“Taʼlim toʻgʻrisida”gi Qonunning 27-moddasi, Oʻzbekiston Respublikasi Vazirlar Mahkamasining 2022-yil 1-iyundagi 295-son qarori bilan tasdiqlangan Umumiy oʻrta taʼlim toʻgʻrisidagi nizomga asosan shaharda maktab yoshidagi bolalarni umumiy oʻrta taʼlimga qamrab olish jarayonida umumtaʼlim muassasalariga biriktirilgan hududlar (mikrohudud)ni aniq belgilab olish maqsadida, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6- va 25-moddalariga asoslanib, qaror qilaman:

1. Navoiy shahrida maktab yoshidagi bolalarni umumiy oʻrta taʼlimga toʻliq qamrab olish boʻyicha umumtaʼlim muassasalariga biriktirilgan hududlar (mikrohudud) roʻyxati ilovaga asosan tasdiqlansin.

2. Maktab yoshidagi bolalarni umumiy oʻrta taʼlimga qamrab olish umumtaʼlim muassasalari pedagog xodimlari tomonidan bolalarni birma-bir (uyma-uy) roʻyxatga olish orqali amalga oshirilsin.

3. Shahar hokimi oʻrinbosari (Yorqulov), shahar maktabgacha va maktab taʼlimi boʻlimi (Xamidova) va umumtaʼlim maktablari rahbarlariga maktab yoshidagi bolalarni umumiy oʻrta taʼlimga, umumtaʼlim muassasasi bitiruvchilarini taʼlimning keyingi bosqichiga toʻliq qamrab olish, oʻquvchilarning darslarga qatnashish holati yuzasidan monitoring olib borish va uning natijasida aniqlangan muammolarni bartaraf etish boʻyicha zarur choralar koʻrish vazifalari topshirilsin.

4. Belgilansinki, shahardagi umumtaʼlim muassasalari rahbarlari oʻzlari rahbarlik qilayotgan muassasaga biriktirilgan hududdagi maktab yoshidagi bolalarni oʻz vaqtida umumtaʼlim muassasasiga oʻqishga jalb qilish uchun masʼul hisoblanadi.

5. Oʻzbekiston mahallalari uyushmasi Navoiy shahar boʻlimi (Yelmuratov)ga mahalla fuqarolari yigʻinlarida maktab yoshidagi bolalarni qamrab olishda umumtaʼlim muassasalariga amaliy yordam berish tavsiya etilsin.

6. Shahar hokimligi axborot xizmati (Ahrorov)ga mazkur qarorning mazmun-mohiyatini ommaviy axborot vositalarida eʼlon qilish va shahar hokimligining rasmiy veb-saytiga joylashtirish tavsiya qilinsin.

7. Mazkur qarorning ijrosini nazorat qilish shahar hokimining oʻrinbosari A. Yorqulov zimmasiga yuklansin.