Даволаш муассасаларининг моддий-техника базасини мустаҳкамлаш, соғлиқни сақлашни маблағ билан таъминлашга йўналтирилаётган бюджет маблағларидан янада оқилона фойдаланиш, турғун даволанишдаги фуқароларга тиббий хизмат кўрсатишни такомиллаштириш мақсадида Ўзбекистон Республикаси Вазирлар Маҳкамаси қарор қилади:

1. 1998 йил 1 январдан бошлаб турғун даволаш-профилактика муассасаларида даволанаётган кишилар учун овқатланиш (нонуштадан ташқари) тўлови жорий этилсин, 1 ва 2-иловаларда кўрсатилган касалликларнинг айрим турларига чалинган шахслар тўловдан озод қилинсин.

2. Белгилаб қўйилсинки, турғун даволаш-профилактика муассасаларида овқатланиш тўлови фуқароларнинг шахсий маблағлари, корхоналар, ташкилотлар, хайрия жамғармаларининг ва бошқа ҳомийларнинг маблағлари ҳисобига амалга оширилади.

Мулкчилик шаклларидан қатъи назар корхоналар, ташкилотлар ва муассасаларнинг раҳбарларига, меҳнат жамоалари билан келишилган ҳолда, турғун даволаш-профилактика муассасаларида овқатланиш тўловини уларнинг тасарруфида қоладиган фойда (бюджет муассасалари харажатлари сметаси бўйича тежамлар) ҳисобига амалга оширишга рухсат этилсин.

3. Турғун даволаш-профилактика муассасаларида овқатланишни ташкил қилиш ва унинг учун ҳақ тўлашнинг вақтинчалик тартиби 3-иловага мувофиқ тасдиқлансин.

Ўзбекистон Республикаси Соғлиқни сақлаш вазирлигига, жойлардаги соғлиқни сақлаш органларига ва даволаш-профилактика муассасалари раҳбарларига даволаш-профилактика муассасаларида овқатланишнинг врачлар тавсияларига ҳамда санитария-гигиена нормаларига мувофиқ ташкил этилиши учун жавобгарлик юклансин.

4. Ўзбекистон Республикаси Соғлиқни сақлаш вазирлиги:

манфаатдор вазирликлар, идоралар ҳамда вилоятлар, шаҳарлар ва туманлар ҳокимликлари билан биргаликда турғун даволаш-профилактика муассасаларида даволанаётган фуқаролар учун, касалхоналарнинг озиқ-овқат блоклари мавжуд базасидан самарали фойдаланиш асосида, сифатли шифобахш овқатланишни ташкил қилсин. Зарурат бўлганда турғун даволаш-профилактика муассасаларида беморларни врачлар тавсияларига, санитария нормаларига мувофиқ овқатлантиришни ташкил этиш юзасидан, тайёрланаётган шифобахш овқатлар сифати учун томонларнинг жавобгарлигини белгилаган ҳолда, даволаш-профилактика муассасалари билан ихтисослаштирилган корхоналар ўртасида шартномалар тузилишини бир ой муддатда таъминласин;

5. Ўзбекистон Республикаси Молия вазирлиги, Соғлиқни сақлаш вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари:

турғун даволаш-профилактика муассасаларида беморларнинг айрим тоифалари учун овқатланиш тўлови жорий этилиши, шунингдек аҳолини дори-дармонлар билан таъминлашнинг тартибга солиниши муносабати билан бўшайдиган бюджет маблағларидан даволаш муассасаларини замонавий тиббий техника, асбоб-ускуналар, махсус автотранспорт билан жиҳозлаш, шунингдек касалликларнинг олдини олиш ишларини кучайтириш мақсадида соғлиқни сақлашнинг бошланғич бўғинларини ривожлантириш учун мақсадли фойдалансинлар;

кўрсатиб ўтилган маблағлардан мақсадли фойдаланилиши тўғрисида ҳар йили Вазирлар Маҳкамасига ахборот берсинлар.

6. Ўзбекистон Республикаси Молия вазирлиги ва Соғлиқни сақлаш вазирлиги:

касалхона муассасалари кассасига овқатланиш тўлови сифатидаги нақд тушумни қабул қилиб олиш ва назорат қилиш ҳамда уни инкассация қилишнинг Марказий банк билан келишилган тартибини;

турғун даволаш-профилактика муассасаларида беморларга бериладиган, уларнинг овқатни олишга ҳуқуқини тасдиқловчи талонларни чиқариш, ҳисобга олиш ва назорат қилиш тартибини бир ой муддатда ишлаб чиқсинлар ва тасдиқласинлар.

