Oʻzbekiston Respublikasi Yer kodeksining 3-moddasi, Qoraqalpogʻiston Respublikasi “Yer toʻgʻrisida”gi Qonunining 4 va 23-moddalari, Oʻzbekiston Respublikasi Prezidentining 2025-yil 27-yanvardagi “Qoraqalpogʻiston Respublikasida tadbirkorlikni yanada qoʻllab-quvvatlash hamda aholi farovonligini taʼminlash uchun yangi imkoniyatlarni yaratish boʻyicha qoʻshimcha chora-tadbirlar toʻgʻrisida”gi Farmoni ijrosini taʼminlash maqsadida, Qoraqalpogʻiston Respublikasi Vazirlar Kengashining “Qoraqalpogʻiston Respublikasi Vazirlar Kengashi toʻgʻrisida”gi Qonunining 8, 35-moddalariga asosan Qoraqalpogʻiston Respublikasi Vazirlar Kengashi qaror qiladi:

1. Oʻzbekiston Respublikasi Prezidentining 2025-yil 27-yanvardagi “Qoraqalpogʻiston Respublikasida tadbirkorlikni yanada qoʻllab-quvvatlash hamda aholi farovonligini taʼminlash uchun yangi imkoniyatlarni yaratish boʻyicha qoʻshimcha choratadbirlar toʻgʻrisida”gi Farmoniga muvofiq 2025-2027-yillarda Nukus shahrida qiymati kamida 500 ming AQSH dollari, Amudaryo, Nukus, Qoʻngʻirot va Xoʻjayli tumanlarida 300 ming AQSH dollari, qolgan tumanlarda esa 100 ming AQSH dollari ekvivalentida boʻlgan yirik investitsiya loyihalari uchun shu jumladan chet el investitsiyalari ishtirokidagi korxonalarga yer uchastkalari (shu jumladan, maxsus iqtisodiy zonalar, kichik sanoat zonalari, yoshlar sanoat va tadbirkorlik zonalaridagi yer uchastkalari)ni eng yaxshi taklifni tanlash asosida yer uchastkalariga uzoq muddatli ijara huquqini baholovchi tashkilot tomonidan aniqlanadigan bozor qiymatiga nisbatan koeffitsiyentlarda belgilanadigan miqdordagi mablagʻni Qoraqalpogʻiston Respublikasi respublika byudjetiga toʻlash sharti bilan Qoraqalpogʻiston Respublikasi Vazirlar Kengashi qarori asosida yer uchastkalarini toʻgʻridan toʻgʻri ijara huquqi asosida ajratishga ruxsat berilganligi maʼlumot uchun qabul qilinsin.

2. Quyidagilar:

Yirik investitsiya loyihasini amalga oshirish uchun eng yaxshi taklifni tanlab olish va yer uchastkalarni toʻgʻridan toʻgʻri ijaraga berish tartibi toʻgʻrisidagi nizom 1-ilovaga muvofiq;

Yirik investitsiya loyihasini amalga oshirish uchun eng yaxshi taklifni tanlab olish va yer uchastkalarini toʻgʻridan-toʻgʻri ijaraga berish masalasini koʻrib chiqish boʻyicha komissiya tarkibi 2-ilovaga muvofiq tasdiqlansin.

3. Shunday tartib oʻrnatilsinki, unga muvofiq Qoraqalpogʻiston Respublikasi Vazirlar Kengashining qarori asosida toʻgʻridan-toʻgʻri ijara huquqi asosida ajratiladigan yer uchastkalariga uzoq muddatli ijara toʻlovining bozor qiymatiga nisbatan 0,01 dan 0,5 gacha kamaytiruvchi koeffitsentlar Yirik investitsiya loyihasini amalga oshirish uchun eng yaxshi taklifni tanlab olish va yer uchastkalarini toʻgʻridan toʻgʻri ijaraga berish masalasini koʻrib chiqish boʻyicha komissiya tomonidan belgilanadi.

4. Kadastr agentligi Qoraqalpogʻiston Respublikasi boshqarmasi (I. Tleuov) Qoraqalpogʻiston Respublikasi Qurilish va uy-joy kommunal xoʻjaligi vazirligi (K. Aytbayev), “Oʻzdaverloyiha” DILI Qoraqalpogʻiston boʻlimi (J. Yerejepov) bilan birgalikda joriy yilning 1-iyun sanasiga qadar, keyinchalik 2026-2027-yillarning 10-yanvar sanasiga qadar investitsiya loyihalari uchun toʻgʻridan-toʻgʻri beriladigan va auksionga chiqariladigan yer uchastkalarining roʻyxatini mazkur qaror bilan tasdiqlangan Nizomda belgilangan tartibda kelishgan holda Qoraqalpogʻiston Respublikasi Vazirlar Kengashiga kiritsin.

Bunda:

tasdiqlangan roʻyxatdagi toʻgʻridan-toʻgʻri beriladigan va auksionga chiqariladigan yer uchastkalarning aniq maydonlari koʻrsatilgan holda kelishiladi;

qishloq xoʻjaligiga moʻljallanmagan yer uchastkalari boʻyicha — Qurilish va uy-joy kommunal xoʻjaligi vazirligi;

qishloq xoʻjaligiga moʻljallangan yer uchastkalari boʻyicha — “Oʻzdaverloyiha” DILI Qoraqalpogʻiston boʻlimi tomonidan yer uchastkalari uchun ruxsat etilgan foydalanishning asosiy turlari mustaqil tartibda belgilanadi.

