Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6-moddasi, “Taʼlim toʻgʻrisida”gi Qonunining 27-moddasi, Oʻzbekiston Respublikasi Vazirlar Mahkamasining 2017-yil 15-martdagi 140-sonli qarori bilan tasdiqlangan “Umumiy oʻrta taʼlim toʻgʻrisida”gi Nizomning 39-bandiga asosan tumanda maktab yoshidagi bolalarni umumiy oʻrta taʼlimga qamrab olish jarayonida umumiy oʻrta taʼlim muassasalariga biriktirilgan hududlar (mikrohudud)ni belgilash maqsadida, qaror qilaman:

1. Tumanda maktab yoshidagi bolalarni umumiy oʻrta taʼlimga toʻliq qamrab olish boʻyicha umumiy oʻrta taʼlim muassasalariga biriktirilgan hududlar (mikrohudud) roʻyxati 1-ilovaga asosan tasdiqlansin.

2. Tuman maktabgacha va maktab taʼlimi boʻlimi (Sh.Rasulov), tumandagi umumiy oʻrta taʼlim muassasalari rahbarlari zimmasiga maktab yoshidagi bolalarni umumiy oʻrta taʼlimga toʻliq qamrab olish, oʻquvchilarning darslarga qatnashish holati yuzasidan monitoring olib borish va uning natijasida aniqlangan muammolarni bartaraf etish boʻyicha zarur choralar koʻrish vazifasi topshirilsin.

3. Belgilansinki, tumandagi umumiy oʻrta taʼlim muassasa rahbarlari oʻzlari rahbarlik qilayotgan muassasaga biriktirilgan hududdagi maktab yoshidagi bolalarni oʻz vaqtida umumiy oʻrta taʼlim muassasasiga oʻqishga jalb qilish uchun masʼul hisoblanadi.

4. Oʻzbekiston mahallalar uyushmasi tuman boʻlimi (F.Kenjayev), tuman Yoshlar ishlari boʻlimi (Oʻ.Muhammadiyev) va barcha mahalla fuqarolar yigʻini raislariga, maktab yoshidagi bolalarni umumiy oʻrta taʼlim muassasalariga jalb etish jarayonida tuman maktabgacha va maktab taʼlimi boʻlimi hamda umumiy oʻrta taʼlim muassasalarga amaliy yordam berish tavsiya etilsin.

5. Mazkur qaror “Paxtachi” gazetasida rasmiy eʼlon qilinsin va hokimlikning rasmiy veb-saytiga joylashtirilsin.

6. Ushbu qaror qabul qilinishi munosabati bilan Paxtachi tumani hokimining 2025-yil 4-iyundagi 140-7-102-Q/25-sonli qarori qonunchilik hujjatlariga asosan bekor qilinsin.

7. Mazkur qaror rasmiy eʼlon qilingan kundan eʼtiboran kuchga kiradi.

8. Ushbu qaror ijrosini nazorat qilish tuman hokimining oʻrinbosari A.Quldoshov zimmasiga yuklatilsin.