Ўзбекистон Республикаси Сайлов кодексининг 14, 16 ва 26-моддаларига мувофиқ, Ўзбекистон Республикаси Марказий сайлов комиссияси қарор қилади:

1. Туман, шаҳар сайлов комиссияси тўғрисидаги низом иловага мувофиқ тасдиқлансин.

2. Мазкур қарор Ўзбекистон Республикаси Марказий сайлов комиссиясининг расмий веб-сайтида эълон қилинсин.

3. Мазкур қарорнинг ижросини назорат қилиш Ўзбекистон Республикаси Марказий сайлов комиссияси Раисининг ўринбосари Б. Кучкаров зиммасига юклансин.

Мазкур Низом Ўзбекистон Республикасининг Сайлов кодексига (бундан буён матнда Сайлов кодекси деб юритилади) мувофиқ туман, шаҳар сайлов комиссияларини тузиш ҳамда уларнинг фаолиятини ташкил этиш тартибини белгилайди.

1. Туман, шаҳар сайлов комиссияси аъзолигига номзодлар тегишли халқ депутатлари туман ва шаҳар Кенгашининг регламентида белгиланган тартибда унинг мажлисида муҳокама қилинади ҳамда тегишли вилоят, Тошкент шаҳар ҳудудий сайлов комиссиясига (бундан буён матнда ҳудудий сайлов комиссияси деб юритилади) тасдиқлаш учун тавсия этилади.

Бунда халқ депутатлари туман ва шаҳар Кенгашининг туман, шаҳар сайлов комиссияси аъзолигига номзодларни тавсия этиш тўғрисидаги қарори қабул қилинган кунидан эътиборан икки иш куни ичида ҳудудий сайлов комиссиясига юборилади.

Туман, шаҳар сайлов комиссияси аъзолигига номзодларни тасдиқлаш учун ҳудудий сайлов комиссиясига тавсия этиш ҳамда ҳудудий сайлов комиссияси томонидан тасдиқлаш жараёнлари «E-saylov» ахборот тизими орқали амалга оширилиши мумкин.

2. Туман, шаҳар сайлов комиссияси ҳудудий сайлов комиссияси томонидан сайловга камида етмиш беш кун қолганида комиссия раиси, раис ўринбосари, котибидан ва комиссиянинг саккиз — ўн саккиз нафар бошқа аъзоларидан иборат таркибда беш йил муддатга тузилади.

3. Ҳудудий сайлов комиссиясининг туман, шаҳар сайлов комиссиясини тузиш тўғрисидаги қарори унинг расмий веб-сайтида эълон қилинади.

4. Янги ташкил этилган маъмурий-ҳудудий бирликларда туман, шаҳар сайлов комиссияси тегишли халқ депутатлари вилоят, Тошкент шаҳар Кенгашининг тавсиясига биноан ҳудудий сайлов комиссияси томонидан сайловга камида олтмиш кун қолганида тузилади ҳамда ўз ваколатларини кейинги сайлов кампанияси бошланганлиги эълон қилингунига қадар амалга оширади.

Қорақалпоғистон Республикаси ҳудудида ушбу Низомда назарда тутилган сайловларга тайёргарлик кўриш ва уларни ўтказиш билан боғлиқ ҳудудий сайлов комиссиясининг ваколатларини Қорақалпоғистон Республикаси Марказий сайлов комиссияси амалга оширади.

5. Туман, шаҳар сайлов комиссияси расмий веб-сайтида ва матбуот нашрларида ўз таркиби, манзили ва комиссиянинг телефон рақамлари тўғрисидаги маълумотларни эълон қилади.

6. Йигирма бир ёшга тўлган, ўрта ёки олий маълумотга, қоида тариқасида, сайловга тайёргарлик кўриш ва уни ўтказиш борасида иш тажрибасига эга бўлган, аҳоли ўртасида обрў-эътибор қозонган Ўзбекистон Республикаси фуқаролари туман, шаҳар сайлов комиссиясининг аъзоси бўлиши мумкин.

7. Қуйидагилар туман, шаҳар сайлов комиссиясининг аъзоси бўлиши мумкин эмас:

Ўзбекистон Республикаси Олий Мажлиси Қонунчилик палатаси (бундан буён матнда Қонунчилик палатаси деб юритилади) депутати, халқ депутатлари вилоят, туман, шаҳар Кенгашлари (бундан буён матнда маҳаллий Кенгашлар деб юритилади) депутати, Ўзбекистон Республикаси Олий Мажлиси Сенати (бундан буён матнда Сенат деб юритилади) аъзоси;

бошқа сайлов комиссиясининг аъзолари;

сиёсий партияларнинг аъзолари ва ваколатли вакиллари;

вилоят, туман ва шаҳар ҳокимлари ҳамда уларнинг ўринбосарлари;

прокуратура органларининг, судларнинг мансабдор шахслари;

номзодлар, номзодларнинг яқин қариндошлари (яъни ота-она, туғишган ва ўгай ака-ука, опа-сингиллар, эр-хотин, фарзанд, шу жумладан фарзандликка олинганлар, бобо, буви, неваралар, шунингдек эр-хотиннинг ота-онаси, туғишган ва ўгай ака-ука, опа-сингиллари) ва ишончли вакиллари;

номзодларга бевосита бўйсунувчи шахслар;

оғир ёки ўта оғир жиноятлар содир этганлиги учун судланганлик ҳолати тугалланмаган ёхуд судланганлиги олиб ташланмаган фуқаролар.

8. Номзодларнинг яқин қариндошлари ёки бевосита номзодларга бўйсунувчи шахслар номзод кўрсатилган ҳудуддан бошқа ҳудудда туман, шаҳар сайлов комиссиялари аъзолигига сайланган бўлса, ушбу шахслар тегишли туман, шаҳар сайлов комиссияси таркибида ўз фаолиятларини давом эттиришлари мумкин.

Сайлов кампанияси давомида номзод рўйхатга олингандан сўнг унинг яқин қариндошлари ёки унга бевосита бўйсунувчи шахслар туман, шаҳар сайлов комиссияси таркибига киритилганлиги аниқланса, ушбу шахслар туман, шаҳар сайлов комиссияси таркибидан белгиланган тартибда чиқарилади.

