Ўзбекистон Республикаси Ҳукумати ва Қозоғистон Республикаси Ҳукумати, кейинги ўринларда «Томонлар» деб аталувчилар,

Ўзбекистон ва Қозоғистон саноат ривожланишининг барқарорлигини рағбатлантириш ва ривожлантириш, хўжалик юритувчи субъектларнинг рақобатбардошлиги ва инновацион фаоллигини ошириш, минтақавий ва халқаро қўшилган қиймат занжирларига уланиш, шунингдек, қулай инвестиция муҳитини яратиш зарурлигини англаган ҳолда,

бозор муносабатлари ва экспортни қўллаб-қувватлаш асосида икки давлат хўжалик юритувчи субъектларининг тўғридан-тўғри ишлаб чиқариш ҳамкорлигининг ҳал қилувчи ўрнини ҳамда Томонлар хўжалик юритувчи субъектлари ўртасида саноат ва илмий-техникавий кооперацияни ўрнатиш ва ривожлантириш учун қулай шарт-шароит билан таъминлашни эътироф этиб,

қуйидагилар тўғрисида келишиб олдилар:

Ўзбекистон ва Қозоғистон қисмларидан ташкил топган саноат кооперацияси, иқтисодий ва инвестициявий ҳамкорлик мажмуаси ҳисобланган «Марказий Осиё» халқаро саноат кооперацияси маркази (кейинги ўринларда — «Марказ») шартлари мазкур Битим қоидалари, бошқа икки томонлама халқаро шартномалар, шунингдек, Томонлар давлатларининг қонунчилиги билан белгиланадиган ҳуқуқий ва иқтисодий режимга эгадир.

Марказнинг Қозоғистон қисми Қозоғистон Республикаси юрисдикцияси доирасида фаолият юритади.

Марказнинг Ўзбекистон қисми Ўзбекистон Республикаси юрисдикцияси доирасида фаолият юритади.

Марказнинг Ўзбекистон ва Қозоғистон қисмлари Томонларнинг ваколатли органлари тарафидан бошқарилади.

Қозоғистон Республикаси Савдо ва интеграция вазирлиги Марказнинг Қозоғистон қисмини бошқариш бўйича ваколатли орган ҳисобланади.

Ўзбекистон Республикаси Инвестициялар, саноат ва савдо вазирлиги Марказнинг Ўзбекистон қисмини бошқариш бўйича ваколатли орган ҳисобланади.

Ваколатли органларнинг расмий номланиши ўзгарган ёки қайта ташкил этилган ҳолларда, Томонлар дипломатик каналлар орқали дарҳол бир-бирларини хабардор қиладилар.

Томонлар Марказни бошқариш ва унинг фаолиятини таъминлаш, инвестицияларни жалб қилиш, хўжалик юритувчи субъектларга комплекс хизмат кўрсатиш, Марказдаги маъмурий, рухсат берувчи ва бошқа жараёнларни (хизматларни) амалга ошириш бўйича Томонларнинг давлат органлари фаолиятини «ягона дарча» принципи асосида мувофиқлаштириш, бошқа хизматларни кўрсатиш мақсадида мазкур Битим ва ўз давлатларининг қонунчилигига мувофиқ Марказнинг ўз ҳудудларидаги қисмида бошқарув компанияларини ташкил этадилар ва (ёки) белгилайдилар.

Марказ Томонлар давлатларининг чегараолди ҳудудларида, Ўзбекистон Республикаси билан Қозоғистон Республикасининг давлат чегараси чизиғининг ҳар икки томонида, бевосита «Гулистон» (Ўзбекистон Республикаси) ва «Атамекен» (Қозоғистон Республикаси) ўтказиш пунктлари ёнида жойлашган.

Томонлар давлатларининг қонунчилиги ва мазкур Битим қоидаларига мувофиқ, Марказнинг Ўзбекистон ва Қозоғистон қисмлари Давлат чегараси чизиғидан бошлаб чегара минтақасидан ташқарида жойлашган.

Марказни бошқариш ва унинг ҳудудида хўжалик юритувчи субъектларнинг фаолияти қатъий равишда унинг чегараси доирасида олиб борилади.

Ҳар бир Томон уни ўраб олиш бўйича самарали чоралар кўриш мажбуриятини олади.

Марказнинг умумий майдони 1 кв. км бўлиб, шундан Ўзбекистон ҳудуди 0,5 кв. кмни, Қозоғистон ҳудуди эса 0,5 кв. кмни ташкил этади.

Марказ ҳудудининг географик координаталари, жойлашуви схемаси ва чегаралари мазкур Битимнинг ажралмас қисми бўлган иловада келтирилган.

Ҳар бир Томон Марказнинг ўзига тегишли қисмида фуқароларнинг, товарлар (юклар) ва транспорт воситаларининг ҳаракатланиши устидан назоратни таъминлаш учун ички назорат-ўтказиш пунктларини ташкил этади.

