«Парламент назорати тўғрисида»ги Ўзбекистон Республикаси Қонунининг 14-моддасига мувофиқ Ўзбекистон Республикаси Олий Мажлисининг Қонунчилик палатаси қарор қилади:

1. «Электрон ҳукумат» тизимининг янги босқичига — «Рақамли ҳукумат» тизимига ўтиш бўйича амалга оширилаётган ишлар тўғрисида»ги Ўзбекистон Республикаси Олий Мажлиси Қонунчилик палатасининг парламент сўровига Ўзбекистон Республикаси рақамли технологиялар вазири Ш. Шерматов томонидан юборилган ёзма жавоб маълумот учун қабул қилинсин.

2. Ўзбекистон Республикаси Рақамли технологиялар вазирлигига:

аҳолига ва тадбиркорлик субъектларига рақамли хизматлардан фойдаланиш учун қулай шарт-шароитлар яратиш мақсадида Ягона интерактив давлат хизматлари портали орқали электрон хизматларни жорий этишни кенгайтириш чораларини кўриш;

ижро этувчи ҳокимиятнинг марказий аппаратлари, уларнинг ҳудудий бўлинмалари ва тасарруфидаги ташкилотларда қоғозсиз иш юритишга ўтиш жараёнини жадаллаштириш мақсадида «Ijro.gov.uz» ижро интизоми идоралараро ягона электрон тизими негизида ишлаб чиқилган «edo.ijro.uz» модули орқали электрон ҳужжат айланиши тизимини тўлиқ жорий этиш чора-тадбирларини белгилаш;

БМТнинг Электрон ҳукумат рейтинги бўйича баҳолаш мезонлари ва талаблари асосида Рақамли трансформация ҳамда ҳудудларда рақамли иқтисодиёт ҳолатини рейтинг баҳолаш мезонлари ва талабларига мувофиқлик даражасини баҳолаш каби кўрсаткичлар билан тўлдириб бориш;

«Рақамли ҳукумат» тизими доирасида ахборот тизимлари ва маълумотлар базаларининг ахборот хавфсизлигини ошириш, заифликларни аниқлаш, заифликлар тўғрисидаги маълумотларни ошкор этиш механизмини яратиш;

Ўзбекистон Республикаси Президентининг 2024 йил 21 февралдаги ПФ-37-сонли Фармонининг 2-иловаси билан тасдиқланган «Ўзбекистон — 2030» стратегиясининг Барқарор иқтисодий ўсиш орқали аҳоли фаравонлигини таъминлаш йўналиши бўйича 2024 йилга мўлжалланган амалий чора-тадбирларнинг тегишли бандлари ижросини ўз вақтида таъминлаш чораларини кўриш тавсия этилсин.

3. Ўзбекистон Республикаси Олий Мажлиси Қонунчилик палатасининг Инновацион ривожланиш, ахборот сиёсати ва ахборот технологиялари масалалари қўмитаси ёзма жавоб маълумотида қайд этилган, парламент сўровини кўриб чиқиш натижалари бўйича белгиланган вазифаларнинг ижро этилишини таъминлаш юзасидан парламент назоратини амалга оширсин.

4. Ўзбекистон Республикаси Рақамли технологиялар вазирлиги ушбу Қарорнинг ижроси юзасидан 2024 йилнинг 10 октябрга қадар Ўзбекистон Республикаси Олий Мажлисининг Қонунчилик палатасига ахборот тақдим этсин.

5. Мазкур Қарор Ўзбекистон Республикаси Рақамли технологиялар вазирлигига юборилсин.

6. Ушбу Қарор қабул қилинган кундан эътиборан кучга киради.