9. Туман, шаҳар сайлов комиссияси аъзоларининг таркибини шакллантиришда мазкур Низомнинг 6-бандида назарда тутилган талабларни инобатга олган ҳолда қуйидагилар орасидан бўлиши тавсия этилади:

нодавлат нотижорат ташкилотлари ва фуқаролик жамиятининг бошқа институтлари вакиллари;

ҳуқуқий билим ва малакага эга, шунингдек хорижий тилларни биладиган мутахассислар;

Сайлов жараёнини бошқариш ахборот тизими (бундан буён матнда СЖБАТ деб юритилади) ва Сайловчиларнинг ягона электрон рўйхати (бундан буён матнда СЯЭР деб юритилади) билан ишлаш кўникмасига эга бўлган, рақамли технологиялар соҳасида билим ва амалий кўникмага эга фуқаролар.

Туман, шаҳар сайлов комиссияси таркибини шакллантиришда хотин-қизлар ва эркаклар учун тенг ҳуқуқ ҳамда имкониятларни, шунингдек ёшлар ҳамда ногиронлиги бўлган ижтимоий фаол фуқароларнинг иштирокини таъминлашга алоҳида эътибор берилади. Бунда туман, шаҳар сайлов комиссияси аъзолигига номзодлардаги хотин-қизларнинг улуши камида ўттиз фоиз бўлиши тавсия этилади.

10. Туман, шаҳар сайлов комиссияси аъзоларига мазкур Низомнинг 1-иловасига мувофиқ шаклда гувоҳнома берилади.

Туман, шаҳар сайлов комиссияси раисининг, раис ўринбосарининг, комиссия котиби ва комиссия аъзоларининг гувоҳномалари ҳудудий сайлов комиссиясининг раиси томонидан имзоланади ва ҳудудий сайлов комиссиясининг муҳри билан тасдиқланади.

Туман, шаҳар сайлов комиссиясининг аъзоларига гувоҳномалар электрон шаклда «E-saylov» ахборот тизими орқали берилиши мумкин. Бунда «E-saylov» ахборот тизими орқали гувоҳнома ҳудудий сайлов комиссияси раиси томонидан электрон рақамли имзо билан тасдиқланади.

11. Туман, шаҳар сайлов комиссиясининг аъзолари ўз фаолиятини жамоатчилик асосида амалга оширади.

12. Туман, шаҳар сайлов комиссиясининг аъзоси сайловга тайёргарлик кўриш ва уни ўтказиш даврида ишлаб чиқариш ёки хизмат вазифаларини бажаришдан ҳудудий сайлов комиссияси билан келишилган ҳолда туман, шаҳар сайлов комиссиясининг қарорига биноан ўртача ойлик иш ҳақи сақланган ҳолда озод қилиниши мумкин.

13. Туман, шаҳар сайлов комиссиясининг аъзолари сайловга тайёргарлик кўриш ва уни ўтказиш даврида иш берувчининг ташаббуси билан ишдан бўшатилиши ёки уларнинг розилигисиз бошқа ишга ўтказилиши мумкин эмас.

14. Туман, шаҳар сайлов комиссиясининг Ўзбекистон Республикаси Президентлигига, Қонунчилик палатаси ва маҳаллий Кенгаш депутатлигига номзод ёки ишончли вакил этиб рўйхатга олинган аъзоси сайлов комиссияси таркибидан чиқиб кетган деб ҳисобланади. Бу ҳақда туман, шаҳар сайлов комиссияси ҳудудий сайлов комиссиясини хабардор этади.

15. Туман, шаҳар сайлов комиссияси аъзосининг ваколатлари ҳудудий сайлов комиссияси томонидан бевосита ёхуд уни аъзоликка тавсия этган органнинг тақдимномасига биноан қуйидаги ҳолларда тугатилиши мумкин:

у ўз ваколатларини зиммасидан соқит қилиш тўғрисида ёзма ариза берганда;

у суд томонидан муомалага лаёқатсиз деб топилганда;

унга нисбатан суднинг айблов ҳукми қонуний кучга кирганда;

у ўз вазифаларини мунтазам равишда бажармай келганда;

қонунга кўра у сайлов комиссияси аъзосининг ваколатларини амалга ошириш билан бир вақтда шуғулланиб бўлмайдиган лавозимга сайланганда ёки тайинланганда;

у суднинг қонуний кучга кирган қарорига асосан бедарак йўқолган деб топилганда ёхуд вафот этган деб эълон қилинганда;

у Ўзбекистон Республикаси фуқаролигини йўқотганда ёки Ўзбекистон Республикаси фуқаролигидан чиққанда;

у вафот этганда.

Комиссия аъзосининг ўз вазифаларини мунтазам равишда бажармай келганлигига оид ҳолат у аъзо бўлган туман, шаҳар сайлов комиссиясининг далолатномаси билан расмийлаштирилади.

16. Туман, шаҳар сайлов комиссиясининг аъзоси комиссия таркибидан чиқарилган ёки туман, шаҳар сайлов комиссияси аъзоларининг сони кўпайтирилган ҳолларда туман, шаҳар сайлов комиссиясининг янги аъзоси Сайлов кодексида ва мазкур Низомда белгиланган тартибда тасдиқланади.

17. Туман, шаҳар сайлов комиссияси:

тегишли туман ёки шаҳар ҳудудида (бундан буён матнда тегишли ҳудуд деб юритилади) Ўзбекистон Республикаси Президенти, Қонунчилик палатаси, маҳаллий Кенгашлар депутатлари сайловларига тайёргарлик кўриш ва уларни ўтказишни ташкил этади;

тегишли ҳудудда Сайлов кодексининг ижроси устидан назоратни амалга оширади, унинг бир хил тарзда қўлланилишини таъминлайди ҳамда сайловни ташкил этиш ва ўтказиш масалалари юзасидан тушунтиришлар беради;

халқ депутатлари туман, шаҳар Кенгашига сайлов ўтказиш бўйича сайлов округларини тузади, уларга ном ва тартиб рақами беради, чегараларини, сайловчилар сонини кўрсатган ҳолда сайлов округларининг рўйхатини эълон қилади;

участка сайлов комиссияларининг фаолиятини мувофиқлаштиради;

