Халқ депутатлари вилоят, туман, шаҳар Кенгашлари депутатларини дахлсизлик ҳуқуқидан маҳрум этиш бўйича киритилган тақдимномаларни кўриб чиқиш тартибини такомиллаштириш мақсадида «Ўзбекистон Республикаси Олий Мажлисининг Сенати тўғрисида»ги Конституциявий Қонуннинг 16-моддаси ва «Ўзбекистон Республикаси Олий Мажлиси Сенатининг Регламенти тўғрисида»ги Қонуннинг 6-моддасига асосан Ўзбекистон Республикаси Олий Мажлиси Сенатининг Кенгаши қарор қилади:

1. Ўзбекистон Республикаси Олий Мажлиси Сенатининг 2021 йил 31 июлдаги СҚ-360-IV-сонли Қарори билан тасдиқланган Халқ депутатлари вилоят, туман, шаҳар Кенгашининг намунавий регламентига иловага мувофиқ ўзгартиш ва қўшимча киритилсин.

2. Халқ депутатлари вилоятлар, Тошкент шаҳар, туман (шаҳар)лар Кенгашларига бир ой муддатда ушбу ўзгартиш ва қўшимча асосида ўз регламентларини қайта кўриб чиқиш ҳамда тасдиқлаш тавсия этилсин.

3. Ўзбекистон Республикаси Олий Мажлиси Сенатининг Маҳаллий ҳокимият вакиллик органлари фаолиятини кучайтиришга кўмаклашувчи комиссияси халқ депутатлари вилоятлар, Тошкент шаҳар, туман (шаҳар)лар Кенгашларига ўз фаолиятини регламент асосида олиб боришлари юзасидан доимий равишда амалий ёрдам кўрсатиб борсин.

4. Ушбу Қарорнинг ижросини назорат қилиш Ўзбекистон Республикаси Олий Мажлиси Сенати Раисининг биринчи ўринбосари С. Сафоев зиммасига юклансин.

5. Мазкур Қарор қабул қилинган кундан эътиборан кучга киради.

Ўзбекистон Республикаси Олий Мажлиси Сенатининг 2021 йил 31 июлдаги СҚ-360-IV-сонли Қарори билан тасдиқланган Халқ депутатлари вилоят, туман, шаҳар Кенгашининг намунавий регламентига қуйидаги ўзгартиш ва қўшимча киритилсин:

1) 98-модда чиқариб ташлансин;

2) қуйидаги мазмундаги XII¹ боб билан тўлдирилсин:

«XII¹ боб. Депутатни дахлсизлик ҳуқуқидан маҳрум қилишга розилик олиш тўғрисида киритилган тақдимномани кўриб чиқиш

99¹-модда. Депутатни дахлсизлик ҳуқуқидан маҳрум қилиш тўғрисидаги масала тегишинча вилоят, туман, шаҳар прокурорининг ёки юқори турувчи прокурорнинг тақдимномасига биноан маҳаллий Кенгаш томонидан ўн кун ичида ҳал этилади.

Сенатор этиб сайланган депутатни дахлсизлик ҳуқуқидан маҳрум қилиш масаласи «Ўзбекистон Республикаси Олий Мажлиси Қонунчилик палатаси депутатининг ва Сенати аъзосининг мақоми тўғрисида»ги Ўзбекистон Республикаси Қонунида белгиланган тартибда ҳал этилади.

99²-модда. Депутатни жавобгарликка тортишга розилик олиш тўғрисида қуйи прокурор томонидан киритилган тақдимномани юқори турувчи прокурор чақиртириб олиши мумкин.

99³-модда. Депутатни жиноий жавобгарликка тортишга, ушлаб туришга, қамоққа олишга ёки унга нисбатан суд тартибида бериладиган маъмурий жазони қўллашга розилик олиш тўғрисидаги прокурор тақдимномаси маҳаллий Кенгашга келиб тушгандан кейин маҳаллий Кенгаш котибияти томонидан расмийлаштирилади ва шу куннинг ўзида маҳаллий Кенгаш раисига ҳамда Регламент ва депутатлик одоби масалалари бўйича доимий комиссия раисига тақдим этилади.

99⁴-модда. Тақдимнома Регламент ва депутатлик одоби масалалари бўйича доимий комиссияга келиб тушгандан кейин икки кун ичида комиссия мажлисида муҳокама қилинади.

