Энергетика соҳасига тўғридан-тўғри хорижий инвестицияларни давлат-хусусий шериклик шартлари асосида кенг жалб қилиш орқали қайта тикланувчи энергия манбаларидан электр энергияси ишлаб чиқаришни ривожлантириш, шунингдек, аҳолини ва иқтисодиёт тармоқларини энергия ресурслари билан барқарор таъминлаш мақсадида:

1. Европа тикланиш ва тараққиёт банки (кейинги ўринларда — ЕТТБ) кўмагида «Давлат-хусусий шериклик тўғрисида»ги Ўзбекистон Республикаси Қонуни асосида «Қорақалпоғистон Республикаси Қораўзак туманида қуввати 100 МВт бўлган шамол электр станциясини давлат-хусусий шериклик шартлари асосида қуриш ва бошқариш» лойиҳасини (кейинги ўринларда — Лойиҳа) молиялаштириш, лойиҳалаштириш, қуриш, ишга тушириш ва синовдан ўтказиш, унга эгалик қилиш, техник хизмат кўрсатиш ва ундан фойдаланиш, ишлаб чиқарилган электр энергиясини етказиб бериш (сотиш), шунингдек, шамол электр станциясини ягона электр энергетика тизимига улаш учун қуриладиган ҳаво электр узатиш тармоқлари ва бошқа электр иншоотларини барпо этиш бўйича халқаро тендер натижаларига кўра:

а) «ACWA POWER-Saudi Listed Joint Stock Company» (Саудия Арабистони) компанияси тендер ғолиби (кейинги ўринларда — тендер ғолиби) деб топилганлиги;

б) тендер ғолиби томонидан Лойиҳани амалга ошириш учун хусусий шерик сифатида Ўзбекистон Республикасида «ACWA Power Wind Karatau» МЧЖ ХК (кейинги ўринларда — лойиҳа компанияси) таъсис этилганлиги;

в) Ўзбекистон Республикаси Ҳукумати номидан Молия вазирлиги, тендер ғолиби ва лойиҳа компанияси ўртасида 2021 йил 17 декабрда Давлат томонидан қўллаб-қувватлаш тўғрисидаги битим тузилганлиги ҳамда унга мувофиқ:

тендер ғолиби ушбу битим бўйича ўз ҳуқуқ ва мажбуриятларидан лойиҳа компанияси фойдасига воз кечиши;

Лойиҳани амалга оширишнинг бутун даври мобайнида Қорақалпоғистон Республикаси Қораўзак туманида қуввати 100 МВт бўлган шамол электр станциясини лойиҳа компанияси лойиҳалаштириши, молиялаштириши, қуриши ва эксплуатация қилиши;

Лойиҳани амалга ошириш учун лойиҳа компанияси юзага келиши мумкин бўлган хавф-хатарларни зиммасига олган ҳолда, ўз маблағлари ҳисобидан 40,1 млн АҚШ доллари ва халқаро молия институтларидан олинадиган қарз ҳисобидан 67,7 млн АҚШ доллари миқдорида тўғридан-тўғри хорижий инвестицияларни жалб этиши белгиланганлиги;

г) «Ўзбекистон миллий электр тармоқлари» АЖ (кейинги ўринларда — давлат шериги) ва лойиҳа компанияси ўртасида 2021 йил 17 декабрда Электр энергиясини сотиб олиш тўғрисида тузилган битимга мувофиқ лойиҳа компанияси:

қурилиш давридаги ўз мажбуриятлари лозим даражада бажарилишининг таъминоти сифатида 20 млн АҚШ доллари миқдорида биринчи даражали хорижий банк кафолатини тақдим этиши;

ишлаб чиқарилган электр энергиясини давлат шеригига кафолатланган тарзда сотиши;

Лойиҳа доирасида шамол электр станциясини ягона электр энергияси тармоғига улаш учун қуриладиган ҳаво электр узатиш тармоқлари, оширувчи подстанция ва ўчириб-ёқиш пунктини қуриш ҳамда ишга туширилгандан сўнг уларни давлат шеригига топшириш мажбуриятини ўз зиммасига олганлиги маълумот учун қабул қилинсин.

2. Молия вазирлиги, тендер ғолиби ва лойиҳа компанияси ўртасида 2021 йил 17 декабрда имзоланган Давлат томонидан қўллаб-қувватлаш тўғрисидаги битим тасдиқлансин ва битим ушбу қарор эълон қилинган кундан эътиборан кучга кирган деб ҳисоблансин.

3. Электр энергиясини сотиб олиш тўғрисидаги битим шартларига мувофиқ, Лойиҳанинг амал қилиш муддати давомида электр энергияси АҚШ долларида деноминация қилинган ва миллий валютада тўланадиган қатъий тариф (1 киловатт-соат электр энергияси учун 2,5695 АҚШ центи) бўйича сотиб олиниши белгилаб қўйилсин.

4. Қорақалпоғистон Республикаси Вазирлар Кенгаши бир ой муддатда Давлат томонидан қўллаб-қувватлаш тўғрисидаги битим ва Электр энергиясини сотиб олиш тўғрисидаги битимда кўрсатилган шартларга мос келадиган ер участкасининг ҳамда шамол электр станцияси фаолиятини таъминлашга хизмат қилувчи ҳаво электр узатиш тармоқлари ва электр инфратузилмаси қурилмалари учун зарур бўлган ер майдонлари эгаллайдиган ер координаталаридан келиб чиқиб, уларнинг Энергетика вазирлигига доимий фойдаланиш ҳуқуқи билан ажратилишини таъминласин.

