Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son qarori ijrosini taʼminlash maqsadida hamda ushbu masala yuzasidan tuman “Suv yetkazib berish xizmati” davlat muassasasi direktori S. Shukurillayevning hisobotini tinglab va atroflicha muhokama qilib, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6 va 24-moddalariga muvofiq xalq deputatlari tuman Kengashi qaror qiladi:

1. Oʻzbekiston Respublikasi Prezidentining 2024-yil 5-yanvardagi “Quyi boʻgʻinda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari toʻgʻrisida”gi PQ-5-son qarori Rahbarlik va ijro uchun qabul qilinsin.

2. Tuman “Suv yetkazib berish xizmati” davlat muassasasi direktori S. Shukurillayevning Oʻzbekiston Respublikasi Prezidentining 2024-yil 5-yanvardagi PQ-5-son qarori ijrosini taʼminlash yuzasidan bergan hisoboti maʼlumot uchun qabul qilinsin.

3. Tumanda 2025-yil vegetasiya davrida isteʼmolchilar kesimida cheklangan suv olish limitlari 1 — 4-ilovalarga muvofiq tasdiqlansin.

4. Tuman “Suv yetkazib berish xizmati” davlat muassasasi direktori S. Shukurillayevga:

belgilangan limitlar asosida isteʼmolchilarga suv yetkazib berish;

oʻziga biriktirilgan hududda suvning hisobi va hisobotini yuritish;

sugʻorish tarmoqlari va ulardagi gidrotexnik inshootlarni soz holatda saqlash, taʼmirlash-tiklash tadbirlarini amalga oshirish;

suv olish joylarini suvni boshqarish va hisobga olish vositalari bilan jihozlash, suv monitoringi, hisobi va hisoboti yuritilishini raqamlashtirish;

isteʼmolchilar kesimida isteʼmol qilingan suv hajmi toʻgʻrisidagi maʼlumotlarni soliq organlariga taqdim etib borish;

suv isteʼmolchilarining buyurtmanomasi asosida boshqa suv xoʻjaligi xizmatlarini koʻrsatish vazifalari yuklatilsin.

5. Tuman hokimining oʻrinbosari A. Davronov, tuman “Suv yetkazib berish xizmati” davlat muassasasi direktori S. Shukurillayev va tuman soliq inspeksiyasi boshligʻi D. Umarov birgalikda tumanda isteʼmol qilingan suv miqdori hisobini yuritmagan (yuritishdan bosh tortgan) qishloq xoʻjaligi mahsulotlari ishlab chiqaruvchilari uchun suv soligʻi bazasi ushbu xalq deputatlari tuman Kengashi qarorining ilovasi bilan tasdiqlangan limitga nisbatan ikki barobar oshirilgan holda hisoblash choralarini koʻrib borsinlar.

6. Tuman “Suv yetkazib berish xizmati” davlat muassasasi direktorining Oʻzbekiston Respublikasi Prezidentining 2024-yil 5-yanvardagi PQ-5-son qarori ijrosi yuzasidan amalga oshirilgan ishlar toʻgʻrisida bir yilda ikki marta xalq deputatlari tuman Kengashiga hisobot berib borishi belgilab qoʻyilsin.

7. Mazkur Kengash qarorining bajarilishini nazorat qilishxalq deputatlari tuman Kengashining “Agrar, suv xoʻjaligi va ekologiya masalalari boʻyicha” doimiy komissiyasi raisi D. Abdurazaqov zimmasiga yuklansin.