«Ўзбекистон Республикаси Олий Мажлисининг Сенати тўғрисида»ги Конституциявий Қонуннинг 16-моддаси, «Ўзбекистон Республикаси Олий Мажлиси Сенатининг Регламенти тўғрисида»ги Қонуннинг 6-моддаси мувофиқ Ўзбекистон Республикаси Олий Мажлиси Сенатининг Кенгаши қарор қилади:

1. Халқ депутатлари вилоят (туман, шаҳар) Кенгашида иш юритиш бўйича намунавий йўриқнома иловага мувофиқ тасдиқлансин.

2. Халқ депутатлари вилоят, туман, шаҳар Кенгашларига Халқ депутатлари вилоят (туман, шаҳар) Кенгашида иш юритиш бўйича намунавий йўриқномани ўз сессияларида кўриб чиқиш ва тасдиқлаш тавсия этилсин.

3. Ўзбекистон Республикаси Олий Мажлиси Сенати девонининг Ҳудудий вакиллик органлари фаолиятини ўрганиш маркази ушбу Қарор ижросини таъминлашда халқ депутатлари вилоят, туман, шаҳар Кенгашлари котибиятларига амалий ёрдам кўрсатиб борсин.

4. Мазкур Қарорнинг ижросини назорат қилиш Ўзбекистон Республикаси Олий Мажлиси Сенатининг Маҳаллий ҳокимият вакиллик органлари фаолиятини кучайтиришга кўмаклашувчи комиссияси раиси Т. Мадумаров зиммасига юклансин.

5. Ушбу Қарор қабул қилинган кундан эътиборан кучга киради.

1. Ушбу Йўриқнома халқ депутатлари вилоят (туман, шаҳар) Кенгашида (бундан буён матнда маҳаллий Кенгаш деб юритилади) иш юритиш (ҳужжатларни тайёрлаш қоидалари, услублари ва жараёнларини ҳамда ҳужжатлар билан ишлаш) тартибини белгилайди.

2. Иш юритишнинг ҳолати учун жавобгарлик маҳаллий Кенгаш котибияти (бундан буён матнда котибият деб юритилади) мудирининг зиммасига юклатилади.

3. Котибият маҳаллий Кенгаш сессиялари ва доимий комиссияларида иш юритишга ташкилий ва услубий жиҳатдан кўмаклашади.

4. Маҳаллий Кенгашда ҳужжатларни рўйхатга олиш, сақлаш ҳамда уларнинг ижросини таъминлаш учун жавобгарлик котибият мудири зиммасига юклатилади.

5. Маҳаллий Кенгашлар, доимий комиссияларнинг қарорлари, комиссиялар мажлислари баённомалари, маҳаллий Кенгаш ва комиссияларнинг бошқа ташкилотлар билан хизмат ёзишмаларини тайёрлашда ва расмийлаштиришда ушбу Йўриқномага амал қилинади.

6. Маҳаллий Кенгаш доимий комиссиялари аъзолари ва котибият ходимлари ушбу Йўриқнома билан имзо қўйдирилган ҳолда таништирилиши лозим.

8. Маҳаллий Кенгаш фаолиятига оид ҳужжатларнинг таркиби маҳаллий Кенгаш, унинг доимий комиссиялари ва котибиятнинг ваколатлари ва вазифаларидан келиб чиқиб белгиланади.

9. Маҳаллий Кенгашда қўлланиладиган ҳужжатларнинг таркибини белгилаш мақсадида котибият мудири томонидан ҳар йили йиғмажилдлар номенклатураси (йиғмажилдларнинг рўйхати ҳамда уларни сақлаш муддатлари кўрсатилган ҳолда) ишлаб чиқилади ва маҳаллий Кенгаш раиси томонидан тасдиқланади.

10. Маҳаллий Кенгаш ҳужжатлари турига ва мазмунига кўра тўғри келадиган тегишли бланкаларда чиқарилади.

Бланкалардаги доимий реквизитлар давлат тилида ёзилади.

11. Ҳужжатни маҳаллий Кенгаш раиси, доимий комиссиялар раислари ва котибият мудири ўз ваколатлари доирасида имзолайди.

12. Ҳар бир ҳужжатда (хатлардан ташқари) унинг тури (қарор, баённома, маълумотнома ва шу кабилар) кўрсатилиши керак.

Ҳужжатга унинг мазмунини аниқ ва лўнда ифодаловчи сарлавҳа қўйилиши шарт (баённомалар ва ёзишмалар бундан мустасно).

Ҳужжатнинг матни мазмунли, аниқ, содда, тўлиқ ва шаклан ихчам ҳамда Ўзбекистон Республикасининг «Давлат тили тўғрисида»ги Қонуни талабларига риоя қилинган ҳолда тузилиши лозим.

