Ўзбекистон Республикаси ва Испания Қироллиги, кейинги ўринларда «Томонлар» деб аталувчилар,

халқаро жиноятчилик давлатларнинг ривожланишига ва хавфсизлигига жиддий таҳдид солишини англаган ҳолда,

жиноятчиликка, айниқса, унинг уюшган шаклларига қарши курашда ҳамкорликни ривожлантириш ва чуқурлаштириш муҳимлигини инобатга олиб,

жиноятчиликка қарши кураш соҳасида халқаро ҳамкорликка катта эътибор қаратган ҳолда умумэътироф этилган инсон ҳуқуқлари ва эркинликларига лозим даражада риоя этиш билан ушбу соҳада имкон қадар кенгроқ ва самарали ҳамкорлик қилиш истагини билдириб,

тенглик, ўзаролик ва ўзаро ёрдам кўрсатиш тамойилларига таянган ҳолда,

қуйидагилар тўғрисида келишиб олдилар:

1. Томонлар ўз миллий қонунчиликлари ва ушбу Битим қоидаларига мувофиқ, ўз ваколатли органлари орқали жиноятчиликка, айниқса унинг уюшган шаклларига қарши курашда ҳамкорлик қиладилар.

2. Томонларнинг ваколатли органлари ушбу Битимни амалга оширишда бир-бирлари билан бевосита ҳамкорлик қиладилар.

1. Томонлар қуйидаги жиноятларга қарши курашда ҳамкорлик қиладилар:

а) терроризм, уни қўллаб-қувватлаш ва молиялаштириш;

б) ҳаётга ва соғлиққа қарши жиноятлар;

в) одам савдоси, инсон органлари ва тўқималари савдоси ҳамда ноқонуний миграция;

г) гиёҳванд воситалар, психотроп моддалар ва прекурсорларининг ноқонуний муомалада бўлиши;

д) қуроллар, ўқ-дорилар, портловчи моддалар ҳамда бошқа хавфли моддалар, икки хил мақсадда ишлатилиши мумкин бўлган товарлар ва технологияларнинг ноқонуний муомалада бўлиши ҳамда ноқонуний савдоси;

е) радиоактив моддалар, биологик ва ядровий материалларни ўғирлаш, уларнинг ноқонуний муомалада бўлиши ҳамда ноқонуний савдоси. Улардан белгиланмаган мақсадда фойдаланиш, улар билан таҳдид қилиш ёки улардан лозим даражада фойдаланмаслик;

ж) ноқонуний молиявий операциялар, иқтисодий ва солиққа оид жиноятлар ҳамда жиноий фаолият йўли билан олинган фойдаларни легаллаштириш;

з) давлат хизмати соҳасидаги коррупция;

и) валюта, қимматли қоғозлар, чеклар ва бошқа тўлов воситаларини, шахсни тасдиқловчи ва йўл ҳужжатларини қалбакилаштириш (босиб чиқариш ёки ўзгартириш) ҳамда улардан ноқонуний фойдаланиш;

к) жинсий эркинликка қарши, жумладан вояга етмаганларнинг жинсий эркинлигига қарши жиноятлар. Вояга етмаганларнинг шаҳвоний тасвирларини ишлаб чиқариш, тарқатиш, тақдим этиш ҳамда ёш болалар порнографиясини ҳосил қилувчи ёки ўзида сақловчи материаллар билан боғлиқ исталган фаолият;

л) мулкка қарши жиноятлар, шу жумладан тарихий қадр-қимматга эга бўлган ва санъат асарлари ҳисобланган маданий бойликларни ўғирлаш ва уларнинг ноқонуний муомалада бўлиши;

м) автотранспорт воситаларини ўғирлаш, уларнинг ноқонуний муомалада бўлиши ва савдоси, ҳужжатларни сохталаштириш ҳамда сохта ҳужжатлардан фойдаланиш, шунингдек улар билан боғлиқ бошқа ноқонуний операциялар;

н) ахборот технологиялари соҳасидаги жиноятлар;

о) маданий ва тарихий бойликларга алоқадор буюмлар, санъат асарлари, қимматбаҳо тошлар ва металлар, интеллектуал мулк, шунингдек бошқа бойликларнинг ноқонуний муомалада бўлиши.

