2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси доирасида давлат бошқарувини такомиллаштириш, жамиятни демократлаштириш, аҳолининг турмуш даражаси ва сифатини ошириш, ҳудудларни комплекс ривожлантириш борасида мамлакатимизда амалга оширилаётган кенг кўламли ислоҳотлар парламент олдига янгидан-янги вазифаларни қўймоқда.

Ислоҳотларнинг шиддати Қонунчилик палатаси, унинг қўмиталари ва комиссиялари фаолияти самарадорлигини янада ошириш, парламент вакилларининг халқ билан доимий мулоқотини сифат жиҳатидан янги даражага кўтариш, қуйи палатанинг қонун ижодкорлигига, парламент ва депутатлик назоратига доир фаолиятини кучайтириш, парламентлараро ҳамкорлик алоқаларини ривожлантириш каби муҳим йўналишларни янада такомиллаштиришни, депутатлар корпуси ишини бугунги кун талаблари асосида олиб боришни тақозо этмоқда.

Шундан келиб чиқиб, Ўзбекистон Республикаси Олий Мажлиси Қонунчилик палатасининг 2021 йил иккинчи ярим йиллигига мўлжалланган фаолиятининг асосий йўналишларини мамлакатда барча соҳаларда олиб борилаётган ислоҳотлардан, Ўзбекистон Республикаси Президентининг Фармон ва қарорларида ҳамда ўтказилаётган видеоселектор йиғилишларида белгилаб берилаётган устувор йўналишлардан келиб чиққан ҳолда танқидий жиҳатдан қайта кўриб чиқиш ҳамда уни бугунги кун талабларига мос равишда янада такомиллаштириш талаб этилмоқда.

Юқоридагиларни инобатга олиб, демократик ислоҳотларни амалга ошириш ва мамлакатни модернизация қилишда Ўзбекистон Республикаси Олий Мажлиси Қонунчилик палатасининг фаол иштирокини таъминлаш мақсадида ҳамда сиёсий партиялар фракциялари, қўмиталар ҳамда комиссияларнинг таклиф ва фикр-мулоҳазаларидан келиб чиққан ҳолда, Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатасининг 2021 йил иккинчи ярим йиллигига мўлжалланган иш режаси (бундан буён матнда Иш режа деб юритилади) иловага* мувофиқ тасдиқлансин.

2. Иш режасида назарда тутилган вазифа ва тадбирларни ўз вақтида, сифатли бажариш учун Ўзбекистон Республикаси Олий Мажлиси Қонунчилик палатаси Спикерининг биринчи ўринбосари ва ўринбосарлари, қўмиталари (комиссиялари) раислари, Девони раҳбари масъул эканлиги белгилаб қўйилсин.

3. Иш режасида белгиланган масъул ижрочилар унинг бажарилиши ҳолати тўғрисида ҳар ойнинг 25 санасига қадар (ёки сўровга кўра) Ўзбекистон Республикаси Олий Мажлиси Қонунчилик палатаси Девонининг Назорат ва мониторинг бўлимига ахборот тақдим этиб борилишини таъминласин.

4. Ўзбекистон Республикаси Олий Мажлиси Қонунчилик палатаси Девонининг Назорат ва мониторинг бўлими (А. Абдукодиров) Иш режасининг ижроси юзасидан доимий мониторинг ўрнатиб, унинг бориши тўғрисида ҳар ойда Ўзбекистон Республикаси Олий Мажлиси Қонунчилик палатаси Кенгашига умумлаштирилган маълумот киритиб борсин.

5. Иш режасида назарда тутилган вазифалар ва тадбирларнинг бажарилишини назорат қилиш Ўзбекистон Республикаси Олий Мажлиси Қонунчилик палатаси Спикерининг биринчи ўринбосари ва ўринбосарлари зиммасига юклатилсин.

6. Ўзбекистон Республикаси Олий Мажлиси Қонунчилик палатаси Кенгашининг 2021 йил 15 февралдаги «Ўзбекистон Республикаси Олий Мажлиси Қонунчилик палатасининг 2021 йилга мўлжалланган иш режасини тасдиқлаш тўғрисида»ги 750-IV-сонли Қарори билан тасдиқланган Ўзбекистон Республикаси Олий Мажлиси Қонунчилик палатасининг 2021 йилга мўлжалланган иш режасига мувофиқ июль — декабрь ойларида ўтказилиши назарда тутилган тадбирлар бекор қилинсин.

7. Ушбу Қарор тасдиқлаш учун Ўзбекистон Республикаси Олий Мажлиси Қонунчилик палатасининг мажлисига киритилсин.

8. Ушбу Қарор қабул қилинган кундан эътиборан кучга киради.