Ўзбекистон Республикаси Ҳукумати ва Мўғулистон Ҳукумати, кейинги ўринларда «Аҳдлашувчи Томонлар» деб аталувчилар,

икки давлат ўртасидаги савдо-иқтисодий муносабатларни ривожлантиришга ҳисса қўшиш йўлида,

бозор иқтисодиёти доирасида автомобиль транспортида ҳамкорликни ривожлантириш истагида,

атроф-муҳитни ва одамларни муҳофаза қилиш, энергиядан оқилона фойдаланиш, йўл ҳаракати хавфсизлиги ва ҳайдовчиларнинг меҳнат шароитларини яхшилаш мақсадида,

транспорт интермодаллигини ривожлантириш истагида,

автомобиль транспортини ривожлантиришда ўзаро манфаатдорликни тан олиб,

қуйидагилар тўғрисида келишиб олдилар:

Мазкур Битим қоидалари Аҳдлашувчи Томонлардан бирининг ҳудудида ташкил этилган ташувчилар тарафидан амалга ошириладиган юк ва йўловчиларни Аҳдлашувчи Томонларнинг ҳудудлари ўртасида, уларнинг ҳудудлари орқали транзит олиб ўтиш ва учинчи давлатларга ёки учинчи давлатлардан автомобилда ташишга нисбатан қўлланилади.

Мазкур Битимда фойдаланилган атамалар қуйидаги маъноларга эга:

1. «Транспорт оператори» Ўзбекистон Республикаси ва Мўғулистоннинг тегишли миллий қонунчилигига мувофиқ, йўловчилар ва (ёки) юкларни халқаро йўналишларда ташиш ҳуқуқига эга бўлган ҳар қандай жисмоний ёки юридик шахсни англатади.

2. «Транспорт воситаси» ҳар қандай Аҳдлашувчи Томонлардан бирининг давлатида рўйхатдан ўтказилган ҳамда фақат йўловчилар ёки юкларни ташиш учун фойдаланиладиган ва жиҳозланган автотранспорт воситаси ёки автотранспорт воситалари бирлашмасини англатади.

3. «Транспорт» транспорт воситаси тиркама ёки ярим тиркама йўлнинг бир қисми давомида поезд ёки сув транспортида ташилаётган бўлса ҳам, транспорт воситасининг юк ортилган ҳолатда ёки юксиз ҳаракатланишини англатади.

4. «Каботаж» бир Аҳдлашувчи Томон давлати транспорт оператори тарафидан бошқа Аҳдлашувчи Томон ҳудудидаги алоҳида пунктлар ўртасида амалга ошириладиган йўловчи ёки юк ташувларини англатади.

5. «Аҳдлашувчи Томон ҳудуди» тегишлилиги бўйича Ўзбекистон Республикаси ҳудуди ва Мўғулистон ҳудудини англатади.

6. «Таъсис мамлакати» ташувчи таъсис этилган ва транспорт воситаси рўйхатга олинган Аҳдлашувчи Томон ҳудудини англатади.

7. «Қабул қилувчи мамлакат» Аҳдлашувчи Томоннинг ташувчи транспорт воситаси рўйхатдан ўтказилмаган ва ташувчи ташкил этилмаган ҳудудини англатади.

8. «Автобус» Аҳдлашувчи Томонлардан бирининг ҳудудида рўйхатдан ўтказилган, конструкцияси ва жиҳозланишига кўра, йўловчиларни ташиш учун мўлжалланган ва яроқли бўлган ҳамда ҳайдовчи ўриндиғидан ташқари саккизтадан ортиқ ўриндиққа эга бўлган транспорт воситасини англатади.

9. «Йўловчиларни мунтазам ташишлар» йўловчиларни белгиланган йўналиш бўйича, олдиндан белгиланган ва эълон қилинган жадвал ва тарифлар асосида ташиш хизматидир. Йўловчилар олдиндан белгиланган тўхташ жойларида олинади ёки туширилади. Мўғулистон давлат чегарасидан ёки Ўзбекистон Республикаси давлат чегарасидан ташқарида автомобиль транспортида йўловчилар ва юкларни мунтазам ташиш.

10. «Трансфер ташиш» олдиндан шакллантирилган йўловчилар гуруҳларини ягона жўнаш пунктидан ягона етказиб бориш пунктига такрорланувчи бориш ва қайтиш рейсларида ташиш хизмати. Ташқарига саёҳат қилган йўловчилардан иборат ҳар бир гуруҳ кейинги сафарда жўнаб кетиш жойига қайтарилади. Жўнаб кетиш пункти ва етказиб бориш пункти мос равишда саёҳат бошланадиган ва тугайдиган жойни, ҳар бир ҳолатда, 50 км радиус атрофдаги аҳоли пунктларини англатади.

