Ўзбекистон Республикаси Ҳукумати ва Хитой Халқ Республикаси Ҳукумати, кейинги ўринларда «Томонлар» деб аталувчилар,

қайта тикланувчи энергия соҳасидаги ҳамкорликни чуқурлаштириш энергетика хавфсизлиги, «яшил энергетика»га ўтиш учун катта аҳамият касб этишини инобатга олиб,

атроф табиий муҳитнинг қулай ривожланиши ва қайта тикланувчи энергия манбаларидан (қуёш, шамол энергияси ва бошқалар) фойдаланишга алоҳида аҳамият берган ҳолда,

энергия тежамкорликни таъминлаш ва энергетик самарадорликни юксалтириш манфаатларидан келиб чиқиб,

самарали ва экологик тоза технологиялар асосида қайта тикланувчи энергия манбалари соҳасида келгуси ҳамкорликни ривожлантириш заруриятини қайд этиб,

энергия тежамкорликни экологик муаммоларни ҳал этишнинг муҳим инструментларидан бири сифатида кўриб,

қайта тикланувчи энергия манбаларини ривожлантириш соҳасида Томонларнинг икки томонлама ҳамкорлиги учун ҳуқуқий асос яратишга интилган ҳолда,

қуйидагилар тўғрисида келишиб олдилар:

Мазкур Битимнинг мақсади қайта тикланувчи энергия манбаларидан самарали фойдаланиш соҳасида ўзаро манфаатли ҳамкорликни ривожлантиришга кўмаклашиш ва ўзбек-хитой энергетика ҳамкорлигини янги мазмун билан узвий тўлдириш ҳисобланади.

Томонлар мазкур Битим доирасидаги ҳамкорликни қуйидаги йўналишларда амалга оширадилар:

«яшил тараққиёт»га ўтишни жадаллаштириш;

Томонлар давлатлари аҳолиси турмуш фаровонлигини янада юксалтириш йўлида тоза қайта тикланувчи энергетикани, шу жумладан, қуёш ва шамол энергетикасини кенг кўламда ривожлантириш, энергия тежамкор технологиялар ва тизимларни кенг жорий қилиш;

қайта тикланувчи энергия манбаларидан фойдаланиш соҳасида илмий-техникавий базани ривожлантириш ва қўшма тадқиқотлар ўтказиш;

қайта тикланувчи энергия манбаларининг бутловчи электр тармоқлари ва электр узатувчи линияларини қуриш ва модернизация қилиш;

қайта тикланувчи энергия манбаларидан фойдаланиш соҳасига инновацион технологияларни, илмий-техникавий ишланмаларни жорий этишни, қайта тикланувчи энергия манбалари қурилмаларининг энергия жиҳатдан самарадорлигини оширишни, уларнинг ишлаб чиқарилишини кенгайтиришни ва маҳаллийлаштиришни рағбатлантириш;

қайта тикланувчи энергиядан самарали ва оқилона фойдаланиш, ушбу жараёнда экологик хавфсизликни, аҳоли саломатлиги муҳофазасини таъминлаш;

Томонлар ўртасида келишиладиган ўзаро манфаатли ҳамкорликнинг бошқа йўналишлари.

Томонлар ҳамкорликни қуйидаги шаклларда амалга оширадилар:

турли даражадаги расмий делегациялар ташрифлари алмашинуви;

экспертлар ва мутахассисларнинг ишчи учрашувлари;

манфаатдор идоралар ва соҳавий ташкилотлар ўртасида қайта тикланувчи энергия манбаларини ривожлантириш ва фойдаланиш, яшил ва кам углеродли энергетика ўтиш йўналишларидаги сиёсат ва ахборот алманишувини ташкил этиш;

қайта тикланувчи энергия манбалари соҳасини режалаштириш, кўргазмали лойиҳаларни қуриш, инновацион технологияларни жорий этиш бўйича ҳамкорликни ривожлантириш;

қайта тикланувчи энергия манбаларидан фойдаланиш соҳасида мутахассисларни биргаликда тайёрлаш ва малакасини ошириш;

академик конференциялар, семинарлар, назарий ва амалий курслар (тренинглар) ва кўргазмаларни ташкил этиш ва уларда иштирок этиш;

қайта тикланувчи энергия манбаларининг қурилмаларини ишлаб чиқарувчи қўшма корхоналарни ташкил этиш;

Томонларнинг келишувига асосан бошқа шакллар.