Томонлар давлатларининг қонунчилигига мувофиқ, Марказ ҳудудида хўжалик юритувчи субъектлар Томонлар давлатлари ўртасида саноат кооперациясини ривожлантиришга қаратилган фаолият турларини олиб боришлари мумкин.

Марказ ҳудудида фаолиятни олиб бориш билан боғлиқ масалаларда келишмовчиликлар юзага келган ҳолларда, ваколатли органлар қўшма маслаҳатлашувлар ўтказадилар.

Марказнинг вазифаларига қуйидагилар киради:

давлатлараро кооперация алоқаларини ривожлантириш ва Томонлар давлатларининг кичик ва ўрта саноат корхоналарини халқаро қўшилган қиймат занжирларига интеграция қилиш учун қулай шарт-шароитлар яратиш;

чегараолди ҳудудларнинг ишлаб чиқариш базасидан фойдаланиш самарадорлигини ошириш;

ишлаб чиқариш жараёнларини оптималлаштириш ва Марказ ҳудудида ташкил этиладиган саноат корхоналарининг рақобатбардошлигини ошириш;

технологик модернизация, инновацион ва илмий ҳажмдор ишлаб чиқаришни ривожлантириш, замонавий технологиялар интеграциялашуви;

корхоналар харажатларини ишлаб чиқарилаётган саноат маҳсулотларига хизмат кўрсатиш аутсорсинги ҳисобидан оптималлаштириш;

Марказ ҳудудида фаолият юритувчи саноат корхоналарини ишлаб чиқариш жараёнига жалб этиш ва импорт ўрнини босувчи маҳсулотлар ишлаб чиқаришни йўлга қўйиш орқали Томонлар давлатларининг саноат кооперациясини кенгайтириш;

бизнес-режа, шунингдек, саноат кооперациясини ривожлантириш режаларига мувофиқ, саноат кооперацияси майдонида саноат маҳсулотлари ишлаб чиқариш, ишларни бажариш ва хизмат кўрсатишни ташкил этиш;

Томонлар давлатларининг қонунчилиги ва мазкур Битимга мувофиқ ишлаб чиқариш кооперацияси фаолияти учун шарт-шароитлар яратиш ва таъминлаш жараёнига лойиҳа ва қурилиш ташкилотларини жалб қилиш.

Марказ ҳудудида солиққа тортиш Томонлар давлатларининг қонунчилиги ва уларнинг давлатлари аъзо ҳисобланган халқаро шартномаларга мувофиқ амалга оширилади.

Марказнинг Ўзбекистон ва Қозоғистон қисмлари ҳудудларида валюта назорати Томонлар давлатларининг қонунчилигига мувофиқ амалга оширилади.

Марказ ҳудудида тўловлар ва пул ўтказмалари Томонлар давлатларининг қонунчилигига мувофиқ белгиланадиган жорий операциялар учун эркин айирбошлаш принципи асосида амалга оширилади.

Марказнинг Ўзбекистон ва Қозоғистон қисмларида банклар филиалларини очиш, шунингдек, уларнинг фаолияти Томонлар давлатларнинг қонунчилигига мувофиқ олиб борилади, тартибга солинади ва назоратга олинади.

Марказ ҳудудида жойлашган корхоналар, муассасалар ва ташкилотларда суғурта шартномалари улар жойлашган давлатнинг қонунчилигида белгиланган тартибда тузилади.

Транспорт инфратузилмаси, сув таъминоти, электр таъминоти, телекоммуникация, муҳандислик муҳофазаси ва бошқа муҳандислик коммуникациялари, назорат пункти, назорат ва текшириш инфратузилмасини, маъмурий бошқарувни ташкил этиш, шунингдек, Марказ ҳудудини чегаралаш бўйича лойиҳалаш, қуриш ва таъмирлаш ишларини молиялаштириш ҳар бир Томоннинг маблағлари, хусусан, уларнинг қонунчилигида тақиқланмаган ҳар қандай манбалар ҳисобидан амалга оширилади.

Марказ ҳудудида турли бизнес бинолари, терминаллар ва тадбиркорлик фаолияти учун бошқа объектлар қурилишини молиялаштириш Томонлар давлатларининг қонунчилигига мувофиқ хўжалик юритувчи субъектларнинг ўз маблағлари ҳисобидан амалга оширилади.

Марказ ҳудудида Томонлар давлатларининг қонунчилигини ҳисобга олган ҳолда, халқаро қурилиш меъёрлари, қоидалари, стандартларини қўллашга рухсат берилади.

Марказ ҳудудида қурилиш ишлари бош режалар асосида амалга оширилади. Марказнинг ҳар бир қисми бош режаларини ишлаб чиқиш, уларга ўзгартириш ва қўшимчалар киритиш Томонлар давлатларнинг қонунчилигида ўрнатилган тартибда амалга оширилади.