агар участка сайлов комиссияларининг қарорлари Сайлов кодексига зид бўлса, ушбу қарорларни мустақил равишда ёки туман, шаҳар прокурорининг тақдимномасига биноан бекор қилади;

халқ депутатлари туман, шаҳар Кенгаши депутатлигига номзодлар кўрсатган сиёсий партиялардан тегишли ҳужжатларни қабул қилиб олади;

халқ депутатлари туман, шаҳар Кенгаши депутатлигига кўрсатилган номзодларни белгиланган тартибда рўйхатга олади ва улар ҳақидаги маълумотлар расмий эълон қилинишини ташкил этади;

рўйхатга олинган халқ депутатлари туман, шаҳар Кенгаши депутатлигига номзодларга гувоҳномалар беради;

номзодларга ва сиёсий партияларга сайлов кампаниясида иштирок этиш учун тенг шароитларни таъминлайди;

халқ депутатлари туман, шаҳар Кенгаши депутатлигига номзодларнинг ишончли вакилларини рўйхатга олади ва уларга тегишли гувоҳномалар беради;

депутатликка номзод этиб рўйхатга олинганларнинг таржимаи ҳоли ва дастурларининг асосий йўналишларининг чоп этилиши ҳамда сайлов участкаларига етказиб берилишини таъминлайди;

сайловларни туман, шаҳар миқёсида ёритувчи маҳаллий оммавий ахборот воситалари вакилларини аккредитациядан ўтказади ва уларга тегишли гувоҳнома беради;

участка сайлов комиссияларининг бинолар, транспорт ва алоқа воситалари билан таъминланишини назорат қилади, тегишли ҳудудда сайловни моддий-техник жиҳатдан таъминлашга доир бошқа масалаларни кўриб чиқади;

халқ депутатлари туман, шаҳар Кенгаши сайловига доир сайлов бюллетенларининг, сайлов комиссиялари баённомаларининг, ўз муҳрининг, сайловга оид бошқа ҳужжатларнинг тайёрланишини таъминлайди;

тегишли туман ёки шаҳар ҳудудидаги сиёсий партиялар, бошқа жамоат бирлашмалари, маҳаллий давлат ҳокимияти органлари, фуқароларнинг ўзини ўзи бошқариш органлари вакилларининг ҳамда корхоналар, муассасалар ва ташкилотлар раҳбарларининг сайловга тайёргарлик кўриш ҳамда уни ўтказиш билан боғлиқ масалалар юзасидан ахборотини эшитади;

сайловчилар рўйхатларининг тузилишини ва ҳамма танишиб чиқиши учун тақдим этилишини назорат қилади;

участка сайлов комиссияларини сайлов бюллетенлари билан таъминлайди;

халқ депутатлари туман, шаҳар Кенгаши сайловида сайлов округлари бўйича сайлов натижаларини аниқлайди;

халқ депутатлари туман, шаҳар Кенгашига ўтказилган сайлов якунларини чиқаради, сайланган депутатларни рўйхатга олади, сайлов якунлари тўғрисидаги маълумотларни ва сайланган депутатларнинг рўйхатларини оммавий ахборот воситаларида эълон қилади;

депутатларга туман, шаҳар Кенгаши депутати гувоҳномасини ва кўкрак нишонини беради;

туман, шаҳар Кенгаши депутатлари такрорий сайлови, шунингдек бўшаб қолган ўринларга депутатлар сайлови ўтказилишини ташкил этади;

сайловчиларнинг ва сайлов жараёни бошқа иштирокчиларининг мурожаатларини кўриб чиқади ҳамда улар юзасидан қарорлар қабул қилади, бундан участка сайлов комиссияларининг ҳаракатлари ва қарорлари устидан берилган шикоятлар мустасно;

Сайлов кодексининг талаблари бузилганлиги тўғрисидаги материалларни судга ёки тегишли ҳуқуқни муҳофаза қилувчи органларга топширади;

сайловни ташкил этиш ва ўтказиш билан боғлиқ ҳужжатларнинг архивларга ва идоравий архивларга топширилишини таъминлайди;

халқ депутатлари туман, шаҳар Кенгашига сайлов якунлари тўғрисида тегишли халқ депутатлари туман, шаҳар Кенгашига ахборот беради;

халқ депутатлари туман, шаҳар Кенгашига сайлов якунлари тўғрисида ҳудудий сайлов комиссиясига ҳисобот беради;

тегишли ҳудудда СЖБАТ ҳамда СЯЭРдан фойдаланиш бўйича умумий раҳбарликни ва мувофиқлаштиришни амалга оширади ҳамда ҳудуддаги сайлов участкалари ва сайловчилар сони ҳақидаги маълумотларни СЖБАТда долзарблаштириш ишларини мувофиқлаштириб боради;

сайлов участкалари кесимида сайловчилар рўйхати иловасига киритилган сайловчилар тўғрисидаги маълумотларни умумлаштиради ҳамда мазкур сайловчиларнинг асосий рўйхатга киритилмаганлиги сабабларини ўрганган ҳолда ҳудудий сайлов комиссиясига ахборот киритади;

сайланган туман, шаҳар Кенгаши депутатларининг гувоҳномаси ва кўкрак нишони ҳисобини юритади;

туман, шаҳар Кенгаши депутатларининг мониторингини олиб боради, шунингдек, бўшаб қолган депутатлик ўринлари бўйича маълумотларни шакллантиради ҳамда бўшаб қолган депутатлик ўринларига сайлов ўтказиш юзасидан ҳудудий сайлов комиссиясига таклифлар киритади;

сайлов участкаларининг сайлов жиҳозлари билан таъминланганлиги бўйича мониторинг юритади;

сайлов жиҳозларининг сифатли ва яроқли ҳолда сақланишини хатловдан ўтказади ҳамда ҳудудий сайлов комиссиясига ахборот киритади;

сайлов участкаларининг дислокациялари асосида сайлов участкаларига тегишли ҳудуд чегаралари бўйича сайлов округлари ва участкаларининг геолокацияли электрон харитаси тузилишини таъминлайди;

сайловлар ҳақида аҳолининг электорал маданиятини ошириш масалалари бўйича давлат органлари, нодавлат ташкилотлар ва фуқаролик жамиятининг бошқа институтлари билан ўзаро ҳамкорлик қилади;