Муҳокама жараёнида дахлсизлик ҳуқуқидан маҳрум қилишга розилик сўралган депутатнинг ўзи ҳам иштирок этади.

99⁵-модда. Регламент ва депутатлик одоби масалалари бўйича доимий комиссия мажлисида тақдимномани муҳокама қилиш якунлари баённома шаклида расмийлаштирилади.

Баённомада мажлис бўлиб ўтган сана, вақт, жой, комиссия аъзоларининг ва дахлсизлик ҳуқуқидан маҳрум қилишга розилик сўралган депутатнинг иштироки, раислик қилувчи, прокуратура вакилининг фамилияси, исми, лавозими, муҳокама жараёнида билдирилган фикр-мулоҳазалар мазмуни ва овоз бериш натижалари батафсил ёритилади.

Баённомада Регламент ва депутатлик одоби масалалари бўйича доимий комиссиянинг депутатни дахлсизлик ҳуқуқидан маҳрум қилишга розилик бериш ёки рад этиш бўйича хулосаси акс эттирилади ҳамда ушбу масалани маҳаллий Кенгаш сессияси муҳокамасига киритиш назарда тутилади.

99⁶-модда. Маҳаллий Кенгаш котибияти тақдимномани расмийлаштиргандан кейин уни кўриб чиқиш бўйича келгуси ўн кун ичида ўтказиладиган сессия кун тартибига киритиш юзасидан маҳаллий Кенгаш раисига таклиф киритади.

Агарда навбатдаги сессия яқин уч кун ичида ўтказилиши белгиланган ва бу сессия Регламент ва депутатлик одоби масалалари бўйича доимий комиссиянинг мажлиси ўтказиладиган кундан олдин бўлса ёки яқин ўн кун ичида сессия ўтказилиши режалаштирилмаган бўлса тақдимномани муҳокама қилиш бўйича навбатдан ташқари сессия чақирилади. Бунда сессияни чақириш бўйича қонунчиликда белгиланган талабларга риоя этилиши шарт.

99⁷-модда. Маҳаллий Кенгаш сессиясида дахлсизлик ҳуқуқидан маҳрум қилишга розилик сўралган депутатнинг ўзи ҳам иштирок этади, тақдимнома прокуратура вакили иштирокида муҳокама қилинади.

Маҳаллий Кенгаш сессиясида тақдимномани кўриб чиқиш масаласи муҳокама қилинаётганда дахлсизлик ҳуқуқидан маҳрум қилишга розилик сўралган депутатнинг раислик қилиши мумкин эмас.

Муҳокама якунлари бўйича депутатни дахлсизлик ҳуқуқидан маҳрум қилишга розилик бериш ёки рад этиш бўйича овоз бериш жараёни ўтказилади. Сессияда иштирок этаётган депутатларнинг таклифига асосан овоз бериш ёпиқ шаклда ўтказилиши ҳам мумкин.

99⁸-модда. Маҳаллий Кенгаш сессиясида депутатни дахлсизлик ҳуқуқидан маҳрум қилишга розилик олиш бўйича тақдимномани кўриб чиқии1 жараёни дахлсизлик ҳуқуқидан маҳрум қилишга розилик сўралган депутатнинг розилиги билан сессия очиқ ёки ёпиқ шаклда ўтказилишидан қатъий назар видеотасвирга олинади ҳамда видеоматериаллар маҳаллий Кенгаш котибиятида сақланади.

99⁹-модда. Маҳаллий Кенгашнинг депутатни дахлсизлик ҳуқуқидан маҳрум қилишга розилик бериш ёки рад этиш масаласига доир қарори расмийлаштирилгандан кейин дарҳол тегишли прокурорга юборилади.

99¹⁰-модда. Депутатни дахлсизлик ҳуқуқидан маҳрум қилишга розилик олган прокурор иш юритиш тамомланган кундан эътиборан уч кунлик муддат ичида маҳаллий Кенгашга ишни тергов қилиш, судда кўриб чиқиш натижалари тўғрисида хабар қилиши шарт.

Маҳаллий Кенгашнинг депутатни дахлсизлик ҳуқуқидан маҳрум қилишга розилик беришни рад этгани унга нисбатан жиноят иши юритилишини ёки суд тартибида бериладиган маъмурий жазони назарда тутадиган маъмурий ҳуқуқбузарлик тўғрисидаги иш юритилишини истисно этадиган ва бундай ишларни тугатишга олиб келадиган ҳолат ҳисобланади».