Ўзбекистон Республикаси Ҳукумати ва Озарбайжон Республикаси Ҳукумати, кейинги ўринларда «Томонлар» деб аталувчилар,

икки мамлакат ўртасида иқтисодий алоқаларни мустаҳкамлаш, йўловчи ва юкларни автомобилда халқаро йўналишларда ташишни ва ўз давлатларининг ҳудудлари орқали транзитни ривожлантиришга кўмаклашиш, шунингдек, икки давлат ўртасида автомобилда йўловчи ва юк ташиш қатновларини енгиллаштириш мақсадида,

қуйидагилар тўғрисида келишиб олдилар:

Мазкур Битимнинг қоидалари Томонлар давлатлари ҳудудлари ўртасида, уларнинг ҳудудларидан транзит тарзда ва учинчи давлатлар ҳудудларидан/ҳудудларига Томонлардан бирининг давлати ҳудудида рўйхатга олинган ташувчиларнинг давлат чегарасидаги белгиланган ўтказиш масканлари орқали, халқаро автомобиль қатновлари учун очиқ бўлган йўллар бўйлаб автомобилда йўловчилар ва юк ташишга нисбатан қўлланилади.

Мазкур Битимда қўлланилган атамалар қуйидаги маъноларни англатади:

1. «Ташувчи» — Томонлардан бирининг давлати ҳудудида рўйхатга олинган, мулкчилик ҳуқуқи ёки бошқа ашёвий ҳуқуқлар асосида автотранспорт воситасига эгалик қилувчи, ушбу давлатнинг миллий қонунчилигига мувофиқ йўловчилар ва юкларни автомобилларда халқаро ташишларни амалга оширишга рухсат берилган ҳар қандай жисмоний ёки юридик шахсни англатади.

2. «Автотранспорт воситаси»:

йўловчиларни ташишда — автобус, яъни йўловчиларни ташиш учун мўлжалланган ва ҳайдовчининг ўрни билан ҳисоблаганда ўтириш учун 9 тадан ортиқ ўриндиққа эга бўлган автотранспорт воситасини;

юкларни ташишда — юк ташишга мўлжалланган автотранспорт воситаси, шу жумладан, юк автомобили, тиркамали юк автомобили, шатакчи автомобиль ёки ярим тиркамали шатакчи автомобилни англатади.

3. «Йўловчиларни мунтазам ташиш» — тегишли йўналишлар ва жадвал (ҳаракатланиш оралиғи) бўйича амалга ошириладиган, ишни бошлаш ва якунлаш вақти, йўловчиларни чиқариш ва тушириш жойлари ҳамда тарифлари олдиндан белгиланган йўловчи ташувларини англатади.

4. «Йўловчиларни номунтазам ташиш» — буюртмачи тарафидан тузилган шартнома (буюртма) асосида ташувчи тарафидан амалга ошириладиган ва мунтазам ташишлар турига тегишли бўлмаган йўловчи ташувларини англатади.

5. «Рухсатнома» — бир Томон давлатининг ваколатли органи тарафидан бериладиган ва бошқа Томон давлатида рўйхатдан ўтказилган автотранспорт воситасига рухсатнома берган Томон давлатининг ҳудуди бўйлаб ёки ҳудуди орқали ўтиш ҳуқуқини берувчи ҳужжатни англатади.

6. «Транзит ташишлар» — Томонлардан бирининг давлати ҳудудида рўйхатдан ўтказилган автотранспорт воситасида бошқа Томон давлати ҳудуди орқали амалга ошириладиган йўловчи ва юк ташувларини англатади.

7. «Учинчи мамлакатлардан/мамлакатларга ташишлар» — бир Томон давлатининг ҳудудида рўйхатдан ўтказилган автомобиль транспорти воситасида икки пункт ўртасида амалга ошириладиган юк ташишларни англатади. Бунда, пунктлардан бири бошқа Томон давлати ҳудудида ва бошқаси эса мазкур Битим иштирокчиси бўлмаган учинчи мамлакат ҳудудида жойлашган бўлади.