Трансфер хизмати йўловчиларни етказиб бориш пунктида ва, зарур ҳолларда, йўл давомида турар жойга жойлаштиришни ўз ичига олиши мумкин.

Биринчи ва охирги сафарлардан қайтиб келиш бориш-қайтишлар серияси давомида юксиз амалга оширилади.

11. «Йўловчиларни номунтазам ташишлар» «йўловчиларни мунтазам ташишлар» атамасига кирмайдиган йўловчиларни автобусларда ташишнинг бошқа барча турларини англатади.

12. «Назорат ҳужжати» мазкур Битимнинг 13-моддасида кўрсатилган Қўшма қўмита томонидан келишилган намунага мувофиқ автобуслар учун йўловчи юкхатини англатади.

13. «Ваколат рухсатномаси» Бир Аҳдлашувчи Томон ваколатли органлари тарафидан бошқа Аҳдлашувчи Томон ҳудудида рўйхатдан ўтган транспорт воситасига ваколат/рухсатнома берган Аҳдлашувчи Томон ҳудудига ёки ҳудуди орқали саёҳат қилиш ҳуқуқини/имкониятини берадиган ҳужжатни англатади.

14. «Транзит»

(14.1). Бошқа Аҳдлашувчи Томон давлати ҳудуди бўйлаб йўловчиларни автобусда чиқармасдан ва ундан туширмасдан ташишни;

(14.2). Бошқа Аҳдлашувчи Томон давлати ҳудуди бўйлаб юкларни автомобилда ортмасдан ва ундан туширмасдан ташишни англатади.

15. «Хавфли юклар» ўзига хос таркиби ва хусусиятларига кўра, ташиш, юклаш, тушириш ва сақлаш вақтида техника воситалари, жиҳозлар, бинолар ва иншоотларнинг шикастланишига, шунингдек, одамларнинг, ҳайвонларнинг ўлимига, жароҳатланишига ёки касалланишига, ва атроф-муҳитга зарар етказишга олиб келиши мумкин бўлган юкларни англатади.

16. «Махсус рухсатнома» бир Аҳдлашувчи Томоннинг ваколатли органлари тарафидан бериладиган, бошқа Аҳдлашувчи Томон ҳудудида рўйхатдан ўтган транспорт воситасига ушбу ваколат/рухсатнома берган Аҳдлашувчи Томон ҳудудига ёки унинг ҳудуди орқали хавфли ёки оғир юклар билан саёҳат қилиш ҳуқуқини (имкониятини) берадиган бир марталик рухсатнома ҳужжатини англатади.

1. Аҳдлашувчи Томонларнинг ҳудудлари ўртасида ёки улар орқали транзитда амалга ошириладиган мунтазам йўловчи ташув хизматлари Аҳдлашувчи Томонларнинг ваколатли органи тарафидан бериладиган рухсатномалар тизими билан боғлиқдир.

2. Рухсатнома олиш учун талабнома транспорт операторининг таъсис этилган давлатдаги ваколатли органига тақдим этилиши лозим. Ваколатли орган талабномани маъқуллаган тақдирда, у ушбу рухсатнома тўғрисида бошқа Аҳдлашувчи Томоннинг ваколатли органига маълум қилади.

Мазкур Битимнинг 13-моддасига мувофиқ ташкил этилган Қўшма қўмита рухсатнома олишга талабнома шакли ва зарур бўлган тасдиқловчи ҳужжатлар юзасидан қарор қабул қилади.

3. Рухсатномалар Аҳдлашувчи Томонларнинг ваколатли органлари тарафидан ўзаро келишув асосида берилади.

Рухсатнома бериш ёки беришни рад этиш тўғрисидаги қарор, алоҳида махсус ҳолатлар юзага келмаса, уч ой ичида қабул қилинади.

Рухсатномалар тугал равишда беш йил давомида амал қилади. Уларда транспорт воситалари жавоб бериши лозим бўлган эксплуатация қилиш шартлари, жумладан, экологик стандартлар ва хавфсизлик стандартлари белгиланади.

