“Ichimlik suvi taʼminoti va oqova suvlarni chiqarib yuborish toʻgʻrisida”gi Oʻzbekiston Respublikasi Qonuni, Oʻzbekiston Respublikasi Prezidentining 2020-yil 25-sentabrdagi “Ichimlik suvi taʼminoti va oqova suv tizimini yanada takomillashtirish hamda sohadagi investitsiya loyihalari samaradorligini oshirish chora-tadbirlari toʻgʻrisida”gi PF-6074-sonli Farmoni, “Buxoro suv taʼminoti” AJning 2025-yil 15-maydagi 678/1-sonli xati, “Damxoʻja magistral suv taʼminoti” AJning 2025-yil 19-maydagi 03-2/223-sonli xati, hamda viloyat iqtisodiyot va moliya bosh boshqarmasining 2025-yil 15-maydagi 02/07-32/123-son, 02/07-32/124-son xulosalariga asoslanib, ichimlik suvi taʼminoti va oqova suvlarni chiqarib yuborish boʻyicha koʻrsatiladigan xizmatlar uchun tariflarni tartibga solish maqsadida, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6-moddasiga muvofiq xalq deputatlari viloyat Kengashi qaror qiladi:

1. “Buxoro suv taʼminoti” AJ direktori Sh.Sadillayevning viloyatda ichimlik suvi taʼminoti va oqova suvlarni chiqarib yuborish boʻyicha xizmatlar tariflari yuzasidan hisoboti maʼlumot uchun qabul qilinsin.

2. Viloyat iqtisodiyot va moliya bosh boshqarmasining ichimlik suvi taʼminoti va oqova suvlarni chiqarib yuborish boʻyicha xizmatlar tariflari boʻyicha xulosalari inobatga olinsin.

3. Buxoro viloyatida ichimlik suvi taʼminoti va oqova suvlarni chiqarib yuborish boʻyicha koʻrsatiladigan xizmatlar uchun yangi tariflar ilovaga muvofiq tasdiqlansin.

4. Viloyat hokimining oʻrinbosari J.Arashov, “Buxoro suv taʼminoti” AJ (Sh.Sadillayev)ga, tumanlar va shaharlar hokimliklari bilan birgalikda:

ichimlik suvi taʼminoti va oqova suvlarni chiqarib yuborish boʻyicha koʻrsatilgan xizmatlardan mavjud qarzdorliklarni qisqartirish choralarini koʻrish;

ichimlik suvidan samarasiz va noqonuniy foydalanishning oldini olish;

sohada koʻrsatilayotgan xizmatlar darajasini yanada yaxshilash, tarmoqdagi avariya holatlarini oʻz vaqtida bartaraf etib borish;

ichimlik suvi resurslaridan oqilona va samarali foydalanish, ularni isrof qilmaslik yuzasidan aholi oʻrtasida targʻibot ishlarini kuchaytirish topshirilsin.

5. Xalq deputatlari viloyat Kengashining 2023-yil 29-dekabrdagi VI-89-99-2-0-K/23-sonli qarori oʻz kuchini yoʻqotgan deb hisoblansin.

6. Mazkur qaror “Buxoronoma” va “Buxarskiy vestnik” gazetalarida eʼlon qilinsin hamda viloyat hokimligining rasmiy veb-saytiga joylashtirilsin.

7. Ushbu qaror bilan tasdiqlangan ichimlik suvi taʼminoti va oqova suvlarni chiqarib yuborish boʻyicha xizmatlar uchun yangi tariflar ommaviy axborot vositalarida rasmiy eʼlon qilingandan keyin oʻn besh kun oʻtgach kuchga kirishi belgilansin.

8. Mazkur qarorning bajarilishini nazorat qilish xalq deputatlari viloyat Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi (O.Xamidov) zimmasiga yuklatilsin.