2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Ёшларни қўллаб-қувватлаш ва аҳоли саломатлигини мустаҳкамлаш йили»да амалга оширишга оид давлат дастурининг 266-банди ижросини таъминлаш мақсадида Ўзбекистон Республикаси Олий Мажлиси Сенатининг Кенгаши қарор қилади:

1. Қуйидагилар трансчегаравий ҳамкорликнинг энг долзарб масалаларини ҳал қилишда маҳаллий ҳокимият вакиллик органлари халқаро фаолиятининг устувор йўналишлари этиб белгилансин:

Ўзбекистон Республикаси ва қўшни давлатлар ўртасидаги трансчегаравий ҳамкорликни турли ижтимоий-сиёсий ҳамда иқтисодий соҳаларида ривожлантиришга йўналтирилган маҳаллий дастурларни ишлаб чиқиш, тасдиқлаш ва амалга ошириш;

превентив дипломатиясини амалга ошириш, Ўзбекистон Республикаси ва қўшни мамлакатларнинг трансчегаравий ҳудудларида яшовчи аҳоли ўртасида ўзаро ҳамжиҳатлик ҳамда дўстлик алоқаларини ривожлантириш;

манфаатдор давлат органлари, ишбилармон доиралар ва аҳоли гуруҳлари, шу жумладан, давлат чегаралари билан ажратилган этник жамоалар ўртасидаги ўзаро алоқаларни янада ривожлантириш, қўшни мамлакатларда яшаётган ёки меҳнат қилаётган ватандошларимизни қўллаб-қувватлаш;

Ўзбекистон Республикаси, унинг трансчегаравий ҳудудларида жойлашган органлари, ташкилотлари, муассасалари ҳамда қўшни мамлакатларнинг тегишли субъектлари ўртасида иқтисодий, ижтимоий, маданий, маъмурий алоқаларни мустаҳкамлаш, транспорт, энергетика, сув, коммунал, экологик, трансчегаравий фавқулодда вазиятлар, ижтимоий-демография, гуманитар ва бошқа долзарб муаммоларни биргаликда ҳал этиш;

трансчегаравий ҳудудларда терроризм, қурол-яроғ ва гиёҳвандлик моддаларининг ноқонуний айланмаси, бошқа уюшган жиноятчиликнинг кўринишлари, шунингдек, миллатчилик, шовинизм, этник ҳамда диний экстремизм, сепаратизм, миллатлараро кескинлик ўчоқларининг биргаликда олдини олиш ва бартараф этишга кўмаклашиш;

ҳудуддаги фуқароларнинг трансчегаравий шикоятлари ва ўзаро масалаларини маҳаллий миқёсда тезкор билан ҳал этилишини таъминлаш.

Хорижий мамлакатлар қўшни ҳудудларининг вакиллик органлари билан ҳамкорлик қуйидаги шакллар ва усулларда амалга оширилиши тавсия этилсин:

чегара соҳасидаги ҳамкорлик масалалари бўйича учрашувлар, маслаҳатлашувлар ҳамда бошқа тадбирларни ташкил этиш ва ўтказиш;

белгиланган тартибда Ўзбекистон Республикаси ва хорижий давлатлар билан трансчегаравий ҳамкорлик бўйича меморандумлар имзолаш;

қўшни давлатлар ёки уларнинг ташкилотлари билан бирга трансчегаравий ҳамкорлик дастурлари доирасида, шу жумладан, чегара ҳудудларида санитария-эпидемиологик вазиятни ўрганиш, касалликлар статистикасини олиб бориш, чегара билан боғлиқ қонунчилик ҳужжатларига риоя қилинишига оид лойиҳаларни амалга ошириш;

ижтимоий-маданий соҳаларда, шу жумладан, спорт мусобақаларини ташкил этиш, маданий тадбирлар (кўргазма, ярмарка ва фестиваллар)ни бирга ўтказиш, туризмнинг турли йўналишларини (маданий туризм, экотуризм) ривожлантиришга қаратилган амалий тадбирлар ўтказиш.

2. Ўзбекистон Республикаси Ташқи ишлар вазирлиги (А. Камилов) Инвестициялар ва ташқи савдо вазирлиги (С. Умурзаков), Иқтисодий тараққиёт ва камбағалликни қисқартириш вазирлиги (Ж. Кучкаров), Молия вазирлиги (Т. Ишметов), Маданият вазирлиги (О. Назарбеков), Марказий банк (М. Нурмуратов), Туризм ва спорт вазирлиги (А. Абдухакимов) Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан бирга икки ой муддатда республиканинг чегарадош ҳудудлари трансчегаравий ҳамкорлик имкониятларини комплекс равишда ўрганиб, Ўзбекистон Республикасининг трансчегаравий ҳамкорлик концепцияси ва мазкур концепцияни амалга оширишга оид чора-тадбирлар режаси («Йўл харитаси») лойиҳаларини ишлаб чиқсин ва тасдиқлаш учун Вазирлар Маҳкамасига киритсин.

