Мустақил Давлатлар Ҳамдўстлигига аъзо давлатлар номидан, бундан кейин Томонлар деб юритилувчи ҳукуматлар,

дўстлик муносабатларини сақлаш ва чуқурлаштириш омили сифатида ёшлар ҳамкорлигини ривожлантириш учун қулай шарт-шароитлар яратиш истагини билдирган ҳолда,

жамият тараққиётининг ҳозирги босқичида ёшлар ролининг ортиб бораётганлигини ҳисобга олган ҳолда,

тенглик тамойиллари асосида ёшларнинг халқаро ҳамкорлигини кенгайтириш ва такомиллаштириш ҳамда шу мақсадда давлат органлари, ёшлар жамоат бирлашмалари ва ёшларга оид давлат сиёсатини амалга оширишда иштирок этувчи бошқа ташкилотлар (бирлашмалар) ўртасида кенг ўзаро алоқани ўрнатиш истагини тасдиқлаган ҳолда,

ёшлар билан ишлаш соҳасидаги ҳамкорлик халқлар ўртасидаги ўзаро тушуниш ва дўстликни мустаҳкамлашга, умуминсоний қадриятларни тасдиқлашга кўмаклашишга қаратилган, деб ҳисоблаган ҳолда,

қуйидагиларни келишиб олдилар:

Томонлар ёшларга оид давлат сиёсатини амалга оширадиган давлат органлари ва жамоатчилик ёшлар ташкилотлари (бирлашмалари) орқали ёшлар билан ишлаш соҳасидаги ҳамкорликни мустаҳкамлайди ва ривожлантиради, уларнинг ёшлар ҳамкорлигини фаоллаштиришга қаратилган ташаббусларини қўллаб-қувватлайди.

Томонлар ёшлар ҳамкорлигида устуворликларни аниқлаш ва ривожлантириш мақсадида давлат органлари ва ёшлар жамоат ташкилотлари (бирлашмалари) ўртасида мунтазам алоқаларни амалга ошириш учун қулай шарт-шароитлар яратади.

Ушбу Шартномани рўёбга чиқариш мақсадида Томонлар ўзаро манфаатдорликка асосланган давлатлараро дастурлар ва алоҳида лойиҳалар ишлаб чиқади ва уларни амалга оширади.

Томонлар қуйидаги йўналишларда ўзаро ёрдам кўрсатадилар:

ёшлар билан ишлаш соҳасида профессионал кадрлар тайёрлаш;

ёшларга оид давлат сиёсатини амалга ошириш ва ёшлар ташаббусларини қўллаб-қувватлаш билан шуғулланувчи давлат органлари, ёшлар жамоат ташкилотлари ва бошқа ташкилот ва бирлашмаларнинг илмий, маълумот-ахборот ва услубий материаллар, иш тажрибаси билан алмашиш;

ёшлар сиёсати ва ёшлар ҳамкорлигининг турли масалалари бўйича ҳамкорликдаги тадқиқотлар ва тадбирлар ўтказиш.

Томонлар ёшлар билан ишлаш соҳасида статистик ва бошқа маълумотлар алмашишга кўмаклашади, шу жумладан:

ўз давлатларида ёшлар сиёсатини тартибга солувчи қонун ҳужжатлари ва бошқа меъёрий ҳужжатлар тўғрисида;

ёшлар сиёсатини амалга ошириш тўғрисида.

Томонлар халқаро ҳамкорлик масалаларида, шу жумладан Томонлар вакилларининг халқаро ёшлар ташкилотлари фаолиятида иштирок этишида ўзаро ёрдам кўрсатадилар.

Томонларнинг ушбу Шартномани амалга ошириш доирасидаги ҳамкорлиги икки томонлама ва кўп томонлама шартномалар асосида амалга оширилади.

Ушбу Шартномани амалга ошириш мақсадида Томонлар Мустақил Давлатлар Ҳамдўстлигига аъзо давлатларнинг Ёшлар ишлари бўйича Кенгашини (бундан буён матнда Кенгаш деб юритилади) тузадилар. Кенгаш ушбу Шартноманинг ажралмас қисми бўлган Низомга мувофиқ фаолият юритади.

