Ўзбекистон Республикаси Президенти Ш.М. Мирзиёевнинг 2020 йил 20 январда Олий Мажлис Қонунчилик палатасининг биринчи йиғилишида ҳамда 21 январда Олий Мажлис палаталарининг қўшма мажлисидаги нутқларида, 24 январда Олий Мажлисга Мурожаатномасида белгиланган устувор вазифаларни ўз вақтида ва самарали амалга ошириш ҳамда 2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Илм, маърифат ва рақамли иқтисодиётни ривожлантириш йили»да амалга оширишга оид Давлат дастурида назарда тутилган вазифаларни рўёбга чиқариш, шунингдек демократик ислоҳотларни чуқурлаштиришда ва мамлакатни модернизация қилишда парламентнинг ролини янада кучайтириш мақсадида Ўзбекистон Республикаси Олий Мажлиси Қонунчилик палатасининг Кенгаши қарор қилади:

1. Ўзбекистон Республикаси Олий Мажлиси Қонунчилик палатасининг 2020 йилга мўлжалланган Иш режаси (бундан буён матнда Иш режа деб юритилади) иловага* мувофиқ тасдиқлансин.

2. Иш режада назарда тутилган вазифалар ва тадбирларни ўз вақтида ҳамда сифатли бажариш учун Ўзбекистон Республикаси Олий Мажлиси Қонунчилик палатаси Спикерининг биринчи ўринбосари ва ўринбосарлари, қўмиталари раислари, Девонининг раҳбари масъул эканлиги белгилаб қўйилсин.

3. Иш режада белгиланган масъул шахслар мазкур Иш режанинг ижроси бўйича доимий ички мониторинг амалга оширилишини, тадбирларнинг бажарилиши ҳолати тўғрисида ахборот тайёрлаб борилишини ҳамда ҳар ойнинг 25 санасига қадар (ёки сўровга кўра) Ўзбекистон Республикаси Олий Мажлиси Қонунчилик палатаси Девонининг Назорат-таҳлил бўлимига тақдим этилишини таъминласин.

4. Ўзбекистон Республикаси Олий Мажлиси Қонунчилик палатаси Девонининг Назорат-таҳлил бўлими Иш режанинг ижроси устидан доимий мониторинг ўрнатиб, унинг бориши тўғрисида ҳар ойда Ўзбекистон Республикаси Олий Мажлиси Қонунчилик палатаси Кенгашига умумлаштирилган маълумот киритиб борсин.

5. Иш режада назарда тутилган вазифалар ва тадбирларнинг бажарилишини назорат қилиш Ўзбекистон Республикаси Олий Мажлиси Қонунчилик палатаси Спикерининг биринчи ўринбосари ва ўринбосарлари зиммасига юклатилсин.

6. Ўзбекистон Республикаси Олий Мажлиси Қонунчилик палатаси Кенгашининг 2020 йил 18 февралдаги «Ўзбекистон Республикаси Олий Мажлиси Қонунчилик палатасининг 2020 йилга мўлжалланган фаолиятининг асосий йўналишлари тўғрисида»ги 94-V-сонли қарори ўз кучини йўқотган деб топилсин.

7. Ушбу қарор қабул қилинган кундан эътиборан кучга киради.