7. Ўзбекистон Республикаси Молия вазирлиги:

турғун даволаш-профилактика муассасаларида овқатланишни ташкил қилиш ва унинг учун ҳақ тўлашнинг янги тартиби жорий этилиши муносабати билан Соғлиқни сақлаш вазирлиги учун ўз айланма маблағлари нормативини кўпайтириш юзасидан икки ҳафта муддатда таклифлар киритсин;

турғун даволаш-профилактика муассасалари томонидан зарур озиқ-овқат маҳсулотларини ўз вақтида сотиб олиш мақсадида ҳар йили ушбу муассасаларни белгиланган нормативлардан келиб чиққан ҳолда зарур айланма маблағлар билан таъминлашни назарда тутсин.

8. Овқатланиш учун ҳақ тўлаш тизимидан қатъи назар, даволаш муассасаларида давлат томонидан таъминланадиган муассасалар учун назарда тутилган озиқ-овқат маҳсулотлари билан таъминлаш манбалари сақлаб қолинсин.

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари хизмат кўрсатиладиган контингентларнинг овқатланишини ташкил этишда турғун даволаш-профилактика муассасаларига ёрдам кўрсатсинлар.

9. Ўзбекистон Республикаси Соғлиқни сақлаш вазирлиги:

диспансерлар ва қишлоқ участка касалхоналари тармоқларини ушбу турдаги кам қувватли муассасаларни қайта ташкил қилиш ва тугатиш ҳисобига тартибга солиш юзасидан 1998 йил 1 январгача Вазирлар Маҳкамасига таклифлар киритсин;

Молия вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда маблағ билан таъминлашни стационар ёрдам кўрсатишдан амбулатория-поликлиникада ёрдам кўрсатишга устуворлик берган ҳолда ўзгартирсин;

амбулатория-поликлиника муассасалари ҳузурида беморларга ҳамширалар хизмат кўрсатадиган касалхоналар ва уйдаги шифохоналарни ривожлантириш чора-тадбирларини кўрсин.

10. Аҳолига тиббий хизмат кўрсатишни янада такомиллаштириш ва пулли тиббий хизматлар кўрсатиш тизимини амалиётга жорий қилиш, бунда тиббий хизмат кўрсатиш сифатини мувофиқ ҳолда ошириш, кўрсатиладиган тиббий хизматлар тури ва шаклларини кенгайтиришни назарда тутиш Ўзбекистон Республикаси Соғлиқни сақлаш вазирлиги, Қорақалпоғистон Республикаси Вазирлар Кенгаши, вилоятлар, шаҳарлар ва туманлар ҳокимликларининг муҳим вазифаси ҳисоблансин.

Соғлиқни сақлаш вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари стоматология, физиотерапия (даволаш ва саломатликни тиклаш), врачлик-жисмоний тарбия тиббиёт муассасаларининг, шунингдек мустақил диагностика марказларининг мулкчилик шаклларини ўзгартириш тўғрисида икки ой муддатда Вазирлар Маҳкамасига таклифлар киритсинлар.

11. Ўзбекистон Республикаси Вазирлар Маҳкамасининг «Аҳолини дори-дармонлар билан таъминлашга доир қўшимча чора-тадбирлар тўғрисида» 1993 йил 8 январдаги 15-сон қарорининг 2-банди ўз кучини йўқотган деб ҳисоблансин.

12. Мазкур қарорнинг бажарилишини назорат қилиш Бош вазир ўринбосарлари А.А. Азизхўжаев ва Б.С. Ҳамидов зиммасига юклансин.

1. Онкологик касалликлар

2. Сил касаллиги

3. Руҳий касалликлар

4. Ихтисослаштирилган муассасаларда гиёҳвандлик

5. Мохов касаллиги

6. Нурланиш касаллигига чалинган беморлар

7. Юқумли касалликлар

8. Сифилис

9. ОИВ касаллигини юқтирганлар (ОИТС)

10. Шошилинч тиббий ёрдам кўрсатиш чоғида беморларнинг шифохонада бўлиши чекланган муддатларининг тасдиқланган стандартлари бўйича реанимация тадбирларини ва интенсив терапияни талаб этувчи ҳолатлар

11. Даражасидан қатъи назар камқонлик касаллигига чалинган ҳомиладор аёллар ва туққан аёллар

12. Эндокринологик касалликлар.

1. Болаликдан ногиронлар

2. Ғирт етимлар

3. I ва II гуруҳ ногиронлари

4. 1941—1945 йиллардаги уруш ногиронлари ва қатнашчилари, шунингдек уларга тенглаштирилган шахслар

5. Бандликка кўмаклашиш ва аҳолини ижтимоий муҳофаза қилиш марказларида ҳисобда турувчи ёлғиз пенсионерлар

6. 1941—1945 йиллардаги уруш йиллари меҳнат фронти қатнашчилари

7. Чернобиль АЭСидаги ҳалокат оқибатларини тугатишда қатнашган — ногирон шахслар

8. Байналмилалчи жангчилар

9. 17 ёшгача бўлган болалар ва ўсмирлар

10. Мудофаа ишлари бўлимларининг йўлланмалари бўйича 18—27 ёшли чақириқ ёшидагилар.