Марказий сайлов комиссиясидан ёки ҳудудий сайлов комиссиясидан юборилган ёхуд бевосита туман, шаҳар сайлов комиссиясига келиб тушган жисмоний ва юридик шахсларнинг мурожаатларини (шу жумладан, жойига чиққан ҳолда мурожаат этувчилар, мутасадди ташкилотлар ва масъул шахслар иштирокида) қонунчилик талаблари асосида кўриб чиқилишини таъминлайди;

сайловга тайёргарлик кўриш ва уни ўтказиш билан боғлиқ тадбирларни (ўқув машғулотлари, семинарлар, конференциялар, давра суҳбатлари ва ҳоказоларни) ташкил этади;

Марказий сайлов комиссиясининг, ҳудудий сайлов комиссиясининг иш режаларида белгиланган туман, шаҳар сайлов комиссияларига тааллуқли бандларнинг ва туман, шаҳар сайлов комиссияси иш режаларида белгиланган вазифаларнинг ўз вақтида сифатли бажарилишини таъминлайди;

сайлов қонунчилиги ва амалиётини такомиллаштириш юзасидан ҳудудий сайлов комиссиясига таклифлар киритади.

18. Туман, шаҳар сайлов комиссияси сайловга тайёргарлик кўриш ва уни ўтказиш билан боғлиқ масалалар юзасидан тегишли ҳудуддаги давлат органларига ҳамда жамоат бирлашмаларининг органларига, корхоналарга, муассасаларга, ташкилотларга, мансабдор шахсларга мурожаат қилиш ҳуқуқига эга. Улар қўйилган масалани кўпи билан уч кунлик муддатда кўриб чиқиши ва туман, шаҳар сайлов комиссиясига жавоб қайтариши шарт.

19. Давлат органлари ва жамоат бирлашмаларининг органлари, корхоналар, муассасалар, ташкилотлар, мансабдор шахслар туман, шаҳар сайлов комиссиясига ўз ваколатларини амалга оширишида кўмаклашиши, унинг иши учун зарур маълумотларни тақдим этиши шарт.

20. Туман, шаҳар сайлов комиссиясининг раиси:

туман, шаҳар сайлов комиссиясининг фаолиятига раҳбарликни амалга оширади;

туман, шаҳар сайлов комиссиясининг мажлисларини чақиради, уларда раислик қилади, комиссия аъзолари ўртасида вазифаларни тақсимлайди;

туман, шаҳар сайлов комиссиясининг мажлисларида иштирок этиш учун давлат органларининг, сиёсий партиялар, бошқа жамоат бирлашмаларининг ҳамда ташкилотларнинг вакилларини ва мансабдор шахсларини таклиф этади;

давлат органлари ва жамоат бирлашмалари, шу жумладан сиёсий партиялар билан муносабатларда туман, шаҳар сайлов комиссияси номидан иш юритади;

халқ депутатлари туман, шаҳар Кенгашига сайлов якунлари тўғрисида тегишли халқ депутатлари туман, шаҳар Кенгашига ахборот беради;

туман, шаҳар сайлов комиссиясининг баённомаларини, қарорларини ва бошқа ҳужжатларини имзолайди;

туман, шаҳар сайлов комиссияси қарорлари ижроси устидан назоратни амалга оширади;

фуқароларни бевосита қабул қилади ва уларнинг мурожаатларини белгиланган тартибда кўриб чиқилишини ташкил этади;

аккредитациядан ўтказилган маҳаллий оммавий ахборот воситалари вакилларининг гувоҳномаларини ва сиёсий партияларнинг ваколатли вакилларининг мандатларини имзолайди;

сайловга тайёргарлик кўриш ва уни ўтказиш жараёнида ҳуқуқбузарликлар аниқланган тақдирда, ҳуқуқбузарликка оид материалларни судга ёки ҳуқуқни муҳофаза қилувчи органларга тақдим қилади;

тегишли ҳудуд бўйича сайлов жараёни ва якунлари тўғрисида ҳудудий сайлов комиссиясига ҳисобот беради;

қонунчилик ҳужжатларида, шунингдек туман, шаҳар сайлов комиссияси аъзолари ўртасидаги вазифалар тақсимотида назарда тутилган ўз зиммасидаги бошқа вазифаларни ҳам амалга оширади.

Туман, шаҳар сайлов комиссияси раисининг ўз ваколатларини бажариши имкони бўлмаганда, шунингдек раис бўлмаган тақдирда, раиснинг вазифалари раис ўринбосарининг зиммасига юклатилади.

21. Туман, шаҳар сайлов комиссияси раисининг ўринбосари:

туман, шаҳар сайлов комиссияси раисининг ўз ваколатларини бажариши имкони бўлмаганда, шунингдек раис бўлмаган тақдирда унинг вазифаларини бажаради;

туман, шаҳар сайлов комиссияси аъзоларининг фаолиятини мувофиқлаштириб боради;

тегишли ҳудудда СЯЭРдан фойдаланиш ва СЖБАТни юритиш масалаларини мувофиқлаштиради;

туман, шаҳар ва участка сайлов комиссиялари аъзоларининг малакасини ошириш ва уларнинг фаолиятини услубий жиҳатдан таъминлаш ишларни мувофиқлаштиради;

оммавий ахборот воситалари вакиллари билан алоқалар ўрнатади, оммавий ахборот воситалари, шу жумладан ижтимоий тармоқларда комиссия фаолиятини ҳар томонлама ёритилишини ташкиллаштиради;

жисмоний шахсларни ва юридик шахсларнинг вакилларини қабул қилади ва уларнинг мурожаатларини белгиланган тартибда кўриб чиқилишини ташкил этади;

туман, шаҳар сайлов комиссияси аъзоларини жалб этган ҳолда комиссия қарорлари ижросини таъминлайди;

ташкилий, таҳлилий ишларни ва туман, шаҳар сайлов комиссияси моддий-техник таъминоти (хизмат кўрсатиш) масалаларини назорат қилади;

туман, шаҳар сайлов комиссияси раисининг топшириқларини бажаради;

ўз ваколатлари доирасида туман, шаҳар сайлов комиссиясининг бошқа аъзоларига топшириқлар беради;

қонунчилик ҳужжатларида, шунингдек туман, шаҳар сайлов комиссияси аъзолари ўртасидаги вазифалар тақсимотида назарда тутилган ўз зиммасидаги бошқа вазифаларни ҳам амалга оширади.