3. Қорақалпоғистон Республикаси Жўқорғи Кенгеси, халқ депутатлари Тошкент шаҳар, вилоят Кенгашларига трансчегаравий ҳамкорликни йўлга қўйиш мақсадида:

трансчегаравий масалаларга бағишланган учрашувлар ҳамда маслаҳатлашувлар ташкил этиш ва ўтказиш, трансчегаравий ҳамкорлик бўйича шартномалар имзолаш масалаларига оид таклифларни Ўзбекистон Республикаси Ташқи ишлар вазирлигига;

чегарадош мамлакатларнинг қўшни ҳудудидаги вакиллик органлари билан трансчегаравий ҳамкорлик алоқаларини ўрнатиш ташаббусларини Ўзбекистон Республикаси ва хорижий мамлакатлар ўртасида икки томонлама ҳамкорлик бўйича тузилган ҳукуматлараро комиссияларга;

трансчегаравий ҳамкорликда маҳаллий вакиллик органларининг ваколатларини кенгайтириш, мазкур ваколатларни амалга ошириш механизмини миллий қонунчиликда мустаҳкамлашни назарда тутувчи ташаббусларни Ўзбекистон Республикаси Олий Мажлиси Қонунчилик палатаси ва Вазирлар Маҳкамасига;

Ўзбекистон Республикаси вакиллик органлари билан трансчегаравий ҳамкорликни амалга оширишнинг ҳуқуқий базасини, ташкилий-институционал шарт-шароитларини яқинлаштириш ва унификациялаш бўйича таклифларни Ўзбекистон Республикаси Адлия вазирлиги ҳамда Ташқи ишлар вазирлигига киритиш тавсия этилсин.

4. Ўзбекистон Республикаси Ташқи ишлар вазирлиги Ўзбекистоннинг қўшни мамлакатлардаги дипломатик ваколатхоналари билан биргаликда Ўзбекистон Республикасининг чегарадош ҳудудларидаги халқ депутатлари маҳаллий Кенгашларига қўшни давлатлар ҳудудидаги вакиллик органлари билан трансчегаравий ҳамкорликни ўрнатишда амалий ёрдам кўрсатсин.

5. Ўзбекистон Республикаси Давлат божхона қўмитаси:

Ўзбекистон Республикаси ва қўшни мамлакатларнинг чегаравий ҳудудлари бўйлаб экспорт, импорт ва транзит товарларни ўтказиш, шу жумладан, давлат чегарасидан ўтказиш пунктларини жиҳозлаш, транспорт инфратузилмаси, божхона омборхоналари, терминалларни шакллантириш, Ўзбекистон ва қўшни мамлакатларнинг ишлаб чиқариш ҳамда ижтимоий базасидан самарали фойдаланиш учун ҳуқуқий шароитлар яратиш;

трансчегаравий ҳудудларда аҳолининг эркин ҳаракатланиш учун барча шарт-шароитларни яратишга, чегара постларидан ўтиш қоидаларини соддалаштиришга, чегарадош ҳудудларда меҳнат бозорини шакллантиришга ва инсон капиталини ривожлантиришга қаратилган чора-тадбирларни ишлаб чиқишни таъминласин.

6. Ўзбекистон Республикаси Фавқулодда вазиятлар вазирлиги трансчегаравий ҳудудларда содир бўлган фавқулодда вазиятларни ўз вақтида бартараф этиш ва трансчегаравий характерга эга бўлган фалокатларга самарали таъсир ўтказиш мақсадида трансчегаравий мамлакатлар билан тезкор ҳамкорлик ўрнатиш учун ҳуқуқий асосларни ишлаб чиқиш ва тасдиқлаш чораларини кўрсин.

7. Сенатнинг Маҳаллий ҳокимият вакиллик органлари фаолиятини кучайтиришга кўмаклашувчи комиссияси:

Ўзбекистон билан чегарадош бўлган мамлакатларнинг қўшни ҳудудлардаги маҳаллий вакиллик органлари билан ҳамкорлик алоқаларини ўрнатишга йўналтирилган ҳуқуқий базани такомиллаштириш юзасидан таклифлар тайёрласин;

маҳаллий вакиллик органларининг трансчегаравий ҳамкорлик соҳасидаги ваколатларини қонун доирасида аниқ белгилашга қаратилган таклиф ва тавсияларни ишлаб чиқсин;

трансчегаравий ҳамкорликка доир халқаро қонунчиликни қайта кўриб чиқиб, бу борада манфаатли халқаро ҳужжатларни ратификация қилиш борасида ваколат доирасида чоралар кўриб борсин.

8. Ўзбекистон Республикаси Вазирлар Маҳкамасига Ўзбекистон Республикаси ва хорижий мамлакатлар ўртасида икки томонлама ҳамкорлик бўйича тузилган ҳукуматлараро комиссиялар таркибига Ўзбекистоннинг чегара ҳудудидаги халқ депутатлари маҳаллий Кенгашларининг депутатларини киритиш тавсия этилсин.

Ушбу Қарор ижроси бўйича маълумотни жорий йилнинг 1 августига қадар Сенатга тақдим этсин.

9. Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси ушбу Қарор ижроси юзасидан амалга оширилган ишлар тўғрисида умумлаштирилган ахборотни жорий йил 25 августга қадар Сенат Кенгашига киритсин.

10. Мазкур Қарорнинг ижросини назорат қилиш Ўзбекистон Республикаси Олий Мажлиси Сенати Раисининг биринчи ўринбосари С. Сафоев зиммасига юклансин.

11. Ушбу Қарор қабул қилинган кундан эътиборан кучга киради.