Алоҳида ҳолларда, ҳужжатлар чет тилларида ҳам тузилиши мумкин.

13. Давлат органлари, жамоат ташкилотлари ва муассасаларнинг қисқартма номлари амалда тасдиқланган шаклларга мувофиқ қўлланилади. Матнда шахсларнинг фамилияси, географик номлар ёки айрим маъмурий-ҳудудий бирликлар санаб ўтилаётган бўлса, улар қоида тариқасида алифбо тартибида жойлаштирилади.

14. Ўзаро узвий боғлиқ узун матн таркибида бир нечта ҳужжатлар мавжуд бўлса, матннинг катта бўлимларига рим рақамлари ва кичик бўлимларига араб рақамлари қўйилиб, улар бандларга бўлинади.

15. Ҳужжатларнинг матнлари икки қисмга бўлинади:

биринчи қисмда ҳужжатни тузишнинг асоси ёки сабаблари кўрсатилади;

иккинчи қисмда қарор, таклиф ва хулоса баён этилади.

16. Ҳужжатнинг мазмунини тушунтириш ва асослашга эҳтиёж бўлмаса, матн битта қисмдан иборат бўлиши мумкин.

17. Ҳуқуқ ва мажбуриятларни белгиловчи ҳужжатларда (низом, йўриқнома ва бошқалар), шунингдек, фактларнинг тавсифи ҳамда баҳоси бериладиган ҳужжатларда (далолатнома, маълумотнома ва бошқалар) баён учинчи шахс номидан бирлик ёки кўплик сонда берилади, масалан: «комиссия таркибига киради», «комиссия қуйидагиларни аниқлади», «мудир вазифаларини амалга оширади».

18. Хатларда қуйидаги баён этиш шаклларидан фойдаланилади:

биринчи шахс номидан кўплик сонда (масалан: «жўнатилишини сўраймиз», «кўриб чиқиш учун жўнатмоқдамиз»);

биринчи шахс номидан бирлик сонда (масалан: «мақсадга мувофиқ деб ҳисоблайман», «ажратишингизни сўрайман»);

учинчи шахс номидан бирлик сонда (масалан: «комиссия эътироз билдирмайди»).

19. Молиявий ва рақамли маълумотларда чалкашликка йўл қўймаслик учун рақамлар қавс ичида сўз билан такрорланиши мумкин.

Масалан: «197 (бир юз тўқсон етти)».

20. Ҳужжатнинг матнида қайд этилган иловалар бўлса, улар қуйидаги шаклда расмийлаштирилади, масалан: «Илова: 10 варақда».

21. Ҳужжатнинг матнида қайд этилмаган иловалар бўлса, уларнинг номи ҳар бир иловадаги варақлар сонини кўрсатган ҳолда бирма-бир ёзиб чиқилиши керак. Масалан:

22. Ҳужжат бошқа ҳужжат иловаси билан бирга илова қилинаётган бўлса, у қуйидаги шаклда расмийлаштирилади. Масалан:

23. Ҳужжатда кўрсатилган айрим манзилларга илова юборилмайдиган бўлса, илова борлиги тўғрисидаги қайд қуйидаги шаклда расмийлаштирилади, масалан: «Илова: 5 варақда биринчи манзилга».

24. Илова муқоваланган бўлса, варақлар сони кўрсатилмайди.

25. Ҳужжатлар тегишли манзилларга жўнатилаётганда қуйидаги қоидаларга риоя этилиши зарур:

а) ҳужжатлар ташкилотларга, уларнинг таркибий бўлинмаларига ёки аниқ шахс номига йўлланади;

б) ҳужжатлар ташкилотларга йўлланганда жўналиш келишигида кўрсатилади, масалан: «Ўзбекистон Республикаси Олий Мажлисининг Сенатига»;

ҳужжатлар ташкилотларнинг таркибий бўлинмаларига йўлланганда ташкилот номи қаратқич келишигида, таркибий бўлинма жўналиш келишигида кўрсатилади, масалан: «Ўзбекистон Республикаси Олий Мажлиси Сенатининг девонига»;

ҳужжатлар ташкилот ходими номига йўлланганда ташкилот номи қаратқич келишигида, таркибий бўлинмалар номи ва шахснинг лавозими бош келишикда, шахс фамилияси эса жўналиш келишигида кўрсатилади, масалан: «Халқ депутатлари Андижон вилоят Кенгашининг Регламент ва депутатлик одоб-ахлоқи масалалари бўйича доимий комиссияси раиси А.А. Адиловга»;

д) ҳужжат ташкилот раҳбарига йўлланаётганда ташкилот номи қабул қилувчи лавозимнинг номи таркибига киради, масалан: «Бухоро давлат университети ректори»;

