Пахта тозалаш саноати олдида турган вазифалар унинг самарадорлигини сифат жиҳатидан ошириш, ишлаб чиқариш қувватларини инновацион янгилаш, техник ва технологик модернизация қилиш, тармоқ рақобатбардошлигини мустаҳкамлаш, замонавий пахтачилик ва тўқимачилик кластерларини яратиш, илғор технологияларни кенг жорий этиш зарурати билан белгиланади ва шундан келиб чиқади.

Маҳаллий пахта маҳсулотларининг рақобатбардошлигини таъминлашга қаратилган саноат ишлаб чиқариш қувватларини модернизация қилиш ва технологик янгилаш жараёнларининг самарадорлиги бевосита фан-техника тараққиётининг илғор ютуқлари, инновацион ишланмалар ва юқори технологияли «ноу-хау»ларни фаол ўзлаштиришга боғлиқ.

Пахта тозалаш саноатига инновацион технологияларни жорий этиш, идоралараро илмий-тадқиқот ва тажриба-конструкторлик ишларини мувофиқлаштириш, халқаро илмий-техникавий ҳамкорлик дастурларида иштирок этишни таъминлаш ва соҳа ходимларининг малакасини оширишни ташкил этиш масалалари «Ўзпахтасаноат» акциядорлик жамияти (кейинги ўринларда — «Ўзпахтасаноат» АЖ) таркибига кирувчи «Пахтасаноат илмий маркази» акциядорлик жамияти (кейинги ўринларда — «Пахтасаноат илмий маркази» АЖ) ваколатига киради.

«Пахтасаноат илмий маркази» АЖнинг кўп йиллик фаолияти давомида соҳада қўлланиладиган асосий технологиялар ва лаборатория жиҳозлари ишлаб чиқилиб, пахта тозалаш корхоналари фаолияти учун зарур ишлаб чиқариш ва норматив-методик асослар шакллантирилди.

Шу билан бирга, «Пахтасаноат Илмий маркази» АЖдаги ишларнинг ҳолатини ўрганиш натижалари кўплаб ҳал этилмаган муаммо ва камчиликлар тўпланиб қолганлигини кўрсатиб, унинг фаолиятини тубдан такомиллаштириш зарурлигини кўрсатади:

биринчидан, илмий тадқиқот ишларида фойдаланиладиган лаборатория ва назорат-ўлчов воситаларининг асосий қисми ўтган асрнинг 60-70 йилларида харид қилинган бўлиб, замонавий талаблар ва халқаро стандартларга жавоб бермайди;

иккинчидан, ишлаб чиқариш бўлинмаларининг технологик асбоб-ускуналари ва машиналари 50 йилдан ортиқ фаолият юритиб келган, маънавий ва жисмонан эскирган, техник имкониятлари ускуналарнинг юқори технологияли ва мураккаб экспериментал моделларини ишлаб чиқаришга имкон бермайди;

учинчидан, муҳим илмий йўналишларни амалга оширишда турғунлик кузатилмоқда, малакали илмий кадрлар чиқиб кетмоқда. Молиялаштиришдаги тизимли муаммолар, моддий-техника ресурсларининг тақчиллиги, тўлақонли илмий тадқиқотлар олиб бориш учун шарт-шароитларнинг етарли эмаслиги кейинги йилларда муҳим илмий натижаларнинг йўқлигига, янги техник ечимлар ва ишланмаларнинг етарлича тезкорлик билан жорий этилмаганига олиб келди;

тўртинчидан, ихтисослашган ташкилотлар билан идоралараро ҳамкорлик даражаси пастлигича қолмоқда; инновацион технологиялар ва қурилмаларни яратиш соҳасида халқаро илмий марказлар билан ҳамкорликда иш деярли йўқ;

бешинчидан, кадрлар малакасини оширишнинг амалдаги тизими эскирган таълим стандартлари ва усулларига, «Пахтасаноат Илмий маркази» АЖ ўқув-ахборот ресурс марказлари ишини ташкил этишга ёндашувларга асосланади, соҳа ходимларини ишдан тўхтовсиз интерфаол ўқитиш имкониятларини чеклайди.

