Oʻzbekiston Respublikasining 2022-yil 22-iyuldagi “Ichimlik suv taʼminoti va oqova suvlarni chiqarib yuborish toʻgʻrisida”gi OʻRQ-784-sonli qonunining 45-moddasi va “Mahalliy davlat hokimiyati toʻgʻrisida”gi Oʻzbekiston Respublikasi qonunining 6, 24-moddalariga muvofiq xalq deputatlari viloyat Kengashi qaror qiladi:

1. Xorazm viloyati “Xorazm suv taʼminoti” masʼuliyati cheklangan jamiyati direktori A.Qadirovning axboroti hamda viloyat iqtisodiyot va moliya bosh boshqarmasining tegishli xulosasi maʼlumot uchun qabul qilinsin.

2. Xorazm viloyati “Xorazm suv taʼminoti” masʼuliyati cheklangan jamiyati tomonidan taklif etilayotgan Xorazm viloyatida ichimlik suvi taʼminoti va oqova suvlarni chiqarib yuborish boʻyicha xizmatlar uchun tariflar ilovaga muvofiq tasdiqlansin.

3. Xalq deputatlari Xorazm viloyati Kengashining 2024-yil 30-maydagi “Xorazm viloyatida ichimlik suvi taʼminoti va oqova suvlarni chiqarib yuborish boʻyicha xizmatlar uchun tariflarni belgilash toʻgʻrisida”gi VI-81-69-12-0-K/24-sonli qarori oʻz kuchini yoʻqotgan deb hisoblansin.

4. Axborot va ommaviy kommunikatsiyalar agentligi Xorazm viloyati boshqarmasi boshligʻi D.Bekchanova, Xorazm viloyati teleradiokompaniyasi direktori Oʻ.Matqurbanov hamda “Xorazm haqiqati” gazetasi bosh muharriri S.Raximberganovalarga ushbu qarorni rasman eʼlon qilish tavsiya etilsin.

5. Mazkur qaror rasman eʼlon qilingan kundan oʻn besh kun oʻtgach kuchga kiradi.

6. Ushbu qarorning ijrosini nazorat qilish xalq deputatlari viloyat Kengashining mahalliy budjet, tadbirkorlikni rivojlantirish va iqtisodiy islohotlar boʻyicha doimiy komissiyasi raisi K.Igambergenov zimmasiga yuklansin.