8. «Хавфли юклар» — ўзига хос хоссалари ва хусусиятлари туфайли муайян омиллар мавжуд бўлган тақдирда, ташиш, юк ортиш-тушириш ишлари жараёнида ташилаётган юклар, техника воситалари, қурилмалар, бино ва иншоотлар, бошқа объектларнинг портлаши, ёниши ёки шикастланишига. шунингдек. одамлар ҳаёти ва соғлиғига, атроф-муҳитга зарар етказилишига сабаб бўлиши мумкин бўлган моддалар, материаллар, буюмлар, чиқиндиларни англатади.

1. Йўловчиларни мунтазам ташиш Томонлар давлатлари ваколатли органлари ўртасидаги келишув асосида автобусларда ташкил этилади.

2. Бундай ташишларни ташкил этиш бўйича таклифлар Томонлар давлатларининг ваколатли органлари тарафидан бир-бирларига олдиндан юборилади. Кўрсатилган таклифлар ташувчининг номи, ҳаракат йўналиши, ҳаракат жадвали, тариф, ташувчи йўловчиларни олиб кетадиган ва туширадиган тўхташ пунктлари, шунингдек, ташишларни бажаришнинг режалаштирилган даври ва мунтазамлиги тўғрисидаги маълумотларни ўз ичига олиши лозим.

3. Томонлар давлатларининг ваколатли органлари ўз давлатларининг ҳудудлари орқали йўловчиларни мунтазам ташишни ташкил этиш тартибини (ёзма шаклда) келишиб оладилар.

1. Икки давлат ўртасида йўловчиларни номунтазам ташиш ёки уларнинг ҳудуди орқали транзит ташишни амалга ошириш учун Томонлар давлатларининг ваколатли органлари тарафидан берилган рухсатномалар талаб этилади. Томонлар давлатларининг ваколатли органлари рухсатнома бланкаларини алмашиш тартиби тўғрисида ўзаро келишиб оладилар.

2. Томонлар давлатларининг ваколатли органлари рухсатномани ўз давлатлари ҳудудидан ўтадиган йўл қисми учун берадилар.

3. Рухсатномада бошқача тартиб белгиланмаган бўлса, ҳар бир номунтазам йўловчи ташуви учун бир маротаба манзилга бориш ва қайтиш ҳуқуқини берадиган рухсатнома берилиши лозим.

4. Йўловчиларни ташиш учун рухсатномаларда уларнинг эгаси номи аниқ кўрсатилиб, бошқа ташувчига ёки учинчи шахсларга берилмайди.

5. Носоз автобусни бошқа автобусга алмаштиришда ушбу моддада кўрсатилган рухсатнома талаб қилинмайди.

1. Томонлар давлатларининг ҳудудлари ўртасида, уларнинг ҳудудларидан транзит тарзда ва учинчи мамлакатларга/мамлакатлардан юкларни ташиш Томонлар давлатларининг ваколатли органлари тарафидан бериладиган рухсатномалар асосида амалга оширилади. Мазкур Битимнинг 6-моддасида назарда тутилган ташишлар бундан мустасно.

2. Рухсатномалар қуйидаги асосий турларга бўлинади:

а) Томонлар давлатларининг ҳудудлари ўртасида юкларни ташиш ва уларнинг ҳудудлари орқали транзит ташиш учун;

б) учинчи мамлакатларга/мамлакатлардан юкларни ташиш учун.

Ушбу рухсатномаларга қўшимча равишда Томонлар давлатларининг ваколатли органлари рухсатномаларнинг бошқа турларини ҳам келишиб олишлари мумкин.

3. Ҳар бир автотранспорт воситасига алоҳида рухсатнома берилиши лозим. Ҳар бир шундай рухсатнома бир маротаба манзилга бориш ва қайтишни амалга ошириш ҳуқуқини беради. Йил давомида берилган рухсатномалар кейинги йилнинг 31 январигача ҳақиқий ҳисобланади. Юксиз ҳаракатланиш учун ҳам рухсатнома талаб этилади.

4. Рухсатномаларда уларнинг эгаси номи аниқ кўрсатилиб, бошқа ташувчига ёки учинчи шахсларга берилмайди.