ташкилот раҳбарининг исми ва отаси исмининг бош ҳарфлари ёзилади ҳамда фамилияси жўналиш келишигида кўрсатилади, масалан: «А.А. Адиловга»;

э) ҳужжат бир турдаги бир неча ташкилотга юборилаётган бўлса, уларнинг номлари умумлаштирма тарзда кўрсатилиши лозим, масалан: «Қорақалпоғистон Республикаси Жўқорғи Кенгеси, вилоятлар ва Тошкент шаҳар ҳокимликларига»;

ф) юборилаётган ҳужжатда ҳужжат олувчиларни тўрттадан кўп кўрсатиш мумкин эмас. Иккинчи, учинчи ва тўртинчи ҳужжат олувчининг номидан олдин «нусхаси» деган сўз қайд этилмайди;

г) ҳужжат тўрттадан ортиқ манзилга юборилаётган бўлса, тарқатма рўйхат тузилади ҳамда ҳар бир хатда фақат битта ҳужжат олувчи кўрсатилади;

ҳ) ҳужжат жисмоний шахсга юборилаётган бўлса, аввал ҳужжат олувчининг почта манзили, сўнгра исми ва отаси исмининг бош ҳарфлари ҳамда фамилияси кўрсатилади, масалан:

26. Ҳужжатларга сана қўйиш қуйидаги усулларда амалга оширилади:

кўпроқ молиявий масалаларга доир маълумотлари бўлган ҳужжат матнига сана қўйилаётганда — 2024 йил 10 июл;

ҳужжатлар, ҳужжатлардаги резолюциялар, визалар, ҳужжат ижро этилганлиги тўғрисидаги қайдлар ва шу сингариларнинг санаси қўйилаётганда — 2022.10.07.;

Маҳаллий Кенгаш сессияларига тааллуқли ҳужжатларга сана қўйилаётганда — 2024 йил 10 июл ёки 2024.10.07.

27. «Имзо» реквизитлари таркибига ҳужжатни имзолаётган шахснинг амалдаги лавозими номи, унинг шахсий имзоси, исмининг бош ҳарфи ҳамда фамилияси киради.

28. Ҳужжатларни лавозим номидан кейин «унинг ўрнига» деган сўз қўшиб ёки лавозим номидан олдин қия чизиқ қўйиб ёки бошқа шу каби усулларда ўзга шахс томонидан имзоланишига йўл қўйилмайди.

29. Ҳужжатнинг мазмуни учун жавобгарлик бир неча шахслар зиммасида бўлса, бундай ҳужжатга икки ва ундан ортиқ шахслар имзолари қўйилади (далолатномалар, молиявий ҳужжатлар ва ҳ.к.).

30. Маҳаллий Кенгаш доимий комиссиялари томонидан тайёрланган ҳужжатларда, бу ҳужжатларни тузган шахсларнинг лавозимлари эмас, балки комиссиялар таркибидаги вазифалари тақсимоти кўрсатилади, масалан:

31. Ҳужжат бир неча шахс томонидан имзоланганда имзолар мазкур шахсларнинг эгаллаб турган лавозимларига мувофиқ кетма-кет жойлаштирилади, масалан:

32. Келишув таомили ҳужжат лойиҳасини дастлабки тарзда кўриб чиқиш ва баҳолаш усули бўлиб, қоида тариқасида, ваколатларига қараб тегишли доимий комиссия ва котибият мудири билан келишиб олинади. Ҳужжат лойиҳасининг ички келишув таомилига ҳужжат лойиҳасини маҳаллий Кенгаш комиссияларига йўллаш ҳамда улардан ёзма тарздаги фикрлари (ҳужжат лойиҳасига доир таклифлар, мулоҳазалар ва қўшимчалар) ва имзосини олиш киради.

33. Ташқи келишув таомили келишув устхати билан келишув тўғрисидаги маълумотномани, келишув варақаси ёки ҳужжат лойиҳаси муҳокамасининг баённомасини тақдим этиш орқали расмийлаштирилиши мумкин, масалан:

«Келишилган

Адлия бошқармасининг 2024 йил 10 апрелдаги 01-4/15-сонли қарори».

34. Келишув устхатлари «имзо» реквизитидан пастроққа ёки алоҳида келишув варақасига жойлаштирилади.

35. Ҳужжатнинг мазмуни бир неча ташкилотнинг манфаатларига дахлдор ҳолларда келишув варақаси тузилиб, бу ҳақда устхат ёзиладиган жойда қайд этилади.

36. Тасдиқланиши керак бўлган ҳужжат, агар ҳужжатда бошқа муддат назарда тутилмаган бўлса, имзоланган ва тасдиқланган вақтдан эътиборан кучга киради.

