Ўзбекистон Республикаси Президенти Ш.М. Мирзиёевнинг Ўзбекистон Республикаси Олий Мажлисига Мурожаатномаси жамиятимизнинг истиқболдаги тараққиётига хизмат қиладиган барча долзарб масалалар ва муаммоларни қамраб олган, иқтисодий барқарорликни таъминлаш, халқимиз фаровонлигини янада оширишга қаратилган кенг кўламли вазифаларни назарда тутувчи яхлит дастурий ҳужжатга айланди.

Мурожаатномада коронавирус пандемиясига қарши курашни тизимли равишда давом эттириш, санитария-эпидемиология хизмати сифатини ошириш, тиббиёт соҳасини рақамлаштириш кўламини янада кенгайтириш, тиббиётнинг бирламчи бўғинини ривожлантириш, айниқса, қишлоқлар ва маҳаллаларда тиббий хизматни сифат жиҳатидан янги босқичга кўтариш, шунингдек соғлом турмуш тарзини шакллантириш каби устувор вазифалар белгилаб берилди.

Эътироф этиш керакки, сўнгги тўрт йил ичида тиббиётни ривожлантириш борасида кенг қамровли ўзгаришлар амалга оширилди. Айниқса, ҳудудларда қишлоқ врачлик пунктлари, шаҳар ва қишлоқ оилавий поликлиникаларини ташкил этиш орқали бирламчи тиббий-санитария ёрдами кўрсатиш тизими такомиллаштирилди ҳамда аҳолининг ушбу хизматлардан фойдаланиш имкониятлари кенгайтирилди. Шошилинч тиббий ёрдам кўрсатишнинг ягона марказлашган тизими яратилди, жойларда фуқароларга юқори технологияларга асосланган тиббий ёрдам кўрсатувчи ихтисослаштирилган илмий-амалий тиббиёт марказлари тармоғи такомиллаштирилди.

Шу билан бирга Мурожаатномада илгари сурилган қатор таклифлар, соғлиқни сақлаш соҳасида сўнгги йилларда аниқланган тизимли камчилик ва муаммолар фуқароларнинг соғлиғини кафолатли муҳофаза қилиш тизимини янада такомиллаштиришга қаратилган вазифаларни фаолроқ амалга оширишни тақозо қилмоқда.

Шу нуқтаи назардан, белгилаб берилган вазифаларнинг муҳим эканлигидан келиб чиқиб, қуйи палата ўзининг назорат-таҳлил фаолиятини ташкил этишда биринчи навбатда Мурожаатномада илгари сурилган ташаббуслар ва таклифларнинг амалга оширилиши юзасидан қатъий ва ҳар томонлама парламент мониторинги тизимини шакллантириши, белгиланган вазифаларнинг ўз муддатида ва сифатли бажарилиши ҳолатини жойларга чиққан ҳолда ўрганиши ҳамда таъсирчан чоралар кўриши, шунингдек бу борада ҳудудларда қатъий парламент назоратини амалга ошириши зарурлиги кун тартибига чиқмоқда.

Соғлиқни сақлаш тизимини тубдан такомиллаштириш бўйича қабул қилинган қонун ҳужжатлари, амалга оширилаётган ислоҳотларнинг мазмун-моҳиятини ва аҳолига яратилаётган қулайликларни кенг жамоатчилик эътиборига етказиш, шунингдек бу борада олиб борилаётган ишларнинг ҳолатига танқидий жиҳатдан ёндашган ҳолда, уларни маҳаллий Кенгашларда доимий равишда муҳокама қилиб бориш муҳим аҳамият касб этади.

