Ўзбекистон Республикаси Олий Мажлиси Қонунчилик палатаси Бюджет ва иқтисодий масалалар қўмитасининг (бундан буён матнда Қўмита деб юритилади) 2023 йилдаги ҳамда 2024 йилнинг биринчи ярим йиллигидаги фаолияти юзасидан ахборотини кўриб чиқиб, Ўзбекистон Республикаси Олий Мажлиси Қонунчилик палатасининг Кенгаши таъкидлайдики, ҳисобот даврида Қўмита томонидан қонун ижодкорлиги фаолияти самарадорлигини оширишга, қонун лойиҳаларини тайёрлашда халқаро тажрибадан унумли фойдаланишга, шунингдек мамлакатимизда иқтисодий барқарорликни таъминлаш, самарали бюджет ва солиқ сиёсатини юритишнинг муҳим масалалари юзасидан қонунчиликни такомиллаштиришга эътибор қаратилган.

Қўмитанинг ўтган даврдаги фаолияти янги таҳрирдаги Ўзбекистон Республикаси Конституцияси, парламент фаолиятини тартибга солувчи конституциявий қонунлар, Ўзбекистон Республикаси Президентининг фармонлари ва қарорлари, «Ўзбекистон — 2030» стратегияси, давлат дастурлари ҳамда Ўзбекистон Республикаси Олий Мажлиси Қонунчилик палатасининг (бундан буён матнда Қонунчилик палатаси деб юритилади) тегишли даврга мўлжалланган асосий йўналишларига мувофиқ ташкил этилган.

Қўмита аъзолари томонидан «Юридик шахс мақомига эга бўлмаган касаба уюшмалари ташкилотларини ҳисобга қўйиш тартиби белгиланаётганлиги муносабати билан «Касаба уюшмалари тўғрисида»ги Ўзбекистон Республикаси Қонунига қўшимчалар ва ўзгартириш киритиш ҳақида»ги Ўзбекистон Республикаси қонуни лойиҳаси қонунчилик ташаббуси ҳуқуқи асосида Қонунчилик палатасига кўриб чиқиш учун киритилди ва учта ўқишда қабул қилиниб, ҚЛ-1080-сонли қонун лойиҳаси билан бирлаштирилган ҳолда Сенатга юборилди.

Ҳисобот даврида Қўмита масъуллигида 46 та қонун лойиҳаси кўриб чиқилди, ундан 5 таси яхлит қонун, 6 таси жамланма қонундир. Шундан жами қабул қилинган қонунлар сони жамланма қонунлар билан биргаликда 39 тани ташкил этди. 7 та қонун лойиҳаси Қўмита томонидан кўриб чиқилмоқда. Президент томонидан қайтарилган 2 та қонун лойиҳаси кўриб чиқишдан олиб ташланди.

Қонунларнинг ва қонуности ҳужжатларининг ижро этилиш ҳолатини ўрганиш, давлат органлари, хўжалик бошқаруви органлари раҳбарларининг ахборотини эшитиш, Қонунчилик палатаси ва Қўмита қарорлари ижросини ўрганиш бўйича Қўмита томонидан 28 та назорат-таҳлил тадбири ўтказилган.

Кўриб чиқилаётган даврда хорижий парламентлар ва халқаро ташкилотлар билан ўзаро делегациялар алмашиш амалга оширилди, чет эл парламентарийлари, элчилар, халқаро ташкилотлар вакиллари билан учрашувлар ўтказилди, парламентлараро ҳамкорлик гуруҳларининг йиғилишларида Қўмита аъзолари фаол иштирок этди.

2023 йилда ҳамда 2024 йилнинг биринчи ярим йиллигида жисмоний ва юридик шахслардан келиб тушган 591 та мурожаат белгиланган тартибда Қўмита аъзолари томонидан кўриб чиқилган. Қонунчиликни такомиллаштириш юзасидан келиб тушган таклифлар алоҳида ўрганилган.

Қўмита фаолиятида очиқлик ва шаффофликни таъминлаш, соҳага оид қабул қилинаётган қонун ҳужжатларининг мазмун-моҳиятини жамоатчиликка етказишда оммавий ахборот воситалари билан самарали ҳамкорлик йўлга қўйилган. Қўмитанинг фаолияти оммавий ахборот воситаларида жами 1623 маротаба ёритилган. Жумладан, телевидение орқали 145 маротаба, радио орқали 123 маротаба, газета ва журналлар орқали 128 маротаба, Интернет нашрлари орқали 451 маротаба ҳамда ижтимоий тармоқларда 776 маротаба чиқишлар қилинган.

Юқорида баён этилганлардан келиб чиқиб, Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатаси Бюджет ва иқтисодий масалалар қўмитасининг 2023 йилдаги ҳамда 2024 йилнинг биринчи ярим йиллигидаги фаолияти тўғрисидаги ахборот маълумот учун қабул қилинсин.

2. Ўзбекистон Республикаси Олий Мажлиси Қонунчилик палатасининг Бюджет ва иқтисодий масалалар қўмитаси:

назорат-таҳлил тадбирлари доирасида қабул қилинган қарорларнинг ижро этилиш ҳолатини доимий равишда мониторинг қилиб бориш чораларини кўрсин;

Қўмита аъзоларининг қонунчилик ташаббуси ҳуқуқидан фойдаланиш самарадорлигини янада оширсин;

Қўмита масъул бўлган қонун лойиҳаларининг жамоатчилик муҳокамаларини ташкил этиш ҳамда келиб тушган таклифлар ва фикр-мулоҳазаларни қонун лойиҳаларини маромига етказишда ҳисобга олиш бўйича ишларни янада кучайтирсин;

2022 — 2026 йилларга мўлжалланган Янги Ўзбекистоннинг тараққиёт стратегиясини «Инсонга эътибор ва сифатли таълим йили»да амалга оширишга оид давлат дастурининг Қўмита фаолиятига тааллуқли бўлган бандларининг ижро этилиши устидан таъсирчан парламент назоратини амалга ошириш чораларини кўрсин;

Ўзбекистон Республикаси Олий Мажлиси Қонунчилик палатаси Кенгашининг 2024 йил 16 апрелдаги «Яшил макон» умуммиллий лойиҳаси доирасида белгиланган вазифалар ижроси устидан самарали парламент назоратини олиб боришга доир чора-тадбирлар тўғрисида»ги 4265-IV-сонли Қарори билан тасдиқланган «Йўл харитаси»да белгиланган вазифалар ижросини ўз вақтида таъминлаб борсин.

3. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосари А. Хаитов зиммасига юклатилсин.

4. Ушбу Қарор қабул қилинган кундан эътиборан кучга киради.