻgʻrisidagi tuman iqtisodiyot va moliya boʻlimi boshligʻi A.Norboyevning hisoboti hamda daromadlar va xarajatlar boʻyicha asosiy koʻrsatkichlari 1-2-ilovalarga muvofiq tasdiqlansin.

2. 2024-yilning 3-chorak yakuni boʻyicha Qorakoʻl tuman mahalliy budjeti daromadlari 24,3 mlrd.soʻmni hamda mahalliy budjetdan amalga oshirilgan xarajatlar 197,4 mlrd.soʻmni tashkil etganligi, shuningdek, ushbu daromad va xarajat oʻrtasidagi farq yuqori turuvchi budjetdan quyi turuvchi budjetga ajratilgan transfertlardan qoplanganligi inobatga olinsin.

3. Oʻzbekiston Respublikasi Budjet kodeksining 147-148-moddalariga asosan tuman mahalliy budjetining ijrosini taʼminlash, budjetda koʻzda tutilgan xarajatlarni belgilangan tartibda va oʻz vaqtida amalga oshirish maqsadida Qorakoʻl tuman mahalliy budjetining 2024-yil 3-chorak yakunlari boʻyicha xarajatlari hamda 3-chorak daromad rejasining prognoz koʻrsatkichlari doirasida kiritilgan tegishli oʻzgartirishlar 3-4-ilovalarga muvofiq tasdiqlansin.

4. Oʻzbekiston Respublikasi Budjet kodeksining 148-moddasiga asosan 2024-yil tasdiqlangan budjet parametrlariga favqulotda hamda kechiktirib boʻlmaydigan xarajatlarni amalga oshirish zarurati tugʻilganda, budjet tashkilotlarining soʻroviga asosan, budjet tashkilotlarini saqlash bilan bogʻliq va boshqa zaruriy va kechiktirib boʻlmaydigan xarajatlarni amalga oshirish tuman iqtisodiyot va moliya boʻlimi tomonidan amalga oshirilishi inobatga olinsin hamda amalga oshirilgan oʻzgartirishlar toʻgʻrisida tuman iqtisodiyot va moliya boʻlimi (A.Norboyev) chorak yakuni bilan tuman xalq deputatlari Kengashiga hisobot kiritib borsin.

5. Tuman soliq inspeksiyasi (SH.Xasanov) hamda tuman iqtisodiyot va moliya boʻlimi (A.Norboyev)ga:

2024-yil uchun belgilangan daromadlar prognoz reja koʻrsatkichlarini choraklar va oylar kesimida barcha soliq turlari boʻyicha toʻliq bajarilishini taʼminlash;

budjet daromadlari bazasini kengaytirish hamda mahalliy budjetga qoʻshimcha soliq tushirish manbalarini aniqlash va mavjud imkoniyatlardan samarali foydalanish;

mahalliy budjet parametrlarida koʻzda tutilgan xarajatlarni, xususan birinchi darajali toʻlovlarni oʻz vaqtida moliyalashtirilishini taʼminlash topshirilsin.

6. Tuman hokimining birinchi oʻrinbosari S.Husenov, tuman iqtisodiyot va moliya boʻlimi (A.Norboyev), tuman soliq inspeksiyasi (SH.Xasanov), xalq deputatlari tuman Kengashining doimiy komissiyalari bilan birgalikda:

- tumanda 2024 yilda budjet mablagʻlaridan samarali foydalanilishi ustidan qatʼiy nazorat oʻrnatish hamda erishilgan natijalar boʻyicha hisobotlarini belgilangan tartibda tuman Kengashiga kiritilishini taʼminlash;

- soliqlar va majburiy toʻlovlarning aniq turlarini ularga biriktirib qoʻyish orqali mahalliy budjetning daromad bazasini tubdan mustahkamlash;

- mahalliy budjetning daromadlarini oshirish uchun tizimli ravishda qoʻshimcha rezervlarni muntazam aniqlab borish;

- tegishli doimiy komissiyalar bilan birgalikda deputatlik va jamoat nazoratini keng jalb qilgan holda, mahalliy budjetni shakllantirishning shaffofligini va uning bajarilishi ustidan tizimli nazoratni oʻrnatish;

- mahalliy budjet daromadlar bazasini mustahkamlash hamda xarajatlarning tasdiqlangan parametrlarini oʻz vaqtida, maqsadli moliyalashtirish, ijtimoiy soha obyektlari va infratuzilmani yanada rivojlantirish va tegishli darajada saqlab turishni taʼminlash ustidan mahalliy davlat hokimiyati organi, moliya va soliq organlarining masʼuliyatini oshirish va javobgarligini kuchaytirish;

- budjet mablagʻlaridan maqsadli va samarali foydalanilishi hamda budjet intizomiga rioya etilishi ustidan nazorat oʻrnatish topshirilsin.

7. Tuman hokimligi Axborot xizmati (SH.Hamroyev) tuman iqtisodiyot va moliya boʻlimi (A.Norboyev) bilan birgalikda Qorakoʻl tuman mahalliy budjetining 2024 yil 3-chorak yakunlari boʻyicha ijrosi toʻgʻrisidagi maʼlumotlarni tuman hokimligining rasmiy veb-saytiga joylashtirilishini taʼminlasin.

8. Mazkur qaror huquqiy ekspertizadan oʻtkazish uchun tuman adliya boʻlimiga kiritilsin.

9. Mazkur qarorning bajarilishini nazorat qilish xalq deputatlari tuman Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi zimmasiga yuklatilsin.

10. Mazkur qaror qabul qilingan kundan eʼtiboran kuchga kiradi.