1. Томонлар қуйидаги шаклларда ҳамкорликни амалга оширадилар:

а) жиноятларни фош этиш, олдини олиш, шунингдек ушбу Битимнинг 2-моддасига мувофиқ бошқа масалаларни ҳал этишга ёрдам бериши мумкин бўлган маълумотлар билан алмашиш;

б) шахслар, ташкилот, муассаса ва корхоналар фаолиятини ҳамда товарлар ва ҳужжатларни текшириш орқали ушбу Битимнинг 2-моддасида кўзда тутилган жиноятларни фош этишда кўмаклашиш;

в) шахсларни идентификация қилиш ва мурдаларни таниб олишда кўмаклашиш;

г) гиёҳванд воситалар, психотроп моддалар ва уларнинг прекурсорларини назорат остида етказиб бериш соҳасида ҳамкорлик қилиш;

д) семинарлар, ўқув курслари ва маслаҳатлашувларни ташкил қилиш йўли билан тажриба ва мутахассислар билан алмашиш;

е) техникавий ва илмий-методик ёрдам кўрсатиш ҳамда ихтисослаштирилган жиҳозлар ҳақида маълумотлар алмашиш;

ж) контрабанда, айниқса гиёҳванд воситалар, психотроп моддалар ва прекурсорлар контрабандасининг олдини олиш мақсадида чегара ва божхона назоратини мустаҳкамлаш бўйича зарур ҳуқуқий, маъмурий ва муҳофаза чораларини кўриш.

2. Томонлар ушбу Битим доирасида ўзаро келишув асосида Битимнинг мақсадларига мос келиши шарти билан бошқа соҳаларда ҳамкорлик қилишлари мумкин.

3. Ушбу Битим доирасидаги ҳамкорлик ҳар қандай ҳолда ҳам жиноят ишлари бўйича ҳуқуқий ёрдам кўрсатиш ва суд ёрдамини таъминлаш ёки Европа ҳибсга олиш ордери предмети ҳисобланадиган ҳуқуқбузарларни ушлаб бериш ёки топшириш масалаларини ўз ичига олмаслиги лозим.

4. Ҳамкорлик ҳажми ва муайян шакллари ваколатли органларнинг келишувига кўра эҳтиёж ва шароитларни, шунингдек бошқа ҳолатларни ҳисобга олган ҳолда белгиланади.

Ушбу Битимнинг 3-модда 1-қисми «а» бандида кўзда тутилган маълумотларни алмашиш шу жумладан қуйидаги жиноятларга дахл қилади:

а) бир Томон ҳудудида жиноий гуруҳлар тарафидан тайёрланаётган ёки содир этилган жиноятлар, агар бошқа Томон фуқаролари бундай фаолиятга жалб этилган бўлса;

б) гиёҳванд воситалар, психотроп моддалар ва прекурсорларининг ноқонуний муомалада бўлиши;

в) жиноий фаолиятдан олинган фойдаларни легаллаштириш билан боғлиқ жиноятлар, агар бундай фаолият Томонлардан бирининг ҳудудида амалга оширилса.

Томонлар, шунингдек, қуйидагилар тўғрисида маълумот алмашадилар:

а) жиноятларни содир этиш усуллари ва методлари, уюшган гуруҳлар ва ташкилотларнинг таркиби, тузилиши, фаолият соҳаси ва жиноий алоқалари;

б) гиёҳванд воситалар, психотроп моддалар ва прекурсорларининг ноқонуний муомалада бўлиш усулларини яшириш мақсадида фойдаланиладиган маршрутларни ошкор қилиш тизими, гиёҳванд воситалар, психотроп моддалар ва прекурсорларининг янги тенденциялари;

в) террорчилик гуруҳларини молиялаштириш ва технологиялардан фойдаланиш усуллари, таркиби ва тузилиши;

г) ушбу Битимнинг 2-моддасида назарда тутилган жиноятларни содир этганликда гумон қилинувчи Томонлардан бирининг ҳудудида доимий ёки вақтинчалик яшайдиган бошқа Томон фуқаролари.

1. Ушбу Битим доирасида кўзда тутилган маълумот алмашинуви ва тадбирлар ўтказиш ҳақидаги сўровлар бевосита Томонларнинг ваколатли органларига дипломатик каналлар орқали ёки Интерпол миллий бюроси орқали ёзма равишда юборилиши лозим.

Сўров уни юбораётган ваколатли органнинг мансабдор шахси томонидан имзоланади ва гербли муҳри билан тасдиқланади. Шошилинч ҳолларда, ваколатли орган батафсил маълумотни ҳар қандай хавфсиз алоқа каналлари орқали оғзаки равишда тақдим этиши сўнгра уни ёзма шаклда тасдиқлаши мумкин.

2. Маълумотлар бўйича ҳар қандай сўров ушбу Битимга мувофиқ уни асословчи сабаб ва қисқа тавсифдан иборат бўлиши лозим.

