Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son Qarorning 7-bandida 1-aprelga qadar vegetatsiya davri uchun va 1-oktabrga qadar kuz-qish davri uchun yakuniy isteʼmolchilar kesimida ekinlarni sugʻorish uchun suv olish limitlarini hududlar boʻyicha tasdiqlangan limit doirasida ishlab chiqilishini va tasdiqlash uchun xalq deputatlari tuman Kengashlariga kiritilishi belgilab qoʻyilgan. Shunga koʻra 2025-yil sugʻorish davri uchun suv olish limitlarini hududlar va manbalar boʻyicha tasdiqlab berish muvofiq deb belgilangan.

Qibray tumaniga 2025-yil sugʻorish davri uchun 251,34 mln m³ suv (limit) ajratilgan. Shundan 124,5 mln m³ suv qishloq xoʻjaligi ekinlarini sugʻorishga, 126,83 mln m³ suv sanoat tarmoqlariga taqsimlangan. Qishloq xoʻjaligi ekinlarini sugʻorish uchun ajratilgan 124,5 mln m³ suv hududlar va manbalar kesimida qayta taqsimlab chiqildi.

Yuqoridagilardan kelib chiqib Qibray tuman “Suv yetkazib berish xizmati” Davlat muassasasining 2025 yil 27-martdagi 82/11-84-sonli xatini inobatga olib, tuman “Suv yetkazib berish xizmati” Davlat muassasasi direktori U.Yuldashevning hisobotini tinglab “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6- va 24-moddalariga muvofiq Xalq deputatlari Qibray tuman Kengashi qaror qiladi:

1.Oʻzbekiston Respublikasi Prezidentining 2024 yil 5 yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son Qarori rahbarlik va ijro uchun qabul qilinsin.

2. Qibray tumani “Suv yetkazib berish xizmati” Davlat muassasasining 2025-yil 27-martdagi 82/11-84-sonli xati va tuman “Suv yetkazib berish xizmati” Davlat muassasasining direktori U.Yuldashevning hisoboti maʼlumot uchun qabul qilinsin.

3. Qibray tumani “Suv yetkazib berish xizmati” Davlat muassasasi tomonidan Qibray tumanida 2025-yil sugʻorish (vegetatsiya) davri uchun hududlar kesimida suv olish limiti 1-ilovaga muvofiq tasdiqlansin.

4. Qibray tumanida 2025 yil sugʻorish (vegetatsiya) davri uchun manbalar kesimida suv olish limiti 2-ilovaga muvofiq tasdiqlansin.

5. Mazkur qaror ijrosini nazorat qilish xalq deputatlari tuman Kengashining Agrar, qurilish, kommunal sohalari, ekologiya, sanoat va transport masalalari boʻyicha doimiy komissiyasi raisi A.Kasimov zimmasiga yuklatilsin.