5. Томонлар давлатларининг ваколатли органлари ҳар йили юкларни халқаро ташиш учун тенглик асосида ўзаро келишилган миқдордаги рухсатнома бланкалари билан алмашадилар.

Ушбу бланкаларда рухсатномаларни берган Томон давлати ваколатли органининг муҳри ва масъул шахснинг имзоси бўлиши лозим.

Томонлардан бирининг мурожаатига кўра аввал келишилган миқдордан ортиқча қўшимча рухсатномалар берилиши мумкин.

6. Томонлар давлатларининг ваколатли органлари рухсатномалар алмашиш тартибини ўзаро келишиб оладилар.

Қуйида кўрсатилган ташишларни амалга ошириш учун рухсатнома талаб қилинмайди:

а) мол-мулк билан кўчиб ўтиш;

б) ярмарка ва кўргазмалар учун мўлжалланган материаллар ва буюмлар, шу жумладан, санъат асарларини ташиш;

в) транспорт воситалари, спорт тадбирларини ўтказиш учун мўлжалланган инвентар ва спорт воситаларини ташиш;

г) театр декорациялари ва реквизитлари, мусиқа асбоблари, фақат реклама ва ахборот мақсадларига мўлжалланган материаллар ва буюмларни, радиоэшиттиришлар, кино ва телетасвирга тушириш ҳамда цирк томошалари учун мўлжалланган ускуналарни ташиш;

д) вафот этганларнинг жасадлари ва хокларини ташиш;

е) табиий офатлар рўй берганда, қутқариш операциялари мақсадида гуманитар ва тиббий ёрдам сифатида, икки мамлакат ўртасида ушбу соҳада тегишли Битим билан белгиланган тартибда бажариладиган ташишлар;

ж) юк кўтариш қобилияти тиркама билан 3,5 тоннагача ёки рухсат этилган тўлиқ вазни тиркама билан 6 тоннагача бўлган автотранспорт воситаларида амалга ошириладиган ташишлар;

з) тирик ҳайвонларни ташиш;

и) почта жўнатмаларини ташиш.

1. Халқаро ташишларни амалга оширадиган автотранспорт воситалари ўз давлатининг рўйхатга олиш ва фарқловчи белгиларига эга бўлиши лозим. Юк автомобиллари ёки шатакчи автомобиллар Томонлар давлатларининг рўйхатга олиш ва фарқловчи белгиларига эга бўлган тақдирда, тиркамалар ва ярим тиркамалар бошқа давлатларнинг рўйхатга олиш ва фарқловчи белгиларига эга бўлишлари мумкин.

2. Ташувчига бошқа Томон давлатининг ҳудудида жойлашган пунктлар орасида йўловчилар ва юкларни ташишга рухсат берилмайди.

l. Томонлар давлатларининг автотранспорт воситалари ҳайдовчилари ўзлари бошқараётган автотранспорт воситаларининг тоифасига мос миллий ёки халқаро ҳайдовчилик гувоҳномаларига ва автотранспорт воситаси учун миллий рўйхатдан ўтиш ҳужжатларига эга бўлишлари лозим.

2. Миллий ёки халқаро ҳайдовчилик гувоҳномаси ҳамда автотранспорт воситаси учун миллий рўйхатдан ўтиш ҳужжатлари 1968 йил 8 ноябрда Вена шаҳрида тузилган Бирлашган Миллатлар Ташкилоти Европа Иқтисодий Комиссиясининг йўл ҳаракати тўғрисидаги Конвенциясида белгиланган талабларга мувофиқ бўлиши шарт.

3. Мазкур Битим қоидалари бўйича талаб қилинадиган рухсатнома ва бошқа ҳужжатлар улар тегишли бўлган автотранспорт воситасида сақланиши ва тегишли назоратни амалга оширувчи давлат органларининг талаби бўйича тақдим этилиши лозим.

1. Юксиз ёки юк билан ҳаракатланаётган автотранспорт воситасининг габарит ва вазн параметрлари бошқа Томон давлатининг ҳудудида белгиланган меъёрлардан ортиқ бўлса, ташувчи бошқа Томон давлатининг миллий қонунчилигига мувофиқ ташиш бошлангунга қадар ушбу давлатнинг ваколатли органларидан махсус рухсатнома олиши лозим.