11. «Ўзбекистон Республикаси фахрий донори» («Почетный донор Республики Узбекистан») кўкрак нишони билан мукофотланган шахслар.

1.1 Мазкур Вақтинчалик тартиб (кейинги ўринларда — Тартиб) турғун даволаш-профилактика муассасаларида даволанаётган контингентнинг овқатланиши учун ҳақ тўлаш жорий қилиниши муносабати билан Вазирлар Маҳкамасининг «Даволаш-профилактика муассасаларини маблағ билан таъминлаш тизимини такомиллаштириш тўғрисида» 1997 йил 2 декабрдаги 532-сон қарорига мувофиқ жорий этилади.

1.2. Овқатланиш тўлови (нонушталардан ташқари) фуқароларнинг шахсий маблағлари, шунингдек, корхоналар, Ташкилотлар, жамғармалар ва бошқа ҳомийлар маблағлари ҳисобига амалга оширилади.

1.3. Мазкур тартиб турғун даволаш-профилактика муассасаларида даволанаётган барча контингентга жорий этилади, овқатланиш тўлови ҳукумат қарорига мувофиқ давлат бюджети маблағлари ҳисобига амалга ошириладиган аҳоли тоифалари ва айрим касалликларга чалинган шахслар бундан мустасно.

Кўрсатиб ўтилган тартиб беморлар контингенти имтиёзлилар тоифасига тўлиқ кирадиган даволаш-профилактика муассасаларига жорий этилмайди.

1.4. Мазкур тартибга мувофиқ ҳақ касалхона муассасалари ёки даволаш-профилактика муассасалари буюртманомаларига кўра хизматлар кўрсатувчи бошқа корхоналар томонидан фақат таомлар тайёрлаш учун сарфланган озиқ-овқат маҳсулотлари қиймати учун тўланади. Таомлар тайёрлаш учун асбоб-ускуналар сотиб олиш ва улардан фойдаланиш билан боғлиқ бошқа харажатлар, озиқ-овқат блоклари биноларини сақлаш, таомлар тайёрлаш билан банд бўлган ходимлар меҳнатига ҳақ тўлаш харажатлари ва бошқалар давлат бюджети маблағлари ҳисобига қопланади.

2.1. Турғун даволаш-профилактика муассасаларидаги беморларни овқатлантириш Ўзбекистон Республикаси Соғлиқни сақлаш вазирлигининг «Ўзбекистон Республикаси даволаш-профилактика муассасаларида шифобахш овқатланишни ташкил этиш тўғрисида» 1993 йил 19 мартдаги 122-сон буйруғига мувофиқ мавжуд озиқ-овқат блоклари негизида ташкил этилади.

2.2. Даволаш-профилактика муассасаларининг бош шифокорлари овқатлантиришни ташкил этиш учун шахсан жавоб берадилар.

2.3. Даволаш-профилактика муассасаси таом тайёрлаш учун шартномавий шартларда бошқа ихтисослаштирилган корхоналарни жалб этиши мумкин. Бундай ҳолларда даволаш-профилактика муассасалари буюртмачи ҳисобланади ва шифобахш овқатланишни ташкил этиш учун беморлар олдида жавоб берадилар.

2.4. Беморнинг шифобахш овқати кимёвий таркиби ва қувватлилиги жиҳатидан беморга ёзиб берилган парҳез талабларига мувофиқ бўлиши керак. Овқатни тайёрлаш белгиланган санитария меъёрларига тўлиқ мувофиқ бўлиши керак.

2.5. Бемор ўз хоҳишига кўра даволаш-профилактика муассасаси тавсия этаётган овқатни тўлиқ ёки қисман рад этиши мумкин. Бундай холларда уни овқатлантириш қариндош-уруғлари ёки яқин кишилари томонидан, шифокор ёзиб берган парҳезга риоя қилинишини ҳисобга олган ҳолда, ташкил этилади. Овқатланиш тўлови учун фойдаланилмаган маблағлар даволаш-профилактика муассасалари томонидан тўловчига қайтарилади.

2.6. Ихтисослаштирилган корхоналар билан шартномавий шартларда овқатлантириш ташкил этилганда даволаш-профилактика муассасаси таомнома ва буюртма қилинадиган таомларга ҳар ҳафталик буюртманома тақдим этади. Шартнома шартларига кўра буюртма берилаётган таомлар миқдори ҳар куни аниқлаштирилиши мумкин.