37. Ҳужжатлар тегишли маҳаллий Кенгаш раиси, доимий комиссиялар раислари ёки котибият мудири томонидан тасдиқланади.

38. Ҳужжат муайян мансабдор шахс томонидан тасдиқланадиган бўлса, тасдиқ устхати «Тасдиқлайман» деган сўздан, ҳужжатни тасдиқлаётган шахснинг лавозими, унинг шахсий имзоси, исмининг бош ҳарфи, фамилияси ва имзоланган санадан иборат бўлади, масалан:

39. Ҳужжат қарор ёки баённома билан тасдиқланаётган бўлса, тасдиқ устхати «тасдиқланган» деган сўздан олдин ҳужжатнинг бош келишикдаги номи ҳужжат тасдиқланган сана ва тартиб рақамини кўрсатган ҳолда берилади, масалан:

40. Тасдиқ устхати ҳужжатнинг юқори ўнг бурчагига жойлаштирилади.

41. Мансабдор шахсларнинг ҳуқуқларини тасдиқловчи, пул маблағлари ва моддий бойликларнинг сарфланганлиги фактини қайд этувчи ҳужжатлар, шунингдек, меъёрий ҳужжатлар масъул шахснинг имзоси ва муҳр билан тасдиқланади.

42. Маҳаллий Кенгаш фаолиятига тааллуқли ҳужжатларнинг асл нусхалари (молиявий ҳужжатлар бундан мустасно) котибиятда сақланади.

43. Ушбу Йўриқноманинг 42-бандида кўрсатилган ҳужжатлардан кўчирма нусхалар маҳаллий Кенгаш раиси ёки котибият мудирининг рухсати билан олинади ва берилади.

45. Ушбу Йўриқноманинг 42-бандида кўрсатилган ҳужжатларнинг электрон ёки полиграфия воситаларида кўпайтирилган кўчирма нусхалари ҳужжат асл нусхасининг бланкадаги белгилари билан бирга тўлиқ такрорланади.

46. Аслига тўғри ҳисобланган ҳужжатда «Аслига тўғри» деган ёзув, тасдиқловчи шахснинг лавозими, унинг шахсий имзоси, исмининг бош ҳарфи, фамилияси ҳамда нусха тасдиқланган сана қайд этилади, масалан:

47. Ҳужжат нусхаси бошқа ташкилотга жўнатилаётганда имзо чекиш ва муҳр босиш орқали тасдиқланиши лозим.

48. Асл нусхадаги имзони айнан акс эттира олмайдиган ҳужжатларнинг кўпайтирилган кўчирма нусхаларига тасдиқловчи муҳр босилади.

49. Маҳаллий Кенгашнинг доимий комиссиялари ҳамда котибияти томонидан ички ва бошқа ҳужжатлар маҳаллий Кенгаш раиси, шунингдек, котибият мудири резолюциясига биноан олинади. Ҳужжатларни жўнатиш «E-xat», «edo.ijro.uz» ахборот хизмати ёки почта алоқа тармоғи орқали амалга оширилади.

50. Маҳаллий Кенгаш қарорлари маҳаллий Кенгашнинг тегишли доимий комиссиялари ҳамда котибияти томонидан тайёрланади. Комиссиялар раислари ва котибият мудири қарор лойиҳалари амалдаги қонун ҳужжатларига мувофиқ бўлишини таъминлаши лозим.

51. Маҳаллий Кенгаш сессияси муҳокамасига киритилиши режалаштирилаётган масалалар бўйича тайёрланган қарор лойиҳаларига маҳаллий Кенгашнинг масъул доимий комиссияси раиси ҳамда котибият мудири имзо қўяди. Қарор лойиҳалари ва уларга тааллуқли ҳужжатлар масъул комиссия ҳамда котибият томонидан кўпайтирилиб, маҳаллий Кенгаш депутатларига топширилади.

52. Маҳаллий Кенгаш қарорлари қабул қилингандан сўнг тегишли меъёрий ҳужжатларга мувофиқ рақамланиб, котибият томонидан белгиланган шаклдаги бланкада чиқарилади. Маҳаллий Кенгаш қарорлари ва уларга тааллуқли ҳужжатларга имзо (виза) йиғиш тегишли доимий комиссия аъзолари ҳамда котибият ходимлари томонидан амалга оширилади.

53. Маҳаллий Кенгаш қарорлари имзолангандан сўнг қарор лойиҳасини тайёрлаган масъул ижрочига қарор имзоланганлиги ҳақида котибият томонидан икки кун муддатда маълум қилинади.

Маҳаллий Кенгаш қарорлари ҳамда уларга тааллуқли ҳужжатлар имзоланганидан кейин уч кун ичида «Жўнатиш рўйхати» билан бирга масъул доимий комиссия томонидан котибиятга топширилади.

