Қишлоқ хўжалигидаги иқтисодий ислоҳотларни янада чуқурлаштириш, сут секторини жадал ривожлантириш, фермер ва деҳқон хўжаликлари, сут маҳсулотларини қайта ишлаш корхоналарининг молиявий барқарорлигини ошириш, шунингдек, халқаро қишлоқ хўжалигини ривожлантириш жамғармаси билан ҳамкорликни кенгайтириш мақсадида:

1. Қуйидагилар инобатга олинсин:

2015 йил 15 сентябрда Халқаро қишлоқ хўжалигини ривожлантириш жамғармаси (кейинги ўринларда — ХҚХРЖ) Бошқарув кенгаши Ўзбекистон Республикасига 17,0 миллион махсус қарз олиш ҳуқуқлари (кейинги ўринларда — МҚОҲ), яъни 23,87 миллион АҚШ долларига эквивалент миқдорда кредит ажратишни маъқуллаганлиги, ушбу кредитнинг қайтариш муддати 25 йил бўлиб, шундан 5 йили имтиёзли давр ҳисобланади. Шунингдек, Ўзбекистоннинг сут саноатида қўшилган қиймат занжирини ривожлантириш лойиҳаси (кейинги ўринларда — лойиҳа) учун 0,5 миллион МҚОҲ, яъни 0,7 миллион АҚШ долларига эквивалент грант ажратиш ҳам тасдиқланди;

Лойиҳанинг умумий қиймати 40,567 миллион АҚШ долларига эквивалент бўлиб, шундан Ўзбекистон Республикасининг лойиҳа амалга оширилишига қўшган ҳиссаси 15,99 миллион АҚШ долларига эквивалентни ташкил этади. Бунга қуйидагилар киради: 0,430 миллион АҚШ доллари — солиқ ва бошқа мажбурий тўловлар бўйича берилган имтиёзлар ҳамда бошқа харажатлар, 8,32 миллион АҚШ доллари — лойиҳа иштирокчилари (бенефицийарлари) томонидан қўшилган ҳисса ва 7,24 миллион АҚШ доллари — лойиҳа иштирокчиси бўлган тижорат банкларининг улуши;

лойиҳани амалга ошириш муддати 6 йил (2017-2023 йил 31 мартгача) этиб белгиланди.

2. Белгилансинки:

лойиҳа Жиззах ва Қашқадарё вилоятларида амалга оширилади;

лойиҳани ўз вақтида ва самарали амалга ошириш учун масъул ижро этувчи орган Ўзбекистон Республикаси Ветеринария ва чорвачиликни ривожлантириш Давлат қўмитаси ҳисобланади;

лойиҳани амалга оширишни мувофиқлаштириш ва бошқариш, шунингдек, лойиҳани амалга ошириш даврида мониторинг ва ҳисоботларни юритиш функциялари Ўзбекистон Республикаси Ветеринария ва чорвачиликни ривожлантириш Давлат қўмитасига юклатилади;

Кредит линиясини бошқариш, ХҚХРЖ кредити маблағларини ўзлаштириш ва мақсадли ишлатиш, шунингдек, сублойиҳаларнинг мониторинги ва ҳисобот юритиш бўйича масъулият иштирокчи тижорат банкларига юклатилади.

3. Қуйидагилар:

«Ўзбекистон Республикаси сут секторида қўшилган қиймат занжирини ривожлантириш» лойиҳасининг асосий техник-иқтисодий параметрлари 1-иловага* мувофиқ;

«Ўзбекистон Республикаси сут секторида қўшилган қиймат занжирини ривожлантириш» лойиҳаси бўйича Халқаро қишлоқ хўжалигини ривожлантириш жамғармасининг кредитга хизмат кўрсатиш схемаси 2-иловага* мувофиқ;

«Ўзбекистон Республикаси сут секторида қўшилган қиймат занжирини ривожлантириш» лойиҳаси доирасида қишлоқ хўжалигини ривожлантириш халқаро жамғармасининг қарзини тўлаш, унга бўлган фоизлар ва комиссияларни тўлаш прогноз жадвали 3-иловага* мувофиқ тасдиқлансин.