Ушбу Шартномани талқин қилиш ва амалга ошириш жараёнида низолар келиб чиқса, улар Томонлар ўртасида музокаралар ёки маслаҳатлашувлар йўли билан ҳал қилинади.

Ушбу Шартнома, уни имзолаган Томонлар унинг кучга кириши учун зарур бўлган давлат ички тартиб-қоидаларининг бажарилганлиги тўғрисида учинчи ёзма хабарномани депозитарийга топширган кундан бошлаб кучга киради.

Ўз ички тартиб-қоидаларини кейинроқ амалга оширган Томонлар учун, Шартнома тегишли билдиришнома депозитарийга юборилган кундан бошлаб кучга киради.

Ушбу Шартномага Томонларнинг ўзаро келишувига биноан ўзгартириш ва қўшимчалар киритилиши мумкин бўлиб, улар ушбу Шартноманинг 10-моддасида белгиланган тартибда кучга киради ва ушбу Шартноманинг ажралмас қисми бўлган алоҳида протоколлар билан расмийлаштирилади.

Ушбу Шартнома унинг мақсадлари ва тамойилларига шерик бўлган ва ушбу Шартномадан келиб чиқадиган мажбуриятларни олишга тайёр бўлган бошқа давлатларнинг қўшилиши учун очиқдир. Қўшилган давлат учун, қўшилиш ҳақидаги ҳужжатлар депозитарийга топширилган кундан эътиборан Шартнома кучга киради.

Мустақил Давлатлар Ҳамдўстлигига аъзо бўлмаган давлатлар учун қўшилиш барча Томонларнинг розилигига кўра мазкур қўшилиш тўғрисидаги ҳужжатларни депозитарийга топшириш йўли билан амалга оширилади. Қўшилиш, мазкур қўшилишга розилик ҳақидаги охирги хабарнома депозитарийга топширилган кундан бошлаб кучга кирган ҳисобланади.

Ушбу шартнома кучга кирган кундан бошлаб 5 йил давомида амал қилади. Ушбу муддат тугагандан сўнг, Томонлар бошқача қарор қилмаса, шартнома автоматик равишда ҳар беш йиллик муддатга узайтирилади.

Томонларнинг ҳар бири ушбу Шартномадан мўлжалдаги чиқиш санасидан камида 6 ой олдин депозитарийга ёзма хабарнома юбориш орқали чиқиб кетиши мумкин.

2005 йил 25 ноябрда Москва шаҳрида рус тилида битта асл нусхада тузилган. Асл нусхаси Мустақил Давлатлар Ҳамдўстлиги Ижроия Қўмитасида сақланади, у тасдиқланган нусхасини ушбу Шартномани имзолаган ҳар бир давлатга юборади.

1.1. Мустақил Давлатлар Ҳамдўстлигига аъзо давлатларнинг Ёшлар ишлари бўйича кенгаши (бундан кейин матнда Кенгаш деб юритилади) Мустақил Давлатлар Ҳамдўстлигига аъзо давлатларнинг Ёшлар билан ишлаш соҳасидаги ҳамкорлик тўғрисидаги Шартномасини (бундан буён Шартнома деб юритилади) амалга ошириш учун тузилган.

1.2. Кенгаш фаолияти МДҲ Давлат раҳбарлари кенгаши, Ҳукумат раҳбарлари кенгаши, Ташқи ишлар вазирлари кенгаши ва Иқтисодий кенгаш томонидан қабул қилинган қарорларнинг бажарилишини ташкил этиш ва мувофиқлаштиришга йўналтирилган.

1.3. Кенгаш МДҲнинг тармоқлараро ҳамкорлик органи бўлиб, ёшлар сиёсати соҳасидаги ўзаро ҳамкорликни мувофиқлаштиришни таъминлаш учун мўлжалланган.

1.4. Кенгаш ўз фаолиятида Мустақил Давлатлар Ҳамдўстлигининг Уставига, асосий халқаро шартномаларга, шу жумладан Мустақил Давлатлар Ҳамдўстлиги доирасида амалда бўлган шартномаларга, МДҲ Давлат раҳбарлари кенгашига, Ҳукумат раҳбарлари кенгашига, Ташқи ишлар вазирлари кенгашига, Иқтисодий кенгашга, шунингдек ушбу Низомга асосланади.

