«Ўзбекистон — 2030» стратегиясида белгиланган кенг кўламли ислоҳотларни самарали амалга ошириш, халқимизнинг кундалик ҳаётида ижобий ўзгаришларга эришиш бўйича тизимли ҳаракатларни изчил давом эттириш мақсадида «Ўзбекистон Республикаси Олий Мажлисининг Сенати тўғрисида»ги Ўзбекистон Республикаси Конституциявий Қонунининг 16-моддасига асосан Ўзбекистон Республикаси Олий Мажлиси Сенатининг Кенгаши қарор қилади:

1. Ўзбекистон Республикаси Президентининг 2024 йил 25 декабрдаги «Ўзбекистон Республикасининг «2025 йил учун Ўзбекистон Республикасининг Давлат бюджети тўғрисида»ги Қонуни ижросини таъминлаш чора-тадбирлари тўғрисида»ги ПҚ-455-сонли Қарорига асосан Ташаббусли бюджет жараёни учун туман (шаҳар)ларда ажратиладиган маблағлар миқдорини режалаштиришда ҳудуддаги аҳоли сонидан келиб чиқиб тақсимлаш назарда тутилганлиги маълумот учун қабул қилинсин.

2. Ташаббусли бюджет жараёнларини ўтказиш ҳамда молиялаштириш тартиби тўғрисидаги Низомга иловага мувофиқ ўзгартириш ва қўшимчалар киритилсин.

3. Белгилансинки, ўзини-ўзи молиялаштириш тизимига ўтганлигини инобатга олган ҳолда 2025 йил 1-мавсумдан бошлаб молиявий мустақил бўлган Олий ўқув муассасаларининг Ташаббусли бюджет жараёнларида иштирок этишига рухсат этилмайди.

4. Маблағлардан самарали фойдаланиш ҳамда ижтимоий муаммоларга кўпроқ эътибор қаратиш мақсадида Ташаббусли бюджет жараёни доирасида ташкилотлар томонидан барча турдаги автомобиллар, жамоат хавфсизлигини таъминлашга оид жиҳозлар (радар, жамоат жойларидаги кузатув камералари, «светофор»), раҳбар ходимлар учун мебел жиҳозларини харид қилиш тақиқланади.

5. Мактабгача ва мактаб таълими ҳамда Соғлиқни сақлаш вазирликлари ўн кун муддатда Ташаббусли бюджет доирасида харид қилиниши рухсат этилган товарларнинг аниқ тавсифларини акс эттирган ҳолда қайта шакллантирилган жиҳозлар реестрини Иқтисодиёт ва молия вазирлигига тақдим этсин.

6. Камбағалликни қисқартириш ва бандлик вазирлиги Иқтисодиёт ва молия вазирлиги билан ҳамкорликда бюджет ташкилоти ходимларини мажбурий овоз беришга жалб этиш ҳолатларининг олдини олиш бўйича тизимли ишларни ташкил этсин ҳамда ҳар мавсум якунига кўра Олий Мажлис Сенатига ахборот киритиб борсин.

7. Иқтисодиёт ва молия вазирлиги ҳамда Ўзбекистон ахборот ва оммавий коммуникациялар агентлиги мазкур қарор билан Ташаббусли бюджет жараёнига киритилган ўзгартириш ва қўшимчаларни аҳолига етказиш бўйича зарур чоралар кўрсин.

8. Мазкур Қарорнинг ижросини назорат қилиш Ўзбекистон Республикаси Олий Мажлиси Сенатининг Бюджет ва иқтисодий масалалар қўмитаси раиси Э. Гадоев зиммасига юклансин.

Ўзбекистон Республикаси Олий Мажлис Сенати Кенгашининг 2024 йил 30 январдаги КҚ-666-IV-сон қарори билан тасдиқланган ««Ташаббусли бюджет жараёнларини ўтказиш ҳамда молиялаштириш тартиби тўғрисида»ги Низомга қуйидаги ўзгартириш ва қўшимчалар киритилсин:

1) 6-банд иккинчи хатбоши қуйидаги таҳрирда баён этилсин:

«туман (шаҳар)лар бюджетларида Ташаббусли бюджет жараёни учун режалаштирилган маблағлар. Бунда, ҳар йили туман ва шаҳарлар бюджетида 10 тадан кам бўлмаган, кўпи билан 30 та лойиҳа учун етарли маблағлар режалаштирилади ҳамда 10 тадан ортиқ лойиҳалар учун маблағлар туман ёки шаҳар аҳолисининг тегишли ҳудуднинг аҳоли сонидаги улушидан келиб чиқиб тақсимланади;»;

бешинчи хатбоши чиқариб ташлансин.

2) 9-банд иккинчи хатбоши қуйидаги таҳрирда баён этилсин:

«туман (шаҳар) бюджетларида режалаштирилган маблағларнинг тенг ярми — биринчи мавсум учун январ ойидан бошлаб, қолган қисми иккинчи мавсум учун май ойидан бошлаб ўтказиб берилади;»

учинчи хатбоши чиқариб ташлансин.