4. Ўзбекистон Республикаси Қишлоқ хўжалиги вазирлиги Молия вазирлиги ва Марказий банк билан биргаликда бир ой муддатда лойиҳа доирасида ХҚХРЖ кредитидан фойдаланиш тартиби тўғрисидаги низомни тасдиқласин, унда кредитни қайта молиялаштириш тартиби, муддатлари ва шартлари, сублойиҳаларни танлаш мезонлари ва уларни баҳолаш тартиблари белгилансин.

5. Ўзбекистон Республикаси Ветеринария ва чорвачиликни ривожлантириш Давлат қўмитаси раиси, Жиззах ва Қашқадарё вилоятлари ҳокимлари зиммасига лойиҳа тадбирларини самарали амалга ошириш учун зарур шарт-шароитларни таъминлаш, ўз вақтида тайёрланишни ташкил этиш ҳамда Ўзбекистон Республикаси ХҚХРЖ тартиб-таомиллари ва қонун ҳужжатлари талабларига мувофиқ зарур ҳисобот ва ҳужжатларни тақдим этиш учун шахсий жавобгарлик юклансин.

6. Ўзбекистон Республикаси молия вазирига Ўзбекистон Республикаси номидан қуйидагиларга имзо қўйиш ваколати берилсин:

ХҚХРЖ билан молиялаштириш шартномаси;

Ўзбекистон Республикаси Ветеринария ва чорвачиликни ривожлантириш Давлат қўмитаси ва иштирок этувчи тижорат банклари билан ХҚХРЖ қарзини қайта кредитлаш тўғрисидаги битим, шунингдек зарурат бўлганда унга тегишли ўзгартиришларга.

7. Ўзбекистон Республикаси Адлия вазирлиги белгиланган тартибда Ўзбекистон Республикаси ва ХҚХРЖ ўртасидаги қарз битими бўйича юридик хулоса тақдим этсин.

8. Қуйидагилар озод қилинсин:

ХҚХРЖ кредити ҳисобидан лойиҳа доирасида харид қилинадиган товарлар (ишлар, хизматлар) ва транспорт воситалари божхона тўловларидан (божхона йиғимларидан ташқари), қўшилган қиймат солиғидан, мажбурий ажратмалар ва давлат мақсадли фондларига йиғимлардан;

Ўзбекистон Республикаси норезидент жисмоний шахсларнинг жисмоний шахслардан олинадиган даромад солиғидан олинадиган даромадлари.

Белгилансинки, ушбу бандда назарда тутилган имтиёзларнинг амал қилиши фермер хўжаликлари ва қишлоқ хўжалиги корхоналари томонидан лойиҳанинг қайта молиялаштириладиган маблағлари ҳисобидан сотиб олинадиган товарларга (ишларга, хизматларга) ҳам татбиқ этилади.

Ушбу имтиёзлар тақдим этилиши натижасида озод бўлган маблағлар Ўзбекистон Республикасининг лойиҳа амалга оширилишига қўшган ҳиссаси сифатида ҳисобланади.

9. Ўзбекистон Республикаси Ташқи ишлар вазирлиги Ветеринария ва чорвачиликни ривожлантириш Давлат қўмитасининг буюртманомалари бўйича лойиҳани амалга оширишда иштирок этаётган хорижий мутахассисларга кириш визалари консуллик ва бошқа йиғимлар ундирилмасдан расмийлаштирилишини таъминласин.

10. Ўзбекистон Республикаси Ички ишлар вазирлиги Ветеринария ва чорвачиликни ривожлантириш Давлат қўмитасининг буюртманомалари бўйича лойиҳани амалга оширишда иштирок этаётган хорижий мутахассисларнинг давлат божи ундирилмасдан кўп марталик визалар берилиши ва узайтирилишини, шунингдек Ўзбекистон Республикасида вақтинча рўйхатдан ўтказилиши ва узайтирилишини таъминласин.

11. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов зиммасига юклансин.