2. Ушбу модданинг 1-бандида кўрсатилган рухсатнома автотранспорт воситасининг муайян йўналиш бўйлаб ҳаракатланишини назарда тутса, ташиш фақат ушбу йўналиш бўйича амалга оширилиши лозим.

1. Қурол-яроғ, ўқ-дорилар, ҳарбий ускуналар ҳамда бошқа махсус ва хавфли юкларни Томонлар давлатларининг ҳудудлари бўйлаб ташиш ва транзит тарзда олиб ўтиш Томонлар давлатларининг миллий қонунчилигига мувофиқ амалга оширилади.

2. Томонлар давлатлари миллий қонунчилигига мувофиқ Томонларнинг давлатлари ҳудудига олиб кириш, ҳудудидан олиб чиқиш ва транзит тарзда ташиш учун тақиқланган юклар рўйхатини Томонлар бир-бирларига тақдим этадилар.

1. Мазкур Битимга асосан йўловчи ва юк ташувларини амалга оширадиган бир Томон давлатининг автотранспорт воситалари қабул қилувчи Томон давлатининг миллий қонунчилигига мувофиқ йўл солиқлари ва йиғимларни тўлайдилар.

2. Пуллик автомобиль йўллари, кўприклар ва туннеллар мавжуд бўлган ҳолларда, ташувчи муқобил бепул автомобиль йўллари бўйлаб ташишни амалга ошириш имконига эга бўлиши лозим.

3. Томонлар давлатларининг ваколатли органлари ўз ҳудудларида амал қилаётган пуллик автомобиль йўллари, кўприк ва туннеллар тўғрисидаги маълумотлар билан ўзаро алмашадилар.

1. Мазкур Битимга асосан ташувларни амалга оширишда бошқа Томон давлатининг ҳудудига олиб кириш вақтида қуйидагилар божхона божлари, солиқ ва йиғимлардан ўзаро озод қилинади:

а) ҳар бир автотранспорт воситаси модели учун ишлаб чиқарувчи заводда назарда тутилган, двигателнинг таъминот тизимига технологик ва конструктив жиҳатдан боғлиқ бўлган сиғимлардаги, шунингдек, ушбу иситиш ёки совитиш қурилмалари ишлаши учун мўлжалланган ишлаб чиқарувчи завод тарафидан тиркамаларда ва ярим тиркамаларда ўрнатилган сиғимлардаги ёқилғи;

б) ташиш давомида фойдаланиш учун зарур бўлган миқдордаги мойлаш материаллари;

в) халқаро ташишни амалга ошираётган носоз автотранспорт воситасини таъмирлаш учун мўлжалланган ва бошқа Томон давлатининг ҳудудига ишлатиш мақсади ишончли тасдиқланган ҳолда олиб кириладиган эҳтиёт қисмлар, агрегатлар ва асбоблар.

2. Фойдаланилмаган эҳтиёт қисмлар қайтариб олиб кетилиши, алмаштирилган эҳтиёт қисмлар эса давлат ҳудудидан олиб чиқилиши ёки тегишли Томон давлати қонунчилигига мувофиқ белгиланган тартибда бошқа божхона тартиб-таомилида расмийлаштирилиши лозим.

Ҳар бир Томон ўз давлатининг қонунчилигига мувофиқ чегара, божхона, санитария, ветеринария ҳамда фитосанитария назоратини, шунингдек, атроф-муҳит ва табиатни муҳофаза қилиш бўйича назоратни амалга оширади.

Томонлар давлатларининг ташувчилари ва автотранспорт воситалари экипажлари автотранспорт воситаси қайси давлат ҳудудида бўлса, ўша Томон давлатининг йўл ҳаракати қоидаларига ва қонунчилигига риоя қилишлари шарт.