«Пахтасаноат илмий маркази» АЖ фаолиятини тубдан такомиллаштириш, илмий салоҳиятидан самарали фойдаланиш учун зарур шарт-шароитларни яратиш, маҳаллий пахта маҳсулотлари сифати ва рақобатбардошлигини ошириш, шунингдек, Ўзбекистон Республикаси Президентининг 2017 йил 28 ноябрдаги «Пахтачилик тармоғини бошқариш тизимини тубдан такомиллаштириш чора-тадбирлари тўғрисида»ги ПҚ-3408-сон қарори ижросини самарали таъминлаш мақсадида:

1. «Пахтасаноат Илмий Маркази» АЖ фаолиятининг асосий йўналишлари этиб қуйидагилар белгилансин:

тармоқни ривожлантиришнинг долзарб илмий муаммоларини ҳал этиш, республика пахта тозалаш саноатида ягона давлат илмий-техника сиёсатини ишлаб чиқиш ва амалга оширишда иштирок этиш;

пахта хомашёсини бирламчи қайта ишлаш ва экиш чигитини тайёрлашни такомиллаштириш соҳасида илмий-техникавий ва инновацион фаолиятни амалга ошириш;

республикада илмий, лойиҳа-конструкторлик ва таълим ташкилотлари томонидан амалга оширилаётган илмий-тадқиқот ва тажриба-конструкторлик ишларини мувофиқлаштириш;

етакчи хорижий илмий-тадқиқот институтлари билан ҳамкорликда инновациялар ва технологиялар трансфери марказларини ташкил этиш, инновацион технологиялар ва қурилмаларни яратиш соҳасида хорижий ҳамкорлар билан биргаликдаги ишларни кенгайтириш;

пахта тозалаш саноатида маҳаллий илм-фанни талаб қилувчи, юқори маҳсулдор ва рақобатбардош технологик асбоб-ускуналарни яратиш ва жорий этиш доирасида илмий-тадқиқот ва тажриба-конструкторлик, тажриба-конструкторлик ишларини амалга ошириш, илмий тадқиқотлардан тайёр илмий-техника маҳсулотигача бўлган тўлиқ инновацион циклни амалга оширишни таъминлаш;

тегишли ўқув курслари ва семинарлар ўтказиш орқали соҳа мутахассисларини қайта тайёрлаш ва уларнинг малакасини оширишни ташкил этиш.

2. «Ўзпахтасаноат» АЖ томонидан ишлаб чиқилган:

«Пахтасаноат Илмий Маркази» АЖ ташкилий тузилмаси 1-иловага* мувофиқ;

«Пахтасаноат Илмий маркази» АЖ ижро аппарати тузилмаси 2-иловага* мувофиқ тасдиқлансин.

3. Қуйидагилар:

2018 — 2020 йилларда Ўзбекистон Республикасида пахта хомашёсини бирламчи қайта ишлаш техникаси ва технологиясини ривожлантириш бўйича тадбирлар дастури (кейинги ўринларда — Дастур) 3-иловага* мувофиқ;

Тажриба пахта тозалаш заводларида ишлаб чиқарилган пахта толасининг устама тўловидан улгуржи рўйхат нархигача бўлган маблағларни шакллантириш ва улардан фойдаланиш тартиби тўғрисидаги низом 4-иловага* мувофиқ тасдиқлансин.

Тасдиқланган Дастурни амалга ошириш бўйича ишларни мувофиқлаштириш «Ўзпахтасаноат» АЖга, уни амалга ошириш бўйича асосий ташкилотнинг ваколатлари ва функциялари ҳамда ихтисослаштирилган ташкилотлар билан ўзаро ҳамкорлик қилиш «Пахтасаноат илмий маркази» АЖ зиммасига юклансин.

4. «Пахтасаноат Илмий маркази» АЖ фаолиятини молиялаштириш манбалари сифатида мазкур қарор билан тасдиқланган Дастурни амалга ошириш учун пахта тозалаш тажриба корхоналари томонидан ишлаб чиқарилган пахта толасининг улгуржи нархига (ҚҚСсиз) 5 фоизли устама маблағлари, хўжалик фаолиятидан олинган маблағлар, Ўзбекистон Республикасининг Инновацион ривожланиш вазирлигининг грантлари, кадрлар тайёрлаш жамғармаси маблағлари, шунингдек қонунчилик ҳужжатларида тақиқланмаган бошқа манбалар белгилансин.

5. Ўзбекистон Республикаси Инновацион ривожланиш вазирлиги мазкур қарор билан тасдиқланган Дастурнинг устувор йўналишларини амалга оширишни жадаллаштиришга, Дастурда белгиланган фундаментал, амалий ва инновацион лойиҳаларни, кенг кўламли идоралараро ишларни белгиланган тартибда танлов асосида танлаш орқали давлат илмий-техника дастурларига босқичма-босқич киритилишини таъминлашга ҳар томонлама кўмаклашсин.

6. Мазкур қарорнинг ижросини назорат қилиш Ўзбекистон Республикаси Бош вазирининг ўринбосари — «Ўзагротехсаноатхолдинг» АЖ бошқаруви раиси Н.С. Отажонов ва «Ўзпахтасаноат» АЖ бошқаруви раиси А.И. Мақсудов зиммасига юклатилсин.