Ўзбекистон Республикаси ва Қозоғистон Республикаси, кейинги ўринларда Томонлар деб аталувчилар,

давлат суверенитети, тенг ҳуқуқлилик ва ўзаро ҳурмат принципларидан келиб чиқиб,

жиноий-ҳуқуқий соҳада халқаро ҳамкорликни янада ривожлантиришга кўмаклашиш ниятида,

маҳкумларнинг жазони ўзлари фуқароси бўлган давлатда ўташлари жазони ижро этиш мақсадига янада самарали эришишга, ҳуқуқбузарларни жамиятда нормал ҳаётга қайтаришга кўмаклашишини инобатга олиб,

инсонпарварлик ва инсон ҳуқуқларини ҳурмат қилиш принципларига амал қилган ҳолда,

қуйидагилар тўғрисида келишувга эришдилар:

Мазкур Шартноманинг мақсадларига эришиш учун атамалар қуйидаги маъноларни билдиради:

а) «ҳукм чиқариш Томони» — жазони ўташни давом эттириш учун топширилиши мумкин бўлган ёки топширилган шахсга нисбатан суд ҳукмини чиқарган Томон;

b) «ҳукмни ижро этиш Томони» — маҳкум жазони ўташни давом эттириши учун топширилиши мумкин бўлган ёки топширилган Томон;

с) «маҳкум» — жиноят содир этганлиги учун Томонлардан бирининг суди томонидан озодликдан маҳрум қилиш жазосига ҳукм қилинган шахс;

d) «қонуний вакил» — Томонлар ҳар бирининг миллий қонунчилигида белгиланган тартибда шундай деб тан олинган шахс;

е) «ваколатли органлар» — Томонларнинг маҳкумларни топшириш тўғрисидаги қарорларини ижро этувчи органлари.

1. Мазкур Шартноманинг қоидаларига мувофиқ, Томонлар маҳкумларни топшириш масалаларида максимал даражада ҳамкорлик қилиш мажбуриятини оладилар.

2. Томонлар мазкур Шартнома талабларига мувофиқ бир-бирларининг сўровлари бўйича ҳукм чиқариш Томони ҳудудида жиноятлар содир этганлик учун озодликдан маҳрум этиш жойларида жазони ўтаётган ва бошқа Томоннинг фуқароси бўлган маҳкумларни ҳукмни ижро этиш Томонига жазони ўташ учун топшириш мумкин.

1. Мазкур Шартнома мақсадларида, Томонлар тарафидан белгиланган марказий органлар бевосита, шу жумладан электрон алоқа воситалари ёки факс ёрдамида алоқа қиладилар.

2. Қуйидагилар марказий органлар ҳисобланадилар:

Ўзбекистон Республикаси учун — Ўзбекистон Республикаси Бош прокуратураси;

Қозоғистон Республикаси учун — Қозоғистон Республикаси Бош прокуратураси.

3. Ҳар бир Томон марказий органи билан боғлиқ ҳар қандай ўзгаришлар ёки унинг ваколатлари бошқа органларга ўтказилганлиги тўғрисида бошқа Томонни дипломатик каналлар орқали хабардор қилади.

Маҳкумни ўзи фуқароси бўлган Томонга топшириш тартиб-таомилини бошлаш учун асос ушбу шахснинг ёки унинг қонуний вакилининг Томонлардан исталган бирининг марказий органига йўллаган аризаси ҳисобланади.

1. Томонларнинг марказий органлари томонидан маҳкумни топшириш тўғрисидаги сўровлар ва уларга жавоблар ёзма шаклда тузилади ва юборилади.

Сўров маҳкумнинг шахси тўғрисида маълумотлар (фамилияси, исми, отасининг исми (агар мавжуд бўлса), туғилган санаси ва жойи), шахс ҳукм қилинган жиноят қонуни моддасининг номи ва маҳкумнинг фуқаролигини тасдиқловчи ҳужжат нусхасини ўз ичига олади.

2. Маҳкумни топшириш тўғрисидаги сўровлар ва уларга жавоблар, шунингдек уларга илова қилинган ҳужжатлар имзо билан тасдиқланиши ва гербли муҳр билан муҳрланиши лозим.

3. Томонлардан исталган бири тарафидан маҳкумни топшириш тўғрисидаги сўров берилиши мумкин. Сўралаётган Томон ўзининг қарори тўғрисида сўраётган Томонни дарҳол хабардор қилиши лозим.

