Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6 va 21¹-moddalari, “Taʼlim toʻgʻrisida”gi Qonunining 27-moddasi, Vazirlar Mahkamasining 2017-yil 15-martdagi 140-son qarori bilan tasdiqlangan Umumiy oʻrta taʼlim toʻgʻrisidagi nizomning 39-bandiga asosan shaharda maktab yoshidagi bolalarni umumiy oʻrta taʼlimga qamrab olish jarayonida umumtaʼlim muassasalariga biriktirilgan hududlar (mikrohudud)ni aniq belgilab olish maqsadida qaror qilaman:

1. Shirin shahrida maktab yoshidagi bolalarni umumiy oʻrta taʼlimga toʻliq qamrab olish boʻyicha umumtaʼlim muassasalariga biriktirilgan hududlar (mikrohudud) roʻyxati ilovaga asosan tasdiqlansin.

2. Shahar hokimining oʻrinbosari F.Alimov, shahar Maktabgacha va maktab taʼlimi boʻlimi (J.Jumanazarov), shahardagi umumtaʼlim muassasalari rahbarlari zimmasiga maktab yoshidagi bolalarni umumiy oʻrta taʼlimga toʻliq qamrab olish, oʻquvchilarning darslarga qatnashish holati yuzasidan monitoring olib borish va uning natijasida aniqlangan muammolarni bartaraf etish boʻyicha zarur choralar koʻrish vazifasi topshirilsin.

3. Belgilansinki, shahardagi umumtaʼlim muassasa rahbarlari oʻzlari rahbarlik qilayotgan muassasaga biriktirilgan hududdagi maktab yoshidagi bolalarni oʻz vaqtida umumtaʼlim muassasasiga oʻqishga jalb qilish uchun masʼul hisoblanadi.

4. Shirin shahar hokimligi matbuot xizmati rahbari (K.Azimjonov) va “Shirin sadosi” gazetasi muharriri (O.Ashurkulov) mazkur qarorning shahar hokimligining rasmiy veb-saytiga joylashtirilishi hamda “Shirin sadosi” gazetasida rasman eʼlon qilinishini taʼminlasin.

5. Qaror rasmiy eʼlon qilingan kundan eʼtiboran kuchga kiradi.

6. Mazkur qarorning ijrosini nazorat qilish shahar hokimining oʻrinbosari F.Alimov zimmasiga yuklatilsin.