22. Туман, шаҳар сайлов комиссиясининг котиби:

туман, шаҳар сайлов комиссияси мажлисларини ташкиллаштиради, муҳокама этиладиган масалалар бўйича қарор ва бошқа ҳужжатлар лойиҳаларини тайёрлайди;

туман, шаҳар сайлов комиссияси аъзоларини комиссия мажлиси ўтказиладиган вақт ва жой ҳақида хабардор қилади;

туман, шаҳар сайлов комиссияси қарорлари ва бошқа материаллар комиссия аъзолари ҳамда участка сайлов комиссияларига, шунингдек, заруратга қараб, тегишли ҳудуддаги давлат органлари, сиёсий партиялар, бошқа жамоат бирлашмалари, корхоналар, муассасалар ва ташкилотлар ҳамда мансабдор шахсларга етказилишини таъминлайди ҳамда комиссия мажлислари ҳақидаги хабар ва маълумотларнинг оммавий ахборот воситаларида эълон қилинишини ташкиллаштиради;

туман, шаҳар сайлов комиссияси мажлисларининг, бошқа тадбирларнинг баённомалари юритилишини ташкил этади ҳамда раислик қилувчи билан бирга уларни имзолайди;

халқ депутатлари туман, шаҳар Кенгаши депутатлигига номзодлар кўрсатган сиёсий партиялардан тақдим этилган ҳужжатларнинг тўғри расмийлаштирилганлигини кўриб чиқиш ишларини ташкил қилади;

халқ депутатлари туман, шаҳар Кенгаши депутатлигига номзод этиб рўйхатга олинган шахсларнинг рўйхатини ва улар ҳақидаги маълумотларнинг оммавий ахборот воситаларида эълон қилинишини ташкиллаштиради;

туман, шаҳар сайлов комиссияси аъзолари билан ҳамкорликда сайлов қонунчилигини такомиллаштириш юзасидан таклифлар тайёрлайди;

участка сайлов комиссияси аъзоларининг СЯЭР ва СЖБАТни юритиш билан боғлиқ фаолиятини мувофиқлаштириб боради;

туман, шаҳар сайлов комиссияси раиси ва раис ўринбосари топшириқларини бажаради;

туман, шаҳар сайлов комиссиясининг фаолиятига тааллуқли иш ҳужжатларини номенклатура асосида юритиб боради;

«E-saylov» ахборот тизимида иш юритилишини таъминлайди;

туман, шаҳар сайлов комиссиясининг истиқболдаги ва жорий ишларини режалаштиришни ташкил қилади ҳамда режалаштирилган тадбирларнинг ижросини назорат қилади;

туман, шаҳар сайлов комиссияси қарорлари бажарилиши тўғрисида комиссия раисига доимий маълумот киритиб боради;

туман, шаҳар сайлов комиссияси муҳрини, расмий бланкасини сақлайди;

бўшаб қолган ўринларга халқ депутатлари туман, шаҳар Кенгаши депутатлари сайловига тайёргарлик кўриш ва уларни ўтказиш бўйича ташкилий ишларни амалга оширади;

участка сайлов комиссиялари аъзолари таркибининг электрон базасини мувофиқлаштириб боради;

қонунчилик ҳужжатларида, шунингдек туман, шаҳар сайлов комиссияси аъзолари ўртасидаги вазифалар тақсимотида назарда тутилган ўз зиммасидаги бошқа вазифаларни ҳам амалга оширади.

23. Туман, шаҳар сайлов комиссияси раисининг ўринбосари, котиби ўз ваколатларини бажариши имкони бўлмаганда, шунингдек раис ўринбосари, котиб бўлмаган тақдирда, уларнинг вазифалари туман, шаҳар сайлов комиссияси раиси томонидан комиссия аъзолари зиммасига вақтинчалик юклатилиши мумкин.

24. Туман, шаҳар сайлов комиссияси аъзосининг мажбуриятлари:

комиссия муҳокамасига киритилган масалаларни тайёрлашда иштирок этади;

комиссиянинг барча мажлисларида, шу жумладан видеоконференцалоқа орқали шахсан иштирок этади, бошқа тадбирларида қатнашади;

ўзи бириктирилган сайлов округида сайловга тайёргарлик кўриш ва уни ўтказиш бўйича тадбирларни ўз вақтида сифатли бажарилишини мувофиқлаштиради;

узрли сабаблар билан (касаллиги, меҳнат таътилида бўлиши ва бошқалар) комиссия мажлисида иштирок эта олмаслиги ҳақида туман, шаҳар сайлов комиссияси раисини ёки комиссия котибини хабардор қилади;

туман, шаҳар сайлов комиссияси раисининг ва раис ўринбосарининг ўз ваколатлари доирасида берган топшириқларини бажаради ҳамда уларнинг бажарилганлиги тўғрисида белгиланган муддатларда ахборот беради;

кўриб чиқиш ўзига юклатилган жисмоний ва юридик шахсларнинг мурожаатларини белгиланган тартибда кўриб чиқилишини таъминлайди;

туман, шаҳар сайлов комиссияси раиси томонидан овоз бериш кунидаги белгиланган вазифаларнинг ўз вақтида ва сифатли бажарилишини таъминлайди;

сайловга тайёргарлик кўриш ва уни ўтказиш жараёнида ҳуқуқбузарликлар аниқланган тақдирда, улар тўғрисида дарҳол раис ёки раис ўринбосарини хабардор қилади;

қонунчилик ҳужжатларида, шунингдек туман, шаҳар сайлов комиссияси аъзолари ўртасидаги вазифалар тақсимотида назарда тутилган ўз зиммасидаги бошқа вазифаларни ҳам амалга оширади.

