Oʻzbekiston Respublikasining “Taʼlim toʻgʻrisida”gi Qonunining 27-moddasi, Oʻzbekiston Respublikasi Vazirlar Mahkamasining 2017-yil 15-martdagi 140-sonli qarori bilan tasdiqlangan “Umumiy oʻrta taʼlim toʻgʻrisida”gi Nizomning 39-bandiga asosan tuman hududidagi maktab yoshidagi bolalarni umumiy oʻrta taʼlimga toʻliq qamrab olish maqsadida Oʻzbekiston Respublikasining “Mahalliy davlat hokimiyati toʻgʻrisida”gi Qonunning 5-, 6- va 25-moddalariga asosan qaror qilaman:

1. Tuman maktabgacha va maktab taʼlimi boʻlimining 2025-yil 3-apreldagi 01/7-04-01-226-sonli xati asos uchun qabul qilinsin.

2. Tuman maktabgacha va maktab taʼlimi boʻlimiga qarashli umumiy oʻrta taʼlim muassasalarining hudud (mikrohudud)lari ilovaga muvofiq tasdiqlansin.

3. Tuman hokimining oʻrinbosari (E.Ummatova), tuman Maktabgacha va maktab taʼlimi boʻlimi (G.Berkinova), tumandagi umumtaʼlim muassasalari rahbarlariga:

maktab yoshidagi bolalarni umumiy oʻrta taʼlimga toʻliq qamrab olish, oʻquvchilarning darslarga qatnashish holati yuzasidan monitoring olib borish va uning natijasida aniqlangan muammolarni bartaraf etish boʻyicha zarur choralar koʻrish hamda mazkur qaror bilan umumtaʼlim muassasalariga biriktirilgan hudud (mikrohudud)lar doirasida umumtaʼlim muassasasi tomonidan roʻyxatga olishni nazorat qilish vazifasi topshirilsin.

4. Oʻzbekiston mahallalari uyushmasi tuman boʻlimi (Y.Jonodilov) maktab yoshidagi bolalarni umumtaʼlim muassasalariga jalb etish jarayonida tuman maktabgacha va maktab taʼlimi boʻlimi hamda umumtaʼlim muassasalarga amaliy yordam berish tavsiya etilsin.

5. Tuman hokimligi axborot xizmat rahbari (R.Karimov) mazkur qarorning mazmun-mohiyatini ommaviy axborot vositalarida eʼlon qilish va tuman hokimligining rasmiy veb-saytiga joylashtirish vazifasi topshirilsin.

6. Ushbu qaror qabul qilinishi munosabati bilan tuman hokimining 2024-yil 1-iyuldagi 137-3-53-Q/24-sonli qarori oʻz kuchini yoʻqotgan deb hisoblansin.

7. Mazkur qaror rasmiy eʼlon qilingan kundan eʼtiboran kuchga kiradi.

8. Mazkur qarorning ijrosini nazorat qilish tuman hokimining oʻrinbosari E.Ummatova zimmasiga yuklansin.