Кенгаш ўз фаолиятида МДҲ Ҳукумат раҳбарлари кенгашига ҳисобдор ҳисобланади.

Кенгаш иши тўғрисидаги ҳисобот МДҲ Давлат раҳбарлари кенгаши, Ҳукумат раҳбарлари кенгаши, Ташқи ишлар вазирлари кенгаши, Иқтисодий кенгаш, Ҳамдўстликка аъзо давлатларнинг доимий вакиллари кенгаши, Ҳамдўстликнинг устав ва бошқа органлари, шунингдек, МДҲ Иқтисодий кенгаши ҳузуридаги Иқтисодий масалалар бўйича комиссия йиғилишларида белгиланган тартибда кўриб чиқилади.

1.5. Кенгаш котибиятининг функциялари МДҲ Ижроия қўмитасининг таркибий бўлинмаси билан биргаликда Кенгашга раислик қилувчи МДҲга аъзо давлатнинг давлат органига юклатилади.

Кенгаш котибияти раҳбари Кенгашда раислик қилувчи давлатнинг давлат ҳокимияти вакили, котибият раҳбари ўринбосари эса МДҲ Ижроия қўмитаси вакили ҳисобланади. Котибият Кенгаш фаолиятининг ташкилий-техник ва ахборот таъминотини амалга оширади.

1.6. Кенгашнинг ишчи тили — рус тили.

1.7. Кенгаш ҳар йили ўз фаолияти тўғрисидаги ахборотни МДҲ Ижроия қўмитасига тақдим этади.

1.8. Кенгаш ўз ишини ўзи ишлаб чиққан ва тасдиқлаган режалар асосида ташкиллаштиради.

2. Кенгашнинг функцияларига қуйидагилар киради:

2.1. Ушбу шартномани амалга ошириш билан боғлиқ масалаларни кўриб чиқиш.

2.2. Ёшлар билан ишлаш соҳасида ҳамкорликни ривожлантириш.

2.3. Ёшлар билан ишлаш соҳасидаги муаммоларни ўрганиш ва муҳокама қилиш ҳамда улар бўйича тавсиялар ишлаб чиқиш.

2.4. Ёшлар билан ишлаш соҳасида ҳамкорлик тўғрисидаги кўп томонлама ҳужжатларни ишлаб чиқиш, шу жумладан уларни белгиланган тартибда Ҳамдўстлик устав органларининг кўриб чиқиши учун тақдим этиш, шунингдек уларнинг бажарилишига кўмаклашиш.

2.5. Миллий ёшлар сиёсати дастурларини ишлаб чиқиш ва амалга оширишда кўмаклашиш.

2.6. Ёшлар билан ишлаш соҳасидаги МДҲга аъзо давлатлар, бошқа давлатлар ва халқаро ташкилотларнинг тажрибасини ўрганиш ва умумлаштириш.

2.7. Ёшлар билан ишлаш соҳасида мутахассис кадрларни тайёрлаш, алмашиш ва малакасини ошириш бўйича ушбу Шартномага аъзо давлатлар фаолиятига кўмаклашиш.

3.1. Кенгаш Шартномага аъзо давлатлардан ҳар бирининг иккитадан ишончли вакилларидан тузилади. Шартномага аъзо давлатларнинг ишончли вакиллари тегишли давлат ҳокимияти органларининг раҳбарлари, шунингдек, ёшларга оид давлат сиёсатини амалга оширишда иштирок этувчи ёшлар жамоатчилик ва бошқа бирлашмаларнинг (ташкилотларнинг) вакиллари ҳисобланади.

Кенгаш аъзоларининг ўрнига бошқа шахслар Кенгаш мажлисига юборилганда, уларнинг ваколатлари тасдиқланиши керак.

Шартномага аъзо ҳар бир давлат Кенгашда битта овозга эга.

3.2. Кенгаш котибияти раҳбари, шунингдек МДҲ Ижроия қўмитасининг вакили Кенгаш таркибига маслаҳатчи овоз ҳуқуқи билан киради.