25. Туман, шаҳар сайлов комиссияси аъзоси қуйидаги ҳуқуқларга эга:

туман, шаҳар сайлов комиссияси мажлисининг кун тартиби, муҳокама қилинаётган масалаларни кўриб чиқиш тартиби ҳамда бу масалаларнинг моҳияти юзасидан таклифлар киритиш ва мулоҳазалар билдириш;

туман, шаҳар сайлов комиссияси мажлисида муҳокамада қатнашиш, мажлисда сўзга чиқиш, таклифлар киритиш;

мажлис иштирокчиларига туман, шаҳар сайлов комиссиясининг мажлисида қабул қилинган қарори юзасидан алоҳида фикр билдириш;

туман, шаҳар сайлов комиссияси фаолиятига доир материаллар ва ҳужжатлар билан танишиб чиқиш.

26. Туман, шаҳар сайлов комиссиясининг барча аъзолари одоб-ахлоқ қоидаларига қатъий риоя этади, коррупцияга нисбатан муросасиз муносабатда бўлади ва коррупцияга олиб келиши мумкин бўлган ҳаракатларнинг (ҳаракатсизликнинг) олдини олади, манфаатлар тўқнашуви юзага келганда, шунингдек яқин қариндошлари тегишли ҳудудда номзод этиб рўйхатга олинган тақдирда, ҳудудий сайлов комиссиясини дарҳол хабардор қилади.

27. Туман, шаҳар сайлов комиссияси ўз фаолиятини мустақиллик, қонунийлик, коллегиаллик, ошкоралик ва адолатлилик принциплари асосида амалга оширади.

28. Туман, шаҳар сайлов комиссияси ишининг ташкилий шакли унинг заруратга қараб ўтказиладиган мажлиси ҳисобланади. Туман, шаҳар сайлов комиссиясининг мажлислари у жойлашган бинода, сайёр тарзда ёки видеоконференцалоқа шаклида ўтказилади.

29. Туман, шаҳар сайлов комиссиясининг мажлиси раиснинг ташаббусига кўра ёки комиссия аъзолари умумий таркибининг камида учдан бир қисми талабига биноан чақирилиши мумкин.

Туман, шаҳар сайлов комиссиясининг мажлиси, агар унда мажлис ўтказилаётган кундаги комиссия аъзолари умумий сонининг камида учдан икки қисми иштирок этаётган бўлса, ваколатли ҳисобланади.

Туман, шаҳар сайлов комиссиясининг аъзоси агар мажлисда видеоконференцалоқадан фойдаланган ҳолда иштирок этаётган бўлса, мажлисда ҳозир бўлган ҳисобланади.

30. Туман, шаҳар сайлов комиссиясининг қарори очиқ овоз бериш йўли орқали комиссия аъзолари умумий сонининг кўпчилик овози билан қабул қилинади. Овозлар тенг бўлиб қолган тақдирда, раислик қилувчининг овози ҳал қилувчи ҳисобланади.

31. Туман, шаҳар сайлов комиссияси мажлисларида масалалар очиқ ва ошкора муҳокама этилади.

Туман, шаҳар сайлов комиссияси мажлисида баённома юритилади.

Баённомада мажлиснинг кун тартиби, унда қатнашган туман, шаҳар сайлов комиссияси аъзолари ва бошқа таклиф этилган шахслар ҳақидаги маълумотлар, муҳокамага киритилган масаланинг қисқача мазмуни, сўзга чиққан ва фикр билдирганлар тўғрисида маълумотлар, кўриб чиқилган ҳар бир масала юзасидан овоз бериш натижалари, қабул қилинган қарорлар кўрсатилади.

Баённома раислик қилувчи ва котиб томонидан имзоланади ҳамда унга қабул қилинган қарор, тааллуқли ҳужжатлар, шунингдек, туман, шаҳар сайлов комиссияси аъзоларининг муайян масала юзасидан ёзма шаклдаги алоҳида фикрлари (агар бўлса) илова қилинади.

Округ бўйича сайлов натижалари тўғрисидаги баённома туман, шаҳар сайлов комиссиясининг мажлисида иштирок этган барча аъзолари томонидан имзоланади.

32. Туман, шаҳар сайлов комиссиясининг қарорлари электрон шаклда «E-saylov» ахборот тизими орқали қабул қилиниши мумкин. Бунда мажлисда қабул қилинган қарорнинг матни «E-saylov» ахборот тизимига туман, шаҳар сайлов комиссияси котиби томонидан юкланади ва комиссия раисига (мажлисда раислик қилувчи) имзолаш учун тақдим этилади. Бунда туман, шаҳар сайлов комиссияси мажлисида маъқулланган тузатишлар (ўзгартириш, қўшимчалар) қарор матнига киритилади.

33. Қарорлар туман, шаҳар сайлов комиссияси раиси (мажлисда раислик қилувчи) томонидан имзоланади.

«E-saylov» ахборот тизими орқали қабул қилинадиган қарорлар туман, шаҳар сайлов комиссияси раиси (мажлисда раислик қилувчи) томонидан электрон рақамли имзо билан тасдиқланади.

34. Туман, шаҳар сайлов комиссиясининг ўз ваколатлари доирасида қабул қилган қарори тегишли туман, шаҳар ҳудудидаги участка сайлов комиссиялари, шунингдек барча давлат органлари, сиёсий партиялар ва бошқа жамоат бирлашмалари, меҳнат жамоалари ва ҳарбий қисмлар, корхоналарнинг, муассасаларнинг ва ташкилотларнинг раҳбарлари ижро этиши учун мажбурийдир.

35. Туман, шаҳар сайлов комиссияси мажлисларида Марказий сайлов комиссияси аъзолари ва Котибияти ходимлари, ҳудудий сайлов комиссияси аъзолари, рўйхатга олинган номзодлар, уларнинг ишончли вакиллари, сиёсий партияларнинг кузатувчилари, ваколатли вакиллари, оммавий ахборот воситаларининг вакиллари, фуқароларнинг ўзини ўзи бошқариш органларидан, бошқа давлатлардан, халқаро ташкилотлардан кузатувчилар иштирок этиши мумкин.

Мажлисларга маҳаллий давлат ҳокимияти органлари, жамоат бирлашмалари вакиллари ва бошқалар таклиф этилиши мумкин.

36. Туман, шаҳар сайлов комиссияси ҳудудий сайлов комиссияси томонидан тузилганидан сўнг қуйидаги тадбирларни амалга оширади:

туман, шаҳар сайлов комиссиясининг биринчи ташкилий мажлисини ўтказади;

туман, шаҳар сайлов комиссияси жойлашган бинони белгиланган тартибда жиҳозлашга зарур бўлган ташкилий ишларни амалга оширади.

