Oʻzbekiston Respublikasi Prezidentining 2025-yil 23-iyundagi “Oʻzbekiston Respublikasida mahalliy davlat hokimiyati vakillik organlari faoliyatini 2030-yilga qadar rivojlantirish konsepsiyasini tasdiqlash toʻgʻrisida”gi PF-98-sonli farmoni va Sirdaryo viloyati hokimining 2025-yil 30-iyundagi 256-9-0-Q/25-sonli qarori ijrosini taʼminlash hamda hududlarni ijtimoiy-iqtisodiy rivojlantirish, aholini tashvishga solayotgan dolzarb masalalarni hal etish, shuningdek, mahalliy Kengash raisi va hokim lavozimlarini bir biridan ajratish “Kuchli Kengash, hisobdor va tashabbuskor hokim” tamoyilini roʻyobga chiqarish maqsadida, “Mahalliy davlat hokimiyati toʻgʻrisida”gi qonunning 6 va 21¹-moddalariga muvofiq qaror qilaman:

1. Oʻzbekiston Respublikasi Prezidentining 2025-yil 23-iyundagi “Oʻzbekiston Respublikasida mahalliy davlat hokimiyati vakillik organlari faoliyatini 2030-yilga qadar rivojlantirish konsepsiyasini tasdiqlash toʻgʻrisida”gi PF-98-son farmoni hamda Sirdaryo viloyati hokimining 2025-yil 30-iyundagi 256-9-0-Q/25-sonli qarori rahbarlik va ijro uchun qabul qilinsin.

2. Oʻzbekiston Respublikasi Prezidentining mazkur Farmoni bilan:

Mahalliy davlat hokimiyati vakillik organlarining tashabbuskorligini yanada oshirish maqsadida quyidagi vakolatlar xalq deputatlari mahalliy Kengashlariga oʻtkazilganligi inobatga olinsin:

davlat koʻchmas mulkidan foydalanganlik uchun ijara toʻlovining eng kam stavkalarini belgilash;

dafn etish joylarini saqlash qoidalarini va dafn etish xizmatlarini koʻrsatish boʻyicha tariflar miqdorini tasdiqlash;

ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zaxiraga qoʻyish;

yoʻllarning ayrim qismlarida harakatlanish tezligini oshirishga yoki kamaytirishga (tegishli yoʻl belgilari oʻrnatib) ruxsat berilganligi;

Oʻzbekiston Respublikasida mahalliy davlat hokimiyati vakillik organlari faoliyatini 2030-yilga qadar rivojlantirish konsepsiyasi;

Mahalliy davlat hokimiyati vakillik organlari faoliyatini 2030-yilga qadar rivojlantirish konsepsiyasini amalga oshirish boʻyicha “Yoʻl xaritasi” (keyingi oʻrinda- “Yoʻl xarita”) tasdiqlanganligi;

Budjet loyihasini ishlab chiqishda mahalliy budjet xarajatlarining muayyan qismini mahalliy Kengash deputatlarining bevosita tashabbusi asosida shakllantirilishi;

mahalliy Kengashlar kotibiyatlari faoliyatini tashkiliy jihatdan qoʻllab-quvvatlash maqsadida Xalq deputatlari viloyatlar Kengashlarida mahalliy ijro etuvchi hokimiyat Organlaridan mustaqil moliyaviy hisob-kitob tizimi joriy etilganligi;

Oliy Majlis palatalari huzuridagi yoshlar parlamentlari tajribasidan kelib chiqqan holda jamoatchilik asosida mahalliy Kengashlar qoshida Yoshlar guruhlari tashkil etilganligi;

Xalq deputatlari mahalliy Kengashi raisi oʻrinbosari instituti tashkil etilishi;

mahalliy Kengash huzurida nodavlat notijorat tashkilotlar, fuqarolarning oʻzini oʻzi boshqarish organlari, fuqarolik jamiyatining boshqa institutlari hamda ilmiy doiralar vakillaridan iborat jamoatchilik asosida faoliyat yuritadigan Maslahat guruhlari tashkil etilganligi;

Tuman hokimi oʻrinbosarligiga nomzodlarni tegishli mahalliy Kengashlar doimiy komissiyalarida dastlabki tarzda muhokama qilish, Kengash sessiyalarida nomzodlarning oʻz yoʻnalishlari boʻyicha hududni rivojlantirish dasturlarini taqdim etish tartibini joriy etilishi;

mahalliy Kengashlarda deputatlar va jamoatchilik vakillari ishtirokida mahalliy ijro etuvchi hokimiyat organlari rahbarlarining ayrim muhim ijtimoiy masalalar yuzasidan axborotlarini eshitish boʻyicha “Kengash soati” institutini joriy qilinishi;

mahalliy Kengashlar faoliyatining tashkiliy-moliyaviy qoʻllab-quvvatlash masalalarini mahalliy budjet parametrlarida alohida koʻrsatish orqali mehnatga haq toʻlash, ragʻbatlantirish, moddiy-texnik bazasini mustahkamlash shartlarini ijro etuvchi hokimiyat darajasidan past boʻlmagan holda belgilanganligi;

mahalliy Kengashlarning Reglament va deputatlik odobi masalalari boʻyicha doimiy komissiyasiga Kengash qarori bilan lavozimga tasdiqlanadigan, tayinlanadigan, lavozimga tayinlanishida Kengash roziligi olinadigan mansabdor shaxslarning odob-axloq normalarini buzganlik boʻyicha ishlarni koʻrib chiqish huquqini berilganligi maʼlumot uchun qabul qilinsin.

2. Xalq deputatlari tuman Kengashi(D.Anorqulova)ga “Yoʻl xarita”ning ijrosi oʻz vaqtida va sifatli amalga oshirilishini muhokama qilib borish tavsiya etilsin.

3. Tuman hokimligi Axborot xizmati rahbari-matbuot kotibi S.Erkinovga Oʻzbekiston Respublikasi Prezidentining 2025-yil 23-iyundagi PF-98-son Farmoni doirasida amalga oshiriladigan ishlarni ommaviy axborot vositalarida keng yoritib borish tavsiya etilsin.

4. Ushbu qarori jrosi yuzasidan nazoratni oʻz zimmamda qoldiraman.