Аҳдлашувчи томонлар,

Бирлашган Миллатлар Ташкилоти Бош Ассамблеяси ўзининг 1946 йил 11 декабрдаги 96 (I)-резолюциясида геноцид халқаро ҳуқуқ нормаларини бузадиган ҳамда Бирлашган Миллатлар Ташкилотининг руҳи ва мақсадларига зид бўлган жиноят эканлигини ҳамда маданиятли олам уни қоралашини эътиборга олиб,

бутун тарих давомида геноцид инсониятга катта талафотлар етказганини эътироф этиб, ва инсониятни ана шу жирканч офатдан қутқариш учун халқаро ҳамкорлик зарурлигига ишонч ҳосил қилиб,

қуйида назарда тутилганидек келишиб олдилар:

Аҳдлашувчи томонлар геноцид у тинч ёки уруш даврида содир этилишидан қатъи назар, халқаро ҳуқуқ нормаларини бузадиган ва унга қарши огоҳлантириш чораларини кўришга ҳамда уни содир этганлиги учун жазолашга мажбур бўлган жиноят эканлигини тасдиқлайдилар.

Ушбу Конвенцияда геноцид деганда бирон бир миллий, этник, ирқий ёки диний гуруҳни тўлиқ ёки қисман йўқ қилиш истагида содир этилган қуйидаги ҳаракатлар тушунилади:

а) шундай гуруҳ аъзоларини ўлдириш;

б) шундай гуруҳ аъзоларига жиддий жисмоний ёки ақлий шикаст етказиш;

с) бирон бир гуруҳни тўлиқ ёки қисман жисмоний йўқ қилишга мўлжалланган шундай ҳаётий шарт-шароитларини яратиш;

д) шундай гуруҳ муҳитида бола туғилишининг олдини олишга мўлжалланган чора-тадбирлар;

э) болаларни бир инсонлар гуруҳидан бошқасига мажбурлаб ўтказиш.

Қуйидаги ҳаракатлар жазоланади:

а) геноцид;

б) геноцидни содир этиш мақсадида тил бириктириш;

с) геноцид содир этишга тўғридан-тўғри ва ошкора иғвогарлик қилиш;

д) геноцид содир этишга суиқасд қилиш;

э) геноцидда бирга қатнашиш.

Геноцид ёки III моддада санаб ўтилган бирор-бир бошқа хатти-ҳаракатларни содир этадиган шахслар, улар конституция бўйича жавобгар ҳукмдорлар, мансабдор ёки хусусий шахслар бўлишидан қатъи назар, жазоланиши керак.

Ушбу Конвенция қоидаларини кучга киритиш учун Аҳдлашувчи томонлар ҳар бири ўз конституциявий тартиб-таомилига мувофиқ зарур қонунчиликни юритиши ва, хусусан, геноцид ёки III моддада келтирилган бошқа жиноятларни содир этишда айбдор шахсларни жазолашнинг самарали чораларини назарда тутиш мажбуриятини оладилар.

Геноцид ёки III моддада санаб ўтилган бошқа хатти-ҳаракатларни содир этишда айбланаётган шахслар, ҳудудида ушбу хатти-ҳаракат содир этилган давлатнинг ваколатли суди ёки шундай суд қилиш ҳуқуқини тан олган мазкур Конвенция томонларига нисбатан юрисдикцияга эга бўла оладиган халқаро жиноят суди томонидан суд қилинишлари лозим.

Айбдорларни беришга нисбатан геноцид ва III моддада санаб ўтилган бошқа хатти-ҳаракатлар сиёсий жиноят сифатида кўрилмайди.

Бундай ҳолларда Аҳдлашувчи томонлар ўз қонунчилиги ва амалдаги шартномаларга мувофиқ бериш мажбуриятини олади.

Ушбу Конвенциянинг ҳар бир иштирокчиси Бирлашган Миллатлар Ташкилотининг тегишли органига, Бирлашган Миллатлар Ташкилоти Уставининг қоидаларига мувофиқ унинг фикрига кўра, геноцид ҳаракатларини ёки III моддада санаб ўтилган бошқа ҳаракатлардан бирини олдини олиш ва тўхтатиш мақсадида барча зарур чораларни кўриши талаби билан мурожаат қилиши мумкин.

Аҳдлашувчи Томонлар ўртасидаги ушбу Конвенцияни талқин қилиш, қўллаш ёки бажариш масалаларига оид баҳслар, жумладан геноцид ёки III моддада санаб ўтилган бошқа хатти-ҳаракатлардан бирини содир этганлик учун у ёки бу давлатнинг жавобгарлигига тааллуқли бўлган баҳслар, баҳсдаги томонлардан бирининг талабига биноан кўриб чиқиши учун Халқаро судга юборилади.