Мазкур Битимнинг амалга оширилиши бўйича Томонларнинг ваколатли органлари қуйидагилар ҳисобланади:

ўзбек томони тарафидан — Ўзбекистон Республикаси Энергетика вазирлиги;

хитой томони тарафидан — Хитой Халқ Республикаси Энергетика ишлари бўйича давлат бошқармаси.

Мазкур Битимнинг амалга оширилиши бўйича ваколатлар бошқа ваколатли органларга тақдим этилган ёки ваколатли органлар номи ўзгарган тақдирда, Томонлар бир-бирларини дипломатик каналлар орқали хабардор қиладилар.

Мазкур Битимни амалга ошириш мақсадида Томонлар тегишли ишчи ва экспертлик гуруҳларини тузишлари, чора-тадбирлар режалари ва бошқа ҳамкорлик дастурлари қабул қилишлари мумкин.

Мазкур Битимни амалга ошириш учун бошқа Томон давлатига юборилган барча шахслар бўлиб турган давлатда амалда бўлган қонунлар ва норматив-ҳуқуқий ҳужжатларга риоя қилиш мажбуриятини оладилар.

Мазкур Битим Томонлар давлатлари иштирокчи ҳисобланган бошқа халқаро шартномалардан келиб чиқадиган уларнинг ҳуқуқ ва мажбуриятларига дахл қилмайди.

Мазкур Битимни талқин қилиш ёки қўллашда ҳар қандай низолар юзага келган ҳолларда, Томонлар уларни дўстона музокаралар ва маслаҳатлашувлар орқали ҳал этадилар.

Томонларнинг ўзаро розилиги билан мазкур Битимга унинг ажралмас қисми бўлган ва мазкур Битимнинг 10-моддасида белгиланган тартибда кучга кирадиган алоҳида баённомалар билан расмийлаштириладиган ўзгартиришлар ва қўшимчалар киритилиши мумкин.

Мазкур Битим имзоланган санадан бошлаб кучга киради.

Мазкур Битим беш йил муддатга тузилади.

Мазкур Битимнинг амал қилиши, башарти Томонлардан бири тегишли муддат тугагунга қадар камида уч ой олдин ёзма шаклда бошқа Томонни унинг амал қилишини тугатиш нияти тўғрисида дипломатик каналлар орқали хабардор қилмаса, кейинги беш йиллик муддатларга ўз-ўзидан узаяверади.

Ҳар қайси Томон Битимни бошқа Томонга дипломатик каналлар орқали ёзма хабарнома юбориш орқали тугатиши мумкин. Мазкур Битимнинг амал қилиши бундай хабарнома тегишли Томон тарафидан олинган санадан ўттиз кун ўтгач тугатилади.

Мазкур Битим амал қилишининг тугатилиши, ваколатли органлар ва (ёки) ваколатли ташкилотлар тарафидан мазкур Битимнинг амал қилиш муддати даврида унинг доирасида тузилган контрактларнинг (шартномаларнинг) бажарилишига дахл қилмайди.

Пекин шаҳрида 2023 йил 17 октябрда, ҳар бири икки асл нусхада, ўзбек, хитой ва рус тилларида тузилди, бунда барча матнлар тенг аутентикдир.

Матнлар ўртасида фарқлар юзага келган тақдирда, Томонлар рус тилидаги матнга мурожаат қиладилар.