54. Маҳаллий Кенгаш доимий комиссиялари мажлислари олиб борилишини, мажлис қатнашчиларининг чиқишларини ҳамда улар қабул қилган қарорларни аниқ ва қисқа қайд қилиш орқали баённома тузилади. Баённома комиссия аъзоси томонидан юритилади.

55. Маҳаллий Кенгаш комиссиялари мажлислари ва тадбирлари (конференциялар, семинарлар, давра суҳбатлари ва бошқалар) олиб борилишини, мажлис қатнашчиларининг чиқишларини ҳамда улар қабул қилган қарорларни аниқ ва қисқа қайд қилиш орқали баённома тузилади.

Доимий комиссиялар мажлислари баённомаси комиссиянинг котиби ва доимий комиссияга бириктирилган котибият ходими томонидан юритилади ва расмийлаштирилади. Доимий комиссиялар тадбирлари ҳамда бошқа мажлисларда эса бу ишни йиғилиш жараёнида сайланган котиб бажаради. Баённомадаги ахборотларнинг аниқлиги учун масъулият ва жавобгарлик мажлис раиси ва котиби зиммасига юклатилади.

56. Маҳаллий Кенгашга ҳужжатлар қоғоз ёки электрон шаклда киритилиши мумкин. Ҳужжатларни қабул қилиб олиш ва уларни дастлабки ишловдан ўтказиш котибият томонидан амалга оширилади.

57. Қоғоз нусхадаги ҳужжатлар солинган конвертлар, шу жумладан буюртма хатлар очилади ҳамда уларда ҳужжатлар (иловалар) бор-йўқлиги кўздан кечирилади.

58. Ташқи электрон ҳужжатлар билан ишлаш фақат ҳимояланган E-xat, Edo.gov.uz, Ijro.gov.uz ва уларнинг регламентларига асосан амалга оширилади.

59. Ҳужжатларда камчилик борлиги ёки уларга шикаст етказилганлиги аниқланса, бу хусусида икки нусхада далолатнома тузилиб, улардан бири котибиятнинг ўзида қолади, иккинчиси эса мазкур конверт қайси ташкилотдан келган бўлса, ўша ташкилотга юборилади.

60. Янглиш юборилган ҳужжатлар янги конвертга солиниб, келган конвертни ҳам илова қилган ҳолда тааллуқлилиги бўйича жўнатилади ёки қайси ташкилотдан келган бўлса, ўша ташкилотнинг ўзига қайтарилади.

61. Келиб тушган ҳужжатлар конвертлари (шу жумладан жисмоний ва юридик шахсларнинг мурожаатлари) жўнатувчининг манзилини, ҳужжатнинг жўнатилган ва олинган вақтини, шунингдек, шахсий ёки хизмат ҳақи тўлаб олинадиган ҳужжатларни фақат конверти бўйича аниқлаш мумкин бўлган ҳолларда йўқ қилинмайди.

62. Олинган ҳужжат биринчи варағининг пастки ўнг бурчагига котибиятнинг қайд этиш штампи қўйилади, унда ҳужжат келиб тушган сана ва унинг қайд этиш тартиб рақами ҳамда варақлар сони акс эттирилади.

63. Маҳаллий Кенгаш ҳужжатларининг лойиҳалари, шу жумладан, хизмат доирасида фойдаланиш учун мўлжалланган ҳужжатлар лойиҳалари «E-Kengash» электрон тизими орқали қабул қилинади.

64. Маҳаллий Кенгаш томонидан қабул қилинадиган норматив-ҳуқуқий ҳужжатларни давлат ҳисобига олиш «E-Kengash» электрон тизими орқали амалга оширилади.

65. «E-Kengash» электрон тизимини четлаб ўтган ҳолда маҳаллий Кенгашнинг тегишли қарорлари ва маҳаллий Кенгаш раисининг фармойишларини қабул қилишга (чиқаришга) йўл қўйилмайди. Бундай ҳужжатлар юридик кучга эга эмас ҳамда у қабул қилинган пайтдан эътиборан ҳеч қандай ҳуқуқий оқибатларни келтириб чиқармайди.

66. Қонунчилик ҳужжатларига мувофиқ давлат сири ҳисобланган маълумотлар ва махфий маълумотларни ўз ичига олган маҳаллий давлат ҳокимияти органларининг ҳужжатлари лойиҳаларини «E-Kengash» электрон тизими орқали қабул қилишга (чиқаришга) йўл қўйилмайди.

Қонунчилик ҳужжатларида назарда тутилган ҳоллардан ташқари махфий тоифага кирмайдиган ҳужжатлар лойиҳаларини мустақил равишда ушбу тоифага киритиш тақиқланади.

