Ўзбекистон Республикаси Ҳукумати ва Озарбайжон Республикаси Ҳукумати, кейинги ўринларда «Томонлар» деб аталувчилар,

икки мамлакатнинг саноат, агросаноат, ишлаб чиқариш ва илмий-техник салоҳияти имкониятлари, шунингдек, уларнинг икки томонлама ўзаро манфаатли ҳамкорликни ривожлантиришдаги манфаатдорликларини инобатга олиб,

тенглик ва ўзаро манфаат принциплари асосида саноат соҳасидаги икки томонлама ҳамкорликнинг самарадорлигини ривожлантириш ва ошириш учун мавжуд салоҳиятни эътироф этган ҳолда,

қуйидагилар тўғрисида келишиб олдилар:

Мазкур Битимнинг мақсадлари Томонларнинг ўз ваколатлари доирасида ва Томонлар давлатларининг қонунчилигига мувофиқ саноат соҳасидаги ҳамкорликни тенг ҳуқуқлилик ва ўзаро манфаатлилик асосида мустаҳкамлашга кўмаклашиш ва бундай ҳамкорликнинг устувор йўналишларини белгилаш ҳисобланади.

Томонлар саноат соҳасидаги ҳамкорликни металлургия, кимё, қурилиш, фармацевтика, нефт ва газ ҳамда заргарлик саноати, қишлоқ хўжалиги маҳсулотларини қайта ишлаш каби устувор йўналишларда ва ўзаро қизиқиш уйғотадиган бошқа соҳаларда ривожлантирадилар.

Мазкур Битимни амалга ошириш мақсадида Томонлар:

ишбилармонлик ва шериклик ҳамкорлигини ташкил этиш мақсадида ўз давлатларининг саноат корхоналари ўртасида ишбилармонлик алоқаларини ўрнатишга кўмаклашадилар;

Ўзбекистон Республикаси ва Озарбайжон Республикаси ҳудудида мазкур Битимнинг 2-моддасида кўрсатилиб ўтилган йўналишлар бўйича саноат соҳасида фаолият олиб борувчи қўшма корхоналарни ташкил этишга кўмаклашадилар;

Ўзбекистон Республикаси ва Озарбайжон Республикасининг саноат соҳасидаги ҳамкорликни тартибга солувчи қонунчилиги бўйича ахборот алмашадилар;

саноатни ривожлантиришнинг миллий устувор йўналишлари бўйича ахборот алмашадилар;

Томонлар давлатлари ҳудудидаги кўргазма-ярмарка тадбирларида Ўзбекистон Республикаси ва Озарбайжон Республикасининг саноат корхоналари ва тегишли соҳавий уюшмаларини жалб қилишга кўмаклашадилар;

саноат соҳасидаги ҳамкорлик масалалари бўйича конференция, семинар ва давра суҳбатларини ташкил этишга кўмаклашадилар.

Мазкур Битим доирасида Томонлар:

а) қўшма чора-тадбирлар режаси, ҳаракатлар дастури ва мазкур Битимни амалга оширишга қаратилган лойиҳаларни ишлаб чиқадилар ва амалга оширадилар;

б) зарур бўлганда, қўшма ишчи гуруҳ тузадилар ва икки томонлама ҳамкорликнинг жорий ҳолати ва уни такомиллаштириш истиқболларини муҳокама қилиш бўйича доимий маслаҳатлашувларни ўтказиш механизмини йўлга қўядилар.

Мазкур Битимни талқин қилиш ёки қўллашда келишмовчиликлар юзага келган ҳолларда, Томонлар уларни музокаралар ва маслаҳатлашувлар орқали ҳал этадилар.

Мазкур Битим Томонларнинг уларнинг давлатлари иштирокчиси бўлган бошқа халқаро шартномалар бўйича ҳуқуқ ва мажбуриятларига дахл қилмайди.

Томонларнинг ўзаро розилиги билан мазкур Битимга унинг ажралмас қисми бўлган ва мазкур Битимнинг 8-моддасида белгиланган тартибда кучга кирадиган алоҳида баённомалар билан расмийлаштириладиган ўзгартиришлар ва қўшимчалар киритилиши мумкин.

Мазкур Битим унинг кучга кириши учун зарур бўлган давлат ички процедураларини Томонлар бажарганлиги тўғрисидаги охирги ёзма хабарнома дипломатик каналлар орқали олинган санадан бошлаб кучга киради.

Мазкур Битим беш йил муддатга тузилади. Мазкур Битимнинг амал қилиши, башарти Томонлардан бири унинг амал қилишини тугатиш нияти тўғрисида тегишли муддат тугашига олти ой қолгунга қадар бошқа Томонни дипломатик каналлар орқали хабардор қилмаса, ўз-ўзидан кейинги беш йиллик муддатларга узаяверади.

Тошкент шаҳрида 2022 йил 21 июнда, ҳар бири ўзбек, озарбайжон ва рус тилларида бўлган икки асл нусхада тузилди, бунда барча матнлар тенг аутентикдир.

Матнлар ўртасида фарқлар юзага келган тақдирда, Томонлар рус тилидаги матнга мурожаат қиладилар.