4. Томонларнинг биридан маҳкумни топшириш тўғрисидаги сўров келиб тушса ва бошқа Томон буни рад этмаса, ҳукм чиқариш Томони ҳукмни ижро этиш Томонига қуйидаги ҳужжатлар ва маълумотларни тақдим этади:

а) қонуний кучга кирган суд қарорининг нусхаси, шу жумладан қарорга асос бўлиб хизмат қилган қонуннинг тегишли қоидалари;

b) жазонинг тури ва муддатини кўрсатувчи маълумотлар, шунингдек унинг ҳисоблаш санаси;

с) жазонинг ўталган муддатлари ва ўталиши лозим бўлган қисмлари тўғрисида, шу жумладан судга қадар ҳибсда ушлаб туриш муддатлари тўғрисида маълумотлар, суд ҳукмининг ўзгартирилганлиги тўғрисида маълумотлар ва суд ҳукмини ижрога қаратиш учун аҳамиятли бошқа маълумотлар;

d) мазкур Шартноманинг 7-моддаси 1-банди с) кичик бандига мувофиқ топширишга маҳкумнинг ёки унинг қонуний вакилининг ёзма розилиги;

е) маҳкумнинг соғлигининг ҳолати тўғрисида тиббий хулоса, шу жумладан унинг даволанганлиги тўғрисида маълумотлар ва келгусида ҳукмни ижро этиш Томонида келгусида даволаниши бўйича тавсиялар;

f) маҳкумнинг хулқ-атворининг ўзига хос хусусиятлари тўғрисида маълумотлар;

g) етказилган моддий зарар ҳамда суд ҳукми ва бошқа ижро ҳужжатларига мувофиқ уни қоплаш бўйича маълумотлар;

h) агар тайинланган бўлса, қушимча жазо ижроси тўғрисида ҳужжат.

5. Ҳукмни ижро этиш Томони ҳукм чиқариш Томонига қуйидаги ҳужжатларни тақдим этади:

а) маҳкумнинг шахси тўғрисидаги маълумотлар (фамилияси, исми, отасининг исми (агар мавжуд бўлса), тугилган санаси ва жойи);

b) маҳкумнинг фуқаролигини тасдиқловчи ҳужжат;

с) ҳукм чиқариш Томонида суд ҳукми чиқарилиши билан боғлиқ қилмиш ҳукмни ижро этиш Томонининг миллий қонунчилигига мувофиқ жиноят ҳисобланиши белгиланган ҳукмни ижро этиш Томонининг тегишли миллий қонунчилигидан кўчирма;

d) ҳукм чиқариш Томони тарафидан чиқарилган суд ҳукмини ҳукмни ижро этиш Томонининг миллий қонунчилиги бўйича ижро этиш тартиби тўғрисида маълумотлар.

6. Зарур ҳолларда, Томонларнинг марказий органлари қўшимча ҳужжатлар ёки маълумотларни сўраб олиши мумкин.

7. Мазкур Шартномани ижро этишда Томонлар рус тилидан фойдаланадилар. Томонларнинг давлат тилларида тузилган ҳужжатларга уларнинг рус тилидаги тасдиқланган таржималари илова қилинади.

1. Ҳукм чиқариш Томони маҳкум ёки унинг қонуний вакили, ҳуқуқий оқибатларни тўлиқ англаган ҳолда, топширишга ихтиёрий розилигини берганлигини ва буни топширишга розилик тўғрисидаги ариза билан тасдиқланишини кафолатлайди.

2. Ҳукм чиқариш Томони ҳукмни ижро этиш Томонининг сўрови асосида ҳукмни ижро этиш Томонига ўзининг ваколатли шахси орқали маҳкум мазкур модданинг 1-банди талабларига мувофиқ ўзини топширишга розилик берганлигига ишонч ҳосил қилиши учун имконият яратиб бериши лозим.

3. Маҳкум ўзини топшириш тўғрисидаги аризани ўзи билган тилда тақдим қилиши мумкин.