5. Qoraqalpogʻiston Respublikasi Vazirlar Kengashi Raisining oʻrinbosarlari (Sh. Teshayev, T. Yusupov) investitsiya loyihalari uchun toʻgʻridan-toʻgʻri beriladigan va auksionga chiqariladigan yer uchastkalarining roʻyxatlarini belgilangan tartibda koʻrib chiqib, joriy yilning 10-iyun sanasiga qadar, keyinchalik 2026-2027-yillarning 15-yanvar sanasiga qadar tasdiqlatish choralarini koʻrsin.

6. Qoraqalpogʻiston Respublikasi Vazirlar Kengashining Axborot xizmati (B. Xojanov) investitsiya loyihalari uchun toʻgʻridan-toʻgʻri beriladigan va auksionga chiqariladigan yer uchastkalarining tasdiqlangan roʻyxatini tasdiqlangan kunning oʻzida Qoraqalpogʻiston Respublikasi Vazirlar Kengashining rasmiy veb-saytda eʼlon qilib borsin.

7. Vazirlik, idora va tashkilotlar bir oy muddatda oʻzlari tomonidan qabul qilingan hujjatlarini ushbu qaror talablariga muvofiqlashtirsin.

8. Mazkur qarorning bajarilishini taʼminlash va nazorat qilish Qoraqalpogʻiston Respublikasi Vazirlar Kengashi Raisining oʻrinbosarlari (Jollibekov, Teshaev va Yusupov) zimmalariga yuklansin.

1. Mazkur Nizom 2025 — 2027 yillarda Nukus shahrida qiymati kamida 500 ming AQSH dollari, Amudaryo, Nukus, Qoʻngʻirot va Xoʻjayli tumanlarida 300 ming AQSH dollari, qolgan tumanlarda esa 100 ming AQSH dollari ekvivalentida boʻlgan yirik investitsiya loyihalari uchun loyiha tashabbuskorlariga, shu jumladan chet el investitsiyalari ishtirokidagi korxonalarga yer uchastkalari (shu jumladan, maxsus iqtisodiy zonalar, kichik sanoat zonalari, yoshlar sanoat va tadbirkorlik zonalaridagi yer uchastkalari)ni eng yaxshi taklifni tanlash asosida yer uchastkalariga uzoq muddatli ijara huquqini baholovchi tashkilot tomonidan aniqlanadigan bozor qiymatiga nisbatan koeffitsiyentlarda belgilanadigan miqdordagi mablagʻni Qoraqalpogʻiston Respublikasi respublika budjetiga toʻlash sharti bilan yirik investitsiya loyihalari uchun Qoraqalpogʻiston Respublikasi Vazirlar Kengashi qarori asosida yer uchastkalarini toʻgʻridan-toʻgʻri ijara huquqi bilan berish tartibini belgilaydi.

Mazkur Nizom yer uchastkalarni jamoat ehtiyojlari,yakka tartibdagi uy-joy va koʻp kvartirali uylar qurilishi uchun ajiratishga nisbatan tatbiq etilmaydi.

2. Ushbu Nizomda quyidagi asosiy tushunchalardan foydalaniladi:

yer uchastkasi – binolar va inshootlar joylashmagan, jismoniy va yuridik shaxslarga qonunchilikka muvofiq ajratib berilmagan, (shu jumladan, erkin iqtisodiy zonalar, kichik sanoat zonalari, yoshlar sanoat va tadbirkorlik zonalari hududlaridagi yer uchastkalari) chegara, maydoni va joylashish manziliga ega qishloq xoʻjaligiga moʻljallangan va qishloq xoʻjaligiga moʻljallanmagan yer uchastkasi.

ishchi organ – Qoraqalpogʻiston Respublikasi Vazirlar Kengashi huzuridagi Tadbirkorlikka koʻmaklashish direksiyasi;

talabgor – amalga oshirish uchun taklif sifatida investitsiya loyihasini taqdim etgan jismoniy va yuridik shaxslar, shu jumladan Oʻzbekiston Respublikasidagi rezident hisoblangan jismoniy va yuridik shaxslar hamda chet el investitsiyasi ishtirokidagi korxonalar;

investitsiya loyihalari – Nukus shahrida qiymati kamida 500 ming AQSH dollari, Amudaryo, Nukus, Qoʻngʻirot va Xoʻjayli tumanlarida 300 ming AQSH dollari, qolgan tumanlarda esa 100 ming AQSH dollari ekvivalentida boʻlgan yirik investitsiya loyihalari;

tarmoq jadvali – investitsiya kiritish sharti bilan toʻgʻridan-toʻgʻri ajratib beriladigan yer maydonida loyiha doirasida amalga oshirilishi belgilangan ishlar toʻgʻrisidagi jadval;

Respublika komissiyasi – Yirik investitsiya loyihasini amalga oshirish uchun eng yaxshi taklifni tanlab olish va yer uchastkalarini toʻgʻridan-toʻgʻri ijaraga berish masalasini koʻrib chiqish boʻyicha komissiyasi;

tanlangan yer uchastkasi – talabgorning Qoraqalpogʻiston Respublikasi Vazirlar Kengashining rasmiy veb-saytida eʼlon qilingan investitsiya loyihalari uchun toʻgʻridan-toʻgʻri beriladigan yer uchastkalarining tasdiqlangan roʻyxati yoki talabgor tomonidan mustaqil tanlanib, vakolatli tashkilot bilan kelishilgan, shuningdek, erkin iqtisodiy zonalar, kichik sanaot zonalari, yoshlar sanoat va tadbirkorlik zonalaridan tanlagan yer uchastkasi;

sanoat zonalari – erkin iqtisodiy zonalar, kichik sanaot zonalari, yoshlar sanoat va tadbirkorlik zonalari.