67. Маҳаллий Кенгашга келиб тушган ҳужжатлар «E-Kengash» электрон тизимида рўйхатга олинади.

Ушбу рўйхатга олиш реквизитларининг қуйидаги мажбурий таркиблари қайд этилади:

ҳужжатнинг қаердан келганлиги;

ҳужжатни жўнатувчи ташкилот номи;

ҳужжатнинг чиқиш тартиб рақами ва санаси;

ҳужжатнинг номи ва қисқача мазмуни;

ҳужжатнинг кирим тартиб рақами ва санаси.

Дастурнинг «резолюция» қисмида ҳужжатдаги ижро этишга доир кўрсатмалар резолюция шаклида берилиб, унда қуйидаги мажбурий элементлар ўз аксини топади:

ижрочининг (ижрочиларнинг) фамилияси;

топшириқнинг мазмуни;

топшириқнинг ижро муддати (зарур ҳолларда);

имзо ва сана.

Масалан:

«Ижрочи исмининг бош ҳарфи ҳамда фамилияси;

Халқ депутатлари Хива тумани Кенгашининг навбатдаги сессияси кун тартиби лойиҳасига киритишингизни сўрайман.

Махсус электрон дастурда рўйхатга олинган ҳужжатларнинг қоғоз шакли котибиятда сақланади ва тегишли муддатларда архивга топшириш чоралари кўрилади.

68. Ҳужжатлар электрон тизим орқали ижрочиларга етказилади.

69. Маҳаллий Кенгаш раиси томонидан ижро этиш муддатлари белгиланган ҳужжатлар (жавоб қайтариш, ўрганиб чиқиб, таклиф бериш, маълумот тайёрлаш ва ҳ.к.) котибият мудири томонидан назоратга олинади.

70. Маҳаллий Кенгашнинг бир нечта доимий комиссияси томонидан ижро этиладиган ҳужжатлар электрон дастур орқали ижрочиларга бир вақтнинг ўзида етказилади.

71. Ҳужжатдаги тегишли резолюцияда кимнинг номи биринчи кўрсатилган бўлса, ўша шахс ижро учун масъул ҳисобланади ёки асосий ижрочининг номи алоҳида кўрсатилади.

72. Устки қисмига «Шахсан» деб ёзилган пакетлар очилмайди ва тааллуқлилиги бўйича топширилади. Айрим ҳолларда бундай конвертлар олувчининг рухсати билан у ваколат берган шахс томонидан очилиши мумкин.

73. Ҳужжатларни дастлабки тарзда кўриб чиқиш уларнинг мазмунига қараб ваколатлар ва вазифалар тақсимотининг маҳаллий Кенгашда белгиланган тартибига асосланган ҳолда амалга оширилади.

74. Бевосита маҳаллий Кенгаш раҳбарияти, доимий комиссиялар, котибиятга йўлланган ҳужжатлар дастлабки тарзда кўриб чиқилмайди ва тааллуқлилиги бўйича топширилади.

75. Жисмоний ва юридик шахсларнинг мурожаатлари тегишли масъул ижрочига йўналтириш учун котибиятга берилади.

76. Жисмоний ва юридик шахсларнинг мурожаатлари билан ишлашни ташкил этиш тартиби, шунингдек, жисмоний ва юридик шахсларни қабул қилиш алоҳида тасдиқланган меъёрий ҳужжатлар асосида амалга оширилади.

77. Маҳаллий Кенгаш доимий комиссиясининг номи кўрсатилмаган ҳолда келган ҳужжатлар котибиятда дастлабки тарзда кўриб чиқилади.

78. Ўзбекистон Республикаси Олий Мажлисининг Қонунчилик палатаси, Ўзбекистон Республикаси Президенти Администрацияси, Ўзбекистон Республикаси Вазирлар Маҳкамаси ёки ҳуқуқни муҳофаза қилувчи органлардан олинган, маҳаллий Кенгаш фаолияти билан боғлиқ масалаларга оид ахборотлари бўлган, маҳаллий Кенгаш раҳбарияти томонидан ҳал қилиш талаб этиладиган ҳужжатлар, шу жумладан депутатларнинг ва котибият ходимларининг хатти-ҳаракатларига тааллуқли ҳужжатлар маҳаллий Кенгаш раҳбариятига кўриб чиқиш учун берилади.

79. Ҳужжатларни ишловдан ўтказиш ва ижрочиларга етказиш ҳужжатлар келиб тушган куннинг ўзида, агар ҳужжатлар иш вақтидан ташқари вақтда келган тақдирда, кейинги иш кунида амалга оширилади.