4.1. Кенгаш йиғилишлари заруратга қараб, лекин йилига камида икки марта ўтказилади ва агар Кенгаш аъзоларининг камида учдан икки қисми қатнашса, йиғилиш ваколатли ҳисобланади.

Кейинги йиғилишнинг жойи, вақти ва кун тартиби лойиҳаси Кенгаш аъзоларининг йиғилишида олдиндан келишилган ҳолда белгиланади.

Кенгашнинг навбатдан ташқари йиғилиши Кенгаш аъзоларининг камида учдан бир қисмининг розилиги билан Кенгашнинг бир ёки бир нечта аъзоларининг ташаббуси билан ўтказилади.

4.1¹. Кенгаш йиғилишларида, унинг қарори билан, МДҲ таркибига кирмайдиган, ёшлар билан ишлаш соҳасида фаолият олиб бораётган бошқа давлатларнинг вакиллари иштирок этишлари мумкин;

4.2. Кенгашга раислик қилиш Ҳамдўстликка аъзо давлатлар номларининг рус алифбоси тартиби бўйича навбат билан Шартномага аъзо бўлган ҳар бир давлат номидан унинг вакили томонидан бир йил муддат давомида амалга оширилади, ушбу муддат Кенгаш қарори билан яна бир йилга узайтирилиши мумкин.

Кенгашнинг олдинги ва кейинги раислари унинг ҳамраислари ҳисобланади. Кенгаш раиси йўқлигида унинг вазифалари ҳамраислардан бирига юклатилади.

4.3. Кенгаш қарорлари ушбу масалани муҳокама қилишда иштирок этаётган Шартномага аъзо давлатлар ишончли вакилларининг учдан икки қисми овози билан қабул қилинади. Зарур ҳолларда Кенгаш МДҲ ҳукуматлари раҳбарлари кенгаши кўриб чиқиши учун белгиланган тартибда таклифлар киритади.

Кенгаш қарорига рози бўлмаган аъзолар йиғилиш баённомасига киритиладиган алоҳида фикр билдиришлари мумкин.

Кенгашнинг ҳар қандай аъзоси у ёки бу масаладан манфаатдор эмаслиги ҳақида баёнот бериши мумкин, мазкур ҳолат қарор қабул қилишга, шунингдек келажакда унинг ушбу қарорга қўшилишига тўсиқ сифатида қаралмаслиги лозим.

Қарор раис томонидан имзоланадиган баённома билан расмийлаштирилади.

Кенгаш қарорлари тавсиявий характерга эга.

4.4. Кенгаш комиссиялар ва ишчи гуруҳлар тузиши мумкин.

4.5. Кенгаш йиғилишини ўтказишнинг ташкилий-техник таъминоти МДҲ Ижроия қўмитаси билан биргаликда Кенгаш йиғилишини ўтказадиган МДҲга аъзо давлат ҳудудида ёшлар билан ишлаш соҳасидаги давлат органи томонидан амалга оширилади.

4.6. Кенгаш йиғилишининг кун тартиби йиғилиш иштирокчиларига йиғилиш бошланишидан 15 кун олдиндан кечиктирмай юборилади.

4.7. Ҳужжатлар лойиҳаларига йиғилиш давомида киритилган таклиф ва ўзгартиришлар, қоида тариқасида, ёзма равишда тақдим этилади ва йиғилиш иштирокчиларига тарқатилади.

4.8. Кенгаш йиғилишларини ўтказишни молиялаштириш билан боғлиқ харажатлар МДҲга аъзо давлатнинг тегишли давлат органлари томонидан амалга оширилади. Кенгаш аъзолари ва йиғилиш қатнашчиларини хизмат сафарига юбориш харажатлари МДҲга аъзо давлатларнинг юборувчи давлат органлари ва ташкилотлари томонидан қопланади.

4.9. Кенгаш қарорларининг асл нусхалари, йиғилиш баённомалари ва бошқа ҳужжатлар МДҲ Ижроия қўмитасида сақланади.

7-модда қуйидаги таҳрирда қабул қилинади: «Ушбу Шартномани амалга ошириш учун Томонлар ўзаро икки томонлама ва кўп томонлама шартномалар тузишлари мумкин».