3. Investitsiya loyihasi doirasida yer uchastkalari:

qishloq xoʻjaligiga moʻljallanmagan yerlarda – qonunchilik hujjatlari bilan taqiqlanmagan faoliyatni amalga oshirish maqsadida;

qishloq xoʻjaligiga moʻljallangan yerlarda – qishloq xoʻjaligi mahsulotlarini, sanoat mahsulotlarini ishlab chiqarish uchun xomashyo sifatida foydalaniladigan oʻsimliklar turlarini, shuningdek, chorvachilik va parrandachilik yoʻnalishlarda ozuqabop mahsulotlarini yetishtirish maqsadida qoʻshilgan qiymat zanjirini yaratish (qayta ishlash, qadoqlash yoki saqlash obyektlarini qurish) sharti bilan ajratib beriladi.

Bunda, talabgorga obyektlarni qurish uchun yer uchastkasi qishloq xoʻjaligiga moʻljallanmagan yerlardan loyiha doirasida ajratib beriladi va belgilangan investitsiya miqdori hisobidan yuritiladi.

4. Investitsiya loyihasi doirasida ajratiladigan yer uchastkalari boʻyicha taklif va xulosalar Respublika komissiyasining yigʻilish bayonnomasi asosida rasmiylashtiriladi.

5. Investitsiya loyihasini amalga oshirish uchun yer uchastkasi Qoraqalpogʻiston Respublikasi Vazirlar Kengashining qarori asosida:

jismoniy va yuridik shaxslarga qishloq xoʻjaligiga moʻljallangan va qishloq xoʻjaligiga moʻljallanmagan yerlar — 49 yil muddatga;

Oʻzbekiston Respublikasidagi rezident hisoblangan jismoniy va yuridik shaxslar hamda chet el investitsiyasi ishtirokidagi korxonalarga qishloq xoʻjaligiga moʻljallangan va qishloq xoʻjaligiga moʻljallanmagan yerlar — 25 yildan oshmaydigan muddatga ijaraga beriladi.

6. Investitsiya loyihasini amalga oshirish uchun beriladigan yer uchastkalarining maydoni Respublika komissiyasi yigʻilishining qarori asosida investitsiya loyihasi hajmidan kelib chiqib belgilanadi.

7. Qoraqalpogʻiston Respublikasi Vazirlar Kengashi har yili 15-yanvarga qadar investitsiya loyihalari uchun toʻgʻridan-toʻgʻri beriladigan yer uchastkalarining roʻyxatini tasdiqlab, oʻz rasmiy veb-saytida eʼlon qilib boradi.

Talabgor tomonidan oʻz loyihasining xususiyatlaridan kelib chiqib, eʼlonga chiqarilgan yer uchastkalarining maʼlum bir qismini tanlab, shu qismini ajratib berish boʻyicha murojaat qilishi mumkin.

Bunda yer uchastkalar Yer kodeksi talablariga muvofiq taqsimlanadi.

Eʼlonga chiqarilgan yer uchastkalarining roʻyxati zaruratga koʻra yangilab boriladi.

8. Davlat kadastrlar palatasi Qoraqalpogʻiston Respublikasi boshqarmasi, boʻsh turgan yer maydonlarini aniqlaydi va investitsiya loyihalari uchun toʻgʻridan-toʻgʻri beriladigan va auksionga chiqariladigan yer maydonlarining roʻyxatini Qoraqalpogʻiston Respublikasi Vazirlar Kengashiga kiritadi.

9. Qoraqalpogʻiston Respublikasi Vazirlar Kengashi investitsiya loyihalari uchun toʻgʻridan-toʻgʻri beriladigan va auksionga chiqariladigan yer maydonlarini ajratgan holda tasdiqlaydi.

10. Davlat kadastrlar palatasi Qoraqalpogʻiston Respublikasi boshqarmasi qishloq xoʻjaligiga moʻljallanmagan yerlarda mazkur nizomning 2-ilovasiga, qishloq xoʻjaligiga moʻljallangan yerlarda 3-ilovasiga muvofiq shaklda investitsiya loyihalari uchun toʻgʻridan-toʻgʻri beriladigan yer maydonlari chegaralariga aniqlik kiritib, sxematik xaritasini ishlab chiqadi va Ishchi organga taqdim etadi.

11. Ishchi organ mazkur nizomning 2-ilovasiga muvofiq tayyorlangan yer uchastkasi sxematik xaritasini Qoraqalpogʻiston Respublikasi Qurilish va uy-joy kommunal xoʻjaligi vazirligiga, 3-ilovasiga muvofiq tayyorlangan yer uchastkasi sxematik xaritasini “Oʻzdaverloyiha” davlat ilmiy-loyihalash institutiga yuboradi.

12. Qoraqalpogʻiston Respublikasi Qurilish va uy-joy kommunal xoʻjaligi vazirligi yer uchastkalari toʻgʻrisida hujjatlar kelib tushgan kundan Shaharsozlik hujjati mavjud boʻlgan taqdirda, uch ish kuni davomida yer uchastkalarini koʻrib chiqadi, ajratiladigan yer uchastkalari boʻyicha xulosa tayyorlaydi. Shuningdek, qishloq xoʻjaligiga moʻljallanmagan yer uchastkalari boʻyicha shaharsozlik normalariga muvofiq yer uchastkalaridan ruxsat etilgan foydalanishning asosiy turlarini belgilaydi va uni tegishlicha Ishchi organga yuboradi.

Bunda xulosa ijobiy yoki salbiy boʻlishi mumkin.

Agar shaharsozlik hujjatlari mavjud boʻlmagan taqdirda, yer uchastkalari toʻgʻrisida hujjatlar hududiy arxitektura shaharsozlik kengashida (keyingi oʻrinlarda Kengash deb yuritiladi) koʻrib chiqiladi.

Kengash oʻz majlisida mazkur yer uchastkalarni besh ish kunidan kechiktirmasdan koʻrib chiqib, kelishadi yoki rad etadi.