80. Маҳаллий Кенгаш доимий комиссиялари ҳамда котибият ўртасидаги ички ёзишмаларга тааллуқли ҳужжатлар рўйхатга олинмайди.

81. Ҳужжатларни ишловдан ўтказиш ва жўнатиш котибият томонидан амалдаги почта қоидаларига мувофиқ амалга оширилади.

82. Ҳужжатларни конвертга жойлаштиришдан аввал уларнинг тўғри расмийлаштирилганлиги, иловалар бор-йўқлиги, нусхалар сонининг ҳужжатларни олувчилар сонига мувофиқлиги текширилади. Тўлиқ расмийлаштирилмаган ёки нотўғри расмийлаштирилган ҳужжатлар белгиланган талабларга асосан қайта тайёрлаб юбориш учун ижрочига қайтарилади.

83. Жавоб тариқасида тайёрланган ҳужжатларни рўйхатга олиш бирламчи ҳужжатнинг қайд этиш шаклларида амалга оширилади. Жавоб тариқасида тайёрланган ҳужжатлар устига ушбу жавоб қайси ҳужжатга тааллуқли бўлса, шу ҳужжатнинг тартиб рақами ва санаси ёзиб қўйилади.

84. Буюртма, жўнатма (реестр) усули билан жўнатилаётган ҳужжат учун тарқатма рўйхат тузилиб, унга котибият мутахассиси ўз фамилиясини ҳамда жўнатилаётган санани ёзиб қўяди.

85. Ахборот технологиялари ускуналари ёрдамида ўқиладиган ҳужжатлар уларда ёзилган ахборотлар сақланишининг техник талабларига мос келадиган ўрамда (идишда) жўнатилади.

86. Ахборот технологиялари ускуналари ёрдамида ўқиладиган ҳужжатларни жўнатиш уларга ёзма хат илова қилинган тақдирдагина амалга оширилади.

87. Жўнатиш учун келиб тушган ҳужжатлар ўша куннинг ўзида ишланиши ва жўнатилиши керак. Жўнатиш учун келиб тушадиган ҳужжатлар котибият томонидан соат 16:00 га қадар қабул қилинади. Соат 16:00 дан кейин топширилган ҳужжатлар кейинги иш кунида жўнатилади.

88. Ҳужжатларни жўнатиш учун топшириш маҳаллий Кенгаш доимий комиссияларида ёки котибиятда иш юритишга масъул шахслар томонидан амалга оширилади.

89. Маҳаллий Кенгаш ҳужжатларининг ҳисоби тўлиқ ва сараланган тарзда (доимий комиссиялар бўйича алоҳида ёки котибият бўйича алоҳида ёхуд ҳужжатлар гуруҳи бўйича алоҳида) юритилади. Жисмоний ва юридик шахсларнинг мурожаатлари алоҳида ҳисобга олинади. Ҳужжатларнинг сонини ҳисоблаб чиқишда кўпайтирилган ва компьютерда ёзилган нусхалар ҳисоб бирлиги деб қабул қилинади.

90. Ҳужжатларни ҳисобга олиш натижалари котибият томонидан умумлаштирилади ҳамда иш юритишни такомиллаштириш чораларини кўриш учун маҳаллий Кенгаш раҳбариятига тақдим этилади.

91. Ижрони назорат қилиш — ҳужжатларни ижро назоратига қўйиш, ижро боришининг дастлабки текширувини ва таҳлилини, ҳужжатлар ижросини назорат қилиш натижаларини ҳисобга олиш ва умумлаштиришни, маҳаллий Кенгаш раҳбариятини хабардор қилишни, ўз вақтида ва сифатли ижрони таъминламаган масъулларга нисбатан жавобгарлик чоралари қўллашни ўз ичига олади.

92. Ижро муддатлари ҳужжат имзоланган (тасдиқланган) санадан эътиборан календар кунлар билан ҳисобланади.

93. Ижронинг охирги санаси ҳужжат матнида ёки маҳаллий Кенгаш раҳбарияти ёхуд котибият мудирининг резолюциясида кўрсатилади.

94. Ҳужжат фақат вазифалар, топшириқлар ва сўровлар бажарилиб, ижроси ҳужжатли асосда тасдиғини топгач, ижро этилган ҳисобланади ҳамда назоратдан чиқарилади.

95. Ҳужжат ижрочисининг ҳужжатни ижрога чиқарган маҳаллий Кенгаш раҳбарияти ва котибият мудири номига ёзган асослантирилган билдиргиси асосида ҳужжатнинг ижроси назоратдан чиқарилиши ёки ижро муддати ўзгартирилиши мумкин.