4. Аҳдлашувчи Томонларнинг ваколатли органлари олдиндан рухсатномалар билан алмашадилар ва ташишни амалга оширадилар. Рухсатномалар қуйидаги маълумотларни ўз ичига олади:

а) транспорт операторининг номи;

b) ташув йўналиши;

c) қатнов жадвали;

d) йўловчи транспорти тарифи;

e) ташувчи тарафидан йўловчиларни транспорт воситасига чиқариш ва тушириш жойлари;

f) ташиш даври ва мунтазамлиги.

5. Аҳдлашувчи Томонларнинг ваколатли органлари бир-бирларидан рухсатномалар бериш учун зарур бўлган қўшимча маълумотларни сўрашлари мумкин.

6. Иш шартларини ўзгартириш ва хизматни бекор қилиш тўғрисидаги қарор ушбу модданинг 2 ва 3-бандларида белгиланган тартибда қабул қилинади.

Башарти хизматга талаб бўлмаса, транспорт оператори рухсат берган ваколатли органларни ва мижозларни уч ой олдин огоҳлантирган ҳолда хизматни бекор қилиши мумкин.

1. Аҳдлашувчи Томонларнинг ҳудудлари ўртасида ва улар орқали йўловчиларни номунтазам транзит олиб ўтиш ёки трансфер ташувлар Аҳдлашувчи Томонларнинг ваколатли органлари тарафидан бериладиган рухсатномалар тизими билан боғлиқдир.

Ушбу моддада назарда тутилган ташувни амалга оширувчи транспорт воситалари риоя қилиши лозим бўлган техник, экологик стандартлар ва хавфсизлик стандартлари Мазкур Битимнинг 13-моддасига мувофиқ ташкил этилган Қўшма қўмита билан келишилади.

2. Қуйида санаб ўтилган хизматлар, мазкур модданинг 1-бандига истисно тариқасида, қабул қилувчи давлат ҳудудида рухсат бериш тизимидан озод қилинади:

а) айни йўловчилар гуруҳини бутун йўл давомида ташиш ва уларни жўнаб кетиш пунктига олиб бориш учун айни транспорт воситасидан фойдаланган ҳолда тақдим этиладиган ёпиқ эшиклар хизматлари;

b) боришда юк ортилган ва қайтишда юк ортилмаган ташув амалга ошириладиган хизматлар;

с) йўловчилар муқаддам Аҳдлашувчи Томон ҳудудига битта ташувчи орқали олиб келиниб ва у ердан транспорт воситасига қайта чиқарилиб, таъсис этилган мамлакат ҳудудига олиб кетиш шарти билан боришда юксиз ва қайтишда юк билан амалга ошириладиган хизматлар.

d) бузилган автобусни бошқа автобус билан алмаштириш ҳолати билан боғлиқ хизматлар.

3. Номунтазам ташувларнинг бошқа тоифалари учун Аҳдлашувчи Томонларнинг ваколатли органларидан рухсатномалар талаб қилинади.

Мазкур Битимнинг 13-моддасига мувофиқ ташкил этилган Қўшма қўмита бир марталик хизматларнинг бошқа тоифаларини рухсатномалардан озод қилиши мумкин.

4. Рухсатнома олиш учун талабнома қабул қилувчи давлатнинг ваколатли органига тақдим этилиши лозим.

Мазкур Битимнинг 13-моддасига мувофиқ ташкил этилган Қўшма қўмита рухсатнома олиш тўғрисидаги талабноманинг шакли ва тасдиқловчи зарур ҳужжатлар юзасидан қарор қабул қилади.

5. Рухсатнома талабларидан озод қилинган ва автобуслардан фойдаланган ҳолда амалга ошириладиган бир марталик ташувлар назорат ҳужжати билан расмийлаштирилган бўлиши лозим. Назорат ҳужжатидан фойдаланиш шартлари ва мазмуни мазкур Битимнинг 13-моддасида кўрсатилган Қўшма қўмита тарафидан белгиланади.

1. Юкларни Аҳдлашувчи Томонларнинг ҳудудлари ўртасида ташиш ёки улар орқали транзит олиб ўтиш, шунингдек, учинчи давлатларга ёки улар орқали ташиш, мазкур Битимнинг 7-моддасида кўрсатилган ташиш бундан мустасно Аҳдлашувчи Томонларнинг ваколатли органлари тарафидан берилган рухсатномалар мавжуд бўлган тақдирда, юк автомобиллари ёки улардан иборат таркиб ёрдамида амалга оширилади.

