«Ўзбекистон — 2030» стратегиясини амалга ошириш доирасида аҳолига давлат пенсиялари ва компенсацияларни тайинлаш тартибини такомиллаштириш орқали пенсия олувчилар ва ногиронлиги бўлган шахсларнинг ижтимоий хизматлардан фойдаланиш имкониятларини янада кенгайтириш мақсадида қарор қиламан:

1. 2025 йил 1 июлдан бошлаб фуқароларга давлат пенсиялари ва компенсацияларни тайинлашнинг қуйидаги соддалаштирилган тартиби жорий этилсин:

(а) фуқароларга I ёки II гуруҳ ногиронлиги белгиланиши муносабати билан пенсияларни алоҳида мурожаат талаб этмаган ҳолда проактив шаклда тайинлаш. Бунда фуқарога проактив шаклда тайинланган пенсияларни рад қилиш ҳуқуқи берилади;

(б) кўриш қобилияти бўйича I гуруҳ ногиронлиги бўлган шахсларга ҳамда ядро полигонлари ва бошқа радиация-ядро объектларида ҳарбий хизматни ўтаган шахсларга компенсацияларни электрон маълумотлар алмашинуви асосида проактив шаклда тайинлаш;

(в) ногиронлик пенсияси тайинлангандан сўнг камида бир йил иш стажига эга бўлганда фуқаронинг пенсия миқдорини ҳар икки йилда проактив шаклда қайта ҳисоблаш.

2. 2025 йил 1 октябрдан бошлаб давлат пенсия таъминотига оид ҳамда АТ «Халқ банки» томонидан пенсияларни нақд пул шаклида тўлаш билан боғлиқ кўрсатиладиган хизматларни фуқароларни биометрик идентификация қилиш (Face-ID) ҳамда уларнинг имзосини электрон шаклда олиш орқали амалга ошириш тартиби жорий этилсин. Бунда:

(а) тўловни амалга ошириш қайдномасини электрон шаклда планшет орқали имзолашга рухсат берилади;

(б) Адлия вазирлиги Иқтисодиёт ва молия вазирлиги ҳузуридаги бюджетдан ташқари Пенсия жамғармаси (кейинги ўринларда — Пенсия жамғармаси) ва АТ «Халқ банки»нинг электрон сўровига асосан фуқароларни биометрик идентификация қилиш маълумотларини бепул етказади;

(в) биометрик идентификация қилиш асосида кўрсатиладиган хизматларни жорий этиш учун фойдаланиладиган қурилмалар хариди билан боғлиқ харажатлар Пенсия жамғармаси ҳамда АТ «Халқ банки» ҳисобидан молиялаштирилади.

3. Иқтисодиёт ва молия вазирлиги Электрон технологияларни ривожлантириш маркази билан биргаликда 2025 йил 1 октябрга қадар Электрон технологияларни ривожлантириш маркази ҳамда Пенсия жамғармаси ҳисобидан фуқароларга пенсия тайинлашда қуйидаги масалаларда амалий кўмак кўрсатиш хизматини жорий этсин:

(а) ёшга доир ва ногиронлик пенсияларини проактив шаклда тайинлашда фуқаронинг иш стажи ва иш ҳақига оид электрон маълумотлардаги камчиликларни бартараф этиш бўйича маслаҳат ва ёрдам кўрсатиш;

(б) фуқароларга пенсия тайинлашда коррупциявий ҳолатлар юзага келмаганлигини «Call-марказ» томонидан аниқлаш.

4. Ўзбекистон Республикаси Президентининг айрим қарорларига иловага мувофиқ ўзгартириш ва қўшимчалар киритилсин.

5. Иқтисодиёт ва молия вазирлиги Ахборот ва оммавий коммуникациялар агентлиги, Ўзбекистон Миллий телерадиокомпанияси ҳамда манфаатдор вазирлик ва идоралар билан биргаликда ушбу қарорнинг мазмун-моҳияти аҳоли ўртасида кенг тушунтирилишини ташкил этсин.

6. Ушбу қарорнинг ижросини самарали ташкил қилишга масъул ва шахсий жавобгар этиб Бош вазир ўринбосари Ж.А. Қўчқоров белгилансин.

7. Қарор ижросини муҳокама қилиб бориш, ижро учун масъул ташкилотлар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов зиммасига юклансин.

1. Ўзбекистон Республикаси Президентининг 2017 йил 13 мартдаги «Пенсиялар ва нафақалар тўлаш механизмини янада такомиллаштириш чора-тадбирлари тўғрисида»ги ПҚ-2826-сон қарорида:

(а) 6-бандда:

учинчи хатбоши чиқариб ташлансин;

тўртинчи хатбоши учинчи хатбоши деб ҳисоблансин;

(б) 7-банднинг биринчи хатбошиси «Ички ишлар вазирлиги» сўзларидан кейин «ва Миллий гвардия» сўзлари билан тўлдирилсин.

2. Ўзбекистон Республикаси Президентининг 2018 йил 4 майдаги «Ўзбекистон Республикаси акциядорлик тижорат Халқ банки ва «Микрокредитбанк» акциядорлик тижорат банкининг молиявий ҳолатини яхшилаш ҳамда фаолиятини янада такомиллаштириш чора-тадбирлари тўғрисида»ги ПҚ-3694-сон қарорининг 8-банди ўз кучини йўқотган деб ҳисоблансин.

3. Ўзбекистон Республикаси Президентининг 2021 йил 4 майдаги «Фуқароларга давлат пенсияларини тайинлаш жараёнини соддалаштириш ҳамда пенсия ва нафақаларни етказиш тизимини янада такомиллаштириш чора-тадбирлари тўғрисида»ги ПҚ-5102-сон қарорининг 1-банди «б» кичик бандида:

(а) иккинчи хатбоши қуйидаги таҳрирда баён этилсин:

«давлат пенсияларини тайинлашда фуқаролардан меҳнат стажи, иш ҳақи, олий таълим муассасаларидаги ўқиш ҳамда ҳарбий хизмат даври тўғрисидаги ҳужжатларни талаб қилиш бекор қилинади. Бунда пенсияга чиқиш ҳуқуқи пайдо бўлган вақтда ишламайдиган фуқаролар учун меҳнат стажи ҳамда ҳарбий хизмат даври тўғрисидаги маълумотларни Камбағалликни қисқартириш ва бандлик вазирлигининг туман (шаҳар) камбағалликни қисқартириш ва бандликка кўмаклашиш бўлимларига мурожаат қилиш орқали «Ягона миллий меҳнат тизими» идоралараро дастурий-аппарат комплексига (кейинги ўринларда — ЯММТ ИДАК) киритиш хизмати жорий этилади»;

(б) учинчи хатбошидаги «ҳужжатлар» сўзи «маълумотлар» сўзи билан алмаштирилсин.