1. Маҳкум мазкур Шартномага мувофиқ қуйидаги ҳолларда топширилиши мумкин, башарти:

а) маҳкум ҳукмни ижро этиш Томонининг фуқароси бўлса;

b) шахсни озодликдан маҳрум қилиш тўғрисидаги суд ҳукми қонуний кучга кирган бўлса;

с) маҳкумнинг ёзма розилиги ёки маҳкумнинг ёши, жисмоний ва (ёки) руҳий ҳолатига кўра ўз иродасини эркин билдира олмаса, унинг қонуний вакилининг розилиги бўлса;

d) шахс ҳар иккала Томоннинг миллий қонунчилигига мувофиқ жиноий жазоланадиган ва озодликдан маҳрум қилишга сабаб бўладиган қилмиш учун ҳукм қилинган бўлса;

е) маҳкумни топшириш тўғрисидаги ариза ёки сўров қабул қилинганда ўталиши лозим бўлган озодликдан маҳрум қилиш жазоси муддати камида бир (1) йилни ташкил қилса;

f) жиноят орқали етказилган моддий зарар қопланган бўлса;

g) ҳукм чиқариш Томонида маҳкумга нисбатан тергов, суд муҳокамаси ёки бошқа процессуал ҳаракатлар давом эттирилмаётган бўлса;

h) Томонлар маҳкумни топширишга рози бўлсалар.

2. Истисно ҳолатларда Томонлар, ҳатто маҳкум ўташи лозим бўлган муддат мазкур модданинг 1-банди е) кичик бандида кўрсатилган муддатдан кам бўлса ҳам, маҳкумни топширишга розилик билдиришга ҳақлидирлар.

Маҳкумни топшириш амалга оширилмайди, башарти:

а) мазкур Шартноманинг 7-моддаси 1-бандида кўрсатилган талабларга амал қилинмаган бўлса;

b) Томонлардан бири маҳкумни топшириш унинг суверенитети, хавфсизлиги, жамоат тартиби ёки бошқа муҳим миллий манфаатларига зарар етказиши мумкин ёхуд унинг миллий қонунчилигига зид деб ҳисобласа;

с) маҳкум бирор-бир молиявий мажбуриятларни бажармаган бўлса;

d) сўраётган Томон тарафидан мазкур Шартноманинг 5-моддаси талаблари лозим даражада бажарилмаган бўлса.

1. Томонлар мазкур Шартномага ва ўзларининг миллий қонунчилигига мувофиқ маҳкумни топшириш тўғрисида қарор қабул қиладилар.

2. Қабул қилинган қарор тўғрисида сўраётган Томоннинг марказий органига ёки маҳкумни топшириш тўғрисида ариза билан мурожаат қилган шахсга ёзма равишда хабар берилади.

3. Маҳкумни топшириш рад этилса, бундай қарор асослантирилган бўлиши лозим.

Томонларнинг ҳар бири мазкур Шартномани амалга ошириш жараёнида олинган шахсий маълумотларни ҳимоя қилишни кафолатлайди ва уларни бошқа Томоннинг олдиндан берилган ёзма розилигисиз учинчи давлатга бериши мумкин эмас.

1. Маҳкумни топшириш тўғрисидаги сўров қаноатлантирилган тақдирда, Томонларнинг ваколатли органлари маҳкумни топшириш вақти ва шартлари тўғрисида келишиб оладилар.

2. Топшириш тартиботи Томонларнинг ваколатли органлари вакиллари томонидан имзоланадиган маҳкумни топшириш тўғрисидаги ҳужжатни икки нусхада тузишни ўз ичига олади.

3. Маҳкумни топшириш тартиботи Ўзбекистон — Қозоғистон давлат чегарасида, «Ғишт-Кўприк» — «Жибек-Жоли» ўтказиш пунктлари орқали амалга оширилади.

4. Ўтказиш пунктлари ўзгартирилган тақдирда, Томонлар бу тўғрисида дипломатик каналлар орқали бир-бирларини хабардор қиладилар.

1. Ҳукмни ижро этиш Томони, маҳкумнинг ҳолатини ёмонлаштирмаган ҳолда, ўз миллий қонунчилигига мувофиқ ҳукм чиқариш Томони судининг ҳукми ижросини тўлиқ давом эттирилишини таъминлаши шарт.

2. Ҳукмни ижро этиш Томонининг суди ўз миллий қонунчилигига мувофиқ, худди ҳукм чиқариш Томонининг суди қарори билан тайинлангани каби озодликдан маҳрум қилиш муддатини белгилаган ҳолда, қарор қабул қилади.

3. Башарти ҳукмни ижро этиш Томонининг миллий қонунчилиги бўйича жиноят содир этганлик учун озодликдан маҳрум қилишнинг чегараланган муддати ҳукм чиқариш Томонининг суди ҳукми билан тайинланган муддатдан кам бўлса, ҳукмни ижро этиш Томонининг суди бундай жиноятни содир этганлик учун миллий қонунчиликда назарда тутилган озодликдан маҳрум қилишнинг энг кўп муддатини белгилайди.