2. Ҳар бир юк ташуви учун бир маротабалик қайтиб келиш рейсини амалга ошириш ҳуқуқини берувчи рухсатнома берилади. Автотранспорт воситаси тиркама ёки ярим тиркама билан жиҳозланган бўлса, рухсатнома фақат юк автомобилига ёхуд тиркама ёки ярим тиркамани шатакка олувчи транспорт воситасига берилади.

3. Аҳдлашувчи Томонларнинг ваколатли органлари ҳар йили 1-бандда кўрсатилган пуллик ва (ёки) бепул рухсатномаларнинг келишилган сонини ўзаро алмашадилар. Рухсатномалар ваколатли орган тарафидан муҳрланади ва ушбу рухсатномани берган масъул шахс томонидан имзоланади. Аҳдлашувчи Томонлардан бирининг илтимосига кўра, қўшимча рухсатномалар берилиши мумкин.

4. 1-бандда кўрсатилган рухсатномалар кейинги календарь йилининг 31 январига қадар амал қилади. Рухсатнома тиркама ва (ёки) ярим тиркама рўйхатдан ўтказилган мамлакатдан қатъи назар, юк транспорт воситаси ёки унинг комбинацияси учун амал қилади.

5. Мазкур Битимнинг 13-моддасига мувофиқ ташкил этилган Қўшма қўмита рухсатномалар квотасини, тоифасини ва улардан фойдаланишни тартибга солувчи бошқа шартларни белгилайди.

6. Мазкур Битимда назарда тутилган юк ташувларини амалга оширувчи ташувчи Аҳдлашувчи Томонлар ваколатли органларининг талабига биноан, юк ташишни тасдиқловчи ҳужжатни, яъни юкхатини тақдим этади. Юкхати Юкларни халқаро йўлларда ташиш шартномаси тўғрисидаги Конвенцияда (Женева, 1956 йил 19 май) ва Юкларни халқаро йўлларда ташиш шартномаси тўғрисидаги Конвенциянинг электрон юкхатига оид Қўшимча Протоколида (Женева, 2008 йил 20 февраль) белгиланган шаклда бўлиши лозим.

1. Мазкур Битимнинг 6-моддасида кўрсатилган рухсатномалар қуйидагилар учун талаб қилинмайди:

а) умумий рухсат этилган юкланган оғирлиги тиркамалар билан бирга 6 тоннадан ошмаган ёки рухсат этилган фойдали юки, шу жумладан, тиркамалар бирга 3,5 тоннадан ошмаган транспорт воситаларидаги ташувлар;

b) ҳаво қатнови йўналиши ўзгарган ҳолларда аэропортларга ёки аэропортлардан амалга ошириладиган ташувлар;

c) шикастланган ёки бузилган транспорт воситаларини ташиш ва транспорт воситаларини тезкор таъмирлаш воситаларини ташиш;

d) бошқа давлатда бузилган транспорт воситаси ўрнига юборилган юк ташиш транспорт воситасининг юксиз рейслари, шунингдек, таъмирланган транспорт воситасининг қайтиши;

е) фавқулодда вазиятларда, хусусан, табиий офатларни бартараф этишда ва гуманитар ёрдам кўрсатиш учун зарур бўлган тиббий буюмлар ва жиҳозларни ташиш;

f) ярмаркалар ва кўргазмалар учун ёки нотижорат мақсадларда асарлар ва санъат буюмларини ташиш;

g) мусиқий, кино, спорт ёки цирк томошалари ва ярмаркаларига олиб бориш ва қайтиб келишда нотижорат мақсадларда, шунингдек, радиоэшиттиришлар ёхуд кино ёки телевидение учун мўлжалланган театр реквизитлари, аксессуарлар ва ҳайвонларни ташиш;

h) корхоналар томонидан маиший буюмларни ташиш, ушбу мақсадда иштирок этган махсус ходимлар ва фойдаланилган ускуналарни ташиш;

i) дафн маросими ташуви;

j) почта ташувлари.

2. Мазкур Битимнинг 13-моддасига мувофиқ ташкил этилган Қўшма қўмита рухсатнома талабларидан озод қилинган транспорт тоифалари рўйхатига қўшимчалар киритиши ёки ундан бандларни чиқариб ташлаши мумкин.

1. Бир Аҳдлашувчи Томон ҳудудида рўйхатдан ўтган ва бошқа Аҳдлашувчи Томон ҳудудида вақтинча бўлиб турган транспорт воситалари ёки уларнинг таркиби орқали ташиладиган товарлар учун божлар ва солиқлар бошқа Аҳдлашувчи Томон ҳудудида амал қиладиган қонун ҳужжатларига мувофиқ ундирилади.