Инглиз, хитой, испан, француз ва рус тили матнлари аслига тўғри бўлган мазкур Конвенцияга 1948 йил 9 декабр санаси қўйилади.

Ушбу Конвенция 1949 йилнинг 31 декабригача уни Бирлашган Миллатлар Ташкилотининг ҳар қандай аъзоси ва Конвенцияни имзолашга Бош Ассамблеянинг таклифини олган Ташкилотга аъзо бўлмаган ҳар қандай давлат номидан имзолаш учун очиқ бўлади.

Ушбу Конвенция ратификация қилиниши керак ва ратификация қилиш тўғрисидаги ҳужжатлар Бирлашган Миллатлар Ташкилоти Бош котибида сақланади.

1950 йил 1 январдан бошлаб Бирлашган Миллатлар Ташкилотининг ҳар қандай аъзоси ва юқорида кўрсатилган таклифни олган бу Ташкилотнинг аъзоси бўлмаган ҳар қандай давлат ушбу Конвенцияга қўшилиши мумкин.

Қўшилиш тўғрисидаги ҳужжатлар Бирлашган Миллатлар Ташкилоти Бош котибида сақланади.

Аҳдлашувчи Томонлардан бири исталган вақтда Бирлашган Миллатлар Ташкилоти Бош котиби номига юборилган билдиришнома орқали ушбу Конвенциянинг қўлланилишини у ташқи муносабатларни олиб бориш учун жавобгар бўлган барча ёки айрим ҳудудларга татбиқ этиши мумкин.

Бош котибига ратификация қилиш ёки қўшилиш тўғрисидаги дастлабки йигирмата акт сақлаш учун топширилган куни Бош котиб нусхаларини Бирлашган Миллатлар Ташкилотининг барча аъзо давлатларига ва XI моддада назарда тутилганидек, Ташкилотга аъзо бўлмаган барча давлатларга юбориш учун баённома тайёрлайди.

Ушбу Конвенция ратификация қилиш ёки қўшилиш тўғрисидаги йигирманчи ҳужжат сақлаш учун топширилган кундан бошлаб тўқсонинчи куни кучга киради.

Ушбу Конвенция кучга киргандан кейин олинган ратификация қилиш ва қўшилиш тўғрисидаги ҳужжатлар Бирлашган Миллатлар Ташкилоти Бош котибига сақлаш учун топширилган кундан бошлаб тўқсонинчи куни кучга киради.

Ушбу Конвенция кучга кирган кундан бошлаб ўн йил мобайнида амал қилади.

У тегишли амал қилиш муддати тугашидан камида олти ой олдин уни денонсация қилмайдиган Аҳдлашувчи Томонларга нисбатан кейинги беш йил давомида ўз кучида қолади.

Денонсация Бирлашган Миллатлар Ташкилоти Бош котиби номига ёзма равишда хабар бериш йўли билан амалга оширилади.

Агар денонсация натижасида ушбу Конвенция иштирокчиларининг сони ўн олтитадан кам бўлса, охирги денонсация кучга кирган кундан Конвенциянинг амал қилиши тўхтайди.

Ушбу Конвенцияни қайта кўриб чиқиш тўғрисидаги талаб Аҳдлашувчи Томонлардан бирининг исталган вақтда Бош котиб номига ёзма равишда хабар бериш орқали тақдим этилиши мумкин.

Бундай талабга нисбатан қандай чоралар кўриш лозимлигини, Бош Ассамблея, агар у қандайдир чоралар кўришни лозим деб топса, ҳал этади.

Бирлашган Миллатлар Ташкилоти Бош котиби Бирлашган Миллатлар Ташкилотининг барча аъзоларига ва XI моддада назарда тутилганидек, Ташкилотга аъзо бўлмаган давлатларга:

а) XI моддада мувофиқ олинган имзолаш, ратификация қилиш ва қўшилиш тўғрисида ҳамма актлар ҳақида;

б) XII моддага мувофиқ олинган ҳамма аризалар ҳақида;

с) XIII моддага мувофиқ ушбу Конвенция кучга кирган кун ҳақида;

д) XIV моддага мувофиқ олинган денонсациялар ҳақида;

э) XV моддага мувофиқ Конвенцияни бекор қилиш ҳақида;

ф) XVI моддага мувофиқ олинган аризалар ҳақида хабар қилади.

Ушбу Конвенциянинг асл нусхаси Бирлашган Миллатлар Ташкилоти архивида сақлаш учун топширилади.

Конвенциянинг тасдиқланган нусхалари Бирлашган Миллатлар Ташкилотининг барча аъзоларига ва XI моддада назарда тутилганидек, Ташкилотга аъзо бўлмаган давлатларга юборилади.

Ушбу Конвенция Бирлашган Миллатлар Ташкилоти Бош котиби томонидан у кучга кирган кундан рўйхатга олинади.