Kengash kelishgan yoki kelishish rad etilgan taqdirda shu kunning oʻzida natijasi yuzasidan Ishchi organga tegishli hujjatlarni taqdim qiladi.

13. “Oʻzdaverloyiha” davlat ilmiy-loyihalash instituti yer uchastkalari toʻgʻrisida hujjatlar kelib tushgan kundan uch ish kuni davomida yer uchastkalarini koʻrib chiqadi, ajratiladigan yer uchastkalari boʻyicha xulosasini va mazkur Nizomning 4-ilovasiga muvofiq yer uchastkasining konturlar boʻyicha hisoblash qaydnomasi, ball boniteti va yerning normativ qiymati toʻgʻrisidagi maʼlumotlarni tayyorlaydi.

Shuningdek, “Oʻzdaverloyiha” davlat ilmiy-loyihalash instituti qishloq xoʻjaligiga moʻljallangan yer uchastkalari boʻyicha yer uchastkalaridan ruxsat etilgan foydalanishning asosiyturlarini mustaqil tartibda belgilaydi va Ishchi organga yuboradi.

Bunda xulosa ijobiy yoki salbiy boʻlishi mumkin.

14. Ishchi organ investitsiya loyihalari doirasida toʻgʻridan-toʻgʻri beriladigan yer uchastkalarining ajratilishi yuzasidan tegishli hujjatlarini quyidagi vazirlik va idoralar bilan (keyingi oʻrinlarda vakolatli tashkilotlar deb yuritiladi) kelishilishini taʼminlaydi:

Qoraqalpogʻiston Respublikasi Qishloq xoʻjaligi vazirligi;

Qoraqalpogʻiston Respublikasi Suv xoʻjaligi vazirligi;

“Oʻzdaverloyiha” DILI Qoraqalpogʻiston boʻlimi;

Qoraqalpogʻiston Respublikasi Favqulodda vaziyatlar boshqarmasi;

Sanitariya-epidemiologik osoyishtalik va jamoat salomatligi xizmati;

Qoraqalpogʻiston Respublikasi Ekologiya, atrof-muhitni muhofaza qilish va iqlim oʻzgarishi vazirligi;

Togʻ-kon sanoati va geologiya vazirligi huzuridagi Togʻ-kon, geologiya va sanoat xavfsizligini nazorat qilish inspeksiyasi shimoliy mintaqaviy boshqarmasi;

Avtomobil yoʻllari hududiy bosh boshqarmasi;

“Qoraqalpoqsuvtaʼminot” MCHJ;

“Hududiy elektr tarmoqlari” AJ Qoraqalpogʻiston hududiy filiali;

“Hududgaz Qoraqalpogʻiston” gaz taʼminoti filiali;

“Oʻzbektelekom” Qoraqalpogʻiston Respublikasi filiali.

Zarur hollarda boʻsh yer uchastkalari sanoat yerlari, temir yoʻllar, aeroport, mudofaa, ichki ishlar va boshqa maqsadlardagi yerlar tarkibiga kirgan yoki yaqin hududlarda joylashganda ushbu vazirlik va idoralar bilan kelishiladi.

Mazkur vakolatli tashkilotlar tomonidan asoslantirilgan xulosalar uch ish kuni ichida Ishchi organga taqdim etilishi lozim.

Vakolatli tashkilotlar tomonidan salbiy xulosa berilgan yoki kelishilmagan taqdirda, ularning xulosalarida investitsiya loyihasini amalga oshirishga toʻqsinlik qiluvchi omillar hamda ushbu omillarni bartaraf etish imkoni boʻlsa, bartaraf etish usullari va investitsiya loyihasini ilgari surish boʻyicha tavsiya va koʻrsatmalar nazarda tutiladi.

Salbiy xulosada normativ-huquqiy hujjatning muayyan normasiga tayangan holda, boʻsh yer uchastkasini ajratish imkoni yoʻqligining aniq sabablari koʻrsatiladi.

15. Vakolatli tashkilotlar tomonidan tanlangan yer uchastkasi boʻyicha qisman salbiy (toʻliq ajratish imkoni boʻlmagan) xulosa berilgan taqdirda Ishchi organ yer uchastkasini ajratish materiallarini qayta tayyorlash boʻyicha Davlat kadastrlar palatasi Qoraqalpogʻiston Respublikasi boshqarmasiga yuboradi.

16. Davlat kadastrlar palatasi Qoraqalpogʻiston Respublikasi boshqarmasi yer uchastkalar sxematik xaritalarini uch ish kuni ichida qayta tayyorlaydi va Ishchi organga taqdim etadi.

Bunda, Ishchi organ faqat salbiy xulosa bergan vakolatli tashkilot bilan hujjatlarini qayta kelishadi.

17. Ishchi organ Davlat kadastrlar palatasi Qoraqalpogʻiston Respublikasi boshqarmasi tomonidan ishlab chiqilgan investitsiya loyihalari uchun toʻgʻridan-toʻgʻri beriladigan yer uchastkalarining yakuniy sxematik xaritalarini bir ish kuni ichida Qoraqalpogʻiston Respublikasi Vazirlar Kengashiga tasdiqlash uchun kiritadi.

18. Qoraqalpogʻiston Respublikasi Vazirlar Kengashi investitsiya loyihalari uchun toʻgʻridan-toʻgʻri beriladigan yer uchastkalarining sxematik xaritasi bilan birga roʻyxatini bir ish kuni ichida tasdiqlaydi va rasmiy veb-saytda eʼlon qilib boradi.

19. Talabgorlar investitsiya loyihasini amalga oshirish uchun yer uchastkasini ajratish boʻyicha Qoraqalpogʻiston Respublikasi Vazirlar Kengashi Raisi nomiga ushbu Nizomning 1-ilovasidagi shaklga muvofiq ariza bilan murojaat qiladi.

