Халқаро терроризмга қарши курашиш самарадорлигини ошириш ҳамда МДХ давлат раҳбарлари Кенгашининг 2003 йил 19 сентябрдаги «МДҲ қатнашчилари бўлган давлатлар томонидан «Игла» ва «Стрела» русумли кўчма зенит ракета комплексларини халқаро етказишни назорат қилиш бўйича чора-тадбирлар тўғрисида»ги қарорини амалга ошириш мақсадида, шунингдек, «Ўзбекистон Республикасининг халқаро шартномалари тўғрисида»ги Қонуннинг 20-моддасига мувофиқ:

1. 2007 йил 18 май куни (Москва шаҳри) томонлар имзолаган Ўзбекистон Республикаси Ҳукумати билан Россия Федерацияси Ҳукумати ўртасида кўчма зенит ракета комплексларини узатиш (олиш) тўғрисида маълумот алмашиш тўғрисидаги битим тасдиқлансин.

2. Ўзбекистон Республикаси Ташқи ишлар вазирлиги ушбу қарорнинг 1-бандида кўрсатилган Битимнинг кучга кириши учун зарур бўлган давлат ички тартиб-таомиллар бажарилганлиги тўғрисида Россия Федерациясига тегишли билдиришномани юборсин.

3. Вазирлар Маҳкамаси (Ш. Мирзиёев), Мудофаа вазирлиги (Р. Мирзаев), Ташқи ишлар вазирлиги (В. Норов), Адлия вазирлиги (Р. Мухитдинов) Битим кучга киргандан кейин белгиланган тартибда Ўзбекистон Республикасининг мажбуриятлари бажарилиши устидан назоратни таъминласин.

4. Мазкур қарорнинг ижросини назорат қилиш Ўзбекистон Республикасининг Бош вазири Ш. Мирзиёев ҳамда Ўзбекистон Республикаси Президенти ҳузуридаги Миллий хавфсизлик кенгаши котиби М. Атаев зиммасига юклансин.