Oʻzbekiston Respublikasi Budjet kodeksining 119, 120, 126-moddalariga asosan, Oʻzbekiston Respublikasi Prezidenti tomonidan 2024-yil 17-oktyabrda oʻtkazilgan yigʻilishda berilgan topshiriqlar, Vazirlar Mahkamasida 2025-yil 27-fevralda oʻtkazilgan 6-sonli yigʻilish bayoni ijrosini taʼminlash maqsadida, budjet xarajatlari samaradorligi ustidan tizimli nazorat oʻrnatish hamda mablagʻlarni iqtisod qilishni taʼminlash boʻyicha samarasiz, past samarali xarajatlarni maqbullashtirish, maqbullashtirilgan mablagʻlar hisobidan yoʻnaltirish maqsadida hamda “Mahalliy davlat hokimiyati toʻgʻrisida”gi Oʻzbekiston Respublikasi qonunining 6 , 24-moddalariga asosan xalq deputatlari Chust tuman Kengashi qaror qiladi:

1. Oʻzbekiston Respublikasi Budjet kodeksining:

119-moddasiga asosan Davlat budjetining qoʻshimcha manbalari Davlat budjetining har bir darajasidagi budjetlarida alohida-alohida shakllantirilishi;

qoʻshimcha manbalar tarkibiga Budjet Kodeksining 120-moddasi toʻrtinchi qismiga muvofiq budjetdan ajratiladigan mablagʻlar kamaytirilishi natijasida boʻshab qolgan mablagʻlar ham kiritilganligi maʼlumot uchun qabul qilinsin.

2. Oʻzbekiston Respublikasi Budjet Kodeksi, Budjet xarajatlari samaradorligi ustidan tizimli nazorat oʻrnatish hamda mablagʻlarni iqtisod qilishni taʼminlash yuzasidan Oʻzbekiston Respublikasi Prezidenti tomonidan 2024-yil 17-oktyabrda oʻtkazilgan yigʻilishda berilgan topshiriqlar, Vazirlar Mahkamasida 2025-yil 27-fevralda oʻtkazilgan 6-sonli yigʻilish bayoni, Oʻzbekiston Respublikasi Bosh Prokuraturasi huzuridagi iqtisodiy jinoyatlarga qarshi kurashish departamenti, Hisob palatasi hamda Iqtisodiyot va moliya vazirligining 2025-yil 29-yanvardagi qoʻshma qarorlari, Iqtisodiyot va moliya vazirligining 2025-yil 4-fevraldagi 57-2-2280-sonli koʻrsatma xati, Oʻzbekiston Respublikasi Bosh Prokuraturasi huzuridagi iqtisodiy jinoyatlarga qarshi kurashish departamentining Davlat moliyaviy nazorati inspeksiyasi Namangan viloyati boshqarmasining 2025-yil 18-fevraldagi 23-5/259-sonli taqdimnomasi maʼlumot va ijro uchun qabul qilinsin.

3. Oʻzbekiston Respublikasi Budjet Kodeksining 120-moddasiga asosan, Chust tumani mahalliy budjetidan mablagʻ oluvchi tashkilotlarning 2025-yil uchun xarajatlar smetasi va shtat jadvallarini rejalashtirishda budjet intizomiga rioya etilishi yuzasidan oʻtkazilgan tahliliy oʻrganishlarda aniqlangan samarasiz hamda past samarali xarajatlar 1-ilovaga muvofiq maqbullashtirilsin.

4. Oʻzbekiston Respublikasi Budjet Kodeksining 126-moddasiga asosan, tuman hokimligining xalq deputatlari tuman Kengashiga taqdim etgan taklifiga muvofiq, tuman mahalliy budjetining 2025-yilgi xarajatlari boʻyicha maqbullashtirilgan mablagʻlar hisobidan 2-ilovaga muvofiq 261 883,0 (ikki yuz oltmish bir million sakkiz yuz sakson uch ming) ming soʻm mablagʻlar yoʻnaltirish toʻgʻrisidagi takliflari maʼqullansin.

5. Xarajatlarni amalga oshirishga masʼul tashkilotlar rahbarlariga:

ajratilgan mablagʻlardan maqsadli va samarali foydalanish, rasmiylashtirilgan hujjatlarni tuman Iqtisodiyot va moliya bosh boʻlimi hamda tuman gʻaznachilik xizmati boʻlimiga taqdim etish hamda belgilangan tartibda toʻlovlarni maqsadli amalga oshirish vazifalari yuklatilsin.

6. Tuman Iqtisodiyot va moliya boʻlimi (A.Xalilov)ga budjet xarajatlariga belgilangan tartibda tegishli oʻzgartirishlar kiritish hamda tuman gʻaznachilik xizmati boʻlimi (J.Kattabekov)ga toʻlovlarni oʻrnatilgan tartibda va oʻz vaqtida amalga oshirish vazifalari topshirilsin.

7. Mazkur qaror ijrosining nazorati xalq deputatlari tuman Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi (U.Azizov) hamda tuman hokimining birinchi oʻrinbosari I.Toʼxtasinov zimmasiga yuklansin.