Arizaga quyidagilar ilova qilinadi:

a) investitsiya loyihasini amalga oshirish rejalashtirilayotgan yer uchastkasining kelishilgan sxematik xaritasi (zaruratga koʻra ushbu Nizomga 2-, 3- va 4-ilovalarga muvofiq);

b) investitsiya loyihasini amalga oshirish bosqichlari, usullari, mexanizmlari va asoslantirilgan hisob-kitob maʼlumotlari, shu jumladan, ishlab chiqarish (xizmat koʻrsatish, qishloq xoʻjaligi va h.k.) quvvatlari (miqdor va qiymat koʻrinishida), mahsulotlar eksporti hajmi, import oʻrnini bosuvchi mahsulotlar ishlab chiqarish hajmi, budjetga tushumlar koʻrsatkichlari, yaratiladigan ish oʻrinlari soni toʻgʻrisidagi maʼlumotlar aks ettirilgan biznes-reja;

v) investitsiya loyihasi doirasida qurilishi rejalashtirilgan obyektning eskiz loyihasini;

g) ushbu Nizomga 5-ilovaga muvofiq amalga oshirilishi belgilangan loyihaga yer ajratish bosqichidan boshlab loyiha ishga tushirilgunga qadar boʻlgan muddatlarni (yer tekislash, qurilish ishlari, asbob-uskunalarni olib kelish hamda oʻrnatish, tashqi infratuzilma obyektlariga ulanish va h.k.) hamda loyihani moliyalashtirish manbalarini belgilab beruvchi tarmoq jadvali.

20. Davlat kadastrlari palatasi Qoraqalpogʻiston Respublikasi boshqarmasi talabgorning investitsiya loyihasini amalga oshirish uchun tanlagan yer uchastkaning sxematik xaritasini tayyorlashda (koordinatali nuqtalari) yer uchastkasining chegaralari, yer toifasi, zaxirada ekanligi, chegara tavsiflari toʻgʻrisidagi maʼlumotlarni kiritib, talabgorga taqdim etadi.

Bunda, ushbu bandda nazarda tutilgan hujjatlarni tayyorlashda talabgordan hech qanday toʻlov undirilmaydi.

21. Qoraqalpogʻiston Respublikasi Vazirlar Kengashi tomonidan talabgorning arizasi bir ish kuni ichida Ishchi organga yuboriladi.

Ishchi organ kelib tushgan ariza va unga ilova qilingan hujjatlarni uch ish kuni ichida koʻrib chiqadi.

Ushbu Nizomning 19-bandida qayd etilgan barcha hujjatlar toʻliq mavjud boʻlmasa yoki hujjatlarda kamchilik mavjud boʻlsa, Ishchi organ hujjatlarni talabgorga bartaraf etilishi lozim boʻlgan kamchiliklarni koʻrsatgan holda qaytarishi yoki talabgordan tegishli hujjatlarni soʻrab olishi mumkin.

22. Talabgor tomonidan taqdim etilgan hujjatlarda kamchiliklar aniqlanmasa, Ishchi organ investitsiya loyihasi va tanlangan yer uchastkasi toʻgʻrisidagi hujjatlarni Respublika komissiyasiga koʻrib chiqish uchun kiritadi.

23. Respublika komissiyasi ishchi organ tomonidan taqdim etilgan hujjatlarni uch ish kuni ichida konseptual jihatdan koʻrib chiqadi hamda investitsiya loyihasini amalga oshirish va tanlangan yer uchastkasini ajratish maqsadga muvofiqligi yoki maqsadga muvofiq emasligi boʻyicha aniq asoslarini koʻrsatgan holda qaror qabul qiladi.

Bunda, Respublika komissiyasi talabgorlarning investitsiya loyihasini quyidagi mezonlar asosida baholashni amalga oshiradi:

kiritiladigan (jalb qilinadigan) investitsiya miqdori;

ishlab chiqarish (xizmat koʻrsatish, qishloq xoʻjaligi va h.k.) quvvatlari (miqdor va qiymat koʻrinishida);

mahsulotlar eksporti hajmi;

import oʻrnini bosuvchi mahsulotlar ishlab chiqarish hajmi;

budjetga tushumlar koʻrsatkichlari;

yaratiladigan ish oʻrinlari soni;

tarmoq jadvaliga muvofiq amalga oshiriladigan ishlari va loyihani ishga tushirish muddati.

24. Investitsiya loyihalarini amalga oshirish istagini bildirib, bitta konturdagi yer uchastkasiga bir nechta talabgorlar tomonidan yer uchastkasini ajratish boʻyicha arizalar kelib tushgan taqdirda Respublika komissiyasi ushbu Nizomning 23-bandida belgilangan mezonlar asosida eng yaxshi taklifni tanlab oladi va qaror qabul qiladi.

Agar, Qoraqalpogʻiston Respublikasi Vazirlar Kengashi tomonidan tasdiqlangan roʻyxatdan tanlangan yer uchastkasida (shu jumladan sanoat zonalaridagi) investitsiya loyihasini amalga oshirishda bitta talabgordan ariza kelib tushgan kundan boshlab besh kun ichida muqobil taklif kelib tushmagan taqdirda Respublika komissiyasi talabgorning arizasini belgilangan tartibda koʻrib chiqib, qaror qabul qiladi.

Bunda, talabgorga ajratiladigan yer uchastkasining maydoni investitsiya hajmiga qarab Respublika komissiyasi tomonidan oʻzgartirilishi mumkin.