Туман, шаҳар сайлов комиссияси биринчи ташкилий мажлисида қуйидаги масалаларни кўриб чиқади:

туман, шаҳар сайлов комиссиясининг сайловга тайёргарлик кўриш ва уни ўтказишга доир иш режасини тасдиқлаш;

туман, шаҳар сайлов комиссияси аъзолари ўртасида вазифаларни тақсимлаш;

туман, шаҳар сайлов комиссияси аъзолари томонидан фуқароларнинг қабулини ташкил этиш;

туман, шаҳар сайлов комиссияси аъзоларининг навбатчилигини ташкил қилиш.

37. Туман, шаҳар сайлов комиссияси 2-иловага мувофиқ тасдиқланган муҳрга эга бўлади.

38. Сайловга тайёргарлик кўриш ва уни ўтказиш даврида туман, шаҳар сайлов комиссиясининг котибияти ташкил этилиши мумкин.

Туман, шаҳар сайлов комиссияси котибиятига жалб этилган мутахассислар ишлаб чиқариш ёки хизмат вазифаларини бажаришдан ўртача ойлик иш ҳақи сақланган ҳолда озод қилинади.

39. Туман, шаҳар сайлов комиссияси раиси ёки раис ўринбосари туман, шаҳар сайлов комиссиясига ташриф буюрган сиёсий партияларнинг кузатувчилари, ваколатли вакиллари, номзодлар ва уларнинг ишончли вакиллари, оммавий ахборот воситалари вакиллари, фуқароларнинг ўзини ўзи бошқариш органларидан, шунингдек, бошқа давлатлар ва халқаро ташкилотлардан кузатувчиларни тегишли ҳужжатлар асосида рўйхатга олади ва қабул қилади.

40. Туман, шаҳар сайлов комиссиясининг раиси, раис ўринбосари ёки котиби овоз бериш кунида тегишли ҳудудда овоз бериш жараёнининг бориши ҳақида ҳар соатда, муддатидан олдин овоз бериш кунларида эса, ҳар кунлик овоз бериш натижаси ҳақида ҳудудий сайлов комиссиясига маълумот бериб боради.

41. Сайловга оид ахборот тизимларидан фойдаланишни ташкиллаштириш мақсадида туман, шаҳар сайлов комиссияси аъзоларидан бирининг (қоида тариқасида рақамли технологиялар соҳасида маълум кўникмага эга бўлганининг) зиммасига қуйидаги вазифалар юклатилади:

комиссия аъзоларининг ахборот тизимларидан самарали фойдаланишини ташкил этиш;

участка сайлов комиссияси аъзоларига СЖБАТга кириш учун тегишли маълумотларни бериш;

ахборот тизимларидан фойдаланишда ахборот хавфсизлигини таъминлаш борасида назорат олиб бориш;

участка сайлов комиссиялари томонидан СЖБАТда амалга ошириладиган ишларни мувофиқлаштириб бориш.

42. Туман, шаҳар сайлов комиссиясида юритиладиган иш ҳужжатлари:

туман, шаҳар сайлов комиссиясининг қарорлари, баённомалари, далолатномалар дафтари ва йиғмажилди;

Марказий сайлов комиссиясининг, ҳудудий сайлов комиссиясининг қарорлари йиғмажилди;

халқ депутатлари туман, шаҳар Кенгаши депутатлари сайловига оид ҳужжатлар йиғмажилди;

кириш, чиқиш ҳужжатларини, шу жумладан жисмоний ва юридик шахсларнинг мурожаатларини рўйхатга олиш дафтари ва йиғмажилди;

молиявий ҳужжатлар ва сайлов жиҳозлари ҳисобига оид ҳужжатлар йиғмажилди;

СЯЭР ва СЖБАТга оид ҳужжатлар йиғмажилди;

кузатувчиларни рўйхатга олиш дафтари.

43. Марказий сайлов комиссиясининг кўрсатмасига асосан туман, шаҳар сайлов комиссиясида юритиладиган иш ҳужжатлари электрон шаклда амалга оширилиши мумкин.

44. Сайловга тайёргарлик кўриш ва уни ўтказиш даврида тегишли ҳудудда жойлашган давлат органлари, корхоналар, муассасалар, ташкилотлар туман, шаҳар сайлов комиссияси ихтиёрига сайловга тайёргарлик кўриш ва уни ўтказиш учун зарур бўлган бинолар, мажлис заллари, хоналар ҳамда жиҳозларни бепул бериб туриши шарт.

Сайловни ўтказиш даврида туман, шаҳар сайлов комиссияси туман, шаҳар ҳокимликлари томонидан камида тўртта хонадан иборат бино билан, шунингдек, транспорт, алоқа воситалари ва қўшимча интернет тармоғига уланиш имконияти билан таъминланади.

45. Сайловни ўтказиш даврида туман, шаҳар сайлов комиссияси жойлашган бино тегишли тарзда жиҳозланиши ва қуйидагиларга эга бўлиши керак:

Ўзбекистон Республикасининг Давлат байроғи (бинонинг устида ва ичида);

Ўзбекистон Республикасининг Давлат герби (бинонинг ичида);

туман, шаҳар сайлов комиссиясининг тўлиқ номи кўрсатилган пешлавҳа;

қулфланадиган сейф ёки металл шкаф;

зарур мебеллар, кондиционер, оргтехника воситалари (компьютер, ноутбук, принтер, сканер, нусха кўчирувчи ускуна, UPS), телефон, телевизор;

СЖБАТ ва «E-saylov» ахборот тизими талабларига жавоб берувчи иккитадан кам бўлмаган компьютер ва уларга керакли бўлган қурилмалар (принтер, сканер, UPS ва бошқалар) ҳамда узлуксиз (симсиз) интернет алоқаси ва ҳ.к.;

видеоконференцалоқа учун видеомонитор, микрофон ва акустик қурилмалар;

муқобил электр энергия ишлаб чиқарадиган генератор қурилмаси;

ёнғинга қарши воситалар.

Туман, шаҳар сайлов комиссияси жойлашган бино ва унга олиб борувчи йўлаклар озода ва таъмирланган, ёритиш мосламалари ўрнатилган бўлиши керак.