3.1. Бемор режа бўйича касалхонага ётқизилганда овқатланиш тўлови, бемор томонидан даволаш-профилактика муассасасига жойлаштирилгунга қадар, у ерда бўлиши режалаштирилаётган барча муддат учун тўлиқ ёки қисман, лекин белгиланган энг кам ойлик иш ҳақидан кам бўлмаган миқдорда тўланади.

Бемор режа бўйича касалхонага ётқизилганда у овқатланиш учун ҳақ тўланганлигини тасдиқловчи ҳужжат ёхуд даволаш-профилактика муассасаси томонидан бериладиган овқатни рад этиш ҳақида ариза тақдим этиши керак.

Даволаш-профилактика муассасасида пулли овқатланишни дастлаб рад этган бемор, буюртириладиган давр учун олдиндан ҳақ тўлаган ҳолда, овқатланиш учун хоҳлаган пайтда буюртма бериши мумкин.

Овқатланиш учун олдиндан қисман ҳақ тўланганда тўлиқ ҳисоб-китоб бемор касалхонадан чиққунга қадар амалга оширилади.

Тасдиқланган стандартларга мувофиқ беморлар шифохонада бўлишининг чекланган муддатларига биноан шошилинч тиббий ёрдам кўрсатилишини талаб этувчи ҳолатлар бекор қилинганда даволанишни давом эттираётган шахсларнинг овқатланиши учун ҳақ тўлаш белгиланган тартибда амалга оширилади.

3.3. Даволаш-профилактика муассасасида овқатга ҳақ тўланмаган, тўлиқ тўланмаган ёки овқатланиш учун ҳақ тўлашдан озод қилиш тўғрисидаги ҳужжатлар тақдим этилмаган барча ҳолларда бемор касалхонадан чиққандан сўнг берилиши лозим бўлган касаллик варақалари беморнинг иш жойига ёки ижтимоий суғурта органларига юқорида санаб ўтилган беморларга овқатлантириш учун амалда сарф қилинган харажатларни тўлиқ тўлаш учун юборилади.

3.4. Овқатланиш тўлови учун маблағларни қабул қилиш учун даволаш-профилактика муассасалари ўзларига хизмат кўрсатувчи банкда алоҳида депозит счёти очадилар. Кўрсатилган счётга беморларнинг овқатланиши учун тўлов сифатида уларнинг шахсий маблағларидан тушувчи барча маблағлар, шунингдек, уларнинг овқатланиш ҳақини тўлаган корхоналар ва ташкилотларнинг маблағлари келиб тушади. Кўрсатиб ўтилган счётга имтиёзларга эга бўлган контингентларнинг овқатланиши учун тўлашга мўлжалланган бюджет маблағлари ўтказилади.

3.5. Овқатлантириш даволаш-профилактика муассасаларининг озиқ-овқат блоки орқали ташкил этилган тақдирда, овқатланиш учун ҳақ нақд пул билан тўланганда — у бевосита даволаш-профилактика муассасаси кассасига ва ҳақ пул ўтказиш йўли билан тўланганда — тақдим этилган счётлар бўйича алоҳида депозит счётига тўланади. Овқатланиш ҳақини тўлаган шахсларга ҳар бир тўловдан сўнг дарҳол амалда тўланган тўлов миқдорини тасдиқловчи ҳужжатлар берилади. Даволаш-профилактика муассасаси томонидан пул маблағларини қабул қилиб олиш ва топшириш Ўзбекистон Республикаси Марказий банки томонидан тасдиқланган Халқ хўжалигида касса операцияларини юритиш тартибига мувофиқ амалга оширилади. Ушбу тартибга риоя этилишини назорат қилиш Ўзбекистон Республикаси Молия вазирлигига юкланади.

3.6. Овқатлантириш даволаш-профилактика муассасаси томонидан ташкил этиладиган барча беморларга ҳар куни уларнинг овқатланиши ҳуқуқини тасдиқловчи талонлар берилади. Талонлар овқатнинг ҳар бир тури (тушлик, иккинчи тушлик, кечки овқат) учун берилади, уларда тиббий муассасанинг муҳри бўлади ҳамда улар даволаш-профилактика муассасаси ёки таомлар тайёрлаш учун жалб қилинган ихтисослаштирилган корхона учун молиявий ҳисобот ҳужжати ҳисобланади.

4.1. Пулли асосда овқатлантиришни ташкил этиш учун барча даволаш-профилактика муассасаларига бюджетдан белгиланган нормативларга мувофиқ бир йилга ҳисобланган айланма маблағлар ажратилади.

4.2. Имтиёзларга эга бўлган контингентларни овқатлантиришни маблағ билан таъминлаш учун бюджет маблағлари илгари белгиланган тартибда ажратилади.

4.3. Даволаш-профилактика муассасаларини озиқ-овқат маҳсулотлари билан таъминлаш давлат томонидан таъминланадиган муассасалар учун назарда тутилган тартибда амалга оширилади.