Мазкур Битимга асосан йўловчилар ва юкларни ташиш автотранспорт воситалари эгаларининг учинчи шахсларга етказилган зарар учун фуқаролик жавобгарлигини мажбурий суғурталаш шарти билан амалга оширилади. Ташувчи кўрсатилган ташувларни амалга оширадиган ҳар бир автотранспорт воситасини Томонлар давлатларининг миллий қонунчилигига мувофиқ олдиндан суғурталаши шарт.

Ташувчи ёки унинг ҳайдовчилари тарафидан бошқа Томон давлатининг қонунчилиги ёки мазкур Битим қоидалари бузилган тақдирда, ушбу қоидабузарлик содир этилган ҳудуддаги Томон давлатининг ваколатли органи бошқа Томон давлатининг ваколатли органига хабар беради, у эса ўз давлатининг миллий қонунчилигида назарда тутилган зарур чораларни кўради. Томонлар давлатларининг ваколатли органлари кўрилган чоралар тўғрисида бир-бирларини хабардор қиладилар.

1. Мазкур Битим қоидаларининг талаб даражасида бажарилишини таъминлаш ва уни қўллаш муносабати билан юзага келадиган ва Томонлар давлатларининг ваколатли органлари ўртасида бевосита мулоқотлар орқали ҳал қилиб бўлмайдиган мунозарали масалаларни тезкор ҳал қилиш мақсадида Қўшма комиссия тузилади.

2. Иккала Томон давлатларининг ваколатли органлари вакилларидан ташкил топган Қўшма комиссия мажлиси Томонлардан бирининг мурожаатига биноан навбат билан Томонлар давлатлари ҳудудларида ўтказилади.

3. Томонлар Қўшма комиссия қарорларини бажариш мажбуриятини ўз зиммаларига оладилар.

4. Қўшма комиссия мазкур Битим моддаларига ўзгартириш ва қўшимчалар киритиш юзасидан тавсиялар бериши мумкин.

1. Мазкур Битим қоидаларини амалга ошириш учун қуйидагилар Томонларнинг ваколатли органлари ҳисобланади:

Озарбайжон Республикаси Ҳукумати номидан — Озарбайжон Республикаси Рақамли ривожланиш ва транспорт вазирлиги;

Ўзбекистон Республикаси Ҳукумати номидан — Ўзбекистон Республикаси Транспорт вазирлиги.

2. Томонлар давлатлари ваколатли органларининг расмий номи ва функциялари ўзгарган тақдирда, Томонлар бир-бирларига дипломатик каналлар орқали ўз вақтида хабар берадилар.

Мазкур Битим қоидаларини талқин қилиш ёки қўллашдан келиб чиқадиган низоли масалалар Томонлар ўртасида маслаҳатлашувлар ва музокаралар орқали ҳал қилинади.

Томонларнинг ўзаро келишувига кўра мазкур Битимга унинг ажралмас қисми ҳисобланган ва мазкур Битимнинг 22-моддасида назарда тутилган тартибда кучга кирадиган алоҳида баённомалар билан расмийлаштириладиган ўзгартириш ва қўшимчалар киритилиши мумкин.

Мазкур Битим Томонлар давлатлари иштирокчи ҳисобланган бошқа халқаро шартномалардан келиб чиқадиган ҳуқуқ ва мажбуриятларга дахл қилмайди.

1. Мазкур Битим унинг кучга кириши учун зарур бўлган давлат ички процедуралари Томонлар тарафидан бажарганлигини тасдиқловчи сўнгги ёзма хабарнома дипломатик каналлар орқали олинган санадан бошлаб ўттиз (30) кун ўтгандан сўнг кучга киради.

2. Мазкур Битим номуайян муддатга тузилади ва Томонлардан бири мазкур Битимнинг амал қилишини тугатиш нияти тўғрисида дипломатик каналлар орқали ёзма равишда хабардор қилган кундан бошлаб олти ой ўтгунга қадар амал қилади.

Тошкент шаҳрида 2022 йил 21 июнда, икки асл нусхада, ҳар бири ўзбек, озарбайжон ва рус тилларида тузилди, бунда барча матнлар бир хил кучга эга.

Мазкур Битим қоидаларини талқин қилишда келишмовчиликлар юзага келган ҳолларда, рус тилидаги матн устувор ҳисобланади.