46. Сайловни ўтказиш даврида туман, шаҳар сайлов комиссияси биносида қуйидагилар жойлаштирилади:

сайлов санасига бағишланган плакат;

туман, шаҳар сайлов комиссиясининг таркиби, манзили ва телефон рақамлари;

Марказий сайлов комиссиясининг, ҳудудий сайлов комиссиясининг, тегишли туман ёки шаҳар суди, прокуратураси ва ички ишлар бўлимининг ишонч телефонлари рақамлари.

47. Туман, шаҳар сайлов комиссияси аъзоларининг хонасида қуйидагилар бўлиши лозим:

Ўзбекистон Республикаси Конституцияси, Сайлов кодекси, сайловга оид қонунчилик ҳужжатлари;

туман, шаҳар сайлов комиссияси аъзоларининг таркиби ҳақида маълумот;

туман, шаҳар сайлов комиссиясининг иш режаси ва навбатчилик жадвали.

48. Стендларда жойлаштириладиган материалларда сайловолди ташвиқотига оид нишон ва аломатлар бўлмаслиги керак.

49. Туман, шаҳар сайлов комиссияси биносига кириш жойида ногиронлиги бўлган шахслар учун ўриндиқли аравачаларга мослаштирилган нишаб йўлаклари (пандуслар) бўлиши ва улар белгиланган талабларга мос бўлиши керак.

50. Туман, шаҳар сайлов комиссияси компьютерларини интернет тармоғига улаш Ўзбекистон Республикаси Рақамли технологиялар вазирлигининг ҳудудий бўлимлари кўмагида амалга оширилади.

51. Ўзбекистон Республикаси Президенти, Қонунчилик палатаси, маҳаллий Кенгашлар депутатлари сайловларига тайёргарлик кўриш ва уларни ўтказиш билан боғлиқ харажатлар Ўзбекистон Республикаси Давлат бюджети маблағлари ҳисобидан амалга оширилади.

52. Халқ депутатлари туман, шаҳар Кенгашининг бўшаб қолган депутатлик ўринлари учун сайловга тайёргарлик кўриш ва уни ўтказиш билан боғлиқ харажатлар тегишли туман, шаҳар маҳаллий бюджети маблағлари ҳисобидан амалга оширилади.

53. Чет давлатларнинг, улар жисмоний ва юридик шахсларининг ҳамда халқаро ташкилотларнинг маблағлари ҳисобидан сайловни молиялаштириш тақиқланади.

54. Халқ депутатлари туман, шаҳар Кенгашлари сайловига тайёргарлик кўриш ва уни ўтказишни молиялаштириш ҳамда маблағлардан фойдаланиш тартиби Марказий сайлов комиссиясининг қарорига асосан амалга оширилади.

55. Жисмоний ва юридик шахсларнинг туман, шаҳар сайлов комиссиясига келиб тушган мурожаатлари Сайлов кодекси, «Жисмоний ва юридик шахсларнинг мурожаатлари тўғрисида»ги Қонун ҳамда бошқа қонунчилик ҳужжатларида белгиланган тартибда кўриб чиқилади.

56. Келиб тушган мурожаатлар туман, шаҳар сайлов комиссияси раиси томонидан комиссия аъзолари ўртасида кўриб чиқиш учун тақсимланади.

Мурожаатга жавоб хати туман, шаҳар сайлов комиссиясининг раиси ёки раис ўринбосари томонидан имзоланади.

57. Мурожаатда баён этилган масалаларни ҳал қилиш туман, шаҳар сайлов комиссияси ваколатига кирмаса, қонунчиликда белгиланган тартибда тегишли органларга юборилади.

58. Туман, шаҳар сайлов комиссияси сайлов кампаниясини ўтказиш даврида жисмоний ва юридик шахсларнинг Сайлов кодекси талаблари бузилганлиги ёки сайловни ташкил этишнинг бошқа масалалари хусусида ўзига келиб тушган мурожаатларини ўз ваколатлари доирасида кўриб чиқади.

Ушбу мурожаатлар бўйича текширувлар ўтказилиши ва уч кунлик муддатда уларга ёзма жавоблар берилиши, сайловга олти кундан кам вақт қолганида ёки овоз бериш куни келиб тушган мурожаатлар эса дарҳол кўриб чиқилиб, жавоб қайтарилиши шарт. Бундан участка сайлов комиссияларининг ҳаракатлари ва қарорлари устидан берилган шикоятлар мустасно.

Зарур ҳолларда туман, шаҳар сайлов комиссияси мурожаатларни кўриб чиқиш учун тегишли мутахассисларни жалб қилган ҳолда ишчи гуруҳ тузиши мумкин.

59. Сайлов тўғрисидаги қонунчилик ҳужжатларини бузганликда айбдор шахслар белгиланган тартибда жавобгар бўлади.

60. Сайловга тайёргарлик кўриш ва уни ўтказиш жараёнидаги ҳуқуқбузарликлар бўйича иш юритиш қонунчиликда белгиланган тартибда амалга оширилади.

61. Сайловга тайёргарлик кўриш ва уни ўтказиш билан боғлиқ ҳужжатлар Марказий сайлов комиссияси томонидан тасдиқланадиган тегишли ҳужжатга мувофиқ сақлаш учун тайёрланади, топширилади ҳамда (ёки) йўқ қилинади.

62. Туман, шаҳар сайлов комиссияси участка сайлов комиссиялари ўз фаолиятини тугатганидан сўнг уларнинг муҳрлари белгиланган тартибда қабул қилинишини ҳамда ҳудудий сайлов комиссиясига етказилишини таъминлайди.

Туман, шаҳар сайлов комиссиясининг гербли резина муҳри диаметри 35 мм айлана шаклда бўлиб, марказдан 18,5 мм узоқликда асосий айлана ва ундан 1 мм масофада яна бир айлана ўтказилган. Иккинчи айлана тагида айлана бўйича «OLMAZOR TUMANI SAYLOV KOMISSIYASI»* ёзуви бор. Ушбу матннинг тагидан яна бир ички айлана ўтказилган бўлиб, айлананинг ичида Ўзбекистон Республикасининг Давлат герби тасвирланган.