Ўзбекистон Республикаси Конституциясининг 69, 78-моддаларига, «Ўзбекистон Республикаси Олий Мажлисининг Қонунчилик палатаси тўғрисида»ги Ўзбекистон Республикаси Конституциявий Қонунининг 8-моддаси ҳамда «Ўзбекистон Республикасида маъмурий-ҳудудий тузилиш масалаларини ҳал этиш тартиби тўғрисида»ги Ўзбекистон Республикаси Қонунининг 2, 5-моддаларига мувофиқ Ўзбекистон Республикаси Олий Мажлиси Қонунчилик палатаси қарор қилади:

1. Ўзбекистон Республикаси Вазирлар Маҳкамасининг таклифи қабул қилиниб:

Хоразм вилояти таркибида Ҳазорасп туманининг чегаралари ўзгартирилсин Тупроққалъа тумани ташкил этилсин;

Питнак шаҳри Тупроққалъа туманининг маъмурий маркази этиб белгилансин.

2. Хоразм вилояти Ҳазорасп тумани Питнак шаҳри ҳудудидаги «А. Ибрагимов», «Муҳаббат», «Навбаҳор», «Ёшлик», «Шарлауқ», «Охунбобоев», «Обод», «Саяпир», «Шехлар», «Пастом» ва «Саидлар» ҳамда Тупроққалъа маскани ҳудудидаги «Саримой», «Нукус», «Ҳазорасп» ва «Тупроққалъа» маҳалла фуқаролар йиғинлари ҳудудлари (умумий ер мадони 192 262 гектор) ташкил этилаётган Тупроққалъа тумани таркибига ўтказилсин.

3. Ўзбекистон Республикаси Вазирлар Маҳкамаси томонидан таклиф этилган Хоразм вилоятининг Ҳазорасп тумани ҳудудидан Тупроққалъа тумани ҳудудига ўтказилаётган ер майдонлари чегараларининг тавсифи ва чизма шакллари тегишлича 1-2-иловаларга* мувофиқ тасдиқлансин.

4. Белгилаб қўйилсинки, чегараси ўзгартирилаётган Ҳазорасп туманидаги сайлов округларидан (25-Қизилқум, 26-Шарлауқ, 27-Темур, 28-Нурушлар, 29-Саяпир, 30-Шехлар) сайланган халқ депутатлари Ҳазорасп туман Кенгаши депутатлари халқ депутатлари Тупроққалъа туман Кенгаши депутатлари ҳисобланади.

5. Ўзбекистон Республикаси Вазирлар Маҳкамаси мазкур Қарорнинг ижроси юзасидан комплекс чора-тадбирлар амалга оширилишини таъминласин.

6. Мазкур қарор Ўзбекистон Республикаси Олий Мажлиси Сенатига юборилсин.

7. Ушбу Қарор қабул қилинган кундан эътиборан кучга киради.