4. Ҳукм чиқариш Томонининг ҳудудида маҳкум ўтаб бўлган жазо муддати ҳукмни ижро этиш Томонида жазони ўташнинг умумий муддатига киритилади.

5. Башарти ҳукм чиқариш Томони судининг ҳукми икки ёки ундан ортиқ қилмишга тегишли бўлса, улардан бири ёки бир нечтаси ҳукмни ижро этиш Томонида жиноят деб ҳисобланмаса, ушбу Томоннинг суди жазонинг қайси қисми жиноят ҳисобланадиган қилмишга қўлланилишини аниқлайди.

6. Башарти содир этилган қилмиш учун ҳукмни ижро этиш Томонида қушимча жазо назарда тутилган бўлса, ушбу Томон суди тарафидан ўз миллий қонунчилигига мувофиқ бундай қушимча жазони ўташ тўғрисида қарор қабул қилинади.

Томонларнинг ҳар бири, бошқа Томонни дарҳол хабардор қилган ҳолда, топширилган маҳкумга нисбатан ўз миллий қонунчилигига мувофиқ афв этиш, амнистия актини қўллаш ёки унга тайинланган жазони енгиллаштириш ёхуд уни жазони ўташни давом эттиришдан озод қилиш тўғрисида қарор қабул қилиш ҳуқуқига эга.

1. Фақатгина ҳукм чиқариш Томони ўз суди томонидан чиқарилган қарорни ўзгартириши ёки бекор қилиши ҳуқуқига эга.

2. Ҳукмни ижро этиш Томони ҳукм чиқариш Томонидан ўзгартирилган ёки бекор қилинган қарорни олган тақдирда, ҳукмнинг ижро этилишини ўзгартириши ёки бекор қилиши лозим.

1. Маҳкумни топшириш ҳукм чиқариш Томонида ҳукмнинг ижро этилиши тугатилганлигини билдиради.

2. Жазони ўташ учун ҳукмни ижро этиш Томонига топширилган маҳкумга нисбатан ушбу Томон ҳудудида шу каби жиноятни содир этган шахсга нисбатан бўлгани каби шундай ҳукм қилишнинг ҳуқуқий оқибатлари бошланади.

3. Ҳукмни ижро этиш учун топширилган маҳкум худди шундай қилмиш учун ҳукмни ижро этиш Томонининг ҳудудида қайта жиноий жавобгарликка тортилиши мумкин эмас.

Ҳукмни ижро этиш Томони ҳукм чиқариш Томонига суд ҳукмининг ижроси тўғрисида ахборот бериши лозим, башарти:

а) суд ҳукмининг ижроси якунланган бўлса;

b) маҳкум қамоқдан қочган ёки жазони ўташ муддати тугашидан олдин вафот этган бўлса;

с) ҳукм чиқариш Томони тарафидан бу ҳақида ахборот сўралса.

1. Ҳар бири Томон мазкур Шартнома қўлланилиши мумкин бўлган маҳкумларни унинг мавжудлиги ва мазмуни тўғрисида хабардор қилади.

2. Маҳкум ёки унинг қонуний вакили топшириш тўғрисидаги аризани кўриб чиқиш бўйича Томонлардан ҳар бири тарафидан қабул қилинган якуний қарор тўғрисида ёзма хабардор қилинади.

1. Томонларнинг ҳар бири, учинчи давлат тарафидан бошқа Томонга топширилган маҳкумни транзит ташиш тўғрисида тегишли сўров мавжуд бўлган тақдирда, ўзининг ҳудуди орқали транзит ташишга рухсат бериш ҳуқуқига эга.

Бунда транзит Томони ўз ҳудудида маҳкумни қабул қилиш, уни ҳибсда сақлаш ва куйидаги қабул қилиш-топшириш пунктигача етказишни таъминлайди:

Ўзбекистон Республикаси учун — Тошкент шаҳри;

Қозоғистон Республикаси учун — Чимкент шаҳри.

2. Транзит Томони қуйидаги ҳолларда транзит ташишни рад этиш ҳуқуқига эга, башарти:

а) маҳкум унинг фуқароси бўлса;

b) содир этилганлиги учун жазо тайинланган жиноят унинг миллий қонунчилигига мувофиқ жиноят деб ҳисобланмаса.

3. Транзит ташиш тўғрисидаги сўровга мазкур Шартноманинг 5-моддаси 4-банди а), b), е) ва f) кичик бандларида назарда тутилган маълумотларни ўз ичига олади ва унга мазкур Шартноманинг 5-моддаси 5-банди а), b), с) кичик бандларида белгиланган ҳужжатлар илова қилинади.

