Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan samaradorligini oshirish chora-tadbirlari toʻgʻrisida”gi PQ-5-sonli qarori ijrosini taʼminlash maqsadida hamda Sariosiyo tumani “Suv yetkazib berish xizmati” DM rahbarining 2025-yil 25-martdagi 136-sonli aloqa xatini xalq deputatlari tuman Kengashining Agrar, suv xoʻjaligi masalalari va ekologiya boʻyicha doimiy komissiyasida koʻrib chiqilganligini inobatga olib, Oʻzbekiston Respublikasining “Mahalliy davlat hokimiyati toʻgʻrisida”gi Qonunining 6 va 24-moddalariga muvofiq, xalq deputatlari tuman Kengashi qaror qiladi:

1. Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-sonli qarori rahbarlik va ijro uchun qabul qilinsin.

2. Sariosiyo tumani “Suv yetkazib berish xizmati” DM rahbarining 2025-yil 25-martdagi 136-sonli aloqa xatiga asosan, tumandagi suv isteʼmolchilariga 2025-yil sugʻorish mavsumida (aprel-sentabr) oylari uchun 93,5 mln. m3 suv limiti belgilangan boʻlib, biroq sugʻorish tarmoqlaridagi yuqotishlarni hisobiga jami 79,9 mln. m3 suv isteʼmolchilar kesimida qayta hisob-kitob qilinganligi inobatga olinsin va ajratilgan suv limiti 1-ilovaga muvofiq tasdiqlansin.

3. Xalq deputatlari tuman Kengashining Agrar, suv xoʻjaligi masalalari va ekologiya boʻyicha doimiy komissiyasi (A.Axmedov)ga:

Sariosiyo tumani “Suv yetkazib berish xizmati” DM rahbari Turdiyev Ravshan Yuldoshovichning xalq deputatlari tuman Kengashi sessiyalariga hisobot berishda muntazam ravishda shaxsan ishtirok etmay kelayotganligi va Kengash ishiga masʻuliyatsizlik bilan qarab, oʻz ishini talab darajasida olib bormayotganligi uchun Oʻzbekiston Respublikasi Suv xoʻjaligi Vazirligi Amu-Surxon irrigatsiya tizimlari havza boshqarmasi rahbari nomiga Taqdimnoma yuborsin.

4. Tuman hokimligi (A.Donayev)ga:

Doimiy ogohlantirishlarga qaramay xalq deputatlari tuman Kengashi sessiyalariga hisobot berishda doimiy ishtirok etmay kelayotgan Sariosiyo tuman “Suv yetkazib berish xizmati” DM rahbari Turdiyev Ravshan Yuldoshovichning faoliyatini qonunchilikka asosan oʻrganib chiqib, lavozimiga loyiq yoki noloyiq ekanligi yuzasidan 15 kun muddat ichida tuman Kengashiga yozma axborot berishi belgilanlsin.

5. Tuman hokimining oʻrinbosari (N.Karimov) va “Suv yetkazib berish xizmati” DM rahbariga:

Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-sonli qarori asosida ishlarni tashkil etish;

belgilangan limitlar asosida isteʼmolchilarga suv yetkazib berish;

suv resurslaridan foydalanish samaradorligini oshirish, suvdan foydalanish madaniyatini yuksaltirish;

suvni tejaydigan sugʻorish texnologiyalarini kengaytirilgan tartibda joriy etishni davom ettirish;

oʻziga biriktirilgan hududda suvning hisobi va hisobotini yuritish;

sugʻorish tarmoqlari va ulardagi gidrotexnik inshootlarni soz holatda saqlash, taʼmirlash-tiklash tadbirlarini amalga oshirish;

suv olish joylarini suvni boshqarish va hisobga olish vositalari bilan jihozlash, suv monitoringi, hisobi va hisoboti yuritilishini raqamlashtirish;

isteʼmolchilar kesimida isteʼmol qilingan suv hajmi toʻgʻrisidagi maʼlumotlarni soliq organlariga taqdim etib borish;

suv isteʼmolchilarining buyurtmanomasi asosida boshqa suv xoʻjaligi xizmatlarini koʻrsatish;

amalga oshirilgan ishlar yuzasidan xalq deputatlari tuman Kengashiga hisobotlarni har chorakda berib borish vazifalari yuklatilsin.

6. Tuman hokimligi Axborot xizmati (J.Ergashov) va “Sariosiyo” gazetasi (A.Azizov)ga amalga oshirilayotgan ishlarni ijtimoiy tarmoqlar va ommaviy axborot vositalari orqali keng yoritib borilishi yuklatilsin.

7. Mazkur qaror ijrosini nazorat qilish xalq deputatlari tuman Kengashining Agrar, suv xoʻjaligi masalalari va ekologiya boʻyicha doimiy komissiyasi (A.Axmedov) zimmasiga yuklansin.

8. Mazkur qaror qabul qilingan kundan kuchga kiradi.