Oʻzbekiston Respublikasining “Ichimlik suvi taʼminoti va oqova suvlarni chiqarish toʻgʻrisida”gi 2022-yil 22-iyuldagi OʻRQ-784-sonli Qonuni, Oʻzbekiston Respublikasi Prezidentining 2020-yil 25-sentabrdagi “Ichimlik suvi taʼminoti va oqova suv tizimini yanada takomillashtirish hamda sohadagi investitsiya loyihalari samaradorligini oshirish chora-tadbirlari toʻgʻrisida”gi PF-6074-sonli Farmoni, 2022-yil 18-martdagi PQ-171-sonli hamda 2023-yil 23-oktyabrdagi PQ-343-son qarorlari, Oʻzbekiston Respublikasi Vazirlar Mahkamasining 2024-yil 16-apreldagi 204-son qarori ijrosini taʼminlash maqsadida Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6 va 24-moddalariga asosan xalq deputatlari viloyat Kengashi qaror qiladi:

1. “Andijon suv taʼminoti” AJ direktori D.Qoʻldashevning ichimlik suvi taʼminoti va oqova suv xizmatlari uchun taklif etilayotgan narxlar (tariflar) yuzasidan taqdimoti maʼlumot uchun qabul qilinsin.

2. Viloyatda ichimlik suvi taʼminoti va kanalizatsiya xizmatlari uchun taklif etilayotgan narxlar (tariflar) ilovaga muvofiq tasdiqlansin.

3. Viloyat hokimining matbuot kotibi — axborot siyosati masalalari boʻyicha maslahatchisi R.Eshonov mazkur qaror rasmiy eʼlon qilinishi munosabati bilan ommaviy axborot vositalari hamda WWW.andijan.uz veb saytiga joylashtirilishini taʼminlasin.

4. Tasdiqlangan tariflar ommaviy axborot vositalarida eʼlon qilingandan keyin oʻn besh kun oʻtgach kuchga kirishi belgilansin.

5. Xalq deputatlari viloyat Kengashining 2023-yil 19-sentabrdagi VI-53-179-1-0K/23-sonli qarori oʻz kuchini yoʻqotgan deb hisoblansin.

6. Mazkur qarorning ijrosini nazorat qilish xalq deputatlari viloyat Kengashining Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi (X.Omanov) hamda ijrosini taʼminlash viloyat hokimining oʻrinbosari U.Joʻrayev zimmasiga yuklatilsin.