Энергетика вазирлиги мазкур бандга асосан:

шамол электр станцияси қурилиши учун ажратилган ер участкасининг Лойиҳани амалга ошириш муддатига тенг даврга лойиҳа компаниясига;

ҳаво электр узатиш тармоқларини ва электр инфратузилмаси қурилмаларини қуриш учун ажратилган ер участкасининг давлат шеригига ижарага берилишини таъминласин.

Ерни ижарага олиш ҳуқуқи учун ҳақ тўлаш ерга нисбатан амал қилувчи ва лойиҳа компанияси томонидан тўланадиган ижара тўловлари кўринишида ифодаланиши белгилансин.

Бунда, лойиҳа компанияси Лойиҳани амалга ошириш доирасида қишлоқ хўжалигига мўлжалланган ерлардан фойдаланганлик учун қишлоқ хўжалиги ишлаб чиқариши нобудгарчилиги ўрнини қоплашдан (компенсация тўловларидан) озод қилинсин.

5. Давлат шеригига лойиҳани амалга ошириш учун лойиҳа компанияси билан биргаликда Электр энергиясини сотиб олиш тўғрисидаги битимда белгиланган тартибга мувофиқ халқаро мустақил инжиниринг компанияларини жалб қилишга рухсат берилсин.

6. Ўзбекистон Республикаси қонунчилигига мувофиқ, лойиҳа компаниясига барча солиқларни тўлаган тақдирда, Лойиҳани амалга ошириш учун қуйидагиларга рухсат берилсин:

кредитлаш, хорижий валютадаги маблағларни олиш ва улардан фойдаланиш (шу жумладан, хорижий валютада кредит маблағлари тушумлари) учун Ўзбекистон Республикасидан ташқарида нуфузли хорижий банкларда белгиланган тартибда банк ҳисобварақларини очиш ва юритиш;

халқаро молия институтларидан жалб қилинган кредитларни қайтариш учун Ўзбекистон Республикасидаги ҳисобварақларидан маблағларни Ўзбекистон Республикасидан ташқарида юритиладиган ҳисобварақларига ўтказиш;

ҳар бир ҳолатда халқаро молия институтларининг талабларига мувофиқ ва ўтказилган маблағлар ҳисобидан Ўзбекистон Республикасидан ташқаридаги хорижий пудратчи, етказиб берувчи ва кредиторларга тўловларни Ўзбекистон Республикасидаги банк ҳисобварақлари орқали ўтказмасдан тўғридан-тўғри лойиҳа компаниясининг хориждаги банк ҳисобварағидан амалга ошириш;

учувчисиз учиш аппаратларини (дрон) харид қилиш ва белгиланган тартибда улар орқали қурилиш ишларининг мониторингини олиб бориш.

7. Адлия вазирлиги Лойиҳани амалга ошириш доирасида Давлат томонидан қўллаб-қувватлаш тўғрисидаги битим ва унинг қоидаларига мувофиқ имзоланган битимлар юзасидан юридик хулосалар берсин.

8. Лойиҳа компаниясининг буюртманомасига биноан Лойиҳани амалга ошириш доирасида:

Ташқи ишлар вазирлиги — жалб қилинадиган хорижий мутахассислар учун кириш визалари, зарур ҳолларда, Ислом Каримов номидаги «Тошкент» халқаро аэропортида белгиланган тартибда расмийлаштирилишини;

Ички ишлар вазирлиги — жалб қилинадиган пудрат ташкилотларининг хорижий мутахассислари ҳамда уларнинг оила аъзоларига кўп марталик виза берилиши ва муддати узайтирилишини, шунингдек, турган жойи бўйича рўйхатдан ўтказилиши ва унинг муддати узайтирилишини;

Камбағалликни қисқартириш ва бандлик вазирлиги — хорижий фуқароларга Ўзбекистон Республикаси ҳудудида меҳнат фаолияти билан шуғулланиш ҳуқуқини берувчи тасдиқномалар берилишини (муддати узайтирилишини) таъминласин.

9. Қуйидагиларга:

Молия вазирлигига Ўзбекистон Республикаси Ҳукумати номидан ЕТТБ билан Давлат томонидан қўллаб-қувватлаш тўғрисидаги ва Электр энергиясини сотиб олиш тўғрисидаги битимларга асосан мажбуриятларни қўллаб-қувватлаш учун мўлжалланган, Лойиҳа юзасидан ЕТТБнинг кафолатланган аккредитивига мувофиқ шакли ва мазмуни бўйича тегишли равишда томонларни қониқтирадиган суверен компенсация кафолати шартномасини тузиш;

Молия вазирлиги, давлат шериги ва Қорақалпоғистон Республикаси Вазирлар Кенгашига лойиҳа компанияси ва Лойиҳани молиялаштиришда иштирок этадиган кредиторлар билан Лойиҳани амалга ошириш доирасида имзоланган битимлар бўйича мажбуриятлар лойиҳа компанияси томонидан бажарилмаган тақдирда лойиҳа компанияси ҳуқуқларини кредиторларга бериш юзасидан битимлар тузиш ҳуқуқи берилсин.

10. Мазкур қарорнинг ижросини самарали ташкил қилишга масъул ва шахсий жавобгар этиб энергетика вазири А.С. Султанов ва молия вазири Т.А. Ишметов белгилансин.

Қарор ижросини назорат қилиш ва ижро учун масъул идоралар фаолиятини мувофиқлаштириш Ўзбекистон Республикасининг Бош вазири А.Н. Арипов зиммасига юклансин.