«Норматив-ҳуқуқий ҳужжатлар тўғрисида»ги Ўзбекистон Республикаси Қонунига мувофиқ «Ўзбекистон Республикаси Олий Мажлиси палаталарининг Ахборотномаси» Ўзбекистон Республикасининг Конституцияси ва қонунлари, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармонлари ва қарорлари эълон қилинадиган расмий манбалардан биридир.

«Ҳуқуқий ахборотни тарқатиш ва ундан фойдаланишни таъминлаш тўғрисида»ги Ўзбекистон Республикаси Қонунида давлат органларида уларнинг фаолиятини тартибга солувчи норматив-ҳуқуқий ҳужжатларнинг тизимлаштирилган ҳисоби мажбурий тартибда юритилиши белгиланган.

Шу муносабат билан «Ўзбекистон Республикаси Олий Мажлиси палаталарининг Ахборотномаси» давлат органлари ва бошқа ташкилотларда қонунийлик ва ҳуқуқ ижодкорлиги самарадорлигини таъминлашда муҳим аҳамиятга эга.

Шу билан бирга «Ўзбекистон Республикаси Олий Мажлиси палаталарининг Ахборотномаси»га обуна бўлиш, бундай харажатларни молиялаштириш юзасидан ягона ёндашув мавжуд эмаслиги давлат органларини ва бошқа ташкилотларни «Ўзбекистон Республикаси Олий Мажлиси палаталарининг Ахборотномаси» билан таъминлаш имконини бермаяпти.

Юқоридагиларни ҳисобга олиб, давлат органларига ва бошқа ташкилотларга «Ўзбекистон Республикаси Олий Мажлиси палаталарининг Ахборотномаси»нинг тизимли етказиб берилишини таъминлаш мақсадида Ўзбекистон Республикаси Олий Мажлиси Қонунчилик палатасининг Кенгаши ва Ўзбекистон Республикаси Олий Мажлиси Сенатининг Кенгаши қарор қиладилар:

1. «Ўзбекистон Республикаси Олий Мажлиси палаталарининг Ахборотномаси» бепул тарқатиладиган давлат органлари ва ташкилотларнинг рўйхати (бундан буён матнда Рўйхат деб юритилади) иловага* мувофиқ тасдиқлансин.

2. Ўзбекистон Республикаси Олий Мажлиси Қонунчилик палатаси Девонининг ушбу Қўшма қарорнинг иловасидаги Рўйхатда кўрсатилган давлат органларига ва ташкилотларга бепул тарқатиладиган «Ўзбекистон Республикаси Олий Мажлиси палаталарининг Ахборотномаси»ни нашр қилиш бўйича «Ўзбекистон Республикаси Вазирлар Маҳкамаси аппарати хўжалик фаолияти бошқармасининг босмахонаси» давлат унитар корхонаси билан шартнома тузиш тўғрисидаги таклифи маъқуллансин.

3. Белгилансинки, «Ўзбекистон Республикаси Олий Мажлиси палаталарининг Ахборотномаси»ни ушбу Қўшма қарорнинг иловасидаги Рўйхатда кўрсатилган давлат органлари ва бошқа ташкилотлар учун нашр қилиш ҳамда етказиб бериш билан боғлиқ харажатлар Ўзбекистон Республикасининг Давлат бюджетидан Ўзбекистон Республикаси Олий Мажлисининг Қонунчилик палатасига ажратилган маблағлар ҳисобидан молиялаштирилади.

4. Ўзбекистон Республикаси Иқтисодиёт ва молия вазирлиги «Ўзбекистон Республикаси Олий Мажлиси палаталарининг Ахборотномаси»ни нашр қилиш билан боғлиқ харажатларни молиялаштириш учун зарур маблағлар Ўзбекистон Республикаси Олий Мажлисининг Қонунчилик палатасига ажратиб борилишини таъминласин.

5. Ўзбекистон Республикаси Олий Мажлиси Қонунчилик палатаси Девонининг Лингвистик экспертиза, таржима ва таҳририят бўлими ҳамда Юридик бошқармаси «Ўзбекистон Республикаси Олий Мажлиси палаталарининг Ахборотномаси» бепул тарқатиладиган давлат органлари ва бошқа ташкилотларнинг рўйхатига зарур бўлганда ўзгартиришлар киритиш бўйича таклифлар киритиб борсин.

6. Ушбу Қўшма қарорнинг ижросини назорат қилиш Ўзбекистон Республикаси Олий Мажлиси Сенати Раисининг биринчи ўринбосари
С. Сафоев ва Ўзбекистон Республикаси Олий Мажлиси Қонунчилик палатаси Спикерининг ўринбосари Р. Хакимов зиммасига юклатилсин.

7. Ушбу Қўшма қарор қабул қилинган кундан эътиборан кучга киради.