Марказий Осиё мамлакатлари ўртасидаги парламентлараро алоқаларни янада ривожлантириш, минтақани ижтимоий-иқтисодий ривожлантиришда парламентлараро комиссиялар, дўстлик гуруҳлари, давлат ҳокимияти вакиллик органлари, ёшлар парламентлари ҳамда хотин-қизларнинг иштирокини кенгайтириш мақсадида Ўзбекистон Республикаси Олий Мажлиси Қонунчилик палатасининг Кенгаши ва Ўзбекистон Республикаси Олий Мажлиси Сенатининг Кенгаши қарор қиладилар:

1. 2024 йилнинг 12-13 сентябрь кунлари Хива шаҳридаги «Фаровон» меҳмонхонасида Марказий Осиё давлатларининг иккинчи парламентлараро форуми ўтказилсин.

2. Қуйидагилар:

Марказий Осиё давлатларининг иккинчи парламентлараро форумини ўтказиш бўйича ташкилий қўмита (бундан буён матнда Ташкилий қўмита деб юритилади) таркиби 1-иловага*;

Марказий Осиё давлатларининг иккинчи парламентлараро форумини ўтказиш бўйича чора-тадбирлар дастури 2-иловага*;

Марказий Осиё давлатларининг иккинчи парламентлараро форумини ёритиш бўйича медиа-режа 3-иловага*;

Марказий Осиё давлатларининг иккинчи парламентлараро форуми концепцияси 4-иловага*;

Марказий Осиё давлатларининг иккинчи парламентлараро форумининг дастури лойиҳаси 5-иловага* мувофиқ тасдиқлансин.

3. Ушбу Қарорнинг 2* ва 3-иловаларида* белгиланган вазифаларнинг ўз вақтида бажарилишини мувофиқлаштириб бориш Ўзбекистон Республикаси Олий Мажлиси Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси ҳамда Қонунчилик палатасининг Халқаро ишлар ва парламентлараро алоқалар қўмитасига, шунингдек, Олий Мажлис палаталари девонлари Ахборот хизматларига юклатилсин.

4. Ташкилий қўмита:

ушбу Қарорнинг 2-иловаси* билан тасдиқланган Марказий Осиё давлатларининг иккинчи парламентлараро форумини ўтказиш бўйича чора-тадбирлар дастурида белгиланган вазифаларнинг ўз вақтида амалга оширилишини таъминласин;

Марказий Осиё давлатларининг иккинчи парламентлараро форуми (бундан буён матнда Форум деб юритилади) иштирокчиларининг келиб-кетиши, транспорт билан таъминланиши ва уларга тиббий хизматлар кўрсатиш масалаларини мувофиқлаштирсин;

Форум ўтказиладиган жойларнинг техника ва телекоммуникациялар билан жиҳозланишини, ободонлаштириш ва йўл таъмирлаш ишлари олиб борилишини ташкил этиш, шунингдек Тошкент ва Хива шаҳарларида зарур меҳмонхоналарнинг тайёр бўлиши ва банд қилинишини таъминласин;

Форумни ўтказиш билан боғлиқ ахборот-таҳлилий ва бошқа ҳужжатларнинг ўз вақтида ҳамда сифатли тайёрланишини таъминласин.

5. «Uzbekistan airways», «Uzbekistan airports» ва «Ўзбекистон темир йўллари» акциядорлик жамиятлари тегишинча Ислом Каримов номидаги «Тошкент» ва Урганч халқаро аэропортларини, Тошкент ва Хоразм темир йўл вокзалларини, улардаги VIP залларини Форум иштирокчиларини кутиб олиш, кузатиш ва уларга хизмат кўрсатиш учун тайёрлаш чораларини кўрсин ҳамда VIP залларидан йиғим ва божлар, шунингдек, зал хизмати учун тўловлар ундирилмай фойдаланилишини таъминласин.

6. Ўзбекистон Республикаси Ички ишлар вазирлиги, Ўзбекистон Республикаси Миллий гвардияси Тошкент, Урганч ва Хива шаҳарларида, тадбир ўтказиладиган жойларда Форум иштирокчилари хавфсизлигини, шунингдек улар учун ажратилган автобусларнинг ҳаракатланиши хавфсизлигини таъминласин.

7. Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Туризм қўмитаси:

икки ҳафта муддатда Марказий Осиё давлатлари делегациялари аъзолари учун мамлакатимизнинг бой туристик салоҳиятини, хусусан, унинг тарихи ва маданий меросини акс эттирувчи тарқатма материалларни тайёрлаш ва тарқатиш чораларини кўрсин;

Ўзбекистон Республикаси Маданият вазирлиги, Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита ҳамда Хоразм вилояти ҳокимлиги билан биргаликда анжуман иштирокчиларини барча тарихий-маданий мерос объектларига кириш чипталари билан бепул таъминласин, ташриф мобайнида фото ва видеолавҳаларни суратга олиш имкониятини яратсин.