25. Respublika komissiyasi tomonidan talabgorning taklif qilgan investitsiya loyihasini amalga oshirish va yer uchastkasini ajratish maqsadga muvofiq emasligi boʻyicha qaror qabul qilingan taqdirda, Ishchi organ talabgorga bir ish kuni ichida tanlangan yer uchastkasini ajratish rad etilganligi toʻgʻrisida asoslantirilgan holda yozma javob beradi.

26. Respublika komissiyasining investitsiya loyihasi doirasida yer uchastkasini ajratishni rad qilish toʻgʻrisidagi qarori mazkur yer uchastkasini boshqa talabgorlarga taklif etishga asos boʻladi.

27. Talabgor Qoraqalpogʻiston Respublikasi Vazirlar Kengashi tomonidan tasdiqlangan roʻyxatdagi investitsiya loyihalari uchun toʻgʻridan-toʻgʻri beriladigan yer uchastkalaridan tashqari, boshqa yer uchastkasini oʻz tashabbusi bilan mazkur Nizomning 19-bandida talablari asosida taklif etgan taqdirda, murojaat Ishchi organ tomonidan belgilangan tartibda oʻrganib chiqiladi.

28. Ishchi organ mazkur yer uchastkasini ajratish masalasini ushbu Nizomning 10 — 16-bandlarida belgilangan tartibda koʻrib chiqish uchun Davlat kadastrlar palatasi Qoraqalpogʻiston Respublikasi boshqarmasiga yuboradi.

29. Ushbu Nizomning 10 — 16-bandlarida belgilangan talablar toʻliq bajarilganidan soʻng, muqobil taklif qabul qilish uchun mazkur yer uchastkasi toʻgʻrisidagi maʼlumotlar besh kun davomida Qoraqalpogʻiston Respublikasi Vazirlar Kengashining rasmiy veb-saytida eʼlon qilinadi.

Ushbu muddat davomida taklif etilgan yer uchastkasida investitsiya loyihasini amalga oshirish uchun muqobil taklif beruvchi talabgorlar mazkur Nizomda belgilangan tartibda ariza bilan murojaat qiladi.

Agar muqobil taklif kelib tushmagan taqdirda, talabgorning arizasi Respublika komissiyasi tomonidan ushbu Nizomda belgilangan tartibda koʻrib chiqiladi.

30. Ishchi organ Respublika komissiyasining investitsiya loyihasini amalga oshirish va tanlangan yer uchastkasini ajratish maqsadga muvofiqligi toʻgʻrisidagi qabul qilgan qarorini keyingi ish kunidan kechikmagan holda Davlat kadastrlari palatasi Qoraqalpogʻiston Respublikasi boshqarmasiga yer uchastkasini ajratish materiallarini tayyorlash uchun yuboradi.

31. Yer uchastkasini ajratish materiallarini tayyorlash boʻyicha Davlat kadastrlari palatasi Qoraqalpogʻiston Respublikasi boshqarmasi hamda talabgor bilan tuzilgan shartnoma asosida bajariladi.

Yer uchastkasini ajratish materiallarini tayyorlash uchun Kadastr agentligi tomonidan tasdiqlangan “Geodeziya, kartografiya, topografiya, maʼmuriy-hududiy birliklar chegaralarini belgilash, yer resurslarini xatlovdan oʻtkazish va yer tuzish boʻyicha loyiha-qidiruv ishlariga narxlar toʻplami”ga muvofiq haq undiriladi.

32. Davlat kadastrlari palatasi Qoraqalpogʻiston Respublikasi boshqarmasi shartnoma tuzilgan kundan boshlab uch ish kuni ichida yer uchastkasi boʻyicha hujjatlar yigʻmajildini tayyorlaydi. Tayyorlangan yigʻma jildini shu kunning oʻzida talabgorga, Qoraqalpogʻiston Respublikasi Qurilish va uy-joy kommunal xoʻjaligi vazirligiga (keyingi oʻrinlarda Qurilish vazirligi deb yuritiladi) hamda Ishchi organga yuborilishini taʼminlaydi.

33. Qurilish vazirligi kadastr yigʻma jildi kelib tushgan kundan Shaharsozlik hujjati mavjud boʻlgan taqdirda, uch ish kuni ichida yigʻma jildni koʻrib chiqadi, ajratiladigan yer uchastkasi boʻyicha xulosa tayyorlaydi va uni tegishlicha Ishchi organga yuboradi.

Bunda xulosa ijobiy yoki salbiy boʻlishi mumkin.

Shaharsozlik hujjatlari mavjud boʻlmagan taqdirda, hujjatlar yigʻma jildini olgandan soʻng uch ish kunidan kechiktirmasdan koʻrib chiqadi hamda oʻz xulosasini ilova qilgan holda hududiy arxitektura shaharsozlik kengashiga (keyingi oʻrinlarda Kengash deb yuritiladi) kelishish uchun yuboradi.

Kengash oʻz majlisida hujjatlar yigʻma jildini uch ish kunidan kechiktirmasdan koʻrib chiqadi hamda materiallarni kelishadi yoki rad etadi.

Qurilish vazirligi salbiy xulosa bergan yoki Kengash bilan kelishish rad etilgan taqdirda shu kunning oʻzida natijasi yuzasidan Ishchi organ va talabgorga yozma javob beradi.

34. Qoraqalpogʻiston Respublikasi Vazirlar Kengashi rasmiy veb saytida eʼlonga chiqarilgan yer uchastkalarni ajratishda ushbu Nizomning 14-bandida nazarda tutilgan vakolatli tashkilotlar bilan kelishish talab etilmaydi.

35. Ishchi organ Qurilish vazirligidan olingan yer ajratish boʻyicha tegishli hujjatlarni bir ish kuni ichida davlat ekologik ekspertizasini oʻtkazishi uchun talabgorga beradi.