3. Ушбу моддада назарда тутилган ёрдам кўрсатиш ҳақидаги сўров сўралаётган Томоннинг миллий қонунчилиги асосида, шунингдек, ушбу Томоннинг қонунчилигига зид келмаган тақдирда сўровда қайд этилган тартибларга мувофиқ амалга оширилади. Агар сўровда назарда тутилган ҳаракатларни амалга ошириш бундай сўровни олган органнинг ваколатига кирмаса, мазкур орган сўровни ўз давлатининг тегишли ваколатли органига тақдим этади ва бу ҳақда сўровни юборган Томонни хабардор қилади.

4. Ваколатли органлар, башарти маълумотлар бошқа Томон учун қизиқиш уйғотиш мумкин деб ҳисоблаш учун асос мавжуд бўлса, ўз тергов жараёнига зарар етказмаган ҳолда, олдиндан олинган сўровларсиз ўз ташаббуслари билан ушбу Битим доирасида тегишли маълумотларни юборишлари мумкин.

5. Сўровларни бажариш қисқа муддатлар ичида амалга оширилиши лозим. Зарур ҳолларда, ваколатли органлар мазкур сўровнинг бажарилишини енгиллаштирадиган қўшимча маълумотлар талаб қилишлари мумкин.

1. Ёрдам кўрсатиш ҳақидаги сўров тўлиқ ёки қисман рад этилиши мумкин, агар унинг ижроси:

а) инсон ҳуқуқларининг бузилишига, давлат суверенитети ёки миллий хавфсизлигига зарар етказилишига олиб келиши мумкин бўлса;

б) жамоат манфаатларига ёки сўралаётган Томоннинг миллий қонунчилигига зид келса;

в) сўралаётган Томон ҳудудида олиб борилаётган тергов ва бошқа жараёнларга зарар келтирадиган бўлса;

г) сўралаётган Томон судининг қарорига ёки суд ҳукмини ижро қилишига зид келса.

2. Агар ёрдам кўрсатиш ҳақидаги сўров рад этилса, сўралаётган Томоннинг ваколатли органи сўровни рад этиш сабаблари ҳақида ёзма шаклда сўраётган Томонни хабардор қилади.

1. Томонлар ушбу Битимнинг 2-моддасида қайд этилган жиноятларнинг олдини олишга йўналтирилган ҳуқуқни муҳофаза қилиш чоралари самарадорлигини ошириш мақсадида ҳуқуқий ва маъмурий тизимлар асосида ҳам ҳамкорлик қиладилар.

2. Томонлар ўз ваколатли органларига қуйидагиларни қамраб олувчи алоҳида битимлар тузишни топширадилар:

а) улар ўртасида алоқа каналларини ўрнатиш ва йўлга қўйиш, жиноятларнинг барча жабҳалари бўйича тегишли маълумотларни ишончли алмашиш ҳамда ушбу Битимнинг 2-моддасида қайд этилган бошқа масалаларни ҳал этиш;

б) қайд этилган жиноятларнинг, айниқса, гиёҳванд моддаларнинг ноқонуний муомалада бўлишини олдини олиш мақсадида бошқа ҳаракатларни амалга ошириш, агар бундай ҳаракатлар Томонларнинг миллий қонунчилигига зид келмаса.

3. Томонлар жиноятчиликка қарши курашиш мақсадида фан ва техника соҳасидаги илмий-тадқиқот дастурларини амалга оширишда бир-бирларига кўмаклашадилар, шунингдек, ҳуқуқни муҳофаза қилувчи органлар учун кадрлар тайёрлаш соҳасида ўзаро манфаатли асосларда ҳамкорлик қиладилар.

1. Томонлар, башарти ўз ваколатли органлари бир-бирларидан оладиган маълумотлар ёпиқ хусусиятга эга бўлса ёки уларни тақдим қилаётган Томон ошкор қилинишини лозим деб топмаса, ваколатли органлар тарафидан бундай маълумотларнинг махфийлигини таъминлаши тўғрисида келишиб олдилар.

2. Ушбу Битим доирасида олинган техник воситалар, ускуналар ва материаллар ҳақидаги маълумотларни учинчи томонга топшириш зарурати туғилса, уларни тақдим этган ваколатли органнинг ёзма розилиги билан амалга оширилади.