2. Бир Аҳдлашувчи Томон ҳудудида рўйхатдан ўтказилган ва бошқа Аҳдлашувчи Томон ҳудудига вақтинчалик олиб кирилган автобуслар ва юк автомобиллари ёки уларнинг таркиблари, шунингдек, ишлаб чиқарувчи ўрнатган стационар цистерналардаги ёнилғи бошқа Аҳдлашувчи Томон қонун ҳужжатларига мувофиқ ҳар қандай божлар, солиқлар ёки йиғимлардан озод қилинади.

3. Бузилган ёхуд йўл-транспорт ҳодисалари натижасида яроқсиз ҳолга келган автобуслар ва (ёки) юк автомобиллари ёки уларнинг составларини таъмирлаш учун бошқа Аҳдлашувчи Томон ҳудудига вақтинча олиб кирилган эҳтиёт қисмлари ушбу Аҳдлашувчи Томон қонун ҳужжатларига мувофиқ ундириладиган божхона божи, йиғимлар, солиқ тўловларидан озод қилинади. Алмаштирилган қисмлар божхона органлари ходимларининг назорати остида қайтарилади ёки йўқ қилинади.

4. Автобуслар ва (ёки) юк автомобиллари ёки уларнинг таркиблари операторлари Аҳдлашувчи Томонларнинг қонун ҳужжатларига мувофиқ йўл инфратузилмасидан (йўлларнинг алоҳида участкалари, кўприклар, туннеллар ва бошқа йўл иншоотларидан) фойдаланганлик учун йўл солиқларини тўлайдилар.

1. Автотранспорт воситаларининг рухсат этилган тугал оғирлиги, уларнинг ўқига тушадиган юкланиш ва габаритлари рўйхатдан ўтказиш ҳужжатларида кўрсатилганлигидан ҳам, қабул қилувчи мамлакатда амалда бўлган рухсат этилган тугал чегаралардан ҳам ошмаслиги лозим.

2. Қабул қилувчи мамлакатда оғирлиги ва ўлчамлари рухсат этилган тугал чегаралардан ошиб кетган транспорт воситаларидан фойдаланишга фақатгина олдиндан олинган махсус рухсатнома мавжуд бўлгандагина рухсат этилади.

1. Хавфли ва тез бузиладиган юкларни Аҳдлашувчи Томонларнинг ҳудудлари ўртасида, улар орқали транзит олиб ўтиш, шунингдек, учинчи давлатларга ёки улар орқали ташиш Аҳдлашувчи Томонларнинг тегишли қонун ҳужжатлари қоидаларига мувофиқ амалга оширилади.

2. Аҳдлашувчи Томонлар мазкур Битим доирасида хавфсизлик ва ифлосланиш стандартларига жавоб берадиган транспорт воситаларидан фойдаланишни қўллаб-қувватлайдилар.

1. Йўловчилар ва юкларни ташиш учун рухсатномалар шахсийдир ва бошқа ташувчиларга ёки учинчи шахсларга ўтказилмайди.

2. Аҳдлашувчи Томонлар давлатларининг ваколатли органлари рухсатномалар алмашинуви тартибини келишиб оладилар.

3. Ташувчиларга бошқа Аҳдлашувчи Томоннинг давлати ҳудудида икки манзил ўртасида йўловчилар ва юкларни ташиш таъқиқланади.

1. Рухсатномалар, ваколатлар, назорат ҳужжатлари ва мазкур Битим бўйича бошқа ҳужжатлар, шунингдек, товар-транспорт юкхати, йўловчи юкхати, суғурта гувоҳномалари, ўқув сертификатлари ва халқаро шартномалар ва (ёки) Аҳдлашувчи Томонлар давлатларининг қонун ҳужжатларига мувофиқ талаб қилинадиган бошқа барча ҳужжатлар транспорт воситаларида сақланиши ва ваколатли мансабдор шахсларнинг талабига биноан тақдим этилиши лозим.

2. Аҳдлашувчи Томонлар чегара ва божхона назорати, шунингдек, ветеринария, фитосанитария, эпидемиология, экология ва табиатни муҳофаза қилиш қоидаларига риоя этиш устидан назоратда ўзларининг миллий қонунчилиги ҳамда ўзлари иштирок этадиган халқаро шартномалар қоидаларини қўллайдилар.