Юқоридагилардан келиб чиқиб ҳамда мамлакатимиз Президентининг Ўзбекистон Республикаси Олий Мажлисига Мурожаатномасида тиббиёт соҳасини тараққий эттириш юзасидан белгиланган устувор вазифаларнинг ўз вақтида ва самарали рўёбга чиқарилишини таъминлаш мақсадида Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Аҳоли саломатлигини мустаҳкамлаш борасидаги ислоҳотларни ҳаётга татбиқ этиш бўйича парламент комиссияси таркиби 1-иловага* мувофиқ тузилсин.

2. Аҳоли саломатлигини мустаҳкамлаш борасидаги ислоҳотларни ҳаётга татбиқ этиш бўйича парламент ва депутатлар назоратини амалга оширишга доир чора-тадбирлар режаси 2-иловага* мувофиқ тасдиқлансин.

3. Аҳоли саломатлигини мустаҳкамлаш борасидаги ислоҳотларни ҳаётга татбиқ этиш бўйича парламент комиссиясига Кўмаклашувчи гуруҳ таркиби 3-иловага* мувофиқ тузилсин.

4. Парламент комиссияси зиммасига:

комиссиянинг ҳар бир аъзосини тегишли ҳудудларга масъул этиб бириктириш ҳамда улар томонидан ўз фаолиятини асосан жойларда ташкил этилишини белгилаш;

Чора-тадбирлар режасида белгиланган вазифалар ўз вақтида ва сифатли ижро этилиши учун гуруҳ аъзоларининг аниқ йўналишлар бўйича ихтисослаштирилишини таъминлаш;

гуруҳ аъзолари ўртасида вазифаларни ҳамда ўрганиш мавзуларини ва объектларини аниқ тақсимлаш;

Чора-тадбирлар режасида белгиланган вазифалар ижросининг бориши устидан доимий назорат ўрнатиш;

Комиссия йиғилишларини, қоида тариқасида, ҳар ойда камида бир маротаба ўтказиш;

ҳудудларда мунтазам равишда ўтказилган ўрганиш ва мониторинг натижалари маҳаллий Кенгашларда мутасадди вазирлик ва идоралар вакиллари билан биргаликда атрофлича ва танқидий руҳда муҳокама этилишини таъминлаш;

ҳудудларда олиб борилган ўрганишлар якунларидан келиб чиқиб, Ўзбекистон Республикаси Олий Мажлиси Қонунчилик палатаси Кенгашида кўриб чиқиш учун асослантирилган таклифлар тайёрлаш вазифалари юклатилсин.

5. Ўзбекистон Республикаси Вазирлар Маҳкамасига аҳоли саломатлигини мустаҳкамлаш, соғлом турмуш тарзини шакллантиришга доир норматив-ҳуқуқий ҳужжатлар лойиҳаларини Парламент комиссияси билан келишилишини таъминлаш тавсия этилсин.

6. Ўзбекистон Республикаси Олий Мажлиси Қонунчилик палатаси Спикерининг ўринбосари А. Кадиров ва Девони раҳбари М. Миралимов Парламент комиссияси томонидан бу борада амалга оширилаётган ишлар оммавий ахборот воситаларида мунтазам ёритиб борилишини таъминлаш чораларини кўрсин.

7. Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти (Ф. Отахонов), Ўзбекистон Республикаси Олий Мажлиси Қонунчилик палатаси Девонининг Давлат бюджети бошқармаси (К. Эрназаров) ва Юридик бошқармаси (Б. Раджабов) Парламент комиссиясининг сўровига асосан соғлиқни сақлаш соҳасидаги қонунчиликни такомиллаштириш, соҳага ажратилаётган бюджет маблағларининг мақсадли сарфланиши билан боғлиқ масалаларни ўз вақтида ва самарали кўриб чиқилишини таъминласин.

8. Ушбу Қарорнинг ижросини назорат қилиш Ўзбекистон Республикаси Олий Мажлиси Қонунчилик палатаси Спикерининг ўринбосарлари А. Кадиров ва У. Иноятов зиммасига юклатилсин.

9. Ушбу Қарор қабул қилинган кундан эътиборан кучга киради.