Ўзбекистон Республикаси Ҳукумати ва Чехия Республикаси Ҳукумати (кейинги ўринларда «Томонлар» деб аталувчилар),

икки давлат ўртасидаги дўстона муносабатлар ва ҳамкорликни мустаҳкамлаш истагидан келиб чиқиб,

1961 йилги Дипломатик алоқалар тўғрисидаги Вена конвенцияси ва 1963 йилдаги Консуллик муносабатлари тўғрисидаги Вена конвенциясини ҳисобга олган ҳолда,

қуйидагилар тўғрисида келишиб олдилар:

1. Амалдаги дипломатик паспортларга эга бўлган Ўзбекистон Республикаси фуқаролари ҳар қандай бир юз саксон (180) кунлик муддат ичида тўқсон (90) кунлик қисқа муддатли бўлишнинг рухсат этилган максимал муддатидан ошмайдиган муддатга Чехия Республикаси ҳудудига визалар ва йиғимларсиз киришлари, чиқишлари, бўлишлари ва транзит ўтишлари мумкин.

2. Амалдаги дипломатик паспортларга эга бўлган Чехия Республикаси фуқаролари ҳар қандай бир юз саксон (180) кунлик муддат ичида тўқсон (90) кунлик қисқа муддатли бўлишнинг рухсат этилган максимал муддатидан ошмайдиган муддатга Ўзбекистон Республикаси ҳудудига визалар ва йиғимларсиз киришлари, чиқишлари, бўлишлари ва транзит ўтишлари мумкин.

1. Ҳар бир Томон давлатининг амалдаги дипломатик паспортларига эга бўлган ва дипломатик ваколатхоналар ёки консуллик муассасалари аъзолари, шунингдек, бошқа Томон давлати ҳудудида жойлашган халқаро ташкилотлар вакиллари сифатида тайинланган фуқаролари киришидан олдин тегишли кириш визасини олишлари талаб этилади.

2. Мазкур модданинг 1-банди ушбу бандда кўрсатилган Томонларнинг тегишли давлати фуқаролари ҳисобланган ва амалдаги дипломатик паспортларга эга бўлган шахсларнинг уй хўжалигининг бир қисмини ташкил этувчи оила аъзоларига нисбатан ҳам қўлланилади.

Мазкур Битимнинг 1-моддасида кўрсатилган шахслар бошқа Томон давлати ҳудудига халқаро йўловчи ташиш учун очиқ бўлган барча чегара пунктлари орқали киришлари мумкин.

Мазкур Битимнинг 1-моддасида кўрсатилган фуқаролар ўзларининг дипломатик имтиёзлари ва иммунитетларига дахл қилмаган ҳолда, бошқа Томон давлатининг ҳудудида бўлиш вақтида унинг миллий қонунчилигига риоя қилиш мажбуриятини оладилар.

Томонларнинг ҳар бири ушбу Битимнинг 1-моддасида кўрсатилган бўлиши номақбул деб топилган бошқа Томон давлати фуқароларининг ўз давлати ҳудудига киришини рад этиш ёки бўлиш муддатини қисқартириш ҳуқуқини ўзида сақлаб қолади.

Мазкур Битимда кўрсатилган паспортларини бошқа Томон давлати ҳудудида йўқотган ҳар бир Томон давлатининг фуқаролари ўз давлатининг дипломатик ваколатхонаси ёки консуллик муассасаси томонидан берилган паспорт ёки йўл ҳужжати билан унинг қонунлари ва қоидаларига мувофиқ ушбу давлатни тарк этадилар.

1. Ҳар бир Томон миллий хавфсизлик, жамоат тартиби ва жамоат соғлиғини ҳимоя қилиш ёки бошқа жиддий сабабларга кўра ушбу Битимнинг бажарилишини бутунлай ёки қисман вақтинча тўхтатиб туриш ҳуқуқини ўзида сақлаб қолади.

2. Ҳар икки Томон ушбу модданинг 1-бандига мувофиқ бундай чораларни жорий этиш ёки бекор қилиш тўғрисида бундай чора кучга киришидан камида етмиш икки (72) соат олдин дипломатик каналлар орқали ёзма хабарнома йўли билан бир-бирини хабардор қилади.

1. Ҳар икки Томон дипломатик каналлар орқали ушбу Битимнинг 1-моддасида кўрсатилган дипломатик паспортлар намуналарини алмашадилар.

2. Агар ушбу Битимнинг 1-моддасида кўрсатилган амалдаги дипломатик паспорт ўзгартирилса ёки қўшимча киритилса, ҳар бир Томон бошқасига дипломатик каналлар орқали ўзининг янги ёки ўзгартирилган дипломатик паспорти намуналарини, шу жумладан унинг батафсил тавсифини у жорий этилишидан камида ўттиз (30) кун олдин юборади.

Мазкур Битимни талқин қилиш ёки қўллаш билан боғлиқ ҳар қандай низолар маслаҳатлашувлар ёки музокаралар йўли билан ҳал қилинади.

Мазкур Битимга Томонлар ўзаро розилиги билан дипломатик ноталар алмашиш йўли билан ўзгартиришлар киритилиши ёки қайта кўриб чиқилиши мумкин.

1. Мазкур Битим номуайян муддатга тузилади ва унинг кучга кириши учун зарур бўлган ички ҳуқуқий тартиб-таомилларни Томонлар бажарганлиги тўғрисидаги охирги ёзма хабарнома дипломатик каналлар орқали олинган кундан бошлаб ўттиз (30) кун ўтгач кучга киради.

2. Ҳар бир Томон исталган вақтда дипломатик каналлар орқали бошқа Томонга ёзма хабарнома юбориш орқали ушбу Битимни тугатиши мумкин. Бундай ҳолда, Битим бошқа Томон бу ҳақдаги хабарномани олгандан кейин олтмиш (60) кун ўтгач ўз кучини йўқотади.

3. Мазкур Битимнинг тўлиқ ёки қисман тугатилиши ёки тўхтатиб турилиши ушбу Битимнинг 1 ва 2-моддаларига мувофиқ, бошқа Томон ҳудудига кириш ҳуқуқи тақдим этилган ва аллақачон унинг ҳудудида бўлган амалдаги дипломатик паспортга эга Томон фуқароларига тугатиш ёки тўхтатиб туриш вақтида татбиқ этилмайди.

Прага шаҳрида 2023 йил октябр ойининг 11 куни икки асл нусхада, ҳар бири ўзбек, чех ва инглиз тилларида тузилди, бунда барча матнлар тенг аутентикдир. Мазкур Битим қоидаларини талқин қилишда келишмовчиликлар юзага келган тақдирда, инглиз тилидаги матн устувор ҳисобланади.