36. Talabgor Ekologiya, atrof-muhitni muhofaza qilish va iqlim oʻzgarishi vazirligi Davlat ekologik ekspertizasi markazi Qoraqalpogʻiston Respublikasi filialiga davlat ekologik ekspertizasi xulosasini olish uchun murojaat qiladi.

37. Davlat ekologik ekspertizasini Davlat ekologik ekspertizasi markazi Qoraqalpogʻiston Respublikasi filialining ixtisoslashtirilgan ekspert boʻlinmalari tomonidan qonunchilikda belgilangan tartibda oʻtkaziladi.

Davlat ekologik ekspertizasi xulosasi ijobiy yoki salbiy boʻlishi mumkin.

Salbiy xulosada qonunchilikning muayyan normalariga tayangan holda, yer uchastkasini ajratish imkoni yoʻqligining asoslangan sabablari koʻrsatiladi.

38. Talabgor qonunchilik hujjatlariga muvofiq davlat ekologik ekspertizasining ijobiy xulosasini olgandan keyin, tanlangan yer uchastkasiga uzoq muddatli ijara huquqining baholovchi tashkilot tomonidan aniqlangan bozor qiymatini baholatadi.

39. Talabgor investitsiya loyiha doirasida tanlangan yer uchastkasiga baholovchi tashkilot tomonidan aniqlangan uzoq muddatli ijara huquqining bozor qiymati toʻgʻrisidagi hujjatlarni Ishchi organga taqdim etadi.

40. Agar, talabgorning tanlangan yer uchastkasiga baholovchi tashkilot tomonidan aniqlangan uzoq muddatli ijara huquqining bozor qiymatini kamaytirish boʻyicha taklifi mavjud boʻlsa, bu haqida Qoraqalpogʻiston Respublikasi Vazirlar Kengashining Raisi nomiga ariza bilan murojaat qiladi.

Ariza bir ish kuni ichida Respublika komissiyasida koʻrib chiqilishi uchun Ishchi organga yuboriladi.

41. Ishchi organ talabgordan barcha hujjatlarni olgandan soʻng bir ish kuni ichida yer uchastkasini ajratish masalasini koʻrib chiqish uchun Respublika komissiyaga taklif kiritadi.

42. Respublika komissiyasi ishchi organ tomonidan taqdim etilgan hujjatlarni uch ish kuni ichida belgilangan tartibda koʻrib chiqadi va qaror qabul qiladi.

Agar talabgor tomonidan yer uchastkasiga uzoq muddatli ijara toʻlovining bozor qiymatiga nisbatan kamaytiruvchi koeffitsiyentlarni qoʻllash toʻgʻrisida arizasi mavjud boʻlsa, Respublika komissiyasi qarorida komissiya aʼzolarining koʻpchilik ovozi bilan 0,01 dan 0,5 gacha kamaytiruvchi koeffitsiyentlarni qoʻllash masalasi aniq koʻrsatiladi.

Respublika komissiyasi yigʻilishida talabgor ishtirok etishi mumkin.

43. Respublika komissiyasi tomonidan talabgorning investitsiya loyihasi doirasida yer uchastkasini ajratish toʻgʻrisida qaror qabul qilingandan keyin Ishchi organ talabgorga yer uchastkasiga uzoq muddatli ijara huquqining toʻlov miqdorini toʻlatish uchun Qoraqalpogʻiston Respublikasi respublika budjetiga yoʻnaltiriladigan hisob raqamini taqdim etadi.

44. Talabgor Qoraqalpogʻiston Respublikasi respublika budjetiga yoʻnaltiriladigan hisob raqamini olganidan keyin mablagʻni ikki ish kuni ichida toʻlaydi va toʻlov topshiriqnomasini (kvitansiya) Ishchi organga taqdim etadi.

45. Talabgor tomonidan yer ajratish boʻyicha tegishli hujjatlarni davlat ekologik ekspertizasini oʻtkazish uchun olingan kundan boshlab mazkur Nizomning 36, 38 va 44-bandlari talablari yigirma kun muddatda bajarilmagan taqdirda Ishchi organ tomonidan mazkur investitsiya loyihasiga yer ajratish jarayonlarini toʻxtatish toʻgʻrisida Respublika komissiyaga taklif kiritiladi.

46. Respublika komissiyasi ishchi organ tomonidan taklif kelib tushgan kundan uch ish kuni ichida talabgorning investitsiya loyihasi doirasida yer uchastkasini ajratishni rad qilish yoki mazkur Nizomning 36, 38 va 44-bandlari talablarini bajarish uchun qoʻshimcha muddat berish boʻyicha qaror qabul qiladi.

47. Talabgor investitsiya loyihasini amalga oshirish uchun sanoat zonalari hududlaridan yer uchastkalarini ajratish boʻyicha murojaat qilganida, tegishli sanoat zonalari Direksiyalari bilan kelishilgan holda belgilangan lotlar kesimida mazkur Nizomning 36, 38 va 44-bandlari talablarini bajarish sharti bilan Vazirlar Kengashining qarori bilan toʻgʻridan-toʻgʻri ajratiladi.

Bunda:

yer uchastkalari sanoat zonalari uchun qonunchilikda belgilangan muddat
va shartlarda ajratiladi;

investitsiya loyihasining hajmidan kelib chiqib, bir nechta lotlar birlashtirilgan holda ajratilishi mumkin;

yer uchastkalarini ijaraga berishda yer uchastkasini ajratish materillari tayyorlanmaydi hamda tegishli vakolatli tashkilotlar bilan kelishilmaydi;

yer uchastkalarining uzoq muddatli ijaraga berish shartnomalari tegishli sanoat zonalari direksiyalari bilan tuziladi.

