Тумандаги бир-бирини такрорловчи кўчалар номини қайта номлаш, жумладан жойларнинг қадимий номларини тиклаш юзасидан тушган таклифлар кўриб чиқилди ва мазкур таклифлар атрофлича муҳокама қилиниб, кўчаларни қайта номлаш ҳамда тумандаги мавжуд кўча номларини тасдиқлаш тўғрисида Географик объектларни номлаш ва қайта номлаш масалалари бўйича туман комиссияси томонидан тақдим этилган хулосалар ҳамда Ўзбекистон Республикасининг «Географик объектларнинг номлари тўғрисида»ги Қонуни ва Ўзбекистон Республикаси Вазирлар Маҳкамасининг 2012 йил 16 октябрдаги «Географик объектларнинг номларини тартибга солиш чора-тадбирлари тўғрисида»ги 295-сонли қарори ҳамда туман комиссияси таклифларини инобатга олиб, Халқ депутатлари Шароф Рашидов тумани Кенгаши қарор қилади:

1. Шароф Рашидов тумани ҳудудидаги бир-бирини такрорловчи кўча номларини ўзгартириш ҳамда мавжуд кўчаларга янги ном бериш бўйича туман ҳокимлиги ҳузуридаги географик объектларни номлаш ва қайта номлаш масалалари бўйича туман комиссияси (кейинги ўринларда Комиссия деб аталади) хулосалари маълумот ва ижро учун қабул қилинсин.

2. Комиссиянинг Шароф Рашидов туман ҳудудидаги мавжуд қонунга зид номларни қайта номлаш ҳамда номсиз кўчаларга ном бериш бўйича таклифлари маъқуллансин.

3. Шароф Рашидов туманида жойлашган маҳалла фуқаролари йиғинларидаги қайта номланган кўчалар рўйхати 1-иловага мувофиқ;

туман ҳудудидаги номи ўзгармайдиган кўчалар рўйхати 2-иловага мувофиқ;

туман ҳудудидаги номлари ўзгартирилаётган маҳалла фуқаролари йиғинлари рўйхати 3-иловага мувофиқ;

туман ҳудудидаги номсиз кўчаларга берилган янги номлар рўйхати 4-иловага мувофиқ тасдиқлансин.

4. Туман статистика бўлими (Х. Шокиров), Жиззах вилояти «Ермулккадастр» давлат корхонаси Шароф Рашидов тумани филиали (Н. Имомқулов), туман архитектура ва қурилиш бўлими (Ж. Комилов) ҳамда тегишли мутасадди ва давлат органларига амалдаги тартибда ном берилган ва номлари ўзгартирилган маҳалла фуқаролар йиғини, аҳоли пунктлари ва кўчаларнинг таркибий қисмларини давлат рўйхатидан ўтказиш ва электрон базасини шакллантириш, иш юритиш ҳужжатларига ўзгартириш киритиш билан боғлиқ барча тадбирларни амалга ошириш вазифаси юклатилсин.

5. Туман Ички ишлар бўлими (Ў. Асқаров) ном берилган ва номлари ўзгартирилган ҳудудларда аҳолининг фуқаролик паспортларига тегишли ўзгартиришлар киритиш ишларини ташкилий равишда амалга оширсин.

6. Географик объектларга ном бериш ва уларнинг номларини ўзгартириш бўйича туман комиссияси (О. Мелибоев, Н. Раҳмонқулов) ном берилган ва номи ўзгартирилган маҳалла фуқаролар йиғини, аҳоли пунктлари ва кўчаларга уларнинг номлари ёзилган металл кўрсаткич ва белгилар, пешлавҳалар босқичма-босқич ўрнатилишини таъминласин.

7. Белгилансинки, географик объектларнинг номлари соҳасидаги ишларини молиялаштириш маҳаллий бюджет маблағлари ва қонун ҳужжатларида тақиқланмаган бошқа манбалар ҳисобидан амалга оширилади.

8. «Жиззах овози» газетаси (А. Мустофоқулов) ушбу қарор газета саҳифасида ёритилсин.

9. Мазкур қарорнинг ижросини таъминлаш халқ депутатлари туман Кенгашининг ижтимоий-маданий соҳани ривожлантириш, оила, хотин-қизлар ва ёшлар масалалари доимий комиссияси (Г. Мамарахимова)га ва қарор ижросини таъминлаш географик объектларга ном бериш ва уларнинг номларини ўзгартириш масалалари бўйича туман комиссияси (О. Мелибоев) зиммасига юклатилсин.

10. Ушбу қарор расмий эълон қилинган кундан эътиборан кучга киради.