Oʻzbekiston Respublikasi Byudjet kodeksining 27-, 126- va 148-moddalariga asosan Vobkent tuman mahalliy byudjetining 2024-yil yillik daromadlari 102,3 mlrd.soʻmni tashkil etdi, mahalliy byudjetdan 229,3 mlrd.soʻm miqdorida xarajatlar amalga oshirildi, shundan 144,6 mlrd.soʻmi yoki 63,1 foizi ijtimoiy xarajatlarga yoʻnaltirildi.

Bundan tashqari, respublika byudjetidan maqsadli tadbirlarga qoʻshimcha ajratilgan mablagʻlar, tartibga soluvchi byudjetlararo transfertlar hamda viloyat mahalliy byudjeti parametrlari doirasida kiritilgan oʻzgartirishlar hisobiga belgilangan tadbirlar oʻz vaqtida moliyalashtirilgan.

Shuningdek, 2024-yil davomida Oʻzbekiston Respublikasi Prezidentining 2024-yil 5-yanvardagi PQ-5-sonli hamda Vazirlar Mahkamasining 2024-yil 9-fevraldagi 79-sonli qarorlari ijrosini taʼminlash maqsadida Xalq deputatlari tuman (shahar) Kengashlari qarorlariga asosan qishloq xoʻjaligi maqsadlarida suv resurslaridan foydalanganlik uchun soliq summasining yillik prognozini 40 foizga oshirilganligi hamda Xalq deputatlari viloyat Kengashining qarorlari hamda viloyat iqtisodiyot va moliya bosh boshqarmasining bildirishnomalari asosida mahalliy byudjetga tushumlardan kelib chiqib, soliq turlari boʻyicha reja koʻrsatkichlarga tegishli oʻzgartirishlar kiritilgan.

Oʻzbekiston Respublikasi Byudjet kodeksining 27-, 126- va 148-moddalariga asosan tuman mahalliy byudjetining 2024-yil yillik ijrosi byudjet parametrlariga kiritilgan oʻzgartirishlar toʻgʻrisidagi hisobotini muhokama qilib, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6 va 24-moddalariga asosan, xalq deputatlari Vobkent tumani Kengashi qaror qiladi:

1. Vobkent tumani iqtisodiyot va moliya boʻlimi boshligʻi birinchi oʻrinbosari A.Barotovning tuman mahalliy byudjetining 2024-yil yillik byudjet ijrosi hamda byudjet parametrlariga kiritilgan oʻzgartirishlar toʻgʻrisidagi hisoboti maʼlumot uchun qabul qilinsin.

2. Quyidagilar:

Vobkent tumani mahalliy byudjetining 2024-yil daromadlari ijrosi boʻyicha asosiy koʻrsatkichlar 1-ilovaga;

Vobkent tumani mahalliy byudjetining 2024-yil xarajatlari ijrosi boʻyicha asosiy koʻrsatkichlar 2-ilovaga;

Vobkent tumani mahalliy byudjetining daromadlari rejasiga 2024-yil davomida oʻzgartirishlar miqdori 3-ilovaga;

Vobkent tumanidagi byudjet tashkilotlarining birinchi darajali toʻlovlari hamda joriy xarajatlarini oʻz vaqtida amalga oshirish maqsadida tuman mahalliy byudjeti xarajatlar rejasiga 2024-yil davomida oʻzgartirishlar miqdori 4-ilovaga muvofiq tasdiqlansin.

3. Tumani hokimining birinchi oʻrinbosari — Iqtisodiyot va moliya boʻlimi boshligʻi M.Malikovga tumani iqtisodiyot va moliya boʻlimi boshligʻining birinchi oʻrinbosari A.Barotov bilan birgalikda:

Oʻzbekiston Respublikasi Byudjet kodeksi talablari asosida tuman mahalliy byudjetining tasdiqlangan parametrlariga belgilangan tartibda tegishli oʻzgartirishlarni kiritish;

ajratilgan maqsadli mablagʻlarni oʻz vaqtida va samarali ishlatilishi yuzasidan moliyaviy hisobotlar asosida tizimli oʻrganish hamda oʻrganish natijalariga koʻra, ishlatilmagan va iqtisod qilingan mablagʻlarni tuman mahalliy byudjetiga qaytarish choralarini koʻrsin.

4. Tuman iqtisodiyot va moliya boʻlimi boshligʻining birinchi oʻrinbosari A.Barotov va tuman soliq inspeksiyasi boshligʻi A.Xolmurodovga:

tuman hokimligi bilan birgalikda daromadlar prognoz reja koʻrsatkichlarini soʻzsiz ijrosini taʼminlash choralarini koʻrish.

Bunda, prognoz rejani har bir soliq turi kesimida toʻliq bajarilishini taʼminlash;

byudjet daromadlari bazasini kengaytirish hamda mahalliy byudjetga qoʻshimcha soliq tushirish manbalarini aniqlash va mavjud imkoniyatlardan samarali foydalanish vazifasi yuklatilsin.

5. Mazkur qaror qabul qilinishi munosabati bilan Xalq deputatlari Vobkent tumani Kengashining 2025-yil 11-fevraldagi “Vobkent tumani mahalliy byudjetining 2024-yil yillik ijrosi hamda 2024-yil davomida kiritilgan oʻzgartirishlari toʻgʻrisida”gi VII-7-21-2-33-K/25-sonli qarori oʻz kuchini yoʻqotgan deb hisoblansin.

6. Mazkur qarorning ijrosini taʼminlash tuman hokimining moliya-iqtisod va kambagʻallikni qisqartirish boʻyicha birinchi oʻrinbosari — tuman iqtisodiyot va moliya boʻlimi boshligʻi M.Malikovga, ijrosini nazorat qilish Xalq deputatlari tuman Kengashining Mahalliy byudjet, iqtisodiy islohotlarni amalga oshirish, investitsiyalar va tadbirkorlikni rivojlantirish boʻyicha doimiy komissiyasi (A.Qurbonov) zimmasiga yuklatilsin.

7. Mazkur qaror qabul qilingan kundan eʼtiboran kuchga kiradi.