8. Ўзбекистон Республикаси Маданият вазирлиги:

Форумининг очилиш маросимида, танаффус ва тушлик, шунингдек, Ўзбекистон Республикаси Олий Мажлиси Сенати номидан Форум иштирокчилари учун ташкил этиладиган расмий кечки қабул давомида концерт дастури тақдимотини ташкил этиш;

Хива шаҳридаги Ичан қалъа мажмуасига Марказий Осиё давлатлари делегациялари аъзоларининг ташрифи доирасида Хива тарихи ва унинг фан ривожига қўшган ҳиссаси, шунингдек, ҳудуднинг бой маданияти ва санъати ҳақидаги ҳикоялар тақдим этиш чораларини кўрсин.

9. Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги ҳамда Ўзбекистон Республикаси Рақамли технологиялар вазирлигига Ўзбекистон Республикаси Олий Мажлиси Сенати девонининг Ахборот хизмати билан биргаликда 2024 йил 1 сентябрга қадар Форумини кенг ёритиш бўйича давлат органларининг ахборот хизматлари раҳбарлари, фаол журналист ва блогерлардан иборат Матбуот-штабини ташкил этиш тавсия этилсин.

10. Матбуот-штабининг асосий вазифаси этиб қуйидагилар белгилансин:

Форумдан олди, Форум вақти ва ундан кейинги жараёнларни кенг ёритиб бориш чораларини кўриш;

Форумнинг мазмун-моҳияти ва аҳамиятини миллий ва хорижий оммавий ахборот воситалари ва Интернет жаҳон ахборот тармоғида ўзбек ва хорижий тилларда кенг ёритиш мақсадида форум бўлиб ўтадиган жойда Матбуот марказини ташкил этиш;

Форумнинг очилиши маросимини оммавий ахборот воситалари орқали жонли намойиш этиш ва иш жараёнини ёритиб боришни ташкил этиш;

Форум иштирокчилари, жумладан, Марказий Осиё давлатлари делегациялари аъзолари билан интервьюлар, махсус репортажлар, брифинг, пресс-клуб кўрсатувларини ташкил этиш;

Марказий Осиё мамлакатлари ўртасидаги парламентлараро алоқалар, минтақани ижтимоий-иқтисодий ривожлантиришда парламентлараро комиссиялар, дўстлик гуруҳлари, давлат ҳокимияти вакиллик органлари, ёшлар парламентлари ҳамда хотин-қизларнинг иштирокини кенгайтириш борасида амалга оширилаётган ислоҳотлар тўғрисида холис ва тўлиқ маълумотларнинг кенг жамоатчиликка тезкор етказилишини таъминлаш.

11. Ўзбекистон миллий телерадиокомпанияси ва Ўзбекистон миллий медиа ассоциацияси Олий Мажлис палаталари девонларининг Ахборот хизматлари билан биргаликда 2024 йил 1 сентябрга қадар Марказий Осиё мамлакатлари ўртасидаги парламентлараро алоқаларни, жумладан минтақани ижтимоий-иқтисодий ривожлантиришда парламентлараро комиссиялар, дўстлик гуруҳлари, давлат ҳокимияти вакиллик органлари, ёшлар парламентлари ҳамда хотин-қизларнинг иштирокини акс эттирувчи 2-3 дақиқали видеороликни тайёрласин.

12. Ўзбекистон Республикаси Олий Мажлиси Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси ҳамда Қонунчилик палатасининг Халқаро ишлар ва парламентлараро алоқалар қўмитаси 2024 йил 5 сентябрга қадар Форум якуни бўйича қабул қилинадиган Хива коммюникеси лойиҳасини ишлаб чиқиб, Марказий Осиё давлатлари парламентлари билан келишсин.

13. Ўзбекистон Республикаси Олий Мажлиси Сенати биноларидан фойдаланиш ва хўжалик фаолияти бошқармаси 2024 йил 30 августга қадар Форумининг харажатлар сметасини ишлаб чиқсин ва белгиланган тартибда Ўзбекистон Республикаси Вазирлар Маҳкамасига киритсин.

14. Мазкур Қўшма қарорнинг ижросини назорат қилиш Ўзбекистон Республикаси Олий Мажлиси Сенати Раисининг биринчи ўринбосари С. Сафоев ҳамда Ўзбекистон Республикаси Олий Мажлиси Қонунчилик палатасин Спикерининг биринчи ўринбосари А. Саидов зиммасига юклатилсин.

15. Ушбу Қўшма қарор қабул қилинган кундан эътиборан кучга киради.