Марказнинг бир қисмидан бошқа қисмига ҳаракатланаётган шахслар, транспорт воситалари, юклар, товарлар ва ҳайвонлар Томонлар давлатларининг қонунчилиги ва уларнинг давлатлари аъзо ҳисобланган халқаро шартномаларга мувофиқ халқаро қатнов учун очиқ бўлган «Гулистон» (Ўзбекистон Республикаси) ва «Атамекен» (Қозоғистон Республикаси) назорат-ўтказиш пунктларида чегара, божхона ва бошқа турдаги назоратидан ўтказилади.

Томонлар давлатларининг, учинчи давлатлар фуқаролари ва фуқаролиги бўлмаган шахслар, Томонлар давлатларидан бирининг Маркази ҳудудига фаолият юритаётган назорат пунктлари орқали амалдаги ҳужжатлар асосида киришлари, ундан чиқишлари ва вақтинча бўлиб туришлари мумкин.

Марказнинг Қозоғистон қисми ҳар куни соат 10:00 дан 19:00 гача фаолият юритади.

Марказнинг Ўзбекистон қисми ҳар куни соат 09:00 дан 18:00 гача фаолият юритади.

Томонлар Марказнинг ўзларига тегишли қисмида хавфсизликни таъминлаш ва жамоат тартиби сақлаш бўйича давлат органларини, шунингдек, зарурат бўлганда, ўз давлатининг тегишли рухсатномасига (лицензияга) эга бўлган, шартнома асосида муҳофаза фаолиятини амалга оширувчи ташкилотларни жойлаштиришлари мумкин.

Марказ ҳудудида жойлашган хавфсизликни таъминлаш ва жамоат тартибини сақлаш бўйича давлат органларининг вазифаларига қуйидагилар киради:

Марказ ҳудудида хавфсизлик ва ҳуқуқий тартибни таъминлаш;

Томонлар давлатларининг қонунчилигига мувофиқ ҳар хил турдаги ҳуқуқбузарликлар ва жиноятларнинг олдини олиш ва уларга қарши курашиш;

Марказнинг ўзига тегишли қисмида назорат ва патруллик қилиш.

Марказ ҳудудида хавфсизлик ва ҳуқуқий тартиботни таъминлаш мақсадида Томонларнинг давлат органлари идоралараро даражада ўзаро ҳамкорликнинг тегишли механизмини ўрнатадилар.

Томонлар самарали назоратни амалга ошириш мақсадида Марказ периметри атрофида назорат тизими ва ёритиш мосламалари билан жиҳозланган махсус тўсиқ ўрнатадилар.

Томонлар Марказ ҳудудида тегишли санитария-эпидемиологик, ветеринария, фитосанитария назорати ва техник жиҳатдан тартибга солиш давлат назорати, шунингдек, ўз давлатлари қонунчилигига мувофиқ бошқа назорат турларини амалга оширадилар.

Томонларнинг масъул органлари юқумли касалликларни назорат қилиш, ўсимликлар ва ҳайвонлар карантини соҳасида ўзаро ҳамкорликни амалга оширадилар ва мустаҳкамлайдилар, шунингдек, эпизоотик ва фитосанитария ҳолати, эпидемиологик вазият ва уларни бартараф этиш бўйича ўз вақтида кўрилган чоралар тўғрисида ўзаро хабардор қилишлари лозим.

Фуқаролар меҳнат фаолияти қабул қилувчи давлатнинг қонунчилигига асосан амалга оширадилар.

Мазкур Битимни талқин қилиш ва қўллашда келишмовчиликлар юзага келган тақдирда, Томонлар уларни маслаҳатлашувлар ва музокаралар йўли билан ҳал қиладилар.

Томонлар ўзаро келишувга биноан, мазкур Битимга унинг ажралмас қисми бўлган ва алоҳида баённомалар билан расмийлаштириладиган ўзгартириш ва қўшимчалар киритилиши мумкин.

Мазкур Битим номуайян муддатга тузилади ва Томонлар унинг кучга кириши учун зарур бўлган давлат ички процедураларини бажарганлиги тўғрисида дипломатик каналлар орқали сўнгги ёзма хабарнома олинган санадан бошлаб 30 (ўттиз) календар кун ўтгандан сўнг кучга киради.

Ҳар бир Томон бошқа Томонни дипломатик каналлар орқали ёзма равишда хабардор қилиш орқали мазкур Битимнинг амал қилишини тугатиши мумкин. Бундай ҳолатда, мазкур Битим ушбу хабарнома олинган санадан бошлаб тўқсон (90) календар кун ўтгандан сўнг тугатилади.

Тошкент шаҳрида, 2023 йил 9 ноябрда, икки нусхада, ҳар бири ўзбек, қозоқ ва рус тилларида тузилди, бунда барча матнлар бир хил кучга эга.

Матнлар ўртасида тафовутлар юзага келган тақдирда, Томонлар рус тилидаги матнга мурожаат қиладилар.