3. Ушбу Битим доирасида тақдим этилаётган шахсий маълумотларни ўрганиб чиқиш қуйидаги тарзда амалга оширилади:

а) зарур ҳолларда, тақдим этаётган Томон бундай маълумотларнинг ишончлилигини, шунингдек тегишли ўзгартиш ва қўшимчаларнинг ўз вақтида тақдим этилишини таъминлайди. Жисмоний шахслар тўғрисида маълумотларни қабул қилиш, рўйхатга олиш, сақлаш, улардан фойдаланиш ва уларни йўқ қилиш Томонларнинг миллий қонунчилигига мувофиқ амалга оширилади. Ушбу Битимнинг амал қилиши тугатилган тақдирда, илгари олинган барча маълумотлар йўқ қилиниши лозим;

б) шахсий маълумотларни тақдим этиш ва қабул қилиш ҳолатлари рўйхатдан ўтказилиши лозим ҳамда бегона шахслар томонидан маълумотларнинг рухсатсиз ўзгартирилиши, йўқ қилиниши ёки ошкор қилинишидан самарали ҳимоя таъминланиши лозим;

в) сўров асосида қабул қилаётган Томон тақдим қилинган маълумотлардан фойдаланиш ва улар асосида олинган натижалар ҳақида тақдим қилган Томонни хабардор қилади.

Ушбу Битим қоидаларини амалга ошириш мақсадида Томонларнинг манфаатдор ваколатли органлари идоралараро битимлар тузишлари мумкин.

1. Ушбу Битимни амалга ошириш бўйича сарф-харажатларни Томонлар ўз мажбуриятларини бажаришлари учун зарур даражада мустақил равишда қоплайдилар.

2. Зарур ҳолларда, Томонлар ушбу Битимни амалга оширишдан келиб чиқадиган харажатларни ҳар бир алоҳида ҳолатда ўзаро келишилган ҳолда қоплайдилар. Биргаликдаги харажатлар бўйича Томонларнинг мажбуриятлари мазкур келишувлар билан тартибга солинади.

3. Томонлар зарур ҳолларда, ушбу Битимнинг 2-моддасида қайд этилган жиноятларнинг олдини олиш бўйича муайян масалаларни ҳал этиш учун зарур бўлган ускуна ва материаллар етказиб бериш орқали бир-бирларига беғараз ёрдам беришлари мумкин.

1. Ушбу Битимнинг амалий бажарилишига жавобгар органлар қуйидагилардир:

Ўзбекистон Республикаси учун: Ички ишлар вазирлиги, Миллий хавфсизлик хизмати, Бош прокуратура, Давлат божхона қўмитаси, Адлия вазирлиги ва Давлат солиқ қўмитаси;

Испания Қироллиги учун: Ички ишлар вазирлиги, бошқа тегишли вазирликларнинг ваколатига зарар етказмаган ҳолда.

2. Ҳар бир Томон ўз ваколатли органларидаги ўзгаришлар ҳақида дипломатик каналлар орқали бошқа Томонни хабардор қиладилар.

Ушбу Битим доирасидаги ҳамкорликни амалга ошириш инглиз тилида олиб борилади.

1. Ушбу Битим қоидаларини амалга ошириш мақсадида Томонлар ўз ваколатли вакилларидан иборат бўлган Қўшма комиссия тузишлари мумкин.

2. Қўшма комиссия зарур ҳолларда навбат билан Ўзбекистонда ва Испанияда ўзаро қизиқиш уйғотадиган масалаларни кўриб чиқиш ҳамда улар бўйича ўзаро мақбул қарорларни қабул қилиш учун йиғилиши мумкин.

Ушбу Битим қоидаларини талқин этиш ёки қўллашда юзага келадиган низоли масалалар Томонлар ўртасида ўзаро маслаҳатлашувлар ёки музокаралар ўтказиш йўли билан ҳал этилади.

Ушбу Битим қоидалари Томонлар иштирокчи бўлган бошқа халқаро шартномалардан келиб чиқадиган ҳуқуқ ва мажбуриятларига дахл қилмайди.

Томонларнинг ўзаро келишувига кўра ушбу Битимга унинг ажралмас қисми ҳисобланадиган ҳамда алоҳида баённомалар билан расмийлаштириладиган ўзгартиш ва қўшимчалар киритилиши мумкин. Мазкур ўзгартишлар ушбу Битимнинг 18-моддасига мувофиқ кучга киради.

1. Ушбу Битим Томонлар тарафидан унинг кучга кириши учун зарур бўлган давлат ички процедураларининг бажарилганлиги тўғрисида сўнги ёзма хабарнома олинган кундан бошлаб кучга киради.

2. Ушбу Битим номуайян муддатга тузилади ва Томонлардан бири ушбу Битимни тугатиш нияти тўғрисида дипломатик каналлар орқали бошқа Томонни ёзма шаклда хабардор қилгунига қадар амал қилишда давом этади.

Бундай ҳолда Битимнинг амал қилиши бошқа Томон мазкур тугатиш ҳақидаги ёзма ҳабарномани олган кундан бошлаб олти ойдан сўнг тугатилади.

Мадрид шаҳрида 2013 йил 5 ноябрда икки асл нусхада, ҳар бири ўзбек, испан ва инглиз тилларида тузилди, бунда барча матнлар бир хил кучга эга.