Ўзбекистон Республикаси Олий Мажлиси Сенатининг 2021 йил 29 майдаги «Таълим муассасалари битирувчиларини иш билан таъминлашдаги долзарб муаммолар юзасидан Ўзбекистон Республикаси Вазирлар Маҳкамасига парламент сўрови юбориш тўғрисида»ги СҚ-311-IV-сонли Қарорига асосан юборилган парламент сўровига тақдим этилган жавобни кўриб чиқиб, Ўзбекистон Республикаси Олий Мажлиси Сенати бу борада муайян ишлар амалга оширилганлигини қайд этади.

Хусусан, 2021/2022 ўқув йилидан бошлаб техникумлар ўқувчилари амалиёт ўташ жойларини ташкил қилиш ҳамда келгусида ишга жойлашишлари учун 800 га яқин тармоқ корхона ва ташкилотларга бириктирилган.

Ёшларнинг тадбиркорлик билим ва кўникмаларини ривожлантириш мақсадида олий ва профессионал таълим муассасаларида «Кичик бизнес ва тадбиркорлик асослари», «Кичик бизнес ва хусусий тадбиркорликни ташкил этиш», «Туризмда тадбиркорлик фаолиятини ташкил этиш» ва «Бизнесни ташкил этиш ва юритиш» фанлари ва ўқув дастурлари ишлаб чиқилган.

Хизматчиларнинг асосий лавозимлар ва ишчилар касблари классификатори лойиҳаси тайёрланиб, унга 2 163 та янги лавозим ва касб қўшилиб, умумий сони 12 151 бирликка ортган.

2019 — 2021 йилларда Аҳоли бандлигига кўмаклашиш марказлари учун замонавий бинолар қуриш, уларнинг моддий-техник базасини яхшилаш ва ходимларни рағбатлантириш учун талаб этиладиган харажатларга Бандликка кўмаклашиш давлат жамғармаси маблағлари ҳисобидан 24 млрд 600 млн сўм миқдорида маблағ молиялаштирилиб, 20 та замонавий хизмат кўрсатиш биноси фойдаланишга топширилган.

Бандлик ва меҳнат муносабатлари вазирлиги томонидан олий маълумот тўғрисидаги бакалавр ва магистр дипломларининг ягона электрон базасини шакллантириш мақсадида otm.mehnat.uz ахборот тизими фаолияти йўлга қўйилган.

«Ягона миллий меҳнат тизими» идоралараро дастурий-аппарат комплексида www.ish2.mehnat.uz бўш (вакант) иш ўринлари базаси яратилган.

Юқоридагилардан келиб чиқиб ҳамда «Парламент назорати тўғрисида»ги Ўзбекистон Республикаси Қонунининг 14-моддасига мувофиқ Ўзбекистон Республикаси Олий Мажлисининг Сенати қарор қилади.

1. Ўзбекистон Республикаси Олий Мажлиси Сенатининг 2021 йил 29 майдаги «Таълим муассасалари битирувчиларини иш билан таъминлашдаги долзарб муаммолар юзасидан Ўзбекистон Республикаси Вазирлар Маҳкамасига парламент сўрови юбориш тўғрисида»ги СҚ-180-IV-сонли Қарори ижроси бўйича Сенатнинг Ёшлар, маданият ва спорт масалалари қўмитаси раиси Б. Сайфуллаевнинг ахбороти маълумот учун қабул қилинсин.

2. Таълим муассасалари битирувчилари бандлигини таъминлаш самарадорлигини янада ошириш мақсадида Ўзбекистон Республикаси Вазирлар Маҳкамаси:

умумтаълим мактабларининг битирувчи ўқувчиларини талаб юқори бўлган икки ва ундан ортиқ касб-ҳунарга ўқитиш тизимини жорий қилиш;

олий ва профессионал таълим муассасалари битирувчиларини ўқув-ишлаб чиқариш амалиётига жалб қилиш тизимини тубдан қайта кўриб чиқиш;

олий ва профессионал таълим дастурларини шакллантириш жараёнига хусусий сектордаги иш берувчиларни жалб этиш;

йўналиш ва мутахассисликлар учун мақсадли кадрлар тайёрлаш тизимини такомиллаштириш мақсадида тадбиркорлик субъектлари томонидан олий таълим муассасаларига буюртмалар бериш амалиётини йўлга қўйиш;

олий таълим муассасаларида тўлов-контракт асосида таълим олганларни иш билан таъминлаш бўйича аниқ мақсадли чоралар белгилаш;

ёшларга тадбиркорлик фаолиятини бошлаши ва юритиши учун Ёшлар саноат зоналари ҳудудида ишлаб чиқариш майдонларини бериш ҳамда мазкур ҳудудларни йўл-транспорт, муҳандислик-коммуникация инфратузилмаси билан таъминлаш;

ёшларга ўз инновацион ишланмаларини ишлаб чиқариш жараёнига жорий этиш ва натижаларини тижоратлаштириш борасида амалий ёрдам кўрсатиш;

ривожланган давлатлар тажрибасини ўрганган ҳолда хусусий секторда кадрларни ишга жойлаштириш бўйича субъектлар фаолиятини рағбатлантириш тизимини яратиш;

«Ягона миллий меҳнат тизими» идоралараро дастурий-аппарат комплексидаги www.ish2.mehnat.uz бўш (вакант) иш ўринлари базасига хусусий сектордаги бўш иш ўринлари (вакансиялар) ҳақида мунтазам маълумот киритиб бориш ҳамда мазкур дастурдан аҳоли хабардорлигини ошириш;

хорижий давлатларга вақтинчалик меҳнат фаолиятини амалга ошириш учун кетадиган фуқаролар ҳақида маълумотлар базасини яратиш, шунингдек, уларнинг меҳнат шароитлари, ижтимоий ва яшаш-турмуш таъминоти, чет эллик иш берувчилар билан тузиладиган меҳнат шартномаларининг ҳуқуқий жиҳатлари ва бошқа масалаларда ёрдам кўрсатиш тизимини яхшилаш чораларини кўрсин.

Ўзбекистон Республикаси Вазирлар Маҳкамаси (Б. Мусаев) мазкур Қарор ижроси юзасидан амалга оширилган ишлар ҳақида 2022 йил 1 февралга қадар Ўзбекистон Республикаси Олий Мажлиси Сенатига ахборот тақдим этсин.

3. Ўзбекистон Республикаси Олий Мажлиси Сенатининг Ёшлар, маданият ва спорт масалалари қўмитаси Аҳоли бандлигига кўмаклашиш давлат дастури доирасида ёшлар бандлигини таъминлаш юзасидан белгиланган чора-тадбирлар ўз вақтида ва сифатли бажарилиши устидан доимий парламент назоратини ўрнатиб, мазкур масалани йилда икки маротаба Қўмита мажлисларида муҳокама этсин.

4. Мазкур Қарорнинг ижросини назорат қилиш Сенатининг Ёшлар, маданият ва спорт масалалари қўмитаси (Б. Сайфуллаев) зиммасига юклансин.

5. Ушбу Қарор қабул қилинган кундан эътиборан кучга киради.