96. Котибият ҳужжатларнинг доимий комиссиялар ҳамда котибият мутахассислари томонидан ижро этилиши билан боғлиқ ишларнинг аҳволини мунтазам таҳлил қилиб боради. Маҳаллий Кенгаш раҳбариятига ижро интизомининг ҳолати ҳақида ахборот бериб туриш учун котибият мудирига маълумотлар тақдим этиб туради.

97. Ҳужжатлар йиғмажилдлари номенклатураси — маҳаллий Кенгашда юритиладиган белгиланган тартибда расмийлаштирилган ва уларни сақлаш муддатлари кўрсатилган ҳолда тартибга солинган ҳужжатлар рўйхатидир.

Маҳаллий Кенгашнинг доимий комиссиялари ва котибиятда иш юритишда ҳужжатлар йиғмажилдларини жамлаш ва ҳисобга олиш тартибли бўлиши учун йиғмажилдлар номенклатураси тузилади.

98. Доимий комиссиялар таклифларига асосан ҳар йили маҳаллий Кенгашда котибият томонидан йиғмажилдлар номенклатураси тузилади ҳамда маҳаллий Кенгаш Раиси томонидан тасдиқланади.

99. Йиғмажилдлар номенклатураси тузилаётганда туркум ва намунавий ишлар номенклатурасига, сақлаш муддатлари кўрсатилган туркум ва идоравий рўйхатларга, идоравий архивлар ишининг асосий қоидаларига риоя этиш лозим.

100. Хизмат заруратига кўра йил давомида иш юритишда янги йиғмажилдлар шаклланган бўлса, йил тугагач, улар келгуси йилга шаклланадиган йиғмажилдлар номенклатурасига киритилади.

101. Муайян масалага оид аввалги йилда бошланган ёзишмалар қайта тикланганда ҳужжатлар аввалги йилдаги йиғмажилд индекси кўрсатилган тарзда жорий йилдаги йиғмажилдга киритилади.

102. Ҳужжатлар йиғмажилдини шакллантириш — бу ҳужжатлар йиғмажилдлари номенклатурасига мувофиқ ҳужжатлар йиғмажилдларидаги ижро этилган ва бошқа ҳужжатларни гуруҳларга бўлишдир.

103. Ҳужжатлар йиғмажилдларини шакллантиришда қуйидаги қоидаларга риоя қилиш зарур:

ҳужжатлар йиғмажилдига номенклатура бўйича ҳужжатлар йиғмажилди сарлавҳаларига мувофиқ фақат ижро этилган ва тўғри расмийлаштирилган ҳужжатларни жойлаштириш;

ҳужжатлар йиғмажилдида битта календар йилнинг ҳужжатларини гуруҳлаш, йилдан-йилга ўтувчи ҳужжатлар йиғмажилдлари бундан мустасно;

ҳужжатлар йиғмажилдларида доимий ва вақтинча сақланадиган ҳужжатларни алоҳида гуруҳлаш.

Ҳужжатлар йиғмажилдига қайтариш лозим бўлган, ортиқча нусхалар, хомаки қўл ёзмалар жойланмаслиги керак ва ҳужжатлар йиғмажилди 300 варақдан ошмаслиги керак.

104. Ижро этилган ва тўғри расмийлаштирилган ҳужжатлар йиғмажилдга номенклатурага мувофиқ жойлаштирилади.

105. Доимий ва вақтинча сақланадиган ҳужжатлар алоҳида-алоҳида йиғмажилдларда сақланади.

106. Илгари котибиятда ишлаган шахсларнинг йиғмажилдлари ва ҳужжатларидан фойдаланишга маҳаллий Кенгаш раисининг ёзма рухсати билан йўл қўйилади.

107. Ҳужжатлар ва йиғмажилдлар котибиятда 3 йил муддатда сақланади, сўнгра тегишли ҳудуд архив идорасига топширилади.

108. Маҳаллий Кенгашда ҳужжатлар йиғмажилдларининг сақланиши, уларни давлат сақловига топширишга тайёрлаш жавобгарлиги котибият мудирининг зиммасига юклатилади.

109. Котибият мудири доимий комиссиялар ҳамда котибият ходимлари иш юритувида бўлган ҳужжатларнинг сақланиши учун жавобгардир.

110. Хизмат ҳужжатларини эгаллаб турган лавозимига кўра улар билан танишиши мумкин бўлган шахслардан бошқа шахсларга бериш ёки ошкор қилиш, улардан иш фаолияти билан боғлиқ бўлмаган бошқа ҳолатларда фойдаланиш тақиқланади.

111. Ҳужжатлар йўқотилган ёки яроқсиз ҳолатга келган тақдирда, масъул ходим дарҳол бу ҳақда котибият мудирига билдирги орқали мурожаат қилиши шарт.

112. Ушбу Йўриқнома талабларини бузиш белгиланган тартибда жавобгарликка олиб келади.