48. Talabgorlarga sanoat zonalaridan yer uchastkalarini ijara huquqi asosida ajratish masalasi Respublika komissiyasida tegishli sanoat zonalari direksiyasi rahbarlari ishtirokida koʻrib chiqib, qaror qabul qiladi.

49. Respublika komissiyasi tomonidan talabgorning investitsiya loyihasi doirasida yer uchastkasini ajratish toʻgʻrisida qaror qabul qilingandan hamda talabgor tomonidan yer uchastkasiga uzoq muddatli ijara huquqining toʻlov miqdori Qoraqalpogʻiston Respublikasi respublika budjetiga toʻlangandan soʻng Ishchi organ bir ish kuni ichida Qoraqalpogʻiston Respublikasi Vazirlar Kengashining qarori loyihasini tayyorlab, “e-qaror” tizimiga kiritadi.

Huquqiy ekspertiza yakuni boʻyicha Qoraqalpogʻiston Respublikasi Adliya vazirligi ijobiy xulosasi mavjudligi Qoraqalpogʻiston Respublikasi Vazirlar Kengashi tomonidan yer uchastkasini investitsiya loyihasini amalga oshirish uchun ijaraga berish haqida qaror qabul qilishning majburiy sharti hisoblanadi.

50. Qoraqalpogʻiston Respublikasi Vazirlar Kengashi tomonidan qabul qilingan qaror belgilangan tartibda tegishli tuman (shahar) hokimligi, masʼul tashkilotlarga hamda talabgorga taqdim etiladi.

51. Vazirlar Kengashining qarori talabgor va tegishli tuman (shahar) hokimligi oʻrtasida yer ijara shartnomasini imzolash uchun asos hisoblanadi.

Tuman (shahar) hokimligi Vazirlar Kengashining qarori kelib tushgan kundan boshlab uch ish kuni ichida yer ijara shartnomasini tuzadi.

Yer ijara shartnomasida talabgorning investitsiya majburiyatlari va loyihani amalga oshirish grafiklari toʻliq aks ettiriladi.

52. Ajratilgan yer uchastkasida investitsiya loyihasini amalga oshirishni boshlashga yer uchastkasiga boʻlgan ijara huquqi davlat roʻyxatidan oʻtkazilgandan keyin yoʻl qoʻyiladi.

53. Yer uchastkasi boʻyicha hujjatlar yigʻma jildini tayyorlash, davlat ekologik ekspertizasi xulosasini olish, yer uchastkasini baholatish va qiymatini toʻlash hamda yer uchastkasiga boʻlgan ijara huquqini davlat roʻyxatidan oʻtkazish bilan bogʻliq xarajatlar talabgor hisobidan toʻlanadi.

54. Qoraqalpogʻiston Respublikasi Vazirlar Kengashining investitsiya loyihasini amalga oshirish uchun yer uchastkasini ijaraga berish haqidagi qarori asosida, ijara shartnomasi tuzilib, yer uchastkasiga boʻlgan huquq belgilangan tartibda davlat roʻyxatidan oʻtkazilgandan soʻng yer uchastkasining chegaralarini (naturada) joyida belgilash, geodeziya faoliyatini amalga oshirish huquqiga ega boʻlgan tashkilotlar tomonidan qonunchilikda belgilangan tartibda amalga oshiriladi.

55. Loyiha doirasidagi investitsiya majburiyatlarining bajarilishini monitoring qilish Ishchi organ va tuman (shahar) hokimining Investitsiya masalalari boʻyicha oʻrinbosarlari tomonidan amalga oshiriladi.

56. Yer uchastkasidan maqsadli va samarali foydalanish ustidan davlat nazorati Kadastr agentligi Qoraqalpogʻiston Respublikasi boshqarmasi va uning tuman boʻlimlari, qishloq xoʻjaligiga moʻljallangan yer uchastkalari boʻyicha esa — Qishloq xoʻjaligi vazirligi va uning tuman boʻlimlari tomonidan amalga oshiriladi.

57. Loyiha doirasidagi investitsiya majburiyatlarining bajarilishini monitoring qilish tartibi Qoraqalpogʻiston Respublikasi Vazirlar Kengashi tomonidan belgilanadi.

58. Mazkur Nizomga muvofiq ijaraga berilgan yer uchastkasida qurilgan bino va inshootlar investitsiya majburiyatlari toʻliq bajarilmagunga qadar begonalashtirilishi, yer uchastkasi xususiylashtirilishi mumkin emas.

59. Ijaraga berilgan yer uchatkasida qurilgan bino va inshootlar keyinchalik turar joyga ixtisoslashtirilishi mumkin emas.

Ushbu band talablarini buzish yer uchastkasiga boʻlgan ijara huquqini bekor qilishga asos boʻladi.

60. Yer uchastkasining ijara muddatini uzaytirish qonunchilikda belgilangan tartibda amalga oshiriladi.

61. Investitsiya majburiyatlari toʻliq bajarilgan taqdirda yer uchastkasi talabgorning arizasiga muvofiq Ishchi organ, Kadastr agentligi Qoraqalpogʻiston Respublikasi boshqarmasi va Qoraqalpogʻiston Respublikasi Qishloq xoʻjaligi vazirligining (basharti ajratilgan yer uchastkasi qishloq xoʻjaligiga moʻljallangan yerlar boʻlsa) ijobiy xulosalari asosida qonunchilikda belgilangan tartibda xususiylashtirilishi mumkin.

62. Investitsiya majburiyatlari doirasida yuzaga kelgan nizolar qonunchilik hujjatlariga muvofiq oʻz-aro murosaga kelish yoʻli bilan yoki sud tartibida hal etiladi.

63. Ishchi organ mazkur tartib asosida amalga oshirilgan ishlar yuzasidan har chorakda Vazirlar Kengashiga hisobot berib boradi.

64. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.