4. Башарти ҳаво транспортидан фойдаланилса ва транзит Томонининг ҳудудида қўниш кўзда тутилмаган бўлса, транзит ташишга рухсат талаб қилинмайди.

5. Ҳаво кемаси режадан ташқари қўнган ҳолларда, транзит Томони бошқа Томоннинг маҳкумни кузатиб бораётган вакилларининг илтимосига кўра, ушбу шахсни транзит ташиш учун рухсат олингунга қадар 72 соат давомида ҳибсда ушлаб туриши мумкин.

6. Башарти ушбу модданинг 5-бандида кўрсатилган муддатларда транзит ташиш учун сўров олинмаса ва Томонлар ўртасида бошқача келишувга эришилмаган бўлса, ушбу шахс озодликка чиқарилади.

1. Мазкур Шартномани ижро этиш билан боғлиқ харажатларни Томонлар ўзларининг миллий қонунчилигига ва мазкур Шартномага мувофиқ қоплайдилар.

2. Ҳукмни ижро этиш Томони қуйидаги харажатларни қоплайди:

а) ҳукм чиқариш Томонининг ҳудудида юзага келадиган харажатлардан ташқари маҳкумни ташиш билан боғлиқ харажатлар;

b) топшириш амалга оширилгандан кейин ҳукмни ижро этиш билан боғлиқ харажатлар.

3. Маҳкумни транзит ташиш билан боғлиқ харажатларни транзит Томони қоплайди.

Мазкур Шартнома мақсадларида, бир Томоннинг марказий органи тарафидан имзо ва гербли муҳр билан тасдиқланган ҳолда юборилган ҳар қандай ҳужжат бошқа Томоннинг ҳудудида ҳеч қандай махсус тасдиқловсиз фойдаланилиши лозим.

1. Ҳукм чиқариш Томони шахсга нисбатан ноқонуний ҳукм чиқарганлик учун жавобгар бўлади.

2. Ҳукм чиқариш Томони ноқонуний ҳукм чиқариш оқибатида етказилган зарарни қоплайди.

Мазкур Шартнома у кучга киришига қадар ва кейинги даврларда чиқарилган ҳукмларни ижро этиш учун қўлланилади.

Мазкур Шартномани талқин қилиш ёки қўллашда юзага келадиган низолар Томонларнинг марказий органлари ўртасида маслаҳатлашувлар ва музокаралар орқали ҳал этилади.

Томонларнинг ўзаро розилиги билан мазкур Шартномага ўзгартириш ва қўшимчалар киритилиши мумкин. Бундай ўзгартириш ва қўшимчалар мазкур Шартноманинг ажралмас қисми ҳисобланади ва алоҳида баённома билан расмийлаштирилади.

Мазкур Шартноманинг қоидалари Томонлар иштирокчиси бўлган бошқа халқаро шартномалардан келиб чиқадиган ҳуқуқ ва мажбуриятларига дахл қилмайди.

1. Мазкур Шартнома ратификация қилинади ва Томонларнинг бири дипломатик каналлар орқали унинг ратификация қилинганлиги тўғрисида сўнгги ёзма хабарнома олган санадан бошлаб олти (6) ой ўтгач кучга киради.

2. Шартнома номуайян муддатга тузилади. Ҳар бир Томон бошқа Томонни исталган вақтда дипломатик каналлар орқали ёзма хабарнома юбориш билан Шартноманинг амал қилишини тугатиши ҳуқуқига эга. Мазкур Шартноманинг амал қилиши Томонлардан бири бошқа Томоннинг уни тугатиш истаги тўғрисидаги хабарномасини олган санадан бошлаб олти (6) ойдан сўнг тугатилади.

3. Мазкур Шартномани тугатилиши уни тугатилишидан олдин олинган маҳкумларни топшириш тўғрисидаги сўровларнинг ижросини якунлашга тўсқинлик қилмайди.

Ушбуни тасдиқлаган ҳолда, тегишли тартибда ваколат берилган қуйида имзо чекувчилар мазкур Шартномани имзоладилар.

Нур-Султон шаҳрида 2021 йил 6 декабрда икки нусхада, ҳар бири ўзбек, қозоқ ва рус тилларида тузилди, бунда барча матнлар бир хил кучга эга.

Мазкур Шартноманинг матнлари ўртасида тафовутлар юзага келган тақдирда, Томонлар рус тилидаги матнга мурожаат қиладилар.