Oʻzbekiston Respublikasining “Geografik obyektlarning nomlari toʻgʻrisida”gi Qonuni, Oʻzbekiston Respublikasi Vazirlar Mahkamasining 2012-yil 16-oktabrdagi “Geografik obyektlarning nomlari toʻgʻrisida”gi Oʻzbekiston Respublikasi Qonuniga muvofiq “Geografik obyektlarning nomlari sohasidagi ishlarni tartibga solish chora-tadbirlari haqida”gi 295-sonli qaroriga muvofiq, Geografik obyektlarga nom berish va ularni qayta nomlash toʻgʻrisidagi takliflarni davlat ekspertizasidan oʻtkazish boʻyicha Oʻzbekiston Respublikasi Iqtisodiyot va moliya vazirligi huzuridagi Kadastr agentligi ekspert komissiyasining bayoni hamda 2025-yil 10-iyuldagi 05-19-11443-sonli ekspert xulosalariga asosan, Sariosiyo tumanida 1043 ta nomsiz va nomi qonun talablariga javob bermaydigan geografik obyektlarning nomlari oʻrganilib chiqilib ijobiy xulosa berilgan.

Yuqoridagilarni inobatga olib, Oʻzbekiston Respublikasining “Mahalliy davlat hokimiyati toʻgʻrisida”gi Qonunining 6 va 24-moddasiga asosan, xalq deputatlari tuman Kengashi qaror qiladi:

1. Geografik obyektlarga nom berish va ularni qayta nomlash toʻgʻrisidagi takliflarni davlat ekspertizasidan oʻtkazish boʻyicha Oʻzbekiston Respublikasi Iqtisodiyot va moliya vazirligi huzuridagi Kadastr agentligi ekspert komissiyasining bayoni hamda 2025-yil 10-iyuldagi 05-19-11443-sonli ekspert xulosasi maʼlumot uchun qabul qilinsin.

2. Sariosiyo tumanidagi 1043 ta nomsiz va nomi qonun talablariga javob bermaydigan geografik obyektlarning nomlari 1-ilovaga muvofiq tasdiqlansin.

3. Tuman hokimining oʻrinbosarlari (M. Qultayev, J. Shaymardonov, A. Qurbonov), Mahallalar uyushmasi tuman boʻlimi (S. Sheraliyev)ga yangi nomlanayotgan koʻchalarni nomlari aks ettirilgan peshlavhalarni 1 (bir) oy muddatda belgilangan tartibda oʻrnatish vazifasi topshirilsin.

4. Belgilab qoʻyilsinki, nomlangan koʻchalarga peshlavhalar tayyorlash, oʻrnatish uchun sarflanadigan mablagʻlar qonunda taqiqlanmagan manbalar hisobidan qoplanadi.

5. Tuman statistika boʻlimi (O. Qosimov), davlat kadastrlari palatasi Sariosiyo tumani filiali (S. Shukurov) nomlangan koʻchalarning nomlarini belgilangan tartibda roʻyxatga olish vazifasi yuklatilsin.

6. Tuman Ichki ishlar boʻlimi (Gʻ. Xoʻjamqulov) fuqarolarni doimiy yashash joyiga roʻyxatga qoʻyishda yangi nomlangan koʻchalarni inobatga olish tavsiya etilsin.

7. Mazkur qaror ijrosini taʼminlash uchun tuman hokimining oʻrinbosarlari (M. Qultayev, J. Shaymardonov, A. Qurbonov), tuman hokimining maʼnaviy-maʼrifiy ishlar samaradorligini oshirish, davlat tili toʻgʻrisidagi qonun hujjatlariga rioya etilishini taʼminlash masalalari boʻyicha maslahatchisi (J. Ergashov) hamda Mahallalar uyushmasi tuman boʻlimi (S. Sheraliyev) masʼul etib belgilansin.

8. Mazkur qaror “Sariosiyo” gazetasida rasman eʼlon qilinsin va tuman hokimligining rasmiy veb-saytiga joylashtirilsin.

9. Ushbu qarorning ijrosini nazorat qilish xalq deputatlari tuman Kengashining Korrupsiyaga qarshi kurashish, davlat organlarida ochiqlikni taʼminlash va huquqiy masalalar boʻyicha doimiy komissiyasi (D. Samatova) zimmasiga yuklatilsin.

10. Ushbu qaror qabul qilingan kundan kuchga kiradi.