1. Аҳдлашувчи Томон давлатининг транспорт операторлари ва уларнинг транспорт воситалари экипажлари бошқа Аҳдлашувчи Томон ҳудудида бўлиб турганда ушбу давлатнинг амалдаги миллий қонунчилигига риоя қилиши лозим.

2. Аҳдлашувчи Томон давлатининг транспорт оператори тарафидан ушбу Битим қоидалари бузилган тақдирда, ҳудудида қоидабузарлик содир бўлган Аҳдлашувчи Томоннинг ваколатли органи ўз мамлакатининг суд жараёнига зарар етказмасдан, бошқа Аҳдлашувчи Томоннинг ваколатли органини хабардор қилган ҳолда ўз давлати миллий қонунчилигида назарда тутилган чораларни кўради. Ўта оғир ҳолатларда, қабул қилувчи давлатнинг ваколатли органи таъсис этувчи давлат ваколатли органининг қарорига қадар ўз мамлакати ҳудудига киришни вақтинчалик тақиқлаши мумкин. Аҳдлашувчи Томонларнинг ваколатли органлари қабул қилинган қарорлар тўғрисида бир-бирларини хабардор қиладилар.

1. Мазкур Битим қоидалари лозим даражада бажарилишини таъминлаш ва уни қўллашда юзага келиши мумкин бўлган, Аҳдлашувчи Томонлар давлатларининг ваколатли органлари бевосита алоқалари орқали ҳал этилмайдиган низоларни дарҳол ҳал қилиш мақсадида Қўшма қўмита тузилади.

2. Бир Аҳдлашувчи Томоннинг сўровига биноан, Аҳдлашувчи Томонларнинг ваколатли органлари вакилларидан иборат таркибда Қўшма қўмита тузилади.

3. Аҳдлашувчи Томонлар Қўшма қўмита қарорларини бажариш мажбуриятини оладилар.

4. Қўшма қўмита мазкур Битимнинг моддаларини тўлдириш ва ўзгартириш бўйича тавсиялар қабул қилиши мумкин.

Қуйидагилар мазкур Битимни амалга ошириш бўйича ваколатли органлар ҳисобланади:

Ўзбекистон Республикаси Ҳукумати номидан: Ўзбекистон Республикаси Транспорт вазирлиги.

Мўғулистон Ҳукумати номидан: Мўғулистон йўлларни ривожлантириш ва транспорт вазирлиги.

Аҳдлашувчи Томонлар ваколатли органларининг расмий номлари ва вазифалари ўзгарган тақдирда, Аҳдлашувчи Томонлар бу ҳақда дипломатик каналлар орқали дарҳол хабардор қиладилар.

1. Мазкур Битим қоидаларини талқин қилиш ёки қўллашдан келиб чиқадиган ҳар қандай низолар Аҳдлашувчи Томонлар тарафидан маслаҳатлашувлар ва музокаралар йўли билан ҳал қилинади.

2. Аҳдлашувчи Томонларнинг ўзаро розилиги билан мазкур Битимга қўшимчалар ва ўзгартиришлар киритилиши мумкин. Бундай қўшимчалар ва ўзгартиришлар мазкур Битимнинг ажралмас қисми ҳисобланувчи алоҳида баённомалар билан расмийлаштирилади ва унинг 16-моддасида белгиланган қоидаларга мувофиқ кучга киради.

1. Мазкур Битим Аҳдлашувчи Томонлар учун мажбурий бўлган халқаро шартномалардан келиб чиқадиган ҳуқуқ ва мажбуриятларга дахл қилмайди.

2. Мазкур Битим Аҳдлашувчи Томонлар унинг кучга кириши учун зарур бўлган тегишли ички процедуралари бажарилганлиги тўғрисида бир-бирларини хабардор қилган сўнгги хабарнома олган санадан сўнг 30 (ўттизинчи) кундан бошлаб кучга киради.

3. Мазкур Битим номуайян муддатга тузилади ва Аҳдлашувчи Томонлардан бири бошқа Аҳдлашувчи Томоннинг ушбу Битимни тугатиш нияти тўғрисидаги ёзма хабарномасини олган санадан бошлаб олти ой ўтгунга қадар амал қилади.

Тошкент шаҳрида, 2024 йил 24 июнда, икки асл нусхада, ҳар бири ўзбек, мўғул ва инглиз тилларида тузилди, бунда барча матнлар тенг аутентикдир.

Талқин қилишда келишмовчиликлар юзага келган тақдирда, Томонлар инглиз тилидаги матнга мурожаат қиладилар.