Германия Федерал президенти Ф.В. Штанмайернинг 2019 йил 27 — 29 май кунлари Ўзбекистон Республикасига расмий ташрифи Ўзбекистон Республикаси делегациясининг Германия Федератив Республикасига олий даражадаги ташрифи давомидаги учрашувлар ва музокараларнинг мантиқий давоми бўлди, Ўзбекистон-Германия ҳамкорлигини янада ривожлантириш ва мустаҳкамлашга янги туртки берди.

Дўстона ва конструктив муҳитда ўтган самарали музокаралар Ўзбекистон ва Германия ўртасидаги кўп қиррали ҳамкорликни чуқурлаштиришга бўлган ўзаро интилиш ва ишончнинг кучайганлигини яна бир бор тасдиқлади.

Сиёсий, савдо-иқтисодий, инвестициявий, молиявий-техник, маданий-гуманитар ва бошқа соҳаларда ўзаро ҳамкорликни кенгаштириш бўйича муҳим келишувларга эришилди.

Ўзбекистон Республикаси ҳамда Германия Федератив Республикаси ўртасида имзоланган битимлар ва эришилган келишувларни сўзсиз амалга оширишни таъминлаш мақсадида:

1. Ўзбекистон Республикаси Президентининг 2019 йил 1 февралдаги «Ўзбекистон Республикаси ва Германия Федератив Республикаси ўртасида кўп қиррали ҳамкорликни янада кенгайтириш чора-тадбирлари тўғрисида»ги ПҚ-4145-сон қарори 1 ва 2-иловаларга* мувофиқ 5 ва 6-иловалар билан тўлдирилсин.

2. Инвестиция ва технологиялар бўйича Ўзбекистон-Германия қўмитаси (Р. Гулямов) ушбу қарорнинг 2-иловасида* назарда тутилган Германия Федератив Республикаси билан молиявий-техник ва инвестициявий-технологик дастурлар ҳамда лойиҳаларнинг ўз вақтида ва тўлиқ амалга оширилиши бўйича вазирлик ва идоралар ишини самарали мувофиқлаштиришни, шунингдек, немис томони билан ҳамкорлик қилишни таъминласин.

3. Масъул ижрочилар — вазирликлар, идоралар, маҳаллий давлат ҳокимияти органлари ва бошқа ташкилотлар ҳисобот ойидан кейинги ойнинг 3 санасига қадар мазкур қарор билан тасдиқланган амалий чора-тадбирлар режалари ижроси бўйича маълумотларни тегишлича Ташқи ишлар вазирлигига — 1-иловага* мувофиқ, Иқтисодиёт ва саноат вазирлигига — 2-иловага* мувофиқ тақдим этишни таъминласин.

4. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Президенти Администрацияси раҳбари З.Ш. Низомиддинов, Ўзбекистон Республикаси Президенти ҳузуридаги Хавфсизлик кенгаши котиби В.В. Махмудов ва Ўзбекистон Республикаси Ҳисоб палатаси раисининг